Kikia 5
5
Anania de Safira taane
1Ko daare nɔɔno wodwoŋi déem mo wora, o yere mo Anania. O kaane de yere mo Safira. O ma kwei ba wonnu tedwonna o yeigi, 2ye o daare o twori sabu kom wone se o taa jega. O kaane wom maa yei o na ke tei to. Anania ma kwei o na twori o daare kolo to o ke Yezu totoŋa nakwa bam jeŋa ne. 3O na ke konto to, Piita ma ta ded‑o o we, “Anania, bɛ mo ke ye nmo pa se setaana pɛ wae n bochare konto dwoŋi, pa se n fɔ vwa de Wɛ Sin-laao kom de nmo na twori kara kam sabu kom wone n pa n tete to? 4Maŋa kam nmo ta na wo yeigi kara kam to, ko ya ye nmo nyem mo. Nmo nam na kwei n yeigi to, sabu kom ta ye nmo nyem. Bɛŋwaane mo n boŋe n bochare ne we nmo wó ke keim dem konto? Nmo na fɔge vwa konto to, n ke n chɔge Wɛ yiga mo, se ko dae nabiina yerane.” 5Anania na nigi konto to, o ma to tega ne o te. Ko déem ma pa se foone ja balo maama na lɔre ko ni ne to. 6Nɔn-donno na wora to ma zaŋe ba vo ba pipiri too wom, ye ba daare ba kwei‑o ba ja nwoŋi ba suli.
7Ko na ke fenfee nenɛɛne awa batɔ to, o kaane wom de daa ma ba o zo Piita ba tei. O daa ta ma wo lɔre kolo na ke to. 8Piita ma ta ded‑o o we, “Ta n bere-ne, mo sabu kolo nmo de n baro wom na jwoŋi á kara kam ŋwaane to na?” O ma sɛ ye o we, “Ɛɛ, ko maama mo tento.”
9Piita laam ma bwei‑o o we, “Bɛŋwaane mo nmo de n baro wom boŋe se á maŋe Yuu-tu Baŋa Wɛ Sin-laao kom á nii? Leile konto, nɔɔna balo ya na kwei n baro wom ba suli to ta zege diga kam ni ne. Ba nam wó zeŋe nmo de ba ja nwoŋi.” 10O na tage konto o ti to bedwe baŋa ne mo kaane wom to tega ne Piita yiga ne ye o te. Nɔn-donno tem ma ba te nii de o tega. Ba ma kwei‑o ba ja nwoŋi ba suli o baro wom saŋa ne.
11Foone déem ma ja Yezu kɔgɔ kom nɔɔna bam de balo maama de na nigi kolo na ke to.
12Yezu totoŋa nakwa bam déem ma pa se maana de wo-kenkagela dedɛ ke nɔɔna tetare ne. Yezu nɔɔna bam maama déem yeini ba tigisi daane de ni dedwe Solomon napɔrɔ kom#5:12 Solomon napɔrɔ kom wo Wɛ wara-jei sem konkɔlɔ kodwoŋi ne. ne. 13Balo yiga na tere ba kɔgɔ kom wone to nɔɔn-nɔɔno wo sɛ o tɔge o woli ba wone. Ko daare teo kom nɔɔna bam maama maa pae se Yezu nɔɔna bam ye nɔn-ŋona. 14Nɔɔna dedɛ déem tu ba sɛ dé Teiru Yezu, baara de kaana maama. Ba ma tɔge ba woli o kɔgɔ kom wone. 15Yezu nɔɔna bam na ye konto to, nɔɔna maa zeŋe jaweena ba nwoŋi ba tiŋi chwei sem nia ne. Ba déem tiŋi-ba sare de gungwollu baŋa ne se Piita ná maa tɔge da o kɛa, se o lunluŋu yerane wane ko tɔge ba badwonna baŋa. 16Nɔɔna dedɛ maa yeini ba nwoŋi Jerusalem nawuura yam maama wone ba jaane jaweena de balo chichiri na daane-ba to ba tui, pa ko gare ba maama yera ne.
Ba jege Yezu tontoŋena bam ba yaara
17Juu tiina kaanem yuu tu wom de o nɔɔna bam maama déem ma na kolo na ke to. Banto déem tɔge ba ye Saduka tiina kɔgɔ kom wo nɔɔna mo. Ba maa tiini ba jege wo-goo de Yezu totoŋa nakwa bam. 18Ba laam ma zaŋe ba ja-ba ba vo ba ke peena diga kalo ba na pe ŋweena da to. 19Tega na yi to, Baŋa Wɛ maleka ma ba ka pore peena diga kam nia yam, pa se Yezu tontoŋena bam nwoŋi pwooni. Ka ma ta de-ba ka we, 20ba véi ba zo Wɛ diga kam se ba taa bere nɔɔna bam Wɛ ŋwe-doŋa kam taane chekke. 21Ba ma seene ba sɛ Wɛ maleka kam ni. Tega na poore tetete to, ba ma vo ba zo Wɛ diga kam ba wora ba bere nɔɔna bam.
Kaanem yuu tu wom de o nɔɔna bam laam ma bwoŋi Juu tiina nakwa bam maama pa se ba tigisi daane. Ba ma daare ba toŋe nɔɔna se ba vo ba le Yezu tontoŋena bam peena diga kam ne ba ja ba ba pa-ba. 22Ba nɔɔna bam na yi da to mo ba wo nɛ Yezu tontoŋena bam. Ba ma jwoori ba vo Juu tiina nakwa bam tei ye ba we, 23“Dé na yi da to, peena diga kam nia mo pe de dam. Nɔɔna balo na wora ba nii jei sem se nɔɔna yé lu to maa zege da. Dé nam na pore diga kam to, dé wo nɛ nɔɔn-nɔɔno ka wone.”
24Kaanem yiga tiina bam dedaane Wɛ diga kam soja tiina dedɛɛro wom na nigi konto to, ba boboŋa ma vugimi. Ba maa yeiri kolo na lage ko ke se ko kweeli to. 25Nɔɔno wodwoŋi laam ma ba o zo ba na wo mɛ to o ta de-ba o we, “Nii-na, nɔɔna balo abam ya na jaane á ke peena diga ne to laam wo Wɛ diga kam ne ba zege ba bere nɔɔna bam.”
26Dedɛɛro wom na nigi konto to, o de o nɔɔna bam ma zaŋe ba vo ba ja Yezu tontoŋena bam ba ba. Ba ma wo mɛ dam ba zi-ba, kolo ŋwaane ba kɔre mo we nɔɔna bam wó dole-ba de kandwa.
27Ba laam ma pa se ba zo ba zege Juu tiina nakwa bam kɔgɔ kom yiga ne. Kaanem yuu tu wom laam ma bwei-ba se o nii. 28O ma ta o we, “Debam maŋe dé kaane abam se á daa yé ta‑á bere kolokolo nɔɔno wonto yere ŋwaane. Nii abam na ke tei to. Á pɛ se á berem dem yerane mo jage Jerusalem maama wone, ye á ta lage á pa se wonto toone dem taa ye debam yiga.”#Matiyu 27:25 29Piita de o dwonna nakwa bam ma leiri ba we, “Debam jege se dé sɛ Wɛ ni mo, se ko dae nabiina yerane. 30Baŋa Wɛ wom dé nabaara na tɔge to mo bi Yezu toone wone. Ko ye abam ya mo jaane‑o á pa dagara yuu ne á go. 31Wɛ mo seene o bi‑o o daare o pa se o jeini o jazem seeni, se o taa ye debam Yiga tu, de dé Vereno. Konto wae ko pa se Isarele tiina na chwoŋa ba leiri ba wo se Wɛ laam yage ba wɛleera o ma chɛ-ba. 32Debam nam mo zege chega kam konto kwaga ne, ye Wɛ Sin-laao kom de tɔge ko zege ka kwaga ne. Kokuri Wɛ pɛ se o Sin-laao kom taa wo balo na sɛ o ni to tei ne.”
33Juu tiina nakwa bam na nigi Yezu tontoŋena bam na tage kolo to, ba bane ma tiini de zaŋe de-ba. Ba boboŋa ma ja se ba go-ba. 34Ba kɔgɔ kom nɔɔno dedoa laam ma zaŋe se o ŋɔɔne, o yere mo Gamaleli. O maa ye Farisi tu ye o ta ye Wɛ nia yam bereno. Nɔɔna maama maa pa‑o zula.#Kikia 22:3 O na zaŋe ba kɔgɔ kom wone to, o ma ta se ba ja Yezu tontoŋena bam ba nwoŋi pwooni se ba cheigi fee. 35O ma daare o ta de nakwa bam kɔgɔ kom o we, “Amo dwonna Isarele tiina bam, á ta‑á yei á tete de á na boŋe se á ke nɔɔna banto tei to. 36Nɔɔno wodwoŋi déem mo zaŋe debam logo ne, o yere mo Teudas. O ma bere o tete we o ye nɔn-kamunu. Nɔɔna dedɛ déem ma tɔge o kwaga, ko maŋe de nɔɔna bia yana (400). Ba déem nam go‑o mo ye o tɔgena bam jage da yiga ne. Kolokolo daa maa wo daare. 37Konto kwaga ne, Galili tu wodwoŋi de daa ma zaŋe, o yere mo Judas. Maŋa kam ba déem na wora ba gare dé logo kom nɔn-bia to mo o zaŋe o la kɔgɔ o ke o kwaga ne. Ba ma go wonto de. O de kwaga tɔgena bam ma jage da yiga ne. 38Konto ŋwaane mo a nam tɛ abam se á yé zaŋe á ke nɔɔna banto kolokolo. Nam yage-na ba yera, kolo ŋwaane ba boboŋa de ba totoŋa maama ná tɔge nabiina yerane ŋwaane, ya wó taa ye kafɛ mo. 39Ko nam ná ye Wɛ kikia mo, abam bá wane á che-ba. Á nam wó ba á lɔre we, á ke chichuŋu de Wɛ mo.”
Gamaleli na tage konto o ti to, ba ma sɛ o taane dem. 40Ba ma bwoŋi Yezu totoŋa nakwa bam pa se ba jwoori ba zo ba tei. Ba ma fere-ba de kaasa ye ba daare ba kaane-ba se ba daa yé ŋɔɔne kolokolo Yezu yere ŋwaane kɔtaa. Ba laam ma yage-ba se ba viiri.
41Yezu tontoŋena bam ma nwoŋi nakwa bam tei ne ye ba jege wopwolo lanyerane de Wɛ na pɛ se ba maŋe se ba na yaara Yezu yere ŋwaane to. 42Dɛ maama wuu ba maa yeini ba tigisi daane Wɛ diga kam ne, ye ba daare ba tole sam ba bere nɔɔna Wɛ chega kam. Ba maa tɛ Wɛ kwor-ywoŋa kam ba bere nɔɔna we Yezu mo seene o ye Wɛ Dam Tu wom.
Tans Gekies:
Kikia 5: KBG
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2020, Ghana Institute of Linguistics, Literacy and Bible Translation (GILLBT)
