লূক 24

বাওয়া আম্রি হিচাগো রাখ্রাং

(মথি ২৮:১-৮; মার্ক ১৬:১-৮; যোহন ২০:১-১০)

1খাঃলি পাথামা রাকনিক কংগং চঃজগা য়াং মিকমারোচা য়াং আমুয়িং ছিই পুরুককো য়ুউরো, সাংখ্যুয়েংবাদুঃ লাঃগেলিইরি। 2য়াংসুউরো ম্রাংগেলিইচাগা, সাংখ্যুয়েংগা ক্যকলুংগো রুয়িই বলৈইকেব্যা, 3য়িগিলি সাংখ্যুয়েং আথিমা লাঃরো, য়াংসুউরো আস্যাং যীশু আলংগো মাম্রাংগেলিই। 4যাখা য়াংসুউরো এংঅফুয়ি ফ্রইলো চেংজাগেলিইরি য়াংখা ছিইমিং পুয়েং আলাং রং ওয়েলো নৈয়কচা য়াংসুউরো নামা লাঃলো রেলিইরি। 5য়াংখা মিকমারোচা ক্রকলো আগং ঙুককেলিইরি। লুঃউ নৈয়কচা য়াংসুউরোগো প্রলিইরি, “যাসুউ আহ্রাংলি য়াংসুউগো যাফু সিইচামা হ্রারিলি? 6য়াংসুউচা দিঃমা মিহিক; য়াংসুউচা হ্রাং থাখাব্যা। য়াংসুউ যাখা গালীলমা হিকলিইরি, য়াংখা নাংরোগো যা প্রলিইরিলি য়াংচাগো ম্হে ক্রিগে। 7য়াংসুউচা প্রলিইরি, মনুসাওয়া সাঃগো আপ্রইস্যাংরো আলাকমা তিঃ পিইফু। য়াংনক য়াংসুউগো থুউ খেফু অর সুংরাক আতুওয়ংমা য়াংসুউচা হ্রাং থাফু।”

8য়াংখা য়াংসুউরোচা য়াং চাঃগাগো আম্হে ক্যাগেলিইরি। 9য়াংসুউরোচা সাংখ্যুয়েংগা প্রেং লাঃলো য়াং তিবি তিছিনৈয়কনা অর আখ্রা লুঃউরোগো দিঃ চাঃগাগো প্রপ্রাগেলিইরি। 10য়াং মিকমারো আতুওয়ংমা মগদলীনী, মরিয়ম, যোহনা অর যাকোব মিখাং মরিয়ম হিকলিইরি। য়াংসুউরোনা অর আখ্রা মিকমা হিকলিইরি য়াংসুউরোলি দিঃ চাঃগাগো তিবিরোগো প্রগেলিইরি। 11ছুগি য়াং চাঃগারোচা য়াংসুউরোবামা মুসুওয়া চাঃগা ম্হেকেরি। য়াং আতুওয়ক য়াংসুউরোচা য়াং মিকমা চাঃগাগো মুক্যুংগেলিই। 12পিতরচা ব্রিইলো সাংখ্যয়েংদুঃ লাঃখারি অর ক্রিরিখা আওয়ে আপি তুখুকলি মাম্রাংলিইব্যা। যাচা প্রাসানা ফ্রইরিলি, য়াংচাগো এংঅলো প্রেং লাঃখারি।

ইম্মায়ু রুওয়া লেংমা

(মার্ক ১৬:১২,১৩)

13য়াং রাকনিক তিবি নৈয়কচা ইম্মায়ু রুওয়াদুঃ লাঃগেতি। রুওয়াচা যিরুশালেনগা খন্হমে লেং খিরিই হিকরি। 14যা প্রাসানা ফ্রইরি য়াংচাগো য়ুউলো চাঃগা আপ্র-আছু প্যাংগেলিইরি। 15য়াং অাখিংমা যীশুচা য়াংদে রকলো য়াং তিবিরোনা আতু লাঃলিইরি। 16য়াংসুউরো ম্যাকচিইচা আকেইং পুয়েং ফ্রইরি য়াং আতুওয়ক য়াংসুুুউরোচা যীশুগো মিসিকগেলিই। 17য়াংখা যীশু য়াংসুউরোগো প্রলিইরি, “কুবাংরো যা চাঃগা প্রলো লাঃগেতিলিঃ?”

য়াং তিবি নৈয়কচা ম্যাকন্হা মমৈনা ক্রি হিকগেলিইরি। 18য়াংখা ক্লিয়পা নাঃমিনা তয়কচা যীশুগো মিংলিইরি, “যিরুশালেনমা দিঃ লৈগারাকমা যা যা ফ্রইরিলি, য়াংচারোগো কুবাং তয়করা মিসিক ফ্রইমি?”

19যীশু য়াংসুউরোগো প্রলিইরি, “যা যা ফ্রইরিলি?”

য়াংসুউরো প্রগেলিইরি, “নাসরতগা যীশুগো য়ুউলো যা যা ফ্রইরিলি। য়াংসুউচা রিসিক তাবা হিকলিইরি। য়াংসুউচা চাঃগানা অলুকমা থাওরা ফোরা অর হিকচা লুঃউ ম্যাকচিইমা তেখুস্যাং তয়ক হিকলিইরি। 20ঙুরোমা ফুংগ্রিই অাগ্রিইরোনা কেইং ছারারোচা য়াংসুউগো রোমীয় সিথি আলাকমা তি পিইলিইরি যাফুলিছুগি য়াংসুউরো য়াংসুউগো তাঃরা চৈলো সেবৈঅং। নক্কা য়াং যিহুদী গংখ্যুকরোচা য়াংসুউগো থুউ খেকেরি। 21ঙুরো ম্হেকেরিচাগা, য়াংসুউচা ইস্রায়েল জেম্যুওগো কিতাংফু। য়াংচারা মুহুক গিরি সুংরাক ফ্রইব্যা দিঃ প্রাসানারো ফ্রইচা। 22অর ঙুরো আফুয়িইমা লৈংগায়ক মিকমাচা ঙুরোগো এংঅফুয়ি প্যাংগেলিইরি। য়াংসুউরোচা কংগং চজগা সাংখ্যুয়েংদুঃ লাঃখাগেতি। 23ছুগি য়াংদেমা যীশু আলংগো মাম্রাংগেলিই। য়াংসুউরো প্রেং লাঃলো প্রগেলিইরি, য়াংসুউরোচা গংখাং নেঃসাগো ম্রাংগেলিইরি অর য়াং গংখাং নেঃসারোচা য়াংসুউরোগো প্রলিইরি, যীশু হ্রাংলো হিকরি। 24য়াংখা ঙুরোনা যাসুউরো হিকলিইরি, য়াংসুউরোগা লৈংগায়ক সাংখ্যুয়েংদুঃ লাঃলো মিকমারো যাপুয়েং ম্রাংলিইরি য়াংপুয়েং ম্রাংগেরি। য়াংসুউরোচা যীশুগো য়াংদে মাম্রাংগেলিই।”

25য়াংখা যীশু য়াংসুউরোগো প্রলিইরি, “কুবাংরোচা তুখুকগোলি নাঃমিলি। ‍কুবাংরোমা চিইচা কংগং কেইংরি, য়জংকিজু রিসিইরো যা প্ররি য়াংচাগো মুক্যুংগে। 26দিঃ দুঃখুওয়ারোগো খেং য়ুউগিরা ফোরালংচা তেখু রাঃফু চাঃগা হিকলিইরিলঃ?” 27য়াংনক যীশুচা মোশিগা চালো হিকচা রিসিইরো রুইচা সেংস্যাংস কেইং চাঃউমা যীশুগো য়ুউলো যা যা রুই হিকরি য়াংচা আলুংগো প্রপ্রালিইরি।

28য়াংসুউরো যা রুওয়াদুঃ লাঃগেতিলি, য়াং রুওয়াবামা রকখা যীশুচা অরলি আওয়িই লাঃফু য়াংপুয়েং প্রালিইরি। 29য়াংখা য়াংসুউরোচা কংগং ঞেঞে প্যাংলো যীশুগো প্রগেলিইরি, আগুগা নিং ওয়ংব্যা, মমৈ ফ্রইব্যা। কুবাংচা ঙুরোনা নিংফিই। য়াংখা যীশুচা য়াংসুউরোনা নিংফু আতুওয়ক ইংদুঃ ওয়ংলিইরি। 30যীশুচা যাখা য়াংসুউরোনা চাঃফু থৈংলিইরি য়াংখা ভংমুউগো য়ুউলো ফোরাগো কিজু তাংলো য়াংসুউরোগো ফি পিইলিইরি। 31য়াংখা য়াংসুউরো ম্যাকচিইচা লাং ললিইরি; য়াংখা যীশুগো সিকগেলিইরি, ছুগি য়াংখা খ্যাং খ্যাং য়াংসুউরো অর যীশুগো মাম্রাংগেলিইরিব্যা। 32য়াংখা য়াংসুউরো তয়ককো তয়ক প্রগেলিইরি, “লেংমা যীশু যাখা ঙুরোনা চাঃগা প্রলিইরি অর সেংস্যাংস কেইংগো আসিক পিইলিইরি য়াংখা ঙুরো চিইদানাচা তেজে ফ্রইলিইরি মুহুক লঃ?”

33খ্যাং খ্যাং য়াংসুউরে নৈয়ক থালো যিরুশালেনদুঃ লাঃখাগেতি অর য়াং তিছি তয়ক তিবিরোনা আখ্রা লুঃউরোগোলি তেরেমা ম্রাংগেলিইরি। 34ফোরাচা আম্হেইং হ্রাং থালিইরি অর শিমোনগো প্রালিইরি য়াংচাগোক য়ুউলো য়াংখা য়াংসুউরো চাঃগা প্রগেলিইরি। 35য়াং তিবি নৈয়কচা লেংমা যা ফ্রইলিইরি য়াংচাগো প্রপ্রাগেলিইরি। য়াংসুউরো অরলি প্রগেলিইরি, যীশু যাখা ভংমুউগো ফিলিইরি য়াংখা যাপুয়েং প্যাংলো য়াংসুউরো যীশুগো সিকগেরিলি।

আস্যাং যীশুচা তিবিরোগো প্রালিইরি।

(মথি ২৮:১৬-২০; মার্ক ১৬:১৪)

36য়াং তিবিরোচা যাখা দিঃ চাঃগারোগো প্রগেতিলি য়াংখা যীশু কুঃদৈং য়াংসুউরো আতুওয়ংমা রেলো আলুংসুউগো প্রলিইরি, “নাংরো খেংসাগেলিই।”

37য়াংসুউরোচা নেঃ ম্রাংরি তুওয়কলো ক্রককেলিইরি। 38যীশু য়াংসুউরোগো প্রলিইরি, “যাফু নাংরো চিই ক্রককেতিলি অর যাফু নাংরো চিইমা মুক্যুংগেলি? 39ঙামা আলাকনা আখ্রিইগো ক্রিগে। ক্রি ঙারা। ঙাগো মেইং ক্রিগে আক্রংগা নেঃমাগা ঙাপুয়েং আরো-আখ্রাং মিহিক।”

40দিঃ চাঃগা প্রলো যীশুচা কুও আলাক-আখ্রিইগো প্রালিইরি। 41ছুগি য়াংসুউরোচা কংগং এংঅলো প্রগেলিইচাগা, ক্যুংফু মারাগেলিইব্যা। য়াংখা যীশু য়াংসুউরোগো প্রলিইরি, “নাংরোমা তুখুকমাসা আচা-আসক হিকরি লঃ?”

42য়াংসুউরো যীশুগো আহ্ল ঙ্হা তিবি পিইগেলিইরি। 43যীশুচা য়াংচাগো য়ুউলো অালুংসুউ হ্রিইথাকমা চাঃলিইরি। 44য়াংনক যীশু প্রলিইরি, “ঙা যাখা নাংরোনা হিকলিইরি য়াংখা ঙা নাংরোগো প্রলিইরি, মোশি ক্যাংওয়েমা, রিসিইরো রুইচা ইই কেইংমা ঙাগো য়ুউলো যা যা রুই হিকরিলি, য়াংচারো আব্রিচুং ফ্রইরাফু।”

45-46সেংস্যাংস কেইং চাঃগাগো নাঃলিঅং যীশুচা তিবিরো চিইদানামা পৈঞ্যা পিইলো য়াংসুউরোগো প্রলিইরি, “রুইলো হিকরি, ফোরালংচা দুঃখাওয়া খেংরাফু অর সুংরাকমা প্রেংলো হ্রাং থাঃরাফু।” 47অরলি রুইলো হিকরি, যিশুশালেনগা চালো হিকচা লুঃউম্যুওরোবামা ফোরালং নাঃমিনা দিঃ চাঃগাগো তাঃরা হঃপ্রাফু, আপ্রইকা চিই হ্লিগি-আপ্রইকা খুওয়ং রাঃরি। 48নাংরোচা দিঃ আলুংমা সাকসিই। 49ক্রিগে, ঙামা ফাখাং যাচাগো পিইফু গিধি খেংলিইরি, য়াংচাগো ঙা নাংরোদুঃ পুলৈমি। গংখাং ফুংগা তেখুগো মারাসাগ্রা নাংরো দিঃ ম্রুমা নিংগে।

যীশুচা গংখাং ফুং তাকখারি

(মার্ক ১৬:১৯)

50নক্কা যীশুচা কুও তিবিরোগো য়ুউলো বৈথানিয়া রকঅং লাঃখারি। য়াংদেমা তিবিরোগো লাক তাংলো ছুউক পিইলিইরি। 51ছুউক পিইলো পিইলো তিবিরোগো বৈখালো যীশুচা লাঃখারি অর য়াংখা যীশুগো গংখাং ফুংদুঃ তাংখারি। 52য়াংখা য়াংসুউরো ওয়েলো থাওরা ফোরা রুসিই তাঃরাগো পিইগেরি অর কংগং প্যলো যিরুশালেনদুঃ প্রেং লাঃখাগেতি। 53য়াংসুউরো খ্যাংখামুছু ওয়িইপাসানা ক্যংমা রকলো থাওরা ফোরাগো খিইম্যুয়েংগেতি।

Tans Gekies:

লূক 24: BBSRMZ

Kleurmerk

Deel

Kopieer