Mateo 6
6
Jesús rseed'de ka rala su'këëz'ru lau'e Dios
1»Ti gun'li le nak dxia'a lau'ke bunach naar lale'i'de lbi'ili bënni ye la'ke. Koma tibi uzi'li xhbei kie' Xuuz'li zue' yewayuba xhki ka gun'li.
1. Kati gak'leen'ru'ne bënni nayaadzji'de
2»Lena'a, kati gak'leenk'li'ne bënni nayaadzji'kde ti guunu ga uakz nu gnëëzi, ka tun'ke bënni nuda' blo'u lu yu useed len la nëëz naar bunach lun'ke leke xhën. Le nak'te rea' lbi'ili ki lena'az luzi'ke xhbei. 3Li'z rala gnëëz'du kati gak'leenu'ne bënni nayaadzji'kde; 4baga'chi'z ben. Len Xuuzu guune ga uzi'u xhbei le rle'i'de ruunu baga'chi'z.
2. Kati gui'leen'ru'ne diidza Dios
(Lc 11:2-4)
5»Kati gui'leen'li'ne diidza Dios, ti gun'li ka bënni nuda' blo'u, leke tadaan'de zuiz'kde ka' lui'leene diidza Dios lu yu useed len lu latj ga tun'ke ye'i naar bunach lale'i'de leke. Le nak'te rea' lbi'ili ki lena'az luzi'ke xhbei. 6San li', kati gui'leenu'ne diidza Dios, pseeyj kuinu nu'yu'u len baga'chi'z be'leene diidza Xuuzu. Ati Xuuzu guune ga uzi'u xhbei le rle'i'de ruunu baga'chi'z.
7»Len kati gui'leen'li'ne diidza Dios, ti gui'li la diidza'z, ka tuune bënni'a ti nayajle'ke, taki'de ki tzka'ti'ga tui'ke diidza, Dios uyëën'de leke. 8Ti gun'li ka tun'ke'a, koma Xuuz'li chik'z nëëzi'kz'de le nayaadzji'li kati zia'a gnaab'li. 9Ki rala gui'leen'li'ne diidza Dios:
»“Xuuz'tu zu' yewayuba,
la'ay naku li'.
10Yëla rnabe' kiu' sua len netu.
Gak le ryaazlaadxu'u lu yëdz'lyu ni
ka rak yewayuba.
11Bdxia'gbeedx le gia'aj'gaag'tu tu tu dza.
12Gxhi'xhën xhtu'la'tu
koma netu rzi'xhëën'tu'ne
bënni bi tusake'e netu.
13Ti gui'u latj gbixh'tu lu dula,
buslá netu lu ne'e bënni xëwi.”
14»Koma xhki lbi'ili si'xhëën'li'ne bënni'a bi gulusaka'ke lbi'ili, Xuuz'li zue' yewayuba lekz'ka' uzi'xhëëne lbi'ili; 15san xhki ti si'xhëën'li lza'a'li, lekz'ka' Xuuz'li ti si'xhëëne xhtu'la'li.
3. Kati gun'ru gbas
16»Kati gun'li gbas, ti gzeeli bayechi'da lau'rua'a'li, ka tuune bënni nuda' blo'u, tun'ze lua' takua'ke bayechi, naar bunach lale'i'de ki tun'ke gbas. Le nak'te rea' lbi'ili ki lena'az luzi'ke xhbei. 17Kati li' guunu gbas, gdiib lau'ru'u len dxia'a'du kpo'u kiu', 18naar bunach ti lak'be'i'de ki ruunu gbas. Tuuze Xuuzu gnëëz'de le ruunu koma Le' zue' ga nak baga'chi', ati Le' gunne ga uzi'u xhbei koma rle'i'de le rak baga'chi'z.
Yëla tzawi ki yewayuba
(Lc 12:33-34)
19»Ti jkuudi'tzka'li yëla tzawi yëdz'lyu ni', ga tutëëba ley be len rak'ditji, ga bënni gban tayaazie len tabaane. 20Gulgun bayuudx ga ga'ta kieeli yëla tzawi ki yewayuba, ga ti kë'ba be len ti gak'ditji'kz, ga bënni gban ti gunn layaazie. 21Koma ga zua yëla tzawi kiu', na' sua lekz'ka' laadxi'dau'u.
Le runn yeni lu yëla naban kiu'
(Lc 11:34-36)
22»Lau'u nak yeni ki yëla naban kiu', xhki lau'u nak dxia'a, gdu yëla naban kiu' ga'ta yeni; 23san xhki ti nak dxia'a, yëla naban kiu' sua ga nak chul. Ati xhki yeni'a lea zua' len li' nak chul, ¡naxh'gaar nak yëla chul na'kz!
Dios len yëla tzawi
(Lc 16:13)
24»Nutunu bënni gunn guune dxin kieke chop'ke bënni xaane; koma tue' lei'de na' ye tue' gdxi'i'de, len tue' gak tuuz laadxe'e ati len bënni'a ye tue' gak chop laadxe'e. Ti gunn gun'li dxin kie' Dios len lekz'ka' gun'li dxin ki yëla tzawi ki yëdz'lyu ni.
Dios run'chi'e bënni xi'ine
(Lc 12:22-31)
25»Lena'a rea' lbi'ili: Ti suáli bagi'i bixh gia'aj'gaag'li tzal suáli yëdz'lyu, ti suáli bagi'i bixh laari gaku'li. ¿Naru ti zaki'i'r yëla naban kieeli ka le gia'aj'gaag'li len zaki'i'r xhpeela'li ka laari raku'li? 26Guluyu'tzka'ba bua' tazuuba: ti taaz'ba len ti talap'ba, tibi liidx yëëz zua kiek'ba, san Xuuz'ru zue' yewayuba rga'we'ba. ¡Naru ku zaki'i'rli lbi'ili ka bua' tazuuba! 27Len zala gakati kë'li bagi'i, ¿Naru gunn kxhën'li ye tu dza tzka za'li yëdz'lyu?
28»¿Bixhkia' rbë'li bagi'i ki bixh laari gaku'li? Guluyu' ka taxhën yaj: ti tun dxin len ti taab yeel. 29San, rea' lbi'ili ki Salomón nak'te gu'ta'tzka kie' le tana' lach'zdan, ti benn'kz gne'e ka tana' yugu yaj'a. 30Xhki Dios ruune ga tana' ka' yaj'a rë' lau'gixi len ru'ueikj dza'a ryeegi, ¡naxh'gaar guune kieeli, lbi'ili bënni ti nap'li yëla rajle'! 31Lena'a ti suáli bagi'i, gnaali: “¿bixh gia'aj'gaag'li?” U “¿bixh laari gaku'li?” 32Yugute' le ni tabë'ke bagi'i bënni ti tayajle'ke, san lbi'ili zue' Xuuz'li chi nëëz'de ki nayaadzji'li ley. 33Lena'a gulugi'i le nak ki yëla rnabe' ki yewayuba, len gulgun le nak dxia'a lau'e Dios, len le' gdxia'gbeedxe kieeli yugute' le ni. 34Ti suáli bagi'i ki kxhë, koma kxhë wa'ta latj suáli bagi'i. Tu tu dza nuche' bagi'i ki.
Tans Gekies:
Mateo 6: PZD
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Sociedad Biblica de México AC
