যোহন 9
9
আকেইং লুঃউচা ম্রাংলিরি
1লেংমা সাওয়া লারিখা যীশু একেইং তয়ক্কু ম্রাংলিরি। য়াংসুউ ম্যুঈরিকাবাং একেইং হিকলিরি। 2য়াংখা তিবিরো যীশুগো মিংগেলিরি, “ছাড়া, যাসু আপ্রইনা দিঃলুঃউচা একেইং ফৈরো ম্যুঈরিলি? য়াংসুউ কুডেংল মহুকিঃ আঃমি-আঃফা কিজুল?”
3যীশু আফ্রি পিলিলি, “ঙারি য়াংসুউলি মুলুঃউলি, আঃমি-আঃফালি মুলুঃউলি। দিঃচা ফৈরি আক্রংগা থাওরা ফোরা আলুংচা দিঃ লুঃউগা নিঃরো প্রাফু আতুওয়ক। 4যাসু ঙাগো রুওয়েলৈতিলি, আখিং হিরিখা য়াংসুউ অলুক লুকফু ঙারো তাংরি। নিঃ ওয়ংহ্লাব্যা, য়াংখা তয়কলি অলুক মলুকনৈমুপ্যা। 5মনৈরাক তৈঅং ঙা লগামা হিফুলি, ঙা লগামা আলাং।” 6দিঃ চাগাঃ প্ররো যীশু কেইংফামা ছুওয়েংছি বৈরো ক্যুকপেয়ে লুকলিইরি। য়াংনক য়াং ক্যুকপেয়েগু যীশু একেইং ম্যাকচিমা কেয়েংরো প্রলিরি, 7“লালি, শীলোহ কেইংমা লারো ছিঃবৈখি।” শীলোহ আঃদিপি ফৈতি- রুওয়েলৈতি।
লুঃউচা লারো ম্যাকচি ছিই বৈলতি অর ম্যাকচি ম্রাংরো প্রেংরো লালিইরি। দিঃচাগু ম্রাংরো য়াংসুউ ঈনেংবাসারো অর য়াংসুউগু যাসুুউরো আলুউ খেংচাগু হ্রিইগা ম্রাংরো হিকগেলিইরি য়াংসুউরো আলুংসুউ প্রগেলিরি, 8“দিঃ লুঃউ থুউসু মুহুকলঃ, যাসুউ থৈরো অালুউ খেংরি?”
9তয়কতিরি প্রগেলিরি, “অয়, দিঃ লুঃউচা, য়াং লুঃউ।” অর তয়কতিরি প্রগেলিরি, “ক্রিগিলি য়াংসুউঞ্যং, য়িগিলি য়াংসুউ মুহু।”
ছুগি লুঃউচা কুঃদৈং লারো প্রলিরি, “অয়, ঙা য়াং লুঃউ।”
10য়াংসুউরো য়াংসুউগু প্রগেলিরি, “ছুগি যা লুকরো নাক ম্যাকচি অঃকং ফৈরিলি?”
11য়াংসুউ আফ্রিমা প্রলিরি, “যীশু খরো য়াং লুঃউচা ক্যুপেয়ে করে ঙা ম্যাকচিমা কেইংরো প্রলিরি, ‘শীলোহ কেইংমা লারো ছিঃবৈখি।’ ঙা লারো ছিই বৈখিরি অর ম্যাকচি ম্রাংলিরি।”
12য়াংসুউরো য়াংসুউগু প্রলিরি, “য়াং লুঃউচা যামালি?”
য়াংসুউ প্রলিরি, “ঙা মিঃসি।”
13যা লুঃউ একেইং হিকলিরি, য়াংসুউগু লুঃউরো ফরীশীরোদু য়ুউ লাখাগেতি। 14যানি যীশু ক্যুপেয়ে কেইংরো ম্যাকচি ফুঅংলিরি, য়াংরাকচা হিকলিরি সাদাংরাক। 15য়াং আতুওয়ক ফরীশীরো প্রেংরো য়াংসুউগো মিংগেলিরি, “নাং মজং লুঃউরো ম্যাকচি ম্রাংলিরিলি?”
য়াংসুউ ফরীশীরোগু প্রলিরি, “য়াংসুউ ঙা ম্যাকচিমা ক্যুপেয়ে কেইংলিরি অর ঙা য়াংচা ছিই বৈরি খ্যাংখ্যাং ম্যাকচি ম্রাংলিইরি।”
16দিঃচাগু ক্রারো ফরীশীরো আতুওয়ংমা লৈগয়ক প্রলিরি, “য়াং লুঃউচা থাওরা ফোরাগা লাঃচা মুহু, আক্রংগা য়াংসুউ সাদাংরাক্কু মুসুং।”
আক্রা ফরীশীরো প্রগেলিরি, “যা লুঃউ আপ্রইসি, য়াংসুউ যাপুওয়েং দিঃ এংঅফুয়ি অলুককু লুকনৈলি?” দিঃপুওয়েং প্রগেরো য়াংসুউরো আতুওয়ংমা চিইচা আঞি মিহিলিগে।
17য়াংখা অর প্রেংরো য়াংসুউরো থুউ লুঃউগো মিংগেলিরি, “নাং য়াংসুউ আক্রংলিলাগু যা প্ররিলি? আক্রংগা য়াংসুউ নাক ম্যাকচিইু ফুওয়ংরো পিরি।”
থুঃউ লুঃউচা প্রলিরি, “য়াংসুউ তয়ক ঋষি।”
18যিহুদী গংখ্যুকরো য়াংসুউ আঃমি-আঃফাগু খরো মিঃমিংসাগ্রা মক্যুংলিচাগা, য়াং লুঃউচা দিঃ হ্রিঃগা একেইং হিকলিরি অর অঃগু ম্রাংরি। 19য়াংসুউরো য়াং লুঃউ আঃমি-আঃফাগু খরো মিংগেলিরি, “দিঃ লুঃউচা নাকমা য়াংসালঃ, নাংরো প্রগেলিচাগা য়াংসুউ মুয়িরিকাবাং একেইং হিকলিরি? অঃগু যাপুওয়েং লুঃউরো ম্যাকচি ম্রাংরিলি?”
20য়াংসুউ আঃমি-আঃফা আফ্রি পিলিরি, “ঙারো সিঃরি, দিঃ লুঃউ ঙারো সাঃ, অর ম্যুলিরিখা একেইং হিকলিরি। 21য়িগিলি আগু যা পুওয়েং লুঃউরো ম্রাংরিলি, ঙারো মিসি। অর যাসু য়াংসুউ ম্যাকচি ফুওয়ং পিলিরি য়াংচাগোলি মিসিঃ। য়াংসুউ আসাক ফৈব্যা, য়াংসুউগো মিংল। য়াংসুউ কুঅক্রংগো কুঃ প্রবেচি।”
22য়াংসুউ আঃমি-আঃফাচা যিহূদী গংখ্যুকরোগু ক্রকরো দিঃচাগাগু প্রলিরি, আক্রংগা যিহূদী গংখ্যুকরো দিঃহ্রিঃগাকাবাং প্ররো হিকচাগা, খ্যাংসুমুছু যীশুগো মশীহ ছুরো আঃমা খেংগি, য়াংসুউগো রুওয়াগা ন্হাংথুউলৈফু। 23য়াং আক্রংনা য়াংসুউ আঃমি-আঃফা প্রগেলিরি, “য়াংসুউ আঃসাক ফৈব্যা, য়াংসুউগো মিংল।”
24যা লুঃউচা হ্রিঃগা একেইং হিকলিরি, য়াংসুউগো প্রেংরো গংখ্যুকরো খরো মিংগেলিরি, “নাং আম্হেং প্ররো থাওরা ফোরাগু ক্রুছুবা। ঙারোগা সিঃরি যীশুচা আপ্রইঈসি।”
25য়াংসুউ আফ্রিমা প্রলিরি, “য়াংসুউ আফ্রঈসিলঃ ঙা মিসিঃ; য়িগিলি তখু আক্রংগো ঙা সিকরি, ঙা একেইং হিকলিরি অর অঃগু ম্রাংরি।”
26গংখ্যুকরো প্রগেলিরি, “য়াংসুউ নাক্কু যা লুঃউঃলিরিলি? যা পুওয়েং লুঃউরো য়াংসুউ নাক ম্যাকচিগো ফুওয়ংলিরিলি?”
27আফ্রিমা লুঃউচা য়াংসুউরোগু প্রলিরি, “ঙাগা হ্রিইগাকাবাং কুবাংরোগু প্রব্যা য়িগিলি কুবাংরো মাঃক্রাগেলি। য়জংছুগি অরপ্রেংরো যাফু নাথংফু ক্রিগেতিলি? কুবাংরোলি য়াংসুউ তিঃবি ফৈখ্যাংগেতিলঃ?”
28দিঃচাগু ক্রারো য়াংলুঃউগো কংগং অঞ্যচি চাঃগা প্ররো প্রগেলিলি, “নাং য়াংসুউ তিঃবি, ঙারোচা মোশি তিঃবি। 29ঙারো সিঃরি মোশিচা থাওরা ফোরানা চাগাঃ প্রলিরি, প্রফুছুগি যীশুচা যাগা লারিলি ঙারো মিঃসি।”
30য়াংখা থুঃউ লুঃউচা আফ্রি পিলিরি, “যা এংঅফুয়িলি! কুবাংরো মিঃসিয়াং য়াংসুউ যাগা লারিলি, কুবাংরো ক্রিরি য়াংসুউ ঙা ম্যাকচি ফুওয়ংরো পিরি। 31ঙা সিকরি থাওরা ফোরা অপ্রঈসি চাগাঃরোগু নামঃথং। য়িগিলি খ্যাংসুউমুছু থাওরা ফোরাগু রোসিখ্রাং হিগি অর য়াংসুউ চিদানাতৈং লুঃউকিরা, থাওরা ফোরা য়াংসুউ চাগাঃগু নাথংরি। 32কাবা তিঃরিকাবাং তাখালি মাক্রাসি, মুয়িংরিকাবাং একেইং লুঃউগো, খ্যাংসুমুছু ম্যাকচি ফুওয়ংরো পিচাগো। 33প্রফুছুগি আম্হেংরা য়াংসুউ থাওরা ফোরাগা মাঃলাগি, তুখুউলি মলুকনৈ।”
34আফ্রিমা গংখ্যুকরো প্রগেলিরি, “নাং মুঈচাগা আপ্রই আতুওয়ংমা অর নাং ঙারোগু সুওয়েংসাং পিরিয়াং?” দিঃচাগা প্ররো গংখ্যুকরো য়াংসুউগো রুওয়াগা ন্হাংথুঃউলৈতি।
35যীশু ক্রালিরিচাগা, গংখ্যুকরো য়াং লুঃউগো রওয়াগা ন্হাংথুউলৈতি। য়াংনক যীশু য়াং লুঃউগো হ্রারারো প্রলিরি, “নাং মনুসাওয়া সাঃ আপঃমা আক্যুংথারিলঃ?”
36য়াংসুউ আফ্রি পিলিরি, “আস্যাং, য়াংসুউ যাসুলি, ঙাগো প্রঃ, যাস্যালি ছুগি ঙা য়াংসুউ আপঃমা আক্যুংথানৈঅং।”
37যীশু য়াংসুউগো প্রলিরি, “নাং য়াংসুউগো ম্রাংব্যা, অর য়াংসুউ নাংনা চাগাঃ প্ররিঃ।”
38য়াংখা লুঃউচা প্রলিরি, “আস্যাং, ঙা ক্যুংবারি।” দিঃ চাগাঃ প্ররো লুঃউচা যীশুগো হ্রিইখুরো সাগ্রা রোসিতাঃরাগু থালিইরি।
39যীশু প্রলিরি, “ঙা দিঃ লঃগাদু তাঃরা চৈফু আতুওয়ক লাঃচা, যাফুলিছুগি যাসুউরো মাম্রাং, য়াংসুউরো ম্রাংঅং অর যাসুরো ম্রাংরি য়াংসুউরো আকেইং ফ্রইতি।”
40লৈগয়ক ফরীশীরোলি যীশুনা হিকলিরি, য়াংসুউরো দিঃচাগো ক্রারো যীশুগো মিংগেলিরি, “কুঃবাং প্রফুক্রিচাগা, ঙারো একেইং?”
41যীশু য়াংসুউরোগু প্রলিরি, “কুবাংরো একেইংছুগি, কুবাংরোমা তখুলি আপ্রই হিকফু মুহুক। য়িগিলি কুবাংরো প্রগেতিচাগা, কুবাংরো ম্রাংরি, য়াং আতুওয়কনা কুবাংরোমা আপ্রই হিকরি।”
Tans Gekies:
যোহন 9: BBSRMZ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
