Kikia 3
3
Gɔrɔ kodwoŋi nɛ yazura Yezu ŋwaane
1Dɛ dedwe mo Piita de Jɔn déem zaŋe ba vo Wɛ diga kam maŋa kalo nɔɔna na yeini ba ware Wɛ to. Wɛ-guni maŋa ne mo konto. 2Ba ma vo ba yi wara-jei sem ni dem ba na bwoi we ‘Ni-laao’ to. Nɔɔno wodwoŋi déem tigi da o na maŋe o ye gɔrɔ o biini ne to. Nɔɔna maa yeini ba zeiŋi‑o ba vo ba jeini da dɛ maama se o taa lwoori sabia nɔɔna balo na tɔge da ba zo diga kam to tei ne. 3Nɔɔno wom ma na Piita de Jɔn na maa zoora. O ma lwoori-ba se ba pa‑o woŋo. 4Ba ma yɔɔre ba nii‑o. Piita laam ma ta ded‑o o we, “Nii debam seeni!” 5O ma seene o nii-ba ye o jege teena se ba pa‑o woŋo. 6Piita ma ta ded‑o o we, “Amo ba jege sabia se a pa‑m. A nam wó pa nmo a na jege wolim delo to. A tɛ nmo Nazarete tu Yezu Krista yere ŋwaane, zaŋe n ta n via.”
7Piita na tage konto o ti to, o laam ma ja o jazem o woli‑o pa se o zaŋe wɛɛne. O na zaŋe konto bedwe baŋa ne to mo o nɛ sem de o nakwollu tem maama ke dam lanyerane. 8Nɔɔno wom ma faŋe wɛɛne o jwoori o ba o chu o nɛ baŋa ne ye o bobo se o taa via. O ma tɔge-ba o zo Wɛ diga kam wo. O maa via ye o faŋa wɛɛne ye o tei Wɛ. 9Nɔn-kɔgɔ kom ma na o na vei ye o zuli Wɛ. 10Ba ma lɔre we nɔɔno wom konto mo ye lwoonu wolo ya na jei wara-jei sem Ni-laao kom ne to. Ba na lɔre‑o to, ko ma tiini ko kagele-ba ye ba yeiri kolo na ke‑o to.
11Nɔɔno wom ma yɔɔre o meeli Piita de Jɔn. Nɔɔna bam maama maa ye yaau. Ba ma zaŋe ba duri ba vo ba tei, konkɔlɔ kom na jege napɔrɔ mɛ to, ko yere mo Solomon napɔrɔ kom. 12Piita na nɛ nɔɔna bam konto to, o ma ta de-ba o we:
“A badwonna Isarele tiina bam, bɛŋwaane mo abam ye yaau de kolo na ke to? Bɛ mo ye abam yɔɔre á nii debam konto? Abam boŋe we ko ye debam dam mo pɛ o zaŋe o vei na? Á boŋe we ko ye debam na kɔre Wɛ lanyerane to ŋwaane mo na? 13Ko nam na ye tei to, Abaraham Wɛ wom, de Izaak de Jakob Wɛ wom na ye dé nabaara maama Wɛ to laam mo pɛ se o tontoŋeno Yezu jwoŋi paare. Abam jaane wonto mo á pa ba go‑o. Pilata déem boŋe se o yage‑o ye abam nam wo sɛ.#Jɔn 19:12 14Yezu Krista ye Wo-pwoŋo Tu mo de Chega Tu. Abam nam ve‑o, ye á daare á lwoori Pilata se o le nɔn-goro mo o yage o pa abam. 15Abam na ke tei to, á go wolo na ye ŋwea tu to mo. Wɛ ma daare o bi‑o toone wone, ye debam zege chega kam konto kwaga ne. 16Ko ye Yezu yere dem ŋwaane mo pɛ gɔrɔ kom na dam o yera ne. Dé na ke dé wo-dedoa de Yezu to mo pɛ ko ke ne á na nɛ tei, ye á maŋe á yei nɔɔno wom to. Ko ye wo-dedoa kalo na tɔge Yezu ŋwaane to mo pɛ o laam na yazura chekke abam maama yiga ne.
17Amo nu-bia bam, abam de á yiga tiina bam na ke Yezu tei to, amo yei we abam ya yeiri woŋo kolo á na ke to. 18Faŋa faŋa to Wɛ déem pɛ o sampwori sem maama tɔɔle o kwora se bere nɔɔna we o Dam Tu Krista jege se o yaare mo. Abam na ke‑o tei to mo pɛ se Wɛ taane dem seene de ji chega. 19Konto ŋwaane nam leiri-na á wo se á daare á pipiri á ta‑á tɔge Wɛ, se Wɛ wó yage á wɛleera o ma chɛ abam. 20Konto to, dé Teiru Wɛ wó wane o pa se abam bochara taa zura maŋa de maŋa, ye o laam daare o toŋe o Dam Tu Krista wom, o na maŋe o tiŋi‑o o pa abam to. Yezu mo konto. 21O jege se o taa wo telaao ne se ko taa vei maŋa kalo Wɛ na wó fɔge o kwɛ wonnu maama to, ne o na maŋe o pa o sampwori sem tɔɔle o kwora faŋa faŋa tei to. 22Ko ye nenɛɛne Moses déem na tage o we, ‘Abam Teiru Baŋa Wɛ wó pa se abam dwi tu dedoa mo zaŋe o taa ye Wɛ ni-jwoŋinu o pa abam, ne o na toŋe amo Moses tei to.#Nia Gulim 18:15 Wonto nam ná tua, abam jege se á sɛ taane delo maama o na wó ta o bere abam to. 23Wolo maama nam ná wo sɛ kolo Wɛ ni-jwoŋinu wom na wó bere to, ba jege se ba le kotu mo Wɛ nɔɔna bam wone ba yage pa se o dwi ti.’
24Mo kolo Moses déem na tage to. Ko ná ye Samuwel de balo maama na saŋe o kwaga to, Wɛ sampwori sem maama de déem tɔɔle konto dwoŋi mo. Balo maama na jege Wɛ kwora ba tɔɔle to déem bere kolo na wó ke zem da yanto wone to mo. 25Wɛ kwora kam o déem na pɛ o sampwori sem se ba tɔɔle to ye abam nyem mo. Wɛ ni dem o déem na gwoni o pa dé nabaara bam to de daa ta ye abam nyem. O déem gwoni ni de Abaraham o we, ‘Ko wó tɔge nmo dwi tiina ŋwaane mo pa amo swɛ logo baŋa dwi maama swolim.’#Pulim 12:2 26Konto ŋwaane, Wɛ na pɛ o tontoŋeno wom zaŋe o ba to, o bobo o toŋe‑o abam tei ne mo se o ke abam zaane de o na wae o pa se abam dedoa dedoa yage o keim-lwanno tem to.”
Tans Gekies:
Kikia 3: KBG
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2020, Ghana Institute of Linguistics, Literacy and Bible Translation (GILLBT)
