HMOTAOPAZY 10
10
Pity nata Kawnilia
1Kaisaria liata Kawnilia ama tahpa chyhsa pakha y ta. Ano cha Rawma pheisaih Itali py ama tahpa liata pheisaih za kha hyutuhpa a châ. 2Kawnilia cha Khazohpa a pachâpa chyhsa châ ta, a chhôhkha zydua chhao Khazohpa a chipa châ ei ta, chyhsa rietheipazy riapha ngaitapa ta baona a pie tyhpa châ ta, Khazohpa lâ thlah khâ a chhâ tyhpa a châ. 3Zâlâ dawh thôh rachhôhpa liata, aluahna sia ngaitapa hmô ta. Khazohpa vâlyuhchâpa a o liata a vaw ngia ta, “Kawnilia,” vaw tah ta. 4Kawnilia ta ano cha kei moh ta, chi ngaita ta, a hnohta, “Abeipa, khâpa maw?” tah ta. Vâlyuhchâpa ta a hnohta, “Na thlahchhânazy nata na hmopiepazy avâ lâ kiah ta, Khazohpa ta a pahno thlâh haw. 5Tahmâ Zôpâ khih lâ chyhsa tuah la, chyhsa pakha Saimaw, Pity ama tahpa kei padysa mah y. 6Savo taotuhpa Saimaw o liata tlô ta, a o cha tilaipi kiah liata a y,” tah ta. 7Bie a chhotuhpa vâlyuhchâpa a sie nahta, Kawnilia cha a chakaotuhpazy hry liata chyhsa pano nata a vaituhpa pheisaihzy hry liata Khazohpa a pachâpa pheisaih pakha aw ta. 8Bie zydua ama hnohta a chho khai nahta, âmo cha Zôpâ khih lâ tuah ta.
Pity ta aluahna a hmô
9A mylâ ta, Kawnilia tuapa chyhsazy cha sie ei ta, khihpi ama tlô chy ta, Pity cha nohchhô locho ta thlahchhâ awpa ta vâphuh lâ kiah ta. 10A nodi kaw ta, pati nie khoh ta, a nie awpa ama taopa hai nota, aluahna hmô ta. 11Avâ a vaw pahy ta, poh lai ngaitapa a lyupa, ki palih ta buhpa alei lâ zâ pathliahpa hmô ta. 12A chhôh liata phei palih a hneipa râhsa to, alyhpasa to nata avâ pavaw to y ei ta. 13Ao vaw pua ta, a hnohta, “Pity, thyu la, thie la, nie teh,” tah ta. 14Châhrasala Pity ta, “Abeipa, châ vei, ânapa nata pathaih leipa khâpa hmah nie beih va na,” tah ta. 15A ei nona ta ao vaw pua heih ta, “Khazohpa ta a pathaisa hapa cha, nâma ta âna tah khah y,” tah ta. 16Cha hawhna chata ei thôh vaw y ta, cha hmo cha avâ lâ chalopa ta y ha ta.
17Pity ta aluahna a hmôpa cha a pachâ nawpa pahno leipa ta, nôpopa ta a y hai nota, Kawnilia vaw tuapa chyhsazy ta Saimaw o hiahripa ta, ochhi thaby liata a vaw duah ei ta, 18cha liata Saimaw Pity a tlô ma, tahpa hiahri ei ta. 19Pity cha aluahna kyh a pachâ hai nota, Thlahpa ta a hnohta, “Chyhsa pathôh ta ama cha tlua. 20Thyu la, chô la, noraih leipa ta âmo pazi mah y, keima vaw tuapa ama châ,” tah ta. 21Chatanachata Pity cha chyhsazy yna lâ za chô ta, ama hnohta, “Nama tluapa cha kei he ei châ. Khâpa ma namâ vyna chhâpa a châ?” tah ta. 22Âmo ta, “Vâlyuhchâpa pathaihpa ta Kawnilia hnohta a luah ta, nâ cha vaw padysa ta, na biereipa a o liata nathlie awpa ta a chho. Ano cha pheisaih za kha hyutuhpa châ ta, chyhsa siapa nata Khazohpa a chipa, Zu phopi zydua ta ama reithaipa a châ,” tah ei ta. 23Âmo cha aw ta, a o liata patlôsa ta.
A mylâ ta Pity cha thyu ta, ama hnohta sie ta, Zôpâ khih liata unawh thokha chhao a hnohta sie hra ei ta. 24A hânoh ta Kaisaria khih cha a ngia ei ta. Kawnilia cha a sanawh chhôhkha nata a viasa phapazy awpakhy ta, âmo cha vaw ydy ei ta. 25Pity cha o â ngia chy ta, Kawnilia ta vaw dy ta, a phei thaby liata pao ta, a chhy ta. 26Pity ta ano cha pathyu ta, “A duah teh, kei chhao nâ hawhta chyhsapa ei châ,” tah ta. 27Pity cha Kawnilia bie a chhona chôta o chhôh lâ a ngia ta, chyhsa hluhpi a ypakhypazy cha hmô ta. 28Ama hnohta, “Zu chyhsa châta chihropa chyhsa a pahlaopa nata a o liata chareipa cha ânapa hmo a chânazie nâmo chhao ta nama pahno. Châhrasala ahy hmah ânapa nata pathaih leipa ei tah awpa a châ leizie Khazohpa ta eina pahmôsa. 29Chavâta eina vaw padysapa chi cha, reina hnei leipa ta a vypa ei châ. Cha hiahri tua ei sah la, khâpa vâta ma eina vaw padysa ei chi?” tah ta. 30Kawnilia ta, “Noh palih a khô hapa liana khata, tahmâ daihti hawhpa taih he thlahchhâpa ta y na ta, zâlâ dawh thôhpa ta ei o liata thlah ei chhâ hai nota, chyhsa pakha poh diehpa a bupa ta ei hmiakô liata a vaw duah ta, 31‘Kawnilia, na thlahchhâna kha theipa châ ta, na hmopiepazy chhao Khazohpa ta â thei. 32Chavâta Zôpâ khih lâ chyhsa tuah la, Saimaw Pity ama tahpa kei padysa mah y. Ano cha tilaipi kiah liata savo taotuhpa Saimaw o liata a tlô,’ tah ta. 33Chavâta thlai cha vaw padysa na ta, zawh a ngiah chi ta, nâ vy theipa he a lypa a châ kaw na. Abeipa ta bie a cha piepa zydua cha nathlie awpa ta, eima zydua heta Khazohpa hmiakô liata tahmâ eimâ vaw hmaoh,” tah ta.
Zenitaizy ta thâtihpha ama thei
34 #
Ryhpa 10.17
Pity cha bie reih ta, “Khazohpa ta chyhsa khokhei eihpa a hnei leizie a siapa ta ei pahno haw. 35Phopi to hry liata ahy rai ano a chipa nata hmo dopa a taopa maih cha Khazohpa ta â ly khai ei. 36Khazohpa ta Izarei sawzy hnohta bie vaw tlôkhei ta, Zisu Krista hmâpa ta thlalôhna thâtihpha cha ama hnohta vaw tlôkhei tlai ta, châhrasala Zisu cha ato zydua Beipa a châ. 37Zawhâna ta bâtina bie a chho khai nahta, Kâlili râh tawhta a thaopa ta, Zudia râh zydua liata hmo a tlôpa kyh kha nâmo chhao ta nama pahno. 38Khazohpa ta Nâzari Zisu kha Thlahpa Pathaihpa nata hmotaotheina ta sathawthu ta, Khazohpa a hnohta a ypa vâta, hmopha taopa ta râh chahryh ta, ahripa taolapa zydua a patlâh lymâ. 39Keimo he Zu khitawzy liata nata Zerusale khihpi liata Zisu hmotaopa zydua a pahnotuhpa eima châ. Ano cha tho liata pangiehpa ta thie ei ta. 40Châhrasala Khazohpa ta ano cha, a noh thôhna noh ta pathyu ta, hmô theipa ta a paluahsa. 41Chyhsa zydua hnohta a luah leipa ta, ano pahnokheituhpa châ awpa ta Khazohpa ta a raopa, athihpa hry tawhta a thyuheih tawhta a hnohta nie ta a dohpa, keimo hnoh deita ta â luah. 42Ano cha athihpa nata ahrohpa pachia awpa ta Khazohpa ta a raopa a châzie a duakheipa ta, chyhsazy hnohta chho awpa ta bie miah a pie. 43Hrohsopa zydua chhao ta, ahy rai ano a ngiapâpa maih cha, ano moh ta moleinazy a ngiahthaipa ama châ aw, tahpa ta ama vaw pahnokhei chhieliepa kha a châ,” tah ta.
Zenitaizy Thlahpa Pathaihpa ama to
44Pity ta cha biezy cha a rei hai nota, bie a theituhpa zydua chô liata Thlahpa Pathaihpa vaw tlô ta. 45Chopawtaipa sahlao hry liata Pity a vaw zipa ngiapâtuhpazy cha, Zenitaizy chô lia taihta Thlahpa Pathaihpa hmopiepa hrypa a châpa ama hmô nahta, ama noâh ngaita ta. 46Reih thei leipazy ta bie reih ei ta, Khazohpa ama reithaipa vâta ama noâh ngaita ta. Pity ta, 47“Keimo eima hneipa hawhta Thlahpa Pathaihpa a hneipa chyhsazy he ti ta bâti ama châ lei nawpa ta, ahy a pakhâ thei aw?” tah ta. 48Chatanachata Zisu Krista moh ta bâti châ awpa ta biepie ta. Cha khai tawhta, noh khazie tlyma châh chy awpa ta a haw ei ta.
Tans Gekies:
HMOTAOPAZY 10: MARVBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The Bible Society of India
© 2023, Used by permission. All rights reserved.
