যোহন 5
5
অর তয়ক সানাসি কেইংমালিরি
1দিঃ প্রাসানা ফ্রইপ্রিনক যীশু যিরুশালেংদুঃ লাঃলিইরি, আক্রংগা য়াং আখিংমা যিহুদীরোমা পুয়িই তুবুয়িই হিকলিরি। 2যিরুশালেংমা সাংফছুয়িই লেংখাওয়া রাংমা তুখু কেইং হিকলিরি; য়াংদেমা ঙাখু ইংখং মুঃফু আরা হিরি। ইব্রীয় আমুকনা য়াং কেইং নাঃমিচা বৈথেসদা। 3য়াং আরামা সানাসি ম্যাচা চুক নিংগেতি। আকেইং, খিঃগি, প্রফুছুগি যাসুরোমা কেইংথাচা সখ্রক লঃরো হিকরি, য়জংজে লুঃউলি য়াংসুউরো আতুওয়ংমা হিকলিরি।
4সাগ্রা তেমেংদ তয়কচা আখা আখা থুউ কেইংমা রিইগু সাকরো ল্হুকতি অর য়াংনক যাসু পাথামা রিইমা সাকতিলি, য়াংসুউমা খ্যাংচা রগামুছু কেইংমা লাঃরি। থুঃউঃ সানাসিরোচা রিই ল্হুকচাগো চংরো য়াং আরামা চুক নিংগেতি।
5সুংছি স্যইন্হ পেলুং সানাসি তয়কলি য়াং আরামা হিকলিরি। 6কংগং আম্যারাক য়াংসুউ য়জংজে ক্যারো হিচাগো যীশু সিইরো য়াংসুউগো মিংলিরি, “নাং কংখ্যাংফু ছেংদা হিকরি লঃ?”
7সানাসিচা আফ্রিঃ পিইলিরি, “প্রফুচাঅং ঙামা তয়কলি মিহি, যাসু রিঃল্হুকতি খ্যাং খ্যাং ঙাগো কেইংদু খ্যালৈইঅং। ঙা লাঃদুং মাঃলাদুং অর তয়ক ঙা হ্রিইগা সাকখাব্যা।”
8যীশু য়াংসুউগো প্রলিরি, “থাঃ, নাক ওয়িইরাগো কক য়ুউরো থাঃরো লিঃ।” 9খ্যাং খ্যাং য়াং লুঃউচা কেইংমালিরি অর কো ওয়িইরাগো কক য়ুউরো থাঃ লাঃলিইরি।
য়াং রাকচা হিকলিরি সাদাংরাক। 10য়াংচা কিজু যা লাঃউগো আকং লুঃউকলিরি, য়াং লুঃউগো যিহূদী গংখ্যুকরোচা প্রগেলিরি, “গিনি সাদাংরাক; বাসা আলৈই ওয়িইরাগো রুকফু নাকমা মাসাং।”
11য়াংখা থুউ সানাসিচা য়াংসুউরোগু প্রলিরি, “য়জংছুগি যাসু ঙাগো আকং লুঃউকলিরি, য়াংসুউ ঙাগো প্রলিরি, ‘নাক আখাংগো কক য়ুউরো, থাঃরো লিঃ।’”
12যিহূদীরো য়াং লুঃউগো মিংগেলিরি, “যাসুলি য়াং লুঃউ, যাসু নাককো প্রলিরি, ‘নাক আখাংগো কক য়ুউরো, থাঃরো লিঃ।’” 13য়জংছুগি যা লুঃউচা কেইংমালিরি, য়াং লুঃউচা মিঃসি, যাসু য়াংসুউগো আকং লুকলিরিলি, আক্রংগা য়াং আরামা কংগং লুঃউ চুককেরি কিজু, যীশু য়াংচাগা লাঃখারিব্যা।
14য়াংনক যীশু, য়াং লুঃউগো ওয়িইপানা ইংমা ম্রাংরো প্রলিরি, “ক্রি, নাক কং লাঃখাব্যা। অর অপ্রবাওয়ামা মিনিংগিফি, যাফুলিছুগি নাং অর মাপ্যাকরাঅং।” 15য়াংখা থুউ লুঃউচা যিহূদীরোগু লাঃরো প্রলিরিচাগা, যাসু য়াংসুউগো আকং লুকলিইরি, য়াংসুউ ফ্রইতি যীশু।
সাঃ ঈ রাঃথচা
16সাদাং রাক যীশু দিঃ অলুকরোগু লুকতিলো, যিহূদী গংখ্যুকরোচা যীশুগো সেবলৈফু ক্রেংগেলিরি। 17য়াংখা যীশু থুউ গংখ্যুকরোগু প্রলিরি, “ঙাক ফাখাংগা খ্যাংখামুছু অলুক লুকলিইরি য়জংকিজু ঙালি লুকতি।”
18যীশু দিঃ চাঃগা কিজু যিহূদী গংখ্যুকরোচা, যীশুগো সেবৈফু কিজু ক্রেংগেলিরি আক্রংগা যীশু সাদাং রাক নিইগো ফ্যাকতিলো মুহুপ্যা, থাওরা ফুরাগো ফাখাং খঃরো কোগুকো থাওরা ফুরানা আহ্রিঃ প্যাংলিরি।
19যীশু য়াং গংখ্যুকরুগু প্রলিইরি, ঙা আম্হেং কুবাংরুগু প্ররিঃ, সাঃচা কুদইং তখুলি মুলুকনৈং। আফাগু যা লুকতি ম্রাংরিলি, য়াংচারা লুকনৈংরি। আক্রংগা আফা যা লুকতিলি, সাঃকতিলি য়াংচা লুকতি। 20সাঃগু ফাখাং খ্যইতি অর কুঃ-যামছু লুকতি, য়াংচা আলুংচা সাঃগু প্রারিঃ। য়াংসুউ দিঃথাকবাং আম্যা কংগ্যু অলু সাঃগু প্রাফু, আক্রংগা সাঃচা য়াংচারুগু লুকচাগু ম্রাংরু এংঅগেঞ্যং। 21ফাখাং আসিঃরুগু মজং আসাক্ পিরু রাং থাজিলি, য়জং তাথেং সাঃলি যাসুউগু চিঃ ম্হেতিলিঃ য়াংসুউগু আসাক্ পিরু আরাং লুকতি। 22ফাখাং তয়ক্কুলিঃ তড়া মচঃ, য়িগিলি সাঃগু আলুং তাঃরা চঃফু তাওয়েং পিলিইরি, 23ফাখাংগু পজং ম্যাকন্হা পিরিলিঃ, য়জং সাঃগুলি ম্যাকন্হা পিরিঃ। সাঃগু যাসু ম্যাকন্হা মাপিলিঃ,য়াসুগু রওয়েলইতি য়াং ফাখাংগুলি থুউলুঃউ ম্যাকন্হা মাপিঃ।
24ঙা নাংরোগু আম্হেং প্ররিঃ, যাসু ঙা চাগাগু নাথংরিঃ অর যাসু ঙাগো রওয়েলই সাগু ক্যুইংরি, য়াংসুউমা মাকুংরিঃ ওয়িঞেংচা হিরিঃ। য়াংসুউগু আচইঃ ঙারিসু মাকইব্যা, য়াংসুউগা সিমাং বাওয়াগা রওয়েং লাখাব্যা৷ 25ঙা নাংরোগু আম্হেং প্ররিঃ, যং অাখিং লারেঃ, প্রফুছুগিগা লাব্যা, যাখা আসিঃরো থাওরা ফোরা সাঃ আসেংগু ক্রামি অর যাসুরো ক্রামি য়াংসুউরো হ্রাংমিঃ। 26দিঃ আক্রংচা ফ্রইতি, ফাখাং পজং ওয়িঞেংগু তাওয়েং হিকরিলিঃ, য়জং সাগুলিঃ ওয়িঞেং আপমাঃ তাওয়েং পিলিরিঃ।
27ফাখাংচা সাঃগু লুঃউরোগু তাঃরা চঃফু তাওয়েং পিলিরি, আক্রংগা য়াংসুউ মানুসুওয়া লুঃউ। 28দিঃ চাগাগু ক্রারো এংমঅগেকিঃ, আক্রংগা যং আখিং লারিঃ যাসুরো সাংখ্যইংমা হিরিঃ, য়াংসুউরো আলুঃউংসু মানুসুওয়া সাঃ আসেংগু ক্রারো থাঃ লাঃফু। 29আকং লুঃউপঃ হিচা লুঃউরো ওয়িঞেং রাফুঃ আতওয়ক থাফুঃ, অর যাসুরো আপ্রই লুঃউরো নিগেলিরিঃ য়াংসুউরো ডেং খেংফু আতওয়ক থাফুঃ। 30ঙা কুডইং তখুলিঃ মুলুকনৈং, পজং ক্রারিলি য়জং তাঃরা চইতিঃ। ঙা সাংরিচালাঃ তাঃরা চইতিঃ, আক্রংগা ঙা ঙাক্ চিতাখ্যাং আলুঃউঃ মুলুকখ্যাং। য়িগিলিঃ যাসু ঙাগো রওয়েলইতি, য়াংসুউ চিখ্যাং অলুক লুকখ্যাংরি।
যীশুগু য়ুইরো সাকসি পিইচা
31“ঙা কুখ্যাংকু সাকসি পিগিঃ, য়াং সাকসিইচা আম্হেং মহুঃ। 32ঙাগো য়ুউরো সাকসি পিচাঃ অর তয়ক হিরিঃ, অর ঙা সিরিক ঙা আতওয়ক যাঃ সাকসি পিইরি য়াংচা ম্হেংরি। 33কুবাংরো যোহনগু মিংরো রওয়েলইকেতিঃ, অর য়াংসুউ আম্হেংগু সাকসি পিলিরিঃ। 34ঙা আম্হেং লুঃউ সাকসিগু মেঃম্হে, য়িগিলি কুবাংরো আপ্রইইকা রওয়েলইঞ্যং দিঃ চাগারোগু প্রচাঃ। 35যোহন হিকলিরিঃ থুউ তক্তি ছিমিঃ আলাং, কুবাংরো তনাঃ আখিং আতওয়ক থুউ ছিমিঃ আরংমা প্যফু গিডিঃ খেইংগিলিরিঃ। 36য়িগিলিঃ যোহনমা সাকসি থাকপাং অরলি আগ্রি সাকসি ঙামা হিরি, আক্রংগা ফাখাং ঙাগো যা অলুককো লুকফু পিলিরি, য়াংচাগু ঙা লুকতি। অর য়াং অলুকরো ঙা আতুওয়ক সাকসি পিরিচা ফ্রইতিঃ, ঙাগো ফাখাং রওয়েলইচাঃ। 37থুউ ফাখাং, যাসু ঙাগো রওয়েলইতি, য়াংসুউ কোডইং ঙা আতুওয়ক সাকসি পিইলিরি। কুবাংরো তাখালি য়াংসুউ আসেইংনা অরুক্কুলি মাম্রাংগেসিঃ। 38দিঃচারো আপিঃ য়াংসুউ তাঃরা কুবাংরো চিই নুন্হুংমা মিনিই, আক্রংগা য়াংসুউ যাসুগো রওয়েলইতি য়াংসুউগো কুবাংরো মক্যুইংগে। 39কুবাংরো সেইংসঃ কেইংগু কংগং চিঃখ্যারো ফেকেতিঃ। আক্রংগা কুবাংরো ম্যাক্কেতিকা য়াং কেইংগু ফেক্কি তিঃম্রিজ বাওয়াগু রানইংফু। য়িগিলি থুউ কেইংচা ঙাগো য়ুউরো সাকসি পিরিঃ; 40য়িগিলি কুবাংরো ওয়িঞেংগু রাফুঃ আতুওয়ক ঙাদু মালাগেঃ।
41“ঙাগো লুঃউরো ক্যঞাফুগো মুলু, 42য়িগিলি ঙা নাংরোগু সিকরি। ঙা সিকরি নাংরো চিঃঞইংমা সাগ্রা আতুওয়ক আখ্য মিহিক। 43ঙা ঙামা ফাখাং নামিঃনা লাঃরি অর কুবাংরো ঙাগো লাকমাখেইংগে। য়িগিলি আখ্রা লুঃউতয়ক কুঃনামিনা লাঃগি, য়াংসুউগু কুবাংরো লাকখেইংতিঃ। 44কুবাংরো তয়ক্কা তয়ক ম্যাকন্হা রাঃফু চিইমা ম্হেকেতিঃ, য়িগিলি থাওরা ফোরাগারা ম্যাকন্হা রাফুঃগু মাক্রেইংগে। য়াংনক্ পজং লুঃউরো আক্যুইং রানইংগেফুলিঃ? 45চিঃমা মাতওয়কগেকি, ফাখাংবামাঃ কুবাংরোগু আপ্রইসি খ্যামিঃ। য়িগিলি কুবাংরো যা মোশিগু চিঃমা ম্যাক্কেলিরিলিঃ, য়াং মোশি কুবাংরোগু আপ্রই খ্যারিঃ। 46কুবাংরো মোশিগু ক্যুইংগেলেইগি, ঙাগুলি ক্যুইংগেলিইফু আক্রংগা মোশিচাঃ ঙাগো য়ুউরো রুইলিরিঃ। 47য়িগিলিঃ যাখা য়াংসুউ রুইচাগু মাক্যুং, য়াংদেমাঃ যাখা ঙাচাগাগু ক্যুংফুলিঃ?”
Tans Gekies:
যোহন 5: BBSRMZ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
