Matayo 2
2
Avakoola va nondwe viihelela kumuwona uYesu
1UYesu aaholiilwe ku wudzenge wa Betelehemu, mu mugoola gwa Yudeya, mu musika gwe aatemile umutwa Helode.#2:1 Helode Uyu ye Helode uMuvina, umutemi va Yudeya, Galilaya, Peleya, Samalya ni Tulakonitisi. AVayahudi voloofu vamuviipiye wiimila wa wusali waakwe. Pe aaviye áholiilwe, avakoola va nondwe ukuhuma kutaali ulubali lwa kunena, viifikaga ku Yelusalemu, 2viiwuudzaga viitigilaga, “Ali kwiya ye áholiilwe ukuvedza Mutwa va Vayahudi? Túluweene ulutondwe ukwesu kunena, ikimanyilo ikya kuholwa kwakwe, lwe lwene twádzile ukumugondamila.”
3Umutwa Helode pe aapuliike ulo, iinyengʼemalaga mu numbula yaakwe pamwinga na vaanu vonda va mu Yelusalemu. 4Neke avalundasage avateekedzi avakomi#2:4 Avateekedzi avakomi Lole Avateekedzi ku Figanulo. vonda na vawulanidzi va milagililwe#2:4 Vawulanidzi va milagililwe Lole Avawulanidzi va milagililwe ku Figanulo. va Vayahudi, avawuudzage atigilage, “UMesiya iiholwa kwiya?” 5Navo vakumulongelaga viitigilaga, “Iiholwa ku wudzenge wa Betelehemu ya Yudeya. Idzo dze dzeene ídzisimbiilwe wugendela wa muvidzi ukutigila,
6‘Na yuuve wudzenge wa Betelehemu, uwa mu nyi ya Yuda,
usili wudzenge wudebe nambe padebe,
mu vatemi avangi va Yuda!
Pakuva umwako mwe mwene mwe ahadza iihumila umutemi,
ye ahadza iivedza mudiimi va vaanu vangu aVaisilaheli.’#Mika 5:2 ”
7Neke uHelode avakemeelelage ku kinyele avakoola va nondwe avo, ukuta vamulongele indakyene umusika gwe lúvawonekiye ulutondwe ulo. 8Apo akuvatumaga ku Betelehemu, akuvalongelaga iitigilaga, “Muhelele mukamusakule wunofu umwana uyo. Pe múmuweene, muundeetelage imola iyo, ukuta na yuune ndihelele ndikamugondamile.”
9Avakoola avo pe vaaviye vápuliike amadzwi ga mutwa, viihegaga apo. Ulutondwe ulo lwe vakaluweene kunena, vakuluwonaga kangi lúvalonguwe kuwutalo ukwawo, neke lwimage pakyanya kidonya na pe agenda umwana. 10Pe vaaviye váluweene ulutondwe ulo, viikeelaga hiilo. 11Neke viingilage mu nyumba, vamuwonage umwana pamwinga nu ngʼina uMaliya, vamugondamilage. Viiwopolaga ififunge fyawo, viiwonolaga isahabu, uwufumba ni manemane.#2:11 Uwufumba ni manemane Kwe kutigila, amafuta aganya lunuusi lunofu, kangi ga wutalamu. 12Viipilukaga ukwawo kugendela ingʼaasi yingi, pakuva uNguluvi avapaviye mu lulooto ukutigila, vatane ukupiluka kwa Helode.
Ukunyilila ku nyi ya Misili
13Avakoola va nondwe avo pe vaaviye váhegile, umunyamwandza va Mutwa Nguluvi akumuwonekelaga uYosefu mu lulooto, akumulongelaga iitigilaga, “Ulamuke, umunyamule umwana nu ngʼina, munyilile ku nyi ya Misili, pakuva uHelode akumutemula umwana uyo, ukuta amukome. Mukiikalage kuuko ukufikila pe ndilavalongela ukutigila mupiluke.” 14Neke uYosefu alamukage pakilo, amunyamulage umwana nu ngʼina, vanyililage ku Misili. 15Vakwikalaga uko ukufikila uHelode pe iifuwa. Dzonda idzo dzaahumiye, ukuta likwile ilidzwi lya Mutwa Nguluvi, lye aalongile wugendela wa muvidzi ukutigila, “Ndamukemeeliye umuswamu-vangu ukuhuma ku Misili.”#Hoseya 11:1
Avaana avadiimi viikomwa
16UHelode pe aadzeeliye ukutigila, avakoola va nondwe avo vámudzangile, iikalaalilaga hiilo. Neke alagidzage ukutigila, avaana avadiimi vonda ukuvangila ifyali ukufikila ava myaka givili, avali mu Betelehemu, pamwinga ni mbala ídziyipiliime, vakomwage. Aalimile ewo ukugelanihidza nu musika gwe aadzeeliye ukuhuma ku vakoola va nondwe. 17Dzonda idzo dzaahumiye, ukuta likwile ilidzwi lya Nguluvi, lye aalongile wugendela wa muvidzi uYelemya ukutigila,
18“Ingoolo yaapuliise mu wudzenge wa Lama,
ikivembo nu kuhugumilila hiilo.
ULaheli akuvavembela avaana vaakwe,
kangi asiikwidika ukunyaamadzwa,
pakuva avaana vaakwe sikoovali kangi.”#Yelemya 31:15
Ukupiluka ukuhuma ku Misili
19UHelode pe aaviye áfuwe, umunyamwandza va Mutwa Nguluvi akumuwonekelaga kangi uYosefu mu lulooto ku Misili uko. 20Akumulongelaga iitigilaga, “Ulamuke, umunyamule umwana nu ngʼina, upiluke ku nyi ya Isilaheli, pakuva avo avakiitemulaga ukumukoma umwana uyo, váfuwe.”
21Neke uYosefu alamukage, amunyamulage umwana nu ngʼina, apilukage navo ku nyi ya Isilaheli. 22Neke kangi pe aapuliike ukutigila, uAlikelawo iitema iYudeya, áhomiye pa daadiye uHelode, iikoogopaga ukuhelela uko. Iipavilwaga mu lulooto ukutigila atane ukuhelela uko, neke ahegage, ahelelage ku mugoola gwa Galilaya. 23Iifikaga, akwikalaga mu wudzenge wa Nasaleti. Ndeeni, liikwilaga ilidzwi lya Nguluvi lye aalongile wugendela wa vavidzi ukutigila, “Iitambulwaga Munasalayo.”#2:23 Iitambulwaga Munasalayo Kwe kutigila, iihuma ku Nasaleti.
Tans Gekies:
Matayo 2: BEZ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2022 Wycliffe Bible Translators, Inc. All rights reserved.
