मत्ती 3

यूहन्ना बाप्तिस्मा आपणार

(मरकुस 1:1-8; लूका 3:1-18; यूहन्ना 1:6-8)

1ता दिहामाय यूहन्ना बाप्तिस्मा आपणार यहूदीयान जेंगलामाय आवीन ओहलो पोरचार केरणे लागू का, 2“मोन फिरावू, काहाकाय स्वर्गान राज्य आहने आव जाईल हि.” 3ज्यो तोच हि ज्यान बारामाय यशाया भविष्यवक्ता कियील इतू का, “जेंगलामाय एक आयेडणारान आवाज होमलानो, का बोगवानान वाट तियार केरू, तान सेडक्यू हिद्यू केरू.”

4ज्यो यूहन्ना उंटळान रोस्कान फाडका पेरतालु, एने तान कोमरांह चांबडान कोमेरपोट्टो बांधील इतो, एने तान खाणो टीडया एने जेंगली मोवाल एतो. 5तेवी आखा यरूशलेम, एने आखो यहूदा, एने यार्देन नदीन आस-पासने वाला आखा माणहे ताफाय आवा. 6एने ता आप-आपणा पापाह मानीन यार्देन नदीमाय तासे बाप्तिस्मा लेदा.

7जेवी तो ताफाय जुलुम सदुकी एने फरीसी बाप्तिस्मा लेणे केरता ताऊखेर आवताला देख्यो, ते तो कियो, “हे तुमु झेहेर वाला गेयळेकान सोरा, तुमूह कूण कियील का तुमु आवणारा दण्ड से दोवडो? 8तान केरता तुमु मोन फिरावो का पश्चातापान हाजो फोल लीन आवो. 9एने आपणा मोना माय ज्यो विचार केरूह मा कि आपणो आबुक अब्राहाम हि, काहाकाय मी तुमूह किथु कि बोगवान ज्या देगडा केरीन भी अब्राहामान सोरा बोणाव सेकीह.”

10कुराड ऐवी झाडान मूला हेरी मिलील हि, एने जो जो झाड हाजो फोल नाह आपती, तो तोडीन आकठाम टाकणेम आवी.

11“मी ते तुमूह पाण्या केरीन मोन फिरावणेन बाप्तिस्मा आपथु, पुण मार बादमाय जो आवण्यो हि, तो माहुरीन भी ताकेत वालो हि, मी तान खाहडा विसणेन लायकीन भी नाह सोतो. तो तुमूह पवित्र आत्मा एने आखठा केरीन बाप्तिस्मा आपी. 12तान आथाम तान हुपडो हि, एने तो तान खेत हास केरीन साफ केरी, एने गोव तान कोठाराम मेली एने रीगील बुहटाह ता आकठाम टाकी केधीच ओलाय नाय.”

यूहन्ना द्वारे यीशुन बाप्तिस्मा

(मरकुस 1:9-11; लूका 3:21,22)

13तेवी यीशु गलील रीन यर्देन नदीन किनारापूर यूहन्नाफाय आवु कि ताफायरीन बाप्तिस्मा लेय. 14पुण यूहन्ना इही केयीन ताह रोकने लाग्यो का, “मी तुवा फायरीन बाप्तिस्मा लेणे जुवी, तू माहुफायरीन लेणे आवूह काय” 15पुण यीशु ताह उत्तर आप्यो, “ऐवी ओहाच एने दी, काहाकाय आपुह इहीच केरीन सोब धार्मिकता पुरो केरणू हि.” तेवी तो तान वातमान लीदु. 16एने यीशु बाप्तिस्मा लीन चालूच पाण्या मायरीन उपेर आवु, एने देखू, तानकेरीन आकाश उगडी गीयो, एने तो तापोर बोगवानान आत्मा कबुतरान रूपामाय उतेरतालू एने तापुर आवतालू देख्यो. 17एने देखू, जी आकाशवाणी एनी का, “ज्यो मारो प्रिय सोरो हि, ज्यापूर मी आनंद हि.”

Tans Gekies:

मत्ती 3: NLXNT

Kleurmerk

Deel

Kopieer