မာကု 12

လော်င်ကျောႈကကည်း ကညျားလိုင်းပ္လါ်ည်းဆပျီတ်

မတဲ ၂၁း၃၃-၄၆၊ လုကာ ၂၀း၉-၁၉

1ႎါည်းဒီး စံဝ်ယေဆု စီႎီးခည်နှဲဘိုး ကျောႈကကည်းတော်န်းမျိုး တာ့်ကဲ စီဒါ်ႈ “မေဲႈလာ်တူအီးဒီးအူချှေႈ တီႇဆမ့်အူန်းဖာ်ႈ လိုင်းပ္လါ်ည်းဆပျီတ် စီရေဲန်းရေဲင်းလိုင်း လိုင်းအူန်း။ အန်းစီကေဲႈအူန်းဘိုးကတဲဝ်း ဒီနံင်နိုတ်ႏတာ့်ပ္လါ်ည်းဆပျီတ် စီရေဲန်းဘိုး ထေင်ႏလာင်း။ ႎါည်းဒီး အန်း စီဒဲႈကဲ ရေဲန်းကဆာင်း၊ အီးမိုႈအန်း စီလည်လေႈဟာဝ်း ပါ့်ကီုင်းဒီဟည်း။ 2ဘိူဝ်စာ်မ်းဒေဲႈတာ် အချီုင်ဆီန်းပ္လါ်ည်းဆပျီတ်ဒီး စာနံင်ဟာဝ်းလာည်း ပ္လါ်ည်းဆပျီတ်ထန်လိုအန်းတာ်လာ်ဘိူန်း အန်းစီဆူည်ႇလာ် တူအီးပံင်ဆူည်ႇအန်းကဲ အူချှေႈ ဟာဝ်းမှာန်းတာ့်ချှေႈအီးရေဲန်း ကဆာင်းကဲဒီး။ 3ဘိူန်ဇေဲန်း ချှေႈအီးရေဲန်းကဆာင်းကဲဒီး စီကမ်းပေါႇ ချှေႈပံင်ဆူည်ႇဒီး စီကရော်မ်ငါ်ႈလာ်အန်း၊ စီပ္လေႈအန်းႎီးဟာဝ်း လလိုည်းလိူည်။ 4ကညျားလိုင်းဒီးမာ် စီဆူည်ႇ တူအီးပံင်ဆူည်ႇအန်းကဲ အူချှေႈ ႎီးဟာဝ်းဘိုး ပါ့်လိုင်း၊ ဘိူန်ဇေဲန်း ကဲအီးရေဲန်းကဆာင်းကဲဒီးမာ် ငါ်ႈဟပ်ဖာ်ႈကေဲန်းအန်း စီရေဲန်းဒဲႈနှာင်းအန်းကံပ်ဆာည်းအီး၊ ကဲ စီပ္လေႈအန်းႎီး။ 5ႎါည်းဒီး ကညျားလိုင်းဒီးမာ် စီဆူည်ႇဟာဝ်းထဲင်ဘိုးအူချှေႈ၊ အီးမိုႈချှေႈဒီးမာ် ကဲ ပယာ်မ်းႎီုန်။ ႎါည်းချှေႈဒီး ဂါဆီင်မိုႈပံင်ဆူည်ႇဒေဲႈအန်းလဘာ်န်းမာ် ချှေႈပံင်ငါ်ႈမာ် ကဲငါ်ႈ၊ ချှေႈပံင်ပယာ်မ်းမာ် ကဲပယာ်မ်းႎီုန် ဘာည်းဇေဲန်း။ 6ဘိူန်ဇေဲန်း ကညျားလိုင်းပ္လါ်ည်းဆပျီတ်ဒီးမာ် စာအန်းနံင်ဆူည်ႇဟာဝ်းဘိုး ဂေါ်ည်းလိူည်ဖာ်ႈ ကော်န်းကမေဲႈအန်း အူချှေႈ။ အန်းစီ တဂေန်းဒါ်ႈ ‘ဆာ်အံဝ်းပ္လေႈဟာဝ်း ကော်န်းအံဝ်း၊ ကဲနံင်ရိုဆေအူန်း ယေဝ်း။’ စံင်နည် အန်းစီပ္လေႈဟာဝ်းလာ် ကော်န်းကမေဲႈအန်းဒီး။ 7ဘည်ဘာည်းမာ် ကဲစီလည်ဒါ်ႈ ‘ချှေႈနီး မိုႈပေါႇ ချှေႈအီးနံင်စာမ်ချမ်း ကညျားလိုင်းနီး။ ဒေဲႈ၊ ဟာႈအဲကယာင် ပယာ်မ်းႎီုန်အန်း၊ ဆာ်ဘာည်းဇေဲန်း အဲစီနံင်ဘိူန်းလာ် ဆီမ့်လာည်း လိုင်းပ္လါ်ည်းဆပျီတ်နီး။’ 8ကဲစီကမ်း ပယာ်မ်းႎီုန်ဖာ်ႈ ကော်န်းကညျားလိုင်းဒီး စီဒိူည်းဟာဝ်းႎီုန် ဒရာ်ည်ႇလိုင်းပ္လါ်ည်းဆပျီတ်။

9ဆီပဲထင် ကညျားလိုင်းဒီး နံင်ရေဲန်းဘာည်းမှေဲ။ အန်းစီနံင်ဒေဲႈ လာည်းပယာ်မ်းႎီုန် ကဲအီးရေဲန်းကဆာင်းကဲဒီး၊ စီနံင်တေဲႈလိုင်းဒီး အန်းစီနံင်အာပ်ဒဲႈ အီးဟည်းရေဲန်း။ 10ပဲအာဝ်တံမ်ဒီႈဟီုဝ် ပံင်ကိက်အူန်း ခေဲင်းဘေဲႇကျာမ်း အီးဒါ်ႈ

‘မာဝ်း ပံင်ပႎဲႈႎီုန်ကဲအီးရေဲန်းခလေဲပ်တဲက်ကဲဒီး၊

ဘော်က်ဘာ်န်း အီးမိုႈမာဝ်းဒီး နံင်ဂေါ်ည်းဒီအီးမိုႈအန်းအခည်း

ဒီရေဲန်းဒဲႈ နှာင်းခလေဲပ်ကတော်န်းမံန်ချှီႇဟာ့်။

11ဇီုင်းလှေနီး မိုႈ ပံင်ရေဲန်းအူန်း စံဝ်ကညျားဒီး၊

အန်း စီမှေဲမ်အာမ်းပေါႇခည်း တာ့်အဲ’။”

12ဘိူန်ဇေဲန်း တူအီးဒါင်းကဲဒီးမာ် ဂေါႇမိုႈကဲဟည်နာ်ႇလာ် ကျောႈကကည်းဒီး ဆီင်ဒါ်ႈတာ့်ကဲ၊ ကဲစီဟြာ်ည်ႇလာ်အီုန်ဒါ်န်း စာနံင်ကမ်းအန်းစံဝ်။ ဘည်ဘာည်းမာ် ဂေါႇမိုႈကဲယံဝ်း တူအီးဂီုန်းကဲ၊ ကဲစီလည်လေႈဟာဝ်း ဒအန်းစံဝ်။

ဘည်ဘာည်း နံင်လိုထာမ်း အခေါ်န်

မတဲ ၂၂း၁၅-၂၂၊ လုကာ ၂၀း၂၀-၂၆

13ႎါည်းဒီး ကဲစီဆူည်ႇလာ် တူအီးစုမ်းဖာရိဆဲ ကာည်း တူအီးစုမ်းတားကညျားဒါင်း ဟေရိုတ်ကဲကလံက် ဒေဲႈပါ့်အန်းစံဝ် စာနံင်ဟြာ်ည်ႇ ဒီနံင်ကလေဲပ်ကျောႈအန်းစံဝ်။ 14ဘိူဝ်ဒေဲႈစာ်မ်းကဲတာ် ပါ့်အန်းစံဝ်၊ စီဒေဲႈယော်လာ်မှောႇအန်းစံဝ် ဒါ်ႈ “အိူဝ် ဆြာ၊ ယေးနာ်ႇအိူဝ် မည်စံဝ်မိုႈပေါႇ ချှေႈအီးဆီုဝ်ယိုး။ မည်းအာဝ်တိူဝ်ႈငါည်းချှေႈမှေဲ့ အာဝ်ယံဝ်းဆိ။ မည်းပနံဝ်းဒဲႈလိူည် ကျောႈတြားအီးမိုႈအီးမှာန်အန်း တောႇဘာည်းကျိုက်စံဝ်ဖြား။ အဲဒဲႈအခေါ်န် တာ့်တားကညျားဒါင်းယောမကဲ၊ ချှင်တော် အာဝ်ချှင်တော်၊ ကလာင်းနှဲဟံင်း ယေးနာ်ႇ။”

15ဘည်ဘာည်းမာ် အန်းစံဝ်ဟည်နာ်ႇပေါႇ မိုႈတာ် ကဲရေဲန်းထင်နှေး လိူည်တူအီးချှီႇ၊ အန်းစံဝ် စီမှောႇလာ်တာ့်ကဲ ဒါ်ႈ “ဆီမ်ဘာည်းပဲဆံမ်ဆီင် စာမ်းလာ်အံဝ်း၊ တေဲႈဒေဲႈဟံင်းအံဝ်းတိူဝ်ႈ ရိူန်းတဲင်ကား အူမေတ်။”

16ကဲမာ် တေဲႈဒေဲႈပေါႇ၊ အန်းစံဝ်စီမှောႇတာ့်ကဲဒါ်ႈ “တိူဝ်ႈဟံင်း တီင်ရိူန်းတဲင်ကားနီး အရာင်ဆီအန်းတောႇ၊ ဇီုဝ်ဆီအန်းကိက်အူန်း။”

ဘိူန်ဇေဲန်း ကဲစီႎီးဒါ်ႈ “တောႇအရာင် တားကညျားဒါင်းယောမ ကာည်း ဇီုဝ်အန်း။”

17စံဝ်ယေဆုစီႎီးဒါ်ႈလာ် တာ့်ကဲ “အန်းအီးဆဲင်တာ် တားကညျားဒါင်းမာ် စီဒဲႈ တာ့်တားကညျားဒါင်းဒီး။ အန်းအီးမိုႈ ပံင်ဆဲင်တာ်စံဝ်ဖြားမာ် ဒဲႈတာ့်စံဝ်ဖြားနာ်ႏ။” ဘိူန်ဇေဲန်း ကဲမာ် အာမ်းငါ်ႇဒို့ ပံင်ႎီးကလာင်းဒါ်ႈအန်းစံဝ်။

လော်င်ယာ်ည်ႇအီမ်းဒေဲႈဒယာ်မ်း

မတဲ ၂၂း၂၃-၃၃၊ လုကာ ၂၀း၂၇-၄၀

18ႎါည်းဒီး တူအီးစုမ်းဆာဒုကဲ ကဲမာင်ကလံက် စီဒေဲႈဇူးပါ့်အန်းစံဝ်။ စားကဲအီးမိုႈ တူအီးစုမ်းဆာဒုကဲ အာဝ်ညျှေဲမ်မ ဘည်ဘာည်းယာ်ည်ႇအီမ်းဒယာ်မ်းဒီး။ ကဲစီမှောႇဒါ်ႈလာ် 19“အိူဝ် ဆြာ၊ မောဆေကိက်ဒါ်ႈအူန်းဘာည်းညျေဲန်း ‘တူအီးအူချှေႈ အာဝ်မေဲႈကော်န်းႎါး ဆာ်ယာ်မ်းႎီုန်ဖာ်ႈပီးအန်း၊ ချှေႈအီးမိုႈႎါးအန်း နံင်လိုႎီးလာည်းဘိုး အည်းအန်း အီးမိုႈပီး ပီအန်းဒီး နှာင်းမေဲႈဒေဲႈ ကော်န်းႎါးခြိူဝ်းပီအန်း။’ 20စာအူဘော်က်၊ စီမေဲႈလာ်ကဲပီႎါးအီးမာည်းပူးချှေႈ၊ ချှေႈပီဒါင်းဒီး စီခါ်ႇလာည်းပီး၊ ညျံမ်မေဲႈမကော်န်းႎါး စီယာ်မ်းဟာဝ်း။ 21ဘိူန်ဇေဲန်း ႎါးအန်းအညီ စီႎီးလာည်းဘိုး အည်းအန်းချှေႈဒီး။ မိုႈလိူည်အန်းမာ် ညျံမ်မေဲႈမကော်န်းႎါး စီယာ်မ်းဟာဝ်း။ ႎါည်းဒီး အန်းဂီဘာည်းလိူည်ဇေဲန်း တောႇကံပ်မိုႈတာ်အလိုမ်။ 22တံန်နှေးဟာဝ်းဒို့ဘာည်းဇေဲန်း ကဲပီႎါးကဲဒီး အူချှေႈဟော်ည်ႇအူချှေႈ လာည်းဟာဝ်းလာ်အီးပဲန့်ဒီး အာဝ်မေဲႈမ ကော်န်းခံဝ်ချှေႈ ကဲပါ်ပူးချှေႈစီယာ်မ်းဟာဝ်းဒို့။ ဘိူဝ်တဟော်ည်ႇအန်း အီးပဲန့်ဒီးမာ် ဟည်ယာ်မ်းဟာဝ်း။ 23ဂေါႇမိုႈဘာည်းဇေဲန်း ဆာ်စာ်မ်းဒေဲႈ ဘိူဝ်မိုႈတာ်အချီုင်ယာ်ည်ႇအီမ်းဒေဲႈဒယာ်မ်း၊ အီးပဲန့်ဒီး စီနံင်မိုႈလာ် ပီးချှေႈမှေဲ၊ ဂေါႇမိုႈ ကဲပီႎါးပါ်ပူးချှေႈ ခါ်ႇလာည်းဒို့ အီးပဲန့်ဒီး တော်န်းချှေႈ။”

24ဘိူန်ဇေဲန်း စံဝ်ယေဆုစီႎီးဒါ်ႈ တာ့်ကဲ “ပဲကဲဒီး ပဲအာဝ်ကဘ္လူႈနာ်ႇမ ပံင်ဆီင်ဒါ်ႈဘေဲႇကျာမ်း။ ကနေဲႈဖုင်းတာန်ခိုးစံဝ်ဖြားမာ် အာဝ်ကဘ္လူႈချှီႇချှီႇ တီင်နောႈပဲ။ ဂေါႇမိုႈဘာည်းဇေဲန်း ပံင်တဂေန်းပံင်ညျှေဲမ်ပဲ ဟည်ကလေဲပ်ကလေႈဒို့။ 25ဂေါႇမိုႈတူအီးနီး ဆာ်ယာ်ည်ႇအီမ်းဒေဲႈဒယာ်မ်းဒီး နံင်ဘူမေဲႈမ လည်ခါ်ႇလည်လာည်း၊ နံင်ဟည်ဘာည်းဒို့ပေါႇ စံင်နာင်းပါ့်ပ္လါ်န်း ကဲအီးဂေါ်ည်း ပါ့်ပ္လါ်န်း။ 26လော်င်ဘည်ဘာည်း ႎီးယာ်ည်ႇအီမ်းဒေဲႈ ဒယာ်မ်းဒီး ပဲအာဝ်တံမ်ဒီႈဟီုဝ် တီင်ဘေဲႇကျာမ်းမောဆေ လှေဒီကိက်ဒါ်ႈအူန်း လော်င်ယုမ်ဘျည်း၊ ခေဲင်းဒီး ပံင်ဒါ်ႈစံဝ်ဖြား ‘အံဝ်းနီး မိုႈပေါႇ စံဝ်ဖြားအာဘရာဟံမ်၊ စံဝ်ဖြားအိဆဲတ်၊ စံဝ်ဖြားရာကိုပ်ကဲဟာ့်။’ 27စံဝ်ဖြားဒီး အန်းအာဝ်မိုႈမ စံဝ်ဖြား စားကဲအီးယာ်မ်း၊ အန်းမိုႈစံဝ်ဖြား စားကဲအီးအီမ်း။ ပံင်တဂေန်းပံင်ညျှေဲမ်ပဲ ဟည်ကလေဲပ်ကလေႈဒို့။”

ဆိန်ပိင်ညာပ်အီးဒါင်းဇားမှယ်ဒို့အီး အယ်တည်း

မတဲ ၂၂း၃၄-၄၀၊ လုကာ ၁၀း၂၅-၂၈

28ဘိူန်ဇေဲန်း စီမေဲႈလာ် ဆြာကံတ်ကျာမ်းအူချှေႈ ဂေါ်ည်းအူန်း ပါ့်ဒီး၊ စီယေဲဝ်းလာ်တညာဝ်း ကဲလည်ကထဲင်းဒါ်ႈ။ ဘိူဝ်ယေဲဝ်းတညာဝ်းအန်းတာ် ဘာည်းႎီးဒါ်ႈအန်းစံဝ် ပေန်ပဲန်းပေါႇခည်း၊ ယာမ်းဇေဲန်း အန်း စီဒေဲႈဇူးလာ် ပါ့်စံဝ်ယေဆု စီမှောႇဒါ်ႈ “တီင်ဆိန်ပိင်ညာပ်ပါ်ပည်မေဲႈ ပိင်ညာပ်လှေမှေဲမိုႈ အီးဒါင်းဇားမှယ်ဒို့အီး။”

29စံဝ်ယေဆု စီႎီးဒါ်ႈ “ဆိန်ပိင်ညာပ်အီးဒါင်းဇားဒို့ခူအီး၊ မိုႈ ‘အိူဝ် ခြိူဝ်းမျိုးအိတရေလ၊ တညာဝ်းလာည်းဟံင်း။ စံဝ်ကညျားအီးမိုႈစံဝ်ဖြားအဲ အန်းမိုႈလိူည်စံဝ်ဖြားအူဆူဟာ့်။ 30ဒါးဂါအီးမေဲႈပံင်ကံတ်မည်း အီးမိုႈနောႈ၊ ဖေဲမ်း၊ ဟေဲႇညာန်၊ ဘ္လော်မ်းမည်း ပါ်ပည်မေဲႈ၊ တေဲႈကမေဲႈ စံဝ်ကညျားအီးမိုႈစံဝ်ဖြားမည်းနာ်ႏ။’ 31ဆိန်ပိင်ညာပ်အီးဒါင်းဇားဒို့ခူအီး ကျောႈတည်းအယ် မိုႈ ‘တေဲႈကမေဲႈ ပီႎါးအီးဂေါ်ည်းကစံမ်ရီမ်းမည်းကဲဒီး ဘာည်းမည်းကမေဲႈတိုးမည်း။’ ဘိူန်ဒဆိန်ပိင်ညာပ်အယ်တည်းကာည်းဒီး ဘူမေဲႈမဆိန်ပိင်ညာပ် အီးဒါင်းဇားခူကာည်းဒီး။”

32ဆြာကံတ်ကျာမ်းဒီး စီဒါ်ႈ “မိုႈအိူဝ် ပေန်အိူဝ် ဆြာ။ ပံင်ဒါ်ႈမည်းစံဝ်ဒီး ဟည်မိုႈဟည်မှာန်ပေါႇခည်းခည်းဟာ့်။ စံဝ်ဖြားဒီး အန်းမေဲႈလိူည် အူဆူဟာ့်။ ဘိူန်ဒစံဝ်ဖြားဒီး အန်းဘူမေဲႈမ ဖြားမျိုးဟည်း။ 33အဲလို ဒါးဂါအီးမေဲႈပံင်ကံတ်အဲ အီးမိုႈနောႈ၊ ဖေဲမ်း၊ ဟေဲႇညာန်၊ ဘ္လော်မ်းအဲ ပါ်ပည်မေဲႈ၊ တေဲႈကမေဲႈ စံဝ်ကညျားအီးမိုႈစံဝ်ဖြားအဲ၊ အာဝ်ႎါ်န်း အဲလိုတေဲႈကမေဲႈ ပီႎါးအီးဂေါ်ည်းကစံမ်ရီမ်းအဲကဲဒီး ဘာည်းအဲကမေဲႈတိုးအဲ။ အီးမိုႈဆိန်ပိင်ညာပ်ကာည်းဒီး မိုႈအီးဒါင်းဇား မှယ်ပေါႇခူ အဲရေဲန်းဒါး ပံင်လှူအီးတိုက်ဒါးငည်း ကာည်း ပံင်လှူတော်န်းမျိုး။”

34ဘိူဝ်ယေဲဝ်းနာ်ႇ စံဝ်ယေဆုတာ် ဘည်ဘာည်းအန်းႎီးဆမားကလာင်းဒါ်ႈ ကရီးကတီး၊ အန်းစံဝ် စီဒါ်ႈ တာ့်အန်း “မည်းအာဝ်ဂေါ်ည်း ကဒိုင်းမ တာ့်ကီုင်းစံဝ်ဖြား။”

ႎါည်းဒီး ချှေႈမှေဲ့မာ် ဘူယမ မှောႇဘိုးအန်းစံဝ်။

မေဆိယဒါ်ႈအီး မိုႈဆီ

မတဲ ၂၂း၄၁-၄၆၊ လုကာ ၂၀း၄၁-၄၄

35ဇိုဂီဟောပနံဝ်းဒဲႈ စံဝ်ယေဆုတာ် တီင်ခေဲင်းႎါင်းစော်င်းစံဝ်ဖြား၊ အန်းစံဝ်စီဒါ်ႈ “ဆီမ်ဘာည်း ဆြာကံတ်ကျာမ်းကဲ ဆံမ်ဒါ်ႈလာ်မေဆိယနီး#၁၂:၃၅ စံဝ်ခရီတ် စီမိုႈလာ် ကော်န်းခြိူဝ်းလှာန်တားကညျားဒါင်းဒါႎေက်။ 36ကံပ်မိုႈတိုးဒါႎေက်မာ် ဒါးႎေညေန်ချှီႇဆငါးစံဝ် စီကလာင်းဒါ်ႈ

‘စံဝ်ကညျားအီးမိုႈစံဝ်ဖြား ကလာင်းဒါ်ႈ တာ့်စံဝ်ကညျားအံဝ်း

“အံက်အူန်း ညျှာတည်းအေဲႈအံဝ်း

ဂါအံဝ်းညျံမ်ဒဲႈ ယာန်ဆူမည်း ဒေဲႈချူႇဂေါ်ည်း ချေဲမ်းကပါးဇာ်န်းမည်း”။’

37ဆာ်မိုႈဘာည်းဇေဲန်း ကံပ်မိုႈတိုးအန်းဒါႎေက် ဆီင်ဂီတေဲႇဒါ်ႈတာ့်မေဆိယဒီး ‘စံဝ်ကညျား’၊ ဘာည်းမှေဲ မေဆိယ#၁၂:၃၇ စံဝ်ခရီတ်ဒီး နံင်ဘာည်းမိုႈလိူည် ကော်န်းခြိူဝ်းလှာန်ဒါႎေက်။” ဘိူန်ဇေဲန်း တူအီးဂီုန်းကဲမာ် နောႈတခိူည်းတညာဝ်းလာည်း ကျောႈပံင်ဟောပနံဝ်းအန်းစံဝ်။

လိုချဲတ်ခည်း ဆြာကံတ်ကျာမ်းကဲ

မတဲ ၂၃း၁-၃၆၊ လုကာ ၂၀း၄၅-၄၇

38ဇိုအန်းစံဝ် ဂီပနံဝ်းဒဲႈ၊ အန်းစီဒါ်ႈဘိုး “အူန်းချဲတ် ဆြာကံတ်ကျာမ်းကဲနာ်ႏ။ ကဲဒီး ယလိူည်ချှေဲပ် တဆီးချှီႇကဲ လှယ်ႎီးလှယ်ဟာဝ်း ဘာည်းဇေဲန်း၊ ပါ့်ကလာႈမာ် ကဲဆီင်ဒဲႈ အီးရိုဆေ ကျောႈတာ့်ကဲ။ 39စံန်ဒါ်ႈဆာ်မေဲႈပ္လေါ်ည်းမာ် ကဲယလိူည်ဂေါ်ည်းအံက်ပေါႇ ဒီဇားဒီချဲမ်း၊ တီင်တရော်ပ်မာ် ကဲဆီင်ဘိူန်းအံက်ဒီဇား။ 40ကဲဆမားစံမ့် ယော်ခလံဝ်းလာည်း အီးမိုႈဂျိုးဂျာမ်းယားကမိုည်းကဲ။ ဘိူန်ဇေဲန်း ကဲစီမှာန်းဆူး ကႎဲတ်ႏကျောႈဒိုင်းဒိုင်း နှာင်းအီးတညာဝ်းချဲမ်း။ တူအီးစားကဲဒီး အန်းကီုင်တာန်ပေါႇလာ် ကညားတံမ်ဒါင်းမှယ်ဒို့အီး။”

ပံင်လှူ ယားကမိုည်း

လုကာ ၂၁း၁-၄

41ႎါည်းဒီး ဇိုယာမ်းဂီအံက်ဂေါ်ည်း စံဝ်ယေဆု ကတော်ငါည်းတာ် တိူက်ႏရိူန်းလှူ၊ အန်းစံဝ်စီတိူဝ်ႈလာ် တူအီးဒေဲႈဟပ် ရိူန်းလှူကဲ။ တူအီးချမ်းကဲမာ် ဒေဲႈဂီုန်း၊ ကဲမာ်လှူဟပ်ဒဲႈပေါႇဂီုန်းဂီုန်း။ 42ဘည်ဘာည်းမာ် ဘိူဝ်မိုႈတာ် ယားကမိုည်းအီးဖ္လာန်းဒီး ဒေဲႈလှူဟပ်ရိူန်းမေတ်အန်း အယ်မေတ် အန်းအီးတန်အူထေ။ 43ဘိူန်ဇေဲန်း အန်းစံဝ် စီတေဲႇလာ်တပဲအန်းကဲ စီဒါ်ႈ “အံဝ်းနံင်ဒါ်ႈအီးမိုႈအီးမှာန်အန်း ယားကမိုည်းအီးဖ္လာန်းနီး အန်းဟည်လှူဟပ်ဂီုန်းမှယ်ခူ ကဲအီးဒေဲႈဟပ်ရိူန်းလှူတော်န်းချှေႈဟာ့်။ 44ဆီမ်ဘာည်းဆံမ်ဒါ်ႈလာ်ဘာည်းဇေဲန်း ကဲဒီး ဒေဲႈလှူဟပ်လိူည် ရိူန်းခလိူဝ်းကဲ၊ ဘည်ဘာည်းမာ် အီးမိုႈယားကမိုည်းနီး အန်းဘည်ဖ္လာန်းစံမ့်မာ် အန်းဟည်လှူဟပ်ဒို့ဒို့ ဂါႇဆီင်မိုႈရိူန်းပံင်မေဲႈအူန်း စာနံင်ချှိုင်းတာ် အဆာက်ႎတ်အန်း။”

Tans Gekies:

မာကု 12: RMT

Kleurmerk

Deel

Kopieer