Met 41
41
Biyeyem bi Faraoñ
(Met 40; Dn 2 a 3:31; 4:34; Miny 3:20)
1Mvuse mimbu mimbaé, Faraoñ a nga yeme biyeyem: A mbe a tele e fefele beta ôsôé. 2Abeñe beyale benya'a zamgbwal be too mevem be nga vame beta ôsôé a taté na ba di élobé. 3Wôna benya'a bevok zamgbwa, *abé a minkôt, be nga vame beta ôsôé, e mvuse ba be mbe mevem, a tebe mefefele map abôñ ôsôé. 4Ane beyale benyak be mbe *abé a minkôt be nga di ba zamgbwal be mbe abeñ a mevem. E nde Faraoñ a nga vee ôyo. 5A nga beta ke ôyo a yeme biyeyeme bi baa: 6Abeñ a mindu mi fône zamgbwal mi too atine da wôna fône zamgbwa, minkôt a ndi'an amu évuñulu ja so jôp da tôô, je ke é nga vame mvuse jap. 7Ane fôn é mbe minkôt é nga mine nyô é mbe mindu. A Faraoñ a nga vee. Biyeyeme biame le.
8Mametyé, nsisime Faraoñ ô nga bili éndeñela'a, a nga loone bebo majik béé a beyeme mam bese y'Ejipte. Faraoñ a nga kañete be biyeyeme bié. Ve môt éziñ a nji bo ngule ya liti Faraoñ atinane y'été. 9Eyoñe te évete menyu é nga nyoñe nkobô a jô Faraoñ na: Ma zu tote den ôsimesane ya ékobe jam. 10Faraoñ a nga wô'ô bebo bisaé bé ôlun, a a nga futi ma mimbôk e ndaa évete beba'ale, bia évete ñyame belet. 11Bia nye bi nga yeme biyeyem alu da, môt ase biyeyem be ne nguleya yem atinan. 12Bia be ésoé mon Hébre bi mbe valé a too *ôlo évete beba'ale. Bi nga kañete nye bie a nye ke a nga liti bia atinane ya biyeyeme biangan; a nga kate môt ase atinane ya biyeyeme bié. 13Mam me nga kui fo'o v'ane a nga kate bia: Faraoñ a nga bulane ma éto jam, a a nga tyelé môte mbo'o élé.
14Faraoñ a nga bo na be loone Yôsep. Ane be nga bo na a kui mimbôk avôl avôl. A nga tyembane nlô, a tyendé mengômesan a ke e be Faraoñ. 15Faraoñ a nga jô Yôsep na: Me nga yeme biyeyem. Teke môt a ne nguleya ve atinane y'été, ve me nga wô'ô na ô ne nguleya kat atinane ya biyeyem ba kate wo. 16Yôsep a nga jô Faraoñ na: Saa ke ma! Zambe nye a ye ve Faraoñ éyalane atinan da yian.
17Faraoñ nye Yôsep na: E biyeyeme biam été me nga tele kindi'i beta ôsôé. 18Beyale benya'a zamgbwal be too mevem a abeñe ya yen, be nga vame beta ôsôé a taté na ba di bilok élobé. 19Wôna beyale benya'a bevok zamgbwal be nga vame mvuse jap be too awulewula, be yené'é *abé a minkôt; me ngenane te yene befe be too *abé avale te Ejipte ése été. 20Beyale benya'a be mbe awulewula a *abé be nga di beyale benya'a zamgbwal be mbe avem. 21Be nga nyiin e mimfe'e mebume miap, be too teke ayemé na be nga nyiin été; be yené'é *abé v'ane ôsusua. Ane me nga vee ôyo. 22Me nga beta fe yene biyeyeme na: Fône zamgbwal é too mindu a abeñ é too atine fône da. 23Wôna fône zamgbwa é too kpwandé, mbo'on a ndi'an amu évuñulu ya jôp da tôô é nga vame mvuse jap. 24Mimbo'one mi fôn mi nga mine nyô é mbe abeñ. Me nga kate de bebo majik bam, ve teke môt a nga kate ma atinane y'été.
25Yôsep a nga jô Faraoñ na: Biyeyeme bi Faraoñ bi ne jôme jia a avale da; Zambe a liti Faraoñ jam a ye bo. 26Beyale benya'a zamgbwa be ne abeñ be ne mimbu zamgbwa; fône zamgbwal é ne abeñ é ne fe mimbu zamgbwal; avale biyeyeme da. 27Beyale benya'a zamgbwal be ne awulewula a *abé be nga vame mvuse ba ya ôsu, be ne mimbu zamgbwa; a fône zamgbwa é ne bindañ ndi'an amu évuñulu ya jôb da tôô, ja ye bo mfumbale zaé mimbu zamgbwal. 28Ajô te, avale me ndôme mane jô, Zambe a litiya Faraoñ, jam a ye bo. 29Tame yene na beta afok a ye bo e si y'Ejipte ése tañe mimbu zamgbwa. 30Mfumbale zaé a ye tôñe mie tañe mimbu zamgbwal. E si ése y'Ejipte, ba ye vuan afo'o te ése; mfumbale zaé a ye bo si y'Ejipte zezé jôm. 31Mvus éte ba ye bo te fe nguleya yemelane jôm éziñ y'afok e si y'Ejipte amu mfumbale zaé a ye bo teke ajibi. 32Nge biyeyem bi nga ba'alane biyoñe bibaé be Faraoñ, ndeme na Zambe a tyi'iya jame te na é boban a na Zambe a ye bo avôle ya bo de. 33Eyoñe ji Faraoñ a ntoo ve yene môt a ne atyeñ a Fek a telé nye si y'Ejipte. 34Faraoñ a fô'ôsa'an a telé bebo bisaé e si asu ya nyoñe ngabe tane nkôane bidi y'Ejipte, tañe mimbu mi afok zamgbwal. 35A kô'ane bidi bise ya mbamba mimbu zamgbwale mia zu; a bo'ok mevôm ba naane fôn a bidi e bitison, bi too éjôé Faraoñ si, a émien nye a ba'ale'e bie. 36Bidi bite bia ye bo mba'alan asu si, mfa'a mimbu mi mfumbale zaé zamgbwal mia ye bo e si y'Ejipte, nalé ate si ja ye bo te di'iban a mfumbale zaé.
Yôsep a tobane minisi
(Sam 105:17-22; Mm 7:9-10; Met 45:4-8; Filip 2:9-11)
37Faraoñ a nga wô'ô nkobô te mvaé; 38a Faraoñ a nga jô be na: Ye mi ne nguleya yene môt a ne aval ane môte nyô, nyô Nsisime Zambe ô too be nye' 39Faraoñ a nga jô Yôsep na: Ataté éyoñe Zambe a te liti wo mam mese ma, môt a ne atyeñ a ñyeman ane wo a nji bo. 40Wo wo ye bo nlô ya *nda jam, a bôte bame bese ba ye ke mebendé môé si. Eto njô bôt étam e nje ja ye bete ma yôp be wo. 41Faraoñ a nga jô Yôsep na: Yenek, ma ve wo éjôé Ejipte ése. 42Faraoñ a nga vaa élondo jé wo wé a jalé je e wo Yôsep; a nga jalé nye mengômesan me ndombo ja dañ abeñ a jalé nye nsanga or e *tyiñ. 43A nga bo nye na a bet e nyanga metôa é mbe é tôñe énjé mvus be yôta'an ôsu vié na: Kutane meboñe si! Avale te e nde Faraoñ a nga ve nye éjôé Ejipte ése. 44Faraoñ a nga jô Yôsep na: Me ne a me ngenane Faraoñ! Ve da Ejipte ése, teke môt a ye fô'é mon ônyu teke nkañesane wôé. 45Faraoñ a nga yôlé Yôsep jôé na: Tyafnat-Paénéa. A nga lu'u nye minga jôé na: Asnat, ngone Pôtiféra, *ntuni ya On. Yôsep a kui atan asu ya nyoñe *ntum éjôé Ejipte. 46Yôsep a mbe mimbu mewôm mela éyoñ a nga zu tebe asu Faraoñ, njô bôte y'Ejipte; a nga kôlô be Faraoñ, a bômane si ése y'Ejipte.
47E nté mimbu mefo'o zamgbwal, si é nga saé abui. 48Yôsep a nga kôane bidi bise ya mimbu zamgbwale mite e si y'Ejipte; a nga futi bidi e bitison, a futi'i e tison ése, bidi ya mefup ma bôman afôla te. 49Yôsep a nga kôane fôn ane nsele'e ya mañ; é mbe étua abui teke fe alañé, amu be nji fe bo nguleya lañe je.
Esaé Yôsep Ejipte
(Met 48; 13-26)
50Te na mbu mfumbale zaé ôsu ô kui, bobefame bebaé be nga bialé Yôsep e be Asnat, ngone Pôtiféra, *ntuni ya On. 51Yôsep a nga yôlé ntôle na: Manasé amu a nga jô na: Zambe a boya na me vuane minju'u miam mise a ndaa ésaa wom. 52A nga yôlé ébatane jôé na: Efrayim, amu a nga jô na: Zambe a boya ma na me fôé e si ya ôsame wom.
53Mimbu mefo'o zamgbwale ya Ejipte mi nga man, 54a mimbu zamgbwale mi mfumbale zaé mi nga taté na mia zu, avale Yôsep a nga kate de foé. Mfumbale zaé a mbe mesi mese; ve bidi bi mbe e si ése y'Ejipte. 55Eyoñe si y'Ejipte ése fe é nga kui zaé, bôt be nga yône be Faraoñ asu ya bi bidi. Faraoñ a nga jô bôte bese y'Ejipte na: Kela koon Yôsep a bo'one jam a ye jô mia. 56Mfumbale zaé a mbe si ése. Yôsep a nga yooé mevôm mese be nga ba'ale bidi a kuane bôte y'Ejipte fôn. Mfumbale zaé a nga dañe dañe bo ngu e si y'Ejipte. 57Bôt be nga so mesi mese a zu Ejipte asu ya kuse fôn e be Yôsep; amu mfumbale zaé a nga su'ulane bo ngu e mesi mese.
Tans Gekies:
Met 41: BDCB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bible en langue Bulu © L'Alliance Biblique du Cameroun, 2007, 2015.
