Jɔn 21

Yezu veere o tete de o kwaga tɔgena

1Konto kwaga ne Yezu déem daa ma jwoori o veere o tete de o tɔgena bam Tiberia naneo kom#21:1 Tiberia ye Galili naneo kom yere dedwoŋi. ni ne. O na ke tei to mo tento: 2Simon Piita déem wora, de Tomas wolo ba na bwoi we ‘Yeywɛ’ to. Natanayel de maa wora, o na nwoŋi Galili teo Kana to, dedaane Zebedi bia bam, de Yezu kwaga tɔgena badwonna balei. Banto bam maama maa wo daane. 3Simon Piita ma ta de o dwonna bam o we, o maa vei se o ja ywona mo. Ba ma ta ded‑o ba we, “Dé wó tɔge de nmo dé vo.” Ba ma zaŋe ba vo ba zo ba nabworo kom. Tete dem konto ne ba ma kwaane se ba ja ywona, ye ba wo nɛ kolokolo ba ja.

4Tega na wora ka poore to, Yezu maa zege naneo kom ni ne, ye ba wo lɔre‑o. 5O ma bwoŋi-ba o we, “A badwonna bam, abam wo jaane ywona na?” Ba ma leiri‑o ba we, “Dé wo nɛ kolokolo.”

6O laam ma ta de-ba o we, “Nam de-na á bora kam nabworo kom jazem seeni, se á wó ja.” Ba ma seene ba ke konto, ye ba daa ware se ba vaŋe bora kam ba de nabworo kom wone, ywona yam na tiini ya daga to ŋwaane. 7Yezu kwaga tɔgeno wolo o na swoi to ma ta de Piita o we, “Debam Teiru wom mo.”

Simon Piita na lɔre we ko ye ba Teiru wom konto to, o ma kwei o gɔrɔ kolo o ya na le to o ma kwoli o tete. O ma faŋe o chu na bam wone. 8Kwaga tɔgena badaara bam ma ja nabworo kom ba ba ba yi na bam ni, ye ba vaŋe bora kam de ka ywona yam ba woli da. Ba ya dae yiga yiga de buburu kom, nenɛɛne naba-laara bi mo tei.#Luka 5:4-7 9Ba na bɛ bubɛ dem to, ba ma na min-chala na wora, ye ywona wo ya baŋa ne. Bworobworo de maa wora. 10Yezu ma ta de-ba o we, “Twori-na ywona yalo á na jaane leile to yadaara á ja á ba.”

11Simon Piita laam ma vo o zo nabworo kom wo o vaŋe bora kam o tuuri o de tega ne. Ka su de ywon-kamuna yerane mo, ya maama ye bi de finnu-yatɔ (153). De konto de, ya wo pɛ se bora kam kaare. 12Yezu ma ta de-ba o we, “Ba-na á saare á ni.” O kwaga tɔgena bam maama ma kɔre se ba bwei‑o ba nii wonto ye wɔ mo, kolo ŋwaane ba maŋe ba yei we ko ye ba Teiru wom mo. 13Yezu ma zaŋe o vo o kwei bworobworo kom o pa-ba, ye o daare o ke ywona yam de konto.

14Yezu na bi toone wone to, konto mo ke kuni betɔ o na veere o tete de o kwaga tɔgena bam to.

Yezu na ŋɔɔne de Piita tei to

15Ba na di ba ti to, Yezu laam ma ta de Simon Piita o we, “Jɔn bu Simon, nmo swoi amo n dwoi banto na?” O ma leiri o we, “Amo Teiru, ɛɛ, nmo yei we amo jege nmo swono.” Yezu ma ta ded‑o o we, “Nam ta‑n nii amo pipeili sem baŋa ne.”

16O ma jwoori o bwei Piita o ke belei o we, “Simon wolo na ye Jɔn bu to, nmo swoi amo na?” O ma leiri o we, “Amo Teiru, ɛɛ, nmo yei we amo jege nmo swono.” Yezu ma ta ded‑o o we, “Nam ta‑n nii amo pei sem baŋa ne.”

17O daa ma bwei Piita o ke kuni betɔ o we, “Simon wolo na ye Jɔn bu to, nmo jege amo swono na?” Piita wo ma chɔge de Yezu na bwei‑o o ke kuni betɔ o we, o jege o swono na to. O ma ta de Yezu o we, “Amo Teiru, nmo yei wonnu maama. Konto ŋwaane, nmo yei we amo jege nmo swono.” Yezu laam ma ta ded‑o o we, “Ta‑n nii amo pei sem baŋa ne.#1 Piita 5:2 18A tɛ nmo chega ŋwaane to, nmo déem na ye nɔn-doŋo to, nmo yeini n vɔ n gwaaro n tete ne mo lanyerane, ye n daare n vei n na lage mɛ to. Ko daare nmo nam ná kwe, n laam wó zeiŋi n jea mo wɛɛne, ye nɔɔno wodwoŋi vɔ-te o pa‑m, ye o daare o ja‑m o vo nmo na ba lage mɛ se n vo to.” 19Yezu déem tage konto se ko bere Piita na wó te toone delo dwi se ko pa Wɛ na zula to mo. O laam ma daare o ta de Piita o we, “Ta‑n tɔge-ne.”

20Piita ma pipiri o kwaga ne o na Yezu kwaga tɔgeno wolo o na swoi to na tɔge-ba. Wonto mo ye wolo ya na jeini o sale Yezu wodiu kom dim maŋa ne ye o bwei‑o o we, “Amo Teiru, wɔ mo lage o yeigi nmo o pa?” to.#Jɔn 13:23-25 21Piita na nɛ‑o konto to, o ma bwei Yezu o we, “Amo Teiru, bɛ mo lage ko ke nɔɔno wonto?” 22Yezu ma leiri‑o o we, “Amo ná lage se nɔɔno wonto taa ŋwe se ko taa vei maŋa kam amo na wó jwoori a ba to, konto dae nmo yiga. Nmo za-n ta‑n tɔge-ne.”

23Konto ŋwaane mo pɛ se Yezu tɔgena bam déem jege taane ba ŋɔɔne we, Yezu kwaga tɔgeno wom konto bá te maŋa de maŋa. Yezu nam wo tage o we, o bá te. O nam ya tage o we, “Amo ná lage se o taa ŋwe se ko taa vei maŋa kam amo na wó jwoori a ba to, konto dae nmo yiga.”

24Yezu kwaga tɔgeno wolo o na tage o taane konto to mo ye amo wolo na bere Wɛ chega kam ye a daare a popone-ka a tiŋi to. Nɔɔna maama yei we amo na bere tei to seene ko ye chega mo.

25Yezu ta ke wonnu dedɛ o woli da. Te maama dedoa dedoa nam ya ná lage te popone te tiŋi, a boŋe we logo baŋa ya bá na jei se twanno tem konto peini da.

Tans Gekies:

Jɔn 21: KBG

Kleurmerk

Deel

Kopieer