GÉNESIS 4
4
Caín runamandapash, Abel runamandapashmi villajun
1Adán runaca, paipaj huarmi Evahuanmi pacta puñurca. Chaimandami, Eva huarmica vijsayu tucushpa, Caín shuti churita ungurca. Chai huarmica: “Mandaj Dios carajpimi, jari huahuata charini” nijurcami. 2Chaipaj jipaca, Cainbaj huauqui Abeltami ungurca. Abelca, llamacunatami michishpa causarca. Cainga, alpapi tarpushpami causarca.
3Huatacuna yalishca jipami, cashna tucurca: Cainga, pambapi fucushca granocunatami, Mandaj Diosman carangapa apamurca. 4Abelca, punda huachashca tucuilla llamacunamanda agllashpami, ashtahuan racu llamata apamurca. Mandaj Diosca, Abeltapash, pai carashcatapashmi alicachishpa ricujurca. 5Ashtahuangarin, Caindaca, pai carashcatapash, na alicachishpami ricujurca. Chaimandami, Cainga, paipaj ñavipash shujpacha tucushpa ninanda fiñarirca. 6Chaimandami Mandaj Diosca, Caindaca cashna nirca:
“¿Imashpata, cambaj ñavipash shujpacha tucushpa, ninanda fiñaringui? 7Alita rurashpaca, ¿nacha jatunyachi tucunguiman? Na alita rurajpimi, juchaca pungupi chapanshna, canda mandangapa shuyajun. Chai juchataca, canmi mishana cangui” nircami.
8Chaipaj jipami Cainga, paipaj huauqui Abeltaca: “Jacu, pambapi purishun” nishpa pusharca. Pambapi paicuna purinajushpami, Cainga, paipaj huauqui Abelta fiñashpa jatarishpa huañuchirca. 9Shinamandami, Mandaj Diosca, Caindaca:
“Cambaj huauqui Abelca, ¿maipita?” nishpa tapurca.
Shina tapujpimi, Cainga:
“Na yachanichu. ¿Ñucachu, ñuca huauquitaca ricuriana cani?” nishpa tigrachirca.
10Shina nijpimi Diosca, cashna nirca:
“¿Imatata rurashcangui? Cambaj huauquipaj yahuarmi, alpamandapacha, Ñucata caparijun. 11Cunanga canga, cai alpapica ninandapacha na alicachi tucushcami cangui. Cai alpami, cambaj huauquipaj yahuartaca, shimita pascashpa langajshna chasquirca. 12Alpapi can tarpujpipash, na fucungachu. Caru llactamanda runashnami, cai pachapica caita chaita purijungui” nircami.
13Shina nijpimi Cainga, Mandaj Diostaca cashna nirca:
“Chai tucui llaquicunata ñuca apanaca, jatun llaquipachamari. 14Ricui cunanmi, cai alpamanda calpachihuangui. Shinamandami, cambaj ñaupajmanda pacajugrisha. Caru llactamanda runashna cai pachapica, caita chaita purijujpimi, pipash tuparishpaca huañuchihuanga” nijurcami.
15Shina nijpimi Mandaj Diosca, cashna nirca:
“Cainda maijambash huañuchishpaca, canchiscamanmi llaquichi tucunga” nircami.
Shinamandami Mandaj Diosca, maijambash tuparishpa ama huañuchijuchun, Cainbica, shuj ricuchinata churarca. 16Cainga, Mandaj Diospaj ñaupajmanda llujshishpami, Edén huertamandaca, indi llujshimujman tiyaj Nod shuti llactapi causagrirca.
17Cainga, paipaj huarmihuan pacta puñushpami, Enoc shuti churita charirca. Cainga, shuj pueblota shayachishpami, paipaj churipaj shutita churarca. Paipaj churica Enoc shutimi carca. 18Enoc shuti runapaj churica, Irad shutimi carca. Irad shuti runaca, Mehujael shuti churitami charirca. Mehujael shuti runaca, Metusael shuti churitami charirca. Metusael shuti runaca, Lamec shuti churitami charirca. 19Lamec shuti runaca, ishcai huarmicunatami charirca. Shujca Ada shutimi carca, caishujca Zila shutimi carca. 20Ada shuti huarmica, Jabal shuti churitami charirca. Jabal shuti runaca, animalcunata viñachishpa, carpacunapi causajcunapaj taitami carca. 21Jabal shuti runapaj huauquica, Jubal shutimi carca. Paica, arpata, gaitata taquinata yachajcunapajca, tucuicunapaj taitami carca. 22Zila shuti huarmica, Tubal-caín shuti churitami charirca. Chai runami bronceta, jirruta, tucui imamambash tigrachishpa, imatapash ruranata ali yachaj carca. Tubal-caín runapaj panica, Naama shutimi carca.
23Lamec shuti runaca, paipaj huarmicunataca cashnami nirca:
“Adapash, Zilapash, ñuca rimashcata uyaichi.
Lamecpaj huarmicuna, ñuca nishcata uyaichi:
Shuj runa ñucata chugrichijpica, huañuchishallami.
Shinallata, chairalla viñai shuj huambra ñucata huactajpipash, huañuchishallami.
24Caín runata llaquichishcamanda, canchiscaman llaquichi tucuna cajpica,
Lamec shuti runata llaquichishcamandaca, canchis chunga canchiscamanmi llaquichi tucunapacha canga” nircami.
25Adán runa, paipaj huarmihuan pacta puñushpami, vijsayu tucujpi, shuj churita charirca. “Abelta, Caín huañuchishcamandami, Taita Diosca shuj churita carahuashca” nishpami, (chai huarmica), Set shutita shutichirca.
26Shinallata, Set runapashmi, shuj churita charirca. Paitaca, Enós shutitami shutichirca. Chai punllamandapachami runacunaca, Mandaj Diosta jatunyachishpa causaita callarinajurca.
Tans Gekies:
GÉNESIS 4: QVI16
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.