Genesis 6
6
1-2Bhodïrï ka arhiï kabami muidimi oidakami oidigi dama. Dai ïïmoko go maamaradï Diuxi soimaaxi idui. Tïgito tïï aarhi oki ix kïï titiodi dai popoki dïïdïdï ïïgi ix makïdï ojoidi.
3-4Dai go maamaradï Diuxi bui aarhi oki dai onta dai abhiadïrï gïïgïrdukami kïkïïrhi maamara ïgai. Mui umigi óídakatadai go gïïgïr kïkïïrhi ïgai oidigi dama. Sïïrhikïdï oomarhigakana ïgai xi kaxkïdï arhiï aatagaiña óídakami ïki.
Daidi Gïr Nukadakami itïi,
—Gin tïgibudaga mai xu mos apia bïïxkïrï maakadamu ñoki odami. Ka mos ïr ïï soimaaxkami tïgibudadï ïgai di. Ka mos arhi ïmo ciento dan ïmokobhai umigi dagitomu aanï ix óídaka óídakami oidigi dama kia— itïi ïgai.
5Dai Gïr Nukadakami tïgito nïidi bïïxi go óídakami oidigi dama ix arhiï mai kïkïïgadu iibhïadï dai go ïï soimaaxi tïgibudagai adaimïi. 6Dai soigamu Gïr Nukadakami nïiditai odami ix makïdï idui dai pobï ïrhi ïgai,
—Tukamïrï maiti iduñimudai aanï mai soi gin ïrhiadamudai nïiditai podukai odami— gï ïrhidi ïgai. 7Daidi itïi ïgai —Xibi gia bïï naato xia duadamu aanï odami ix makïdï idui aanï ïmadï modukai kiiyïrï buxtaki dai oidigana buxtaki dai asta go kïkïixi bïïxi ïmadï ujurugi. Xioma ïr kïïgaikamudai ix maiti iduñimudai aanï— itïi ïgai.
8Dïï gia Gïr Nukadakami apia bïïxkïrï bhai ïrhiarakïdï nïidiña go Noé.
9Xibi aagamu aanï go Noé. Go Noé kïï tuigakana dai kïï ïïgidiña Diuxi. Aidïpïrï go ïï Noé ïgai dai ïïgidiña Diuxi. Maigobai mai tipukatadai ïmai xorai ïpïandukai biakagi tïgibudagai. 10Dai Noé maamara baika kïkïïrhi. Ïmoko Sem tïgidu dai ïmai Kam dai ïmai Jafet.
11Maigobai go gaa go ïï buirudagai maaxi ibuadana buidïrï Diuxi. Dai bïï aipako mai tipukatadai xadutudaragai. 12Go ïï soimaaxi tïï Diuxi nïiditai oidigi ka mos pupuirukatai oidakami.
13Dai bhodïrï Diuxi potïtïdai go Noé sai,
—Ka buana iñagai oidigi dai ka mai biamu aanï oidakami. Bïï naato kodamu aanï odami oidigi dama xïïxi oidaga. Arhiï mai xadutudakai óídaga ïgai tomarhi ïmadutai— itïtïdai Diuxi. 14—Xibi gï agai ix iduña aapi ïmo barko kïï kaapakamikïdï uxi daidi iduñi tutukabi ïraana. Bhodïrï gï agai xi bhïiyagi aapi saidakami tukukami ix makïdï oidigi ïrabiadïrï busanïi daidi ïgaikïdï saitudagi go barko ïrabiadïrï dai modukai kidigamadïrï xi mai baakiagi sudagi. 15Ïmo ciento dan ïmokobhai dan bhaibuxtama dan taama metro iduñi tïbïakoga dai ïmokobhai dan goka metro dan tajukami gajiakoga dai bhaibuxtama dan baika metro dan tajukami taiyakoga— itïtïdai Diuxi. 16—Baiko daamarhikami iduñi go barko— itïtïdai. —Dai ïmo padïrï kïïxidañi kuuparadï. Dai bhodïrï ïpïabidañi damanadïañdïrï tajukami metro koidamakoga dai ami kïïxida ïmo bentana— itïtïdai Diuxi. 17Daidi itïtïdai ïpï —Aanï sudaïrï dupituda iñagai bïï sudakami go oidigi dai bïï ugitimu go ix makïdï ibhïkïi oidigi dama. Bïï naato kodamu aanï— itïtïdai.
18Bhodïrï Diuxi itïtïdai go Noé,
—Xibi gia kaxi gin baasa iñagai sai gïn nukada iñagai. Kaxkïdï abïr bapaki aapimï barkoana. Aapi ïmadï gï oñiga dai gï maamara ïmadï gï kaakaxdïïdï abïr bïïxi bapakïda barkoana— itïtïdai Diuxi Noé. 19-20—Dai gogokatai daibidamu bïïxi ixtuma oidaga oidigi dama. Dukami kiiyïrï buxtaki maaxi dai oidigïrï buxtaki dai kïkïixi dai aarhi kïkïixi dai ujurugi. Dadimu gobai pai aapi soikïdana. Dai podukai gogokatai abïr bapaasa ïgai gïn ïmadï barko ïrana ïïmo kïkïïrhiadï ïmadï ïïmo okiadï sai mai ugitïna ïgai. 21Daidi abïr bhai darasa bïïxi mïx tuma tïgitoka agai kuadagai maaxi bïïtarï go ix makïdï gï ïmadï iimïda agai ami barkoïrï— itïtïdai Diuxi.
22Dai go Noé idui bïïxi go aaduindagai ix makïdï gatïjai Diuxi.
Tans Gekies:
Genesis 6: NTP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Copyright: Ethnos360 Sanford, Florida
