Kejadian Uram 4
4
Kain ab Habel ab deyok
4:1-16
1Adam biryi er ner Hawa ab tonkwa kunmarei ani, er ner mundu bobmou. Mundu boamwe ani, sal mi deibmou. Ura, “Er Iya Erebdobnyi biryi karebmanir ba, a mi deibman,” ena ati, a mi si ara Kain eboka si dobmou. 2Kurandei ani, tubto er ner Hawa mundu boboka sal akwe ton deibmou. Ura, a deibmou mi si ara Habel eboka si dobmou. Ba, er weit Habel bira bisam kambing domba wininanyi kibmou. Ba, Kain bira kwaning wa ibde kunanyi kibmou. 3A talak kuramnyi ani, uki tentok tum ara Kain er wa iramwe dinyi kiboka Er Iya Erebdobnyi biti dama deiboka uk dabkwamouci, uk sekmou. 4Ba, a tum akwe Habel erbabyi, er bisam kambing totoa, domba totoa winiramwe bisam asi mi yuma deiramwe bisam akwe wiboka, Er Iya Erebdobnyi biti obdeiboka minta akwe dama deibmou. Ba, Er Iya Erebdobnyi biryi Habel bisi, “Teleb,” tenebmouci, ersi kisal dakmou. 5Ba, Kain biryi er kouramwe dinyi dama deibmou dinyi ara Er Iya Erebdobnyi biryi Er li kubmou aryi ersi kisal dangna kum kubmou. Ba, Kain er kanya yu weik kubmouci, er urasin ababyi yu urasin bobmou. 6Ura, Kain er yu urasin bobmou ati, Er Iya Erebdobnyi biryi Kain bisi ato ebmou, “Kan unati kanya tin bukmakirci, yu urasin bobmarim do? 7Telebto akwe kuronmatum ura, lengleng en urasin boboka si kiribmatum. Bok, kan urasin lengleng ena kum kubmarim aryi, kan kanya dam malyito kun dinyi wengyankwamakirci, yu kam dirbumnande to dirbumakir. Ati, ukura kan kanya dam asi urasin lengleng eboka, teleb kanya dobdobminci, mikib yabdobdum. Ukubminyi ura, malyi kun dinyi kan dam wengyangana kum kubkwankir!” ebmou. 8Ura, Kain biryi er weit Habel bisi ato ebmou, “Wa in dam bindobkwinim!” ebmou. Ura, binmarei ani, sirya wa in dam binmarei ura, Kain yu wekmou. Ura, lukdandoka er weit Habel bisi obmou ba, dibmou. 9Uca, Er Iya Erebdobnyi biryi Kain bisi ato ebmou, “Kan weit Habel bira dan kunmar do?” eboka asibmou. Uca, Kain biryi, “Ni kum bikman, Nira ni weit kalingnanyi kununa kuma!” ebmou. 10Uca, Er Iya Erebdobnyi biryi ato ebmou, “Kan weit asi una kubmarim do? Kan weit er ining tukwe umbura dam aryi nisi uram donmanirci, ‘Ni obmaniranyi bisi erbabyi kisok dakdum!’ eboka molobmanir ati ebman,” ebmou. 11Ani, ton ato ebmou, “A mutuk dam aryi kanci kan weit asi orabumwe talak aryi kan weit er ining ara a mutuk aryi yibde ati, kanda a mutuk dam kuboka wa kum ironkwandim. 12Sangkuna a mutuk dam wa ibminyi ababyi aboka nong kum kubkwankir. Eda, kanda tingyangananyi kuna talyi yuk mutuk nirya yibinkirikwandim,” eboka submou. 13Uca, Kain biryi Er Iya Erebdobnyi bisi ato ebmou, “A ikin weik dinyi karebnirim ara ni kanya mambul weik kubmanir. 14Ati, Kanci nisi Kan dam aryi yakdonoknirim ba, binkwaman. Dantam yibanyi ba, ninyi aryi nisi asing eibningnyi ura, tanglona kum kubkwaning, eda obkwaning,” ebmou. 15Uca, Er Iya Erebdobnyi biryi Kain bisi ato ebmou, “Kansi okina kum kubkwanking, unanyi biryi asing eiboka obkirinyi bira sunbabyi ninyi tabaryi kisok dakwaming,” ebmou. Ura, Er Iya Erebdobnyi biryi Kain bisi, “Aminda yuk ninyi ab ebdangiryi obingnyei,” tenen yukto keica nun Kain er nong deici deibdongobmou. 16Ura, Kain bira Er Iya Erebdobnyi dam aryi anaboka Eden mutuk yaletam kuboka mutuk si Nod#4:16 Mutuk si, “Nod,” ara duknurban mutuk ena ati, Ibrani uram aryi, “Nod,” enung. dam bindoka kuramwe.
Kain ab, Set ab, Enos ab aryi mabwe yaldakmai deyok
4:17-26
17Kain ner dobmou ura, kunmarei ani, er ner mundu boboka sal deibmou. Ura, a mi si ara, “Henokh,” eboka si dobmou. Ani, Kain weik atei doramwe ani, akatei si ara er mi si makmak akwe, “Henokh,” eboka si dobmou. 18Ura, Henokh biryi er mi si Irad deibmou. Ba, Irad er mi si Mehuyael deibmou. Ura, Mehuyael biryi Metusael deibmou. Metusael biryi Lamekh deibmou. 19Lamekh biryi ner bitinyi dobmou, ton ner si ara Ada dobmou. Ba, ton ner si ara Zila dobmou. 20Ura, ton ner Ada biryi Yabal deibmou. Ba, Yabal deibdoba mabwe ara keis ol ai doboka kuramiryi, bisam domba totoa, kambing totoa winin nang kuramnyi. 21Yabal er weit si ara Yubal kuramwe. Ba, Yubal deibdoba mabwe ara bilul si kecapi ab, suling ab kwemni nang kuramnyi. 22Ani, Zila bibabyi mi deibmou. A mi si ara Tubal-Kain deibmou. Tubal-Kain deibdoba mabwe ara kat keil si besi ab, tembaga ab aryi kikniramnyi nang kuramnyi. Ba, Tubal-Kain er malner si ara Naama kuramwe.
23Uki tentok tum ara Lamekh biryi er nerabwe bitinyi asi ato ebmou,
“Ada ab, Zila ab ni uram ebkun uram asi kekebdurum!
Sal kamnyi tentok aryi nisi onmou ba, ni bol ara nebmanou.
Anyi biryi nisi dilaka sakeibmanou. Uca, niryi anyi bisi obmase ba, dibwe.
24Kain bisi obingnyi ba, kisok dakwamangnyi ara ninyi tabaryi oboka kisok dakwanung.
Ba, ni Lamekh bisi obningnyi ara ninyi yubwa 77 baryi oboka kisok dakwanung,” ebmou.
25A talak kunmarei ani, Adam ner Hawa mi mundu bobmou. Mundu bobmou ani, sal mi deibmou. Ura, a mi si ara Set eboka si dobmou. A mi si Set eboka si dobmou ara, “Ni mi Habel bira er du Kain biryi oamwe asi, Er Iya Erebdobnyi biryi tubto Habel unuboka a mi karebnir,” ena ati, a mi si Set eboka si dobmou. 26Set sirya neboka ner dobmou ura, sal mi deibmouci, a mi si Enos eboka si dobmou. A talak aryi Er Iya Erebdobnyi si bikoka, Er Iya Erebdobnyi si weik ebkalibmai.
Tans Gekies:
Kejadian Uram 4: MTG
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2007 (New Testament), @LAI2022 (Old and New Testament)
