যোহন 3
3
আসঃ লাঃচা লুঃউরো
1ফরীশীরো আতুওয়ংমা নীকদীম নামিনা যিহূদীরোগা গংখ্যুক তয়ক হিকরিলি। 2তারাক ঞিঃনিই য়াংসুউচা যীশুবাদুঃ লাঃরো প্রলিরি, “ছারা, ঙারো সিকরি কোবাংচা তয়ক ছারাপৈং থাওরা ফোরাগা লাঃচা, আক্রংগা কোবাং যাপুয়েং এংঅফুয়িই অলুক লুকতিলি, থাওরা ফোরা নক্কা মিহিকগি, তয়কলি য়াংচাগু মুলুনৈং।”
3যীশুচা নীকদীমগো প্রলিরি, “ঙা নাক্কো আম্হেং প্ররি, আসঃ প্যাংরো পিধিসেংথি মুয়ুউব্রি, তয়কলি থাওরা ফোরা ঈ নেংঙাইংদগো মাম্রাংহু।”
4য়াংখা নীকদীমচা য়াংসুউগু প্রলিইরি, “লুঃউচা ওয়াগ্রি ফ্রই লাঃখাগি, যাপুয়েং প্যাংরো প্রেংব পিধিসেংথি য়ুঃফুলি? তুদিয়া আখিংমা মিঃখাং আওয়েংমা প্রেং লাঃরো, য়াংসুউ প্রেংরো পিদিসেংথি য়ুউনৈং লঃ?”
5আফ্রিমা যীশু প্রলিরি, “ঙা নাক্কো আম্হেং প্ররি, রিঃনা সেংস্যাংস ওয়িঞেংগা পিধিসেংথি মুয়ুব্রি, তয়কলি থাওরা ফোরা ঈ নেংঙাইংদদুঃ মুওয়ংনৈং। 6লুঃউগা যা মুয়িংরি য়াচাচা ফ্রইতি লুঃউ অর যাচা সেংস্যাংস ওয়িঞেংগা মুয়িংরি য়াংচাচা ফ্রইতি ওয়িঞেং। 7ঙা নাক্কো প্রলিরিচাগা, কোবাংরোমা অাসঃ প্যাংরো পিধিসেংথি য়ুউফু আঃলু হিকরি, দিঃ চাগো ক্রারো এংমমগি। 8লিইচা যাদুঃ থাঃখ্যাংলি, য়াংচাদুঃ থাঃরি অর কোবাং য়াং লিই আসেংগু ক্রারি, ছুগি যাচাগা লাঃরিলি মুহুক্কি যাদুঃ লাঃরিলি য়াংচাগো কোবাং মিসিক। সেংস্যাংস ওয়িঞেংগা যাসুরো মুয়িংরি, য়াংসুউরোলি তেথেং য়াংপুয়েং ফ্রইতি।”
9নীকদীমচা যীশুগু মিংলিরি, “দিঃচা যাপুয়েং ফ্রইফুলিঃ?”
10য়াংখা যীশু য়াংসুউগু প্রলিরি, “কোবাং ইস্রায়েলীরোমা ছারা ফ্রইরোলি, দিঃচারোগু নাঃমিলি লঃ? 11কোবাংগু আম্হেং প্ররি, ঙারো যাচা সিকরিলিঃ, য়াংচারা প্ররি অর যা ম্রাংরিলিঃ-য়াংচাগু সাকসি পিইরি, য়িগিলি কোবাংরোচা ঙাক সাকসিগু লাক মেখেংগে। 12ঙা কোবাংরোবামা লঃগা আক্রংলিলাগো য়ুউরো প্রগি, য়াংখাগা মুক্যুংগে, য়াংদেমা গংখাং ফুং আক্রংলিলাগু য়ুউরো প্রগি, যাপুয়েং প্যাংরো ক্যুংগেফুলিঃ?
13“যাসু গংখাং ফুংমা নিংরিলি অর গংখাং ফুংগা ছাংলেতিলি, য়াং মনুসাওয়া সাঃ মুহুকপ্রি অর তয়কলি গংখাং ফুংদুঃ মাতাকসি। 14মোশি যাপুয়েং প্যাংরো সিঃলিই প্রাংমা আরেমা, থুঃউ ম্রিংগো আথাকতু তাংলিরি, য়াংপুয়েং মনুসাওয়া সাঃগুলি আথাকতু তাংরাফু, 15যাফুলিছুগি খ্যাংসুমুছু মনুসাওয়া সাঃগু ক্যুংগি, য়াংসুউ তিম্রিজ বাওয়াগু রাঃরি।
16“থাওরা ফোরাচা লুঃউরোগু খ্যলিরিচাগা, কোঃমা সাঃ তয়ককো হ্লুলিরি, যাফুরিছুগি খ্যাংসুমুছু য়াং সাঃ অাপমা আক্যুং থাঃরিছুগি, য়াংসুউ মাপ্যাকপ্রি অর তিম্রিজ বাওয়াগু রাঃরি। 17থাওরা ফোরাচা লুঃউরোগু আপ্রইসিঃ প্রাফুকিজু, কোঃ সাঃগু লঃগাদুঃ মুরুওয়েলি, প্রফুছুগি লুঃউরোচা সাঃকিজু আপ্রইইকা ক্যুয়েম্রক রাঃঅং, য়জংকিজুরা সাঃগু রুওয়েলৈতি। 18যাসু য়াং সাঃগু ক্যুংরি, য়াংসুউগু য়ুউরো তাঃরা মফ্র, ছুগি যাসু মক্যুংলি, য়াংসুউগু আপ্রইস্যাংছুরো হ্রিঃগাকাবাং ম্হেরো থাঃব্যা। আক্রংগা য়াংসুউ থাওরা ফোরা ঈ সাঃগু মুক্যুংলি। 19য়াংসুউগু আপ্রইস্যাংছুরো ম্হেরি আক্রংগা লঃগামা আলাং লাঃলিইরি, য়িগিলি লুঃউরো অলুকচা মকং ফ্রইরো, লুঃউারোচা আহ্লাংগুচা থাক আমৈইগো আম্যা সায়াগেলিরি। 20খ্যাংসুমুছু মকং অলুককো লুক নিংগি, য়াংসুউ আলাংগু মাসায়াব্যা। য়াংসুউ মকং অলুকচা পুওয়ংরো থুওকমি ক্রকরো, য়াংসুউচা আহ্লাংদুঃ মালাঃব্যা। 21ছুগি যাসু আকং লেংমা লাঃরি, য়াংসুউ আলাংদুঃ লাঃরি যাফুলিছুগি য়াংসুউ অলুকচা থাওরা ফোরা ঈ ছেংদা আলৈই প্রানৈংঅং।”
যোহন সাকসি পিইচা
22য়াংনক যীশুচা কোঃ তিবিরোনা যিহূদীয়া প্রিনিদুঃ লাঃখাগেতি। য়াংদেমা যীশুচা কোঃ তিবিরোনা লৈংগারাক নিংলিরি অর লুঃউরোগু রিঙুক মাঙ্গালা পিইলিরি। 23শালীম নাঃমিনা তুখু রুওয়াবামা ঐনোন খঃরো তুখু আঃরা, য়াংখা যোহনচা রিঙুক মাঙ্গালা পিইরি, আক্রংগা য়াং আঃরামা আম্যা রিঃই হিকলরি অর লুঃউরোলি লাঃরো রিঙুক মাঙ্গালা লাক খেংগেলিরি। 24য়াখাতয়ং যোহনচা থংমা মাক্যাসিই।
25য়াং আখিংমা বাসারিঃ আলৈই মকং স্যাংফু আক্রংলিলাগু য়ুউরো যোহন তিবিরোচা যিহূদীনা আঙ্রাং-আতাং চাঃগা প্যাংগেলিরি। 26নক্কা য়াংসুউরো যোহনদুঃ লাঃরো প্রগেলিরি, “ছারা, যাসু যর্দন খ্যং থুউ ব্রাক্কা কোবাংনা আতু হিকলিরি অর যাসুগু য়ুউরো কোবাং সাকসি পিইলিরি, ক্রি, য়াংসুউ রিঙুক মাঙ্গালা পিইরি অর আলুংসো বাদুঃ লাঃরি।”
27দিঃ চাঃগা আফ্রিমা যোহন প্রলিরি, “গংখাং ফুংগা মিপিইগি, তয়কলি তুখু মাঃরানৈং। 28নাংরো ঙা চাঃগাগু ক্রারো হিকচাগা, ঙা মশীহ মুহু, য়িগিলি ঙাগো য়াংসুউ হ্রিইগা রুওয়েলৈতি। 29যাসু আলাকমা সিঃমিংগো খ্যালৈতিলি, য়াংসুউরা সামাক। সামাক লং মিছুয়ি রেঃরো সামাক লং চাঃগাগু নাঃথংরি অর য়াংসুউ আসেংগু ক্রারো কংগং প্যরি। য়াংচাঞ্যং ঙামা আপ্যলি গিনি আব্রিচুং ফ্রইরি। 30য়াংসুউ ক্রিরো তাকফু অর য়াংসুউগু ঙা আঃরা হ্লেরো পিইরাফু।”
31যাসু আথাক্কা লাঃরিলি, য়াংসুউ আলুংসো আথাক্কা। যাসু লঃগাগা লাঃরিলি, য়াংসুউ লঃগামা, অর য়াংসুউ লঃগা চাঃগারা প্ররি। য়িগিলি যাসু গংখাং ফুংগা লাঃরি, য়াংসুউরা আলুংসু থাক আথাক্কা। 32য়াংসুউ যা ম্রাংরিলি অর ক্রারিলি, য়াংচারা সাকসিই পিইরি, ছুগি তয়কলি য়াংসুউ সাকসিইগো লাক মেখেংগে। 33যাসুরা য়াংসুউ সাকসিইগো লাক খেংলিরি, য়াংসুউচা লাক খেংসাগা নিংরো প্রালিরিচাগা, থাওরা ফোরা যা প্ররি য়াংচা ম্হেংরি। 34থাওরা ফোরা যাসুগো রুওয়েলৈতিলি, য়াংসুউচা থাওরা ফোরা চাঃগাগুরা প্ররিব্যা। আক্রংগা থাওরা ফোরাচা য়াংসুউগু সেংস্যাংস ওয়িঞেংগু আব্রিচুং পিইরো হিকরি। 35ফাখাাং সাঃগু খ্যতি অর সাঃ আলাকমা আলুংচা পিইলিরি। 36খ্যাংসুউমুছু সাঃগু ক্যুংরিছুগি, য়ংসু খ্যাং খ্যাং তিম্রিজ বাওয়াগু রাঃরি, ছুগি যাসু সাঃগু লাক মেখেংলি, য়াংসুউচা থুউ বাওয়াগু তাখালি মাঃরামু, প্রফুছুগি থাওরা ফোরা য়াংসুুুউগো মেইং হিকফু।
Tans Gekies:
যোহন 3: BBSRMZ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
