Mataio 3
3
Ioane Bapatiso Vita
(Mareko 1:1–8; Luka 3:1–18; Ioane 1:19–28)
1Soka lea sare sare voa Ioane, Bapatiso Vita foreri Iudea ve furuka merava voa itoro a’ mō ape, 2Haiiri keroria, ipi kauri ve basileia haekao loi.#Mat 4:17; Mak 1:15 3Ipi peroveta Isaia sa evera mōri moipe vita eite meha,
Furuka merava voa karu aea i mō la isa moipea,
Papuvita ve otiharo la lei kekese leitia,
areve terai oti la lei haura lei puavaia.#Isa 40:3
4Ioane ve mopaita puta kamela ve mehe sa sa’ pisosipe, aea are animala ve ruru kava ta areve sofa voa suka meiape; aea areve larietau puka ita meoe‐ma ita reha.#2 King 1:8 5Soka Ierusalema karikara aea Iudea mea ve karu foromai, aea Ioridana lorara karikara karikara karu foromai ita arero tai kokorukaiape; 6aea ere ereve iri kaiae la vavavi, are erero Ioridana mai voa bapatiso leiape.
7A—, are Farisea karu aea Sadukea karu rauapo areve bapatiso vei forerōpe la ofae eavōpe lea mea, are erero mō ōpe, Ikaroa ve atutemori e! forerai vei leipeta kitou la kiripi oroai vei ero kureaita vita leisa?#Mat 12:34; 23:33 8Haiiri kerorita eite la muiaia, 9aea hai mōri levi kaeaia, Elave papa Abrahama reha, ipi ara ero o mō la aipea, Ualare siahu ia mea fave korukoru la maravi, atutemori Abrahama vei lei foreraita ore.#Ion 8:33 10Mea faitora soa naoita tola ve ipi voa la muiaipea, lea vei fare lareva tai auke leita lea tola foromai la fei putei a iri voa la sukapaipea.#Mat 7:19 11Haiiri kerorita peise vei ara ero ma sa bapatiso lei vovo mea; a—, arave siahu la sapataita vita arave aite voa koti vei la roi; ara areve tamaka la taiovi terai vei lareva kao. Are Safu Arahoha Lareva aeata sarita a ita sa ero bapatiso leiti roi. 12Areve mai sa areve miruru la ovi toatoa areve uiti ruru la toaita oti la lei ovava leiti vei, aeata uiti eite la arisovi areve sitoa uvi voa toea miavi, uiti ruru la are futai auke leita a voa suka sisōvi a sa sa’ kaleiti roi.
Iesu la bapatiso leipe
(Mareko 1:9–11; Luka 3:21–22)
13Lea soa voa Iesu Galilea kiripi Ioane tai Ioridana voa koti forerōpe, are sa arero bapatiso leiti vei. 14A—, Ioane o erere a’ mō ōpe, Ara sa haikaeaipeta etau meha, ave bapatiso la ovai vei; eite a araro tai foreraita meha, ei? 15A—, Iesu tava o arero mō ōpe, Eapo au leitia; ipi elaka mai haura foromai la lei kekese leitita, mai lareva reha. Soka are Iesu ve o la kakeva leipe reha.
16Iesu la bapatiso lei roroka lei, are ma iri voa karoa patei forerōpe soa kofa voa, are kauri haea aea Ualare ve Arahoha, usoso sua ve maea feare, arero tai faukōpe la ofae eovi, 17aea i kauri voa forera mō ōpe, Arave haikakare araita Atute meha, ara are vei hailareva leititore.#Gen 22:2; Sal 2:7; Isa 42:1; Mat 12:18; 17:5; Mak 1:11; Luk 9:35
Tans Gekies:
Mataio 3: TQO1983
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Published by the Bible Society of Papua New Guinea in 1983.
