Matew 9
9
Jesus tremoltuy kiñe wentru lañmalelu ñi kuerpu
(Marku 2.1-12; Luka 5.17-26)
1Dew rupalu tüfachi dungu, Jesus konpuy kiñe farku mew. Notuy nome ti pichi lafken mew, fey puwtuy kisu tañi waria mew, Kapernaum pingelu. 2Feyti mew yelelngey kiñe kutran lañmalelu ñi kuerpu, kudulelu kiñe pichi ngütantu mew. Feymew Jesus ngüneduamfilu tati pu che ñi rume feyentulen engün, feypifi tati kutran:
—Yafüluwnge, weni. Dew wiñoduamangetuymi tami yafkan mew —pifi ti wentru.
3Fey kiñeke wentru kimeltukelu ta Moyse ñi ley dungu, allkülu tüfachi dungu, rakiduami engün: “Fey tüfa tañi feypielchi dungu mew notukafi ta Ngünechen.” 4Jesus am kimnielu tañi femngechi rakiduamkülen engün, fey ramtufi ti pu wentru:
—¿Chumngelu anta fente wesa rakiduamküleymün ta eymün? 5¿Chem pin anta doy küdawngelay? ¿Tañi wiñoduamangetuael che yafkan mew, kam ñi tremolngetuael kiñe kutran? 6Feymew tamün kimael tati Wentrukünuwpalu ñi nien ta pepiluwün tüfachi mapu mew ñi wiñoduamatuafiel ta che ñi yafkan mew, feypiafiñ tüfachi lemuwkenochi kutran:
—Witratunge. Nütunge tami ngütantu, fey amutunge tami ruka mew —pi.
7Fey tati kutran, lañmalelu ñi kuerpu, witratuy ka amutuy tañi ruka mew. 8Fey tati pu che, pefilu tüfachi dungu ñi rupan, llükay ka püramyefi engün ta Ngünechen femngechi pepiluwün tañi pengelel ta wentru mew.
Jesus dullifi ta Matew
(Marku 2.13-17; Luka 5.27-32)
9Jesus tripatuy ta tiye mew, fey pefi ta kiñe wentru Matew pingelu, anülelu chew tañi kofrakemum ta impuestu Romangealu. Fey Jesus feypifi ta Matew:
—Inaen.
Feymew Matew witrapüray, fey inaeyew.
10Feymew Jesus amuy ñi imeael Matew ñi ruka mew, rume fentren tati kofrakelu impuestu ta Romangealu, fey kakelu wesake dunguyen che puwi engün. Ka femngechi fülkonpuy engün ta mesa mew kiñentrür ñi iyael Jesus engün ka tañi pu disipulu. 11Fey tati pu farisew, pefilu tüfachi dungu, ramtufi engün Jesus tañi pu disipulu:
—¿Chumngelu am tamün kimeltufe kiñentrür imekey tati kofrakelu impuestu ka ti pu yafkafe engün?
12Fey Jesus allkülu ñi feypin engün, fey feypieyew:
—Tati külfünkülelu ka mongelelu duamlay engün ta lawentuchefe, welu tati pu kutran may ta duami ta lawentuchefe. 13Amumün ka kimtukuaymün ñi chem piel ta tüfachi wirin dungu: ‘Iñche may ta duamnien tamün kutranpiwkeyecheael, welu tamün chalintukumekenoael tati langümelchi kulliñ müten.’#9.13 Osea 6.6. Iñche am küpanolu tati pu küme piwkekawünnngelu mew, welu may tati pu yafkafe ñi wiñorakiduamtuael —pi.#9.13 Kiñeke kuyfi wirin mew ngelay: «ñi wiñorakiduamtuael».
Jesus ramtungey tati ayunan wimtun dungu mew
(Marku 2.18-22; Luka 5.33-39)
14Fey Juan tati Fawtisachefe tañi pu disipulu fülkonpuy engün ta Jesus mew, fey ka ramtupufi:
—Iñchiñ ka tati pu farisew ayunakeiñ, fey ¿chumngelu am tami pu disipulu kay ayunakelay engün?
15Jesus llowdungueyew:
—¿Weñangküleafuy am tati pu mangelngelu kiñe mafün mew, petu tañi mülen tati nofio ta kisu engün mew? Welu akuay ti antü ñi yengetuael tati nofio, fey wülake ta ayunayay engün. 16Iney rume ta lapatule ta kiñe llud takuwün, lapantukulelkelafi ta kiñe we katrün pañu. Tati lapantukuelchi we katrün pañu trüküfkey, fey doy wesa wikürkey tati llud takuwün, fey doy alükey tati wichafün ti lapatukeel. 17Ka femngechi tukungekelay rume we pulku kiñe llud kueru mew. Femngefule, wikürafuy tati kueru, fey tati pulku ka tati kueru ngünapüdayafuy. Feymew feley tañi tukungeael tati we pulku kiñe we kueru mew, femngechi tañi fente küme chañmatuael tati epu chemkün.
Jesus tremolfi kiñe pichidomo ka kiñe domo
(Marku 5.21-43; Luka 8.40-56)
18Petu dungumekelu ta Jesus, akuy kiñe longkolelu tati pu judiu mew, fey lukutunagi kisu ñi fülpüle ka feypieyew:
—Tañi ñawe fewla we lapey, welu eymi amulmi ka fampuwülelfilmi tami kuwü, fey wiñomongetuay.
19Fey Jesus witrapüray, ka kompañnieeyew tañi pu disipulu, fey amuy tati wentru engün. 20Feymew kiñe domo amulerkelu mari epu tripantu dewma ñi kutrankülen, kachükerkelay ñi mollfüñ, fey fülkontufi ta Jesus furi püle, fey idañmafi ñi wechuñ takuwün. 21Famngechi rakiduamürkelu am: “Idañmafili müten tañi takuwün, tremolewetuan.” 22Welu Jesus wiñokintuy, fey pefi tati domo ka feypifi:
—Yafüluwnge, papay. Tami feyentun mew ta tremotuymi.
Feychi lelen mew müten tremolewetuy.
23Fey Jesus puwlu tati longko ñi ruka mew, ka pepufilu tati pu kim dungulu weñangkün musikatun#9.23 Dew layüm kiñe judiuche, kintulngekey kiñeke kim flawtatukelu ka femngechi kakelu che kullingekefuy ñi ngümameael femngechi ñi doy küme adtripayael ti ngüman. ka ti pu che ñi ngümakawmeken, 24fey feypipufi ti pu che:
—Tripatumün ta tüfa mew. Tüfachi pichidomo ta lalay. Re umawküley müten.
Fey Jesus ayeñeeyew ti pu che, 25welu kisu feypifi ñi tripayael engün wekuntu ruka mew. Fey wüla konpuy ka nüñmapufi ñi kuwü tati pichidomo, fey tati pichidomo witrapüratuy. 26Fey kom tiyechi trokiñ mapu mew mülechi pu che kimi femngechi dungu ñi rupan.
Jesus tremolfi ta epu trawma
27Fey tripapatulu ta Jesus tiye mew, epu trawma ta wirarkülen inaeyew:
—¡David mew dullielchi Yomelche,#9.27 David mew dullielchi Yomelche: ti pu judiu ñi feypikefelchi üy ñi tukulelafiel ti Montulchefe, fey David ñi Yomelchengeael. kutranpiwkeyemuyu!
28Feymew Jesus konpulu ti ruka mew, tati epu trawma fülkontueyew, fey Jesus ramtufi ti epu trawma:
—¿Feyentuymu anta eymu iñche tañi pepi femael ta tüfachi dungu?
—May, Ñidol —llowdunguy ti epu wentru.
29Feymew Jesus idañmafi ñi nge tati epu trawma, ka feypifi:
—Femngechi felepe chumngechi tamu feyentulen ta eymu.
30Fey pelotuy engu. Feymew Jesus ta fente küme feypifi tati epu wentru:
—Feypilayafimu iney no rume femngechi tañi kimngenoael tüfachi dungu.
31Welu, tripapatulu müten, nütramkayngu kom tiyechi trokiñ mapu mew tañi femel ta Jesus.
Jesus tremolfi ta kiñe ketrongechi wentru
32Petu tripatulu tati epu trawma, küpalngey Jesus mew kiñe ketrongechi wentru konweküfülelu. 33Fey Jesus wemünentufilu müten tati weküfü, tati ketrongechi wentru pepi dungutuy. Fey tati pu che afmatulen feypi:
—¡Fey tüfa famngechi dungu chumkawnorume pengekelay Israel mapu mew!
34Welu tati pu farisew feypiyey engün:
—Tati longkolelu ti pu weküfü mew elufi tüfachi wentru feychi pepiluwün tañi wemünentuafiel tati pu weküfü.
Jesus kutranpiwkeyefi tati pu che
35Jesus miyawenturkey kom ti pu waria che mew ka kom lelfüntripa mülechi pu che mew. Kimeltuyawi kom sinagoga mew. Kimeli tati küme dungu Ngünechen tañi longko ülmenngen, ka tremolyefi fill kutrankülelu ka ngañkolelu. 36Fey Jesus pefilu tati pu che, kutranpiwkeyefi kisulelu engün am kiñe kechan ufisa reke nienolu tañi kamañnieaetew. 37Feymew feypifi tañi pu disipulu:
—Rüf dungu mew pütrüley ta kosecha, welu küdawfe rume pichiley. 38Feymew ngillatuafimün ta eymün tati ngenngelu tati ngan ketran mew ñi werküael küdawfe tañi kosechayael ti fün ketran.
Tans Gekies:
Matew 9: ARN
Kleurmerk
Deel
Kopieer
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Faf.png&w=128&q=75)
Wil jy jou kleurmerke oor al jou toestelle gestoor hê? Teken in of teken aan
El Nuevo Testamento en Mapudungun © Sociedades Bíblicas Unidas 1996.