युहन्ना 6
6
येशूये बाङा हजार भर्मीकोलाक कास्च
(मत्ती १४:१३-२१; मर्कूस ६:३०-४४; लुका ९:१०-१७)
1होटै न्हुइङ येशू गालील टाल टरीसार पारी पट्टी नुङा। (होसे टालकी तिबेरियास टाल र डेमन्या।) 2भर्मीकुङ काट बाड्को भीडै होसकोकी डुटा, हीजैडेनाङ होसकै छाचको अचम्म खाटा गेपाक्च होखुरीकै डाङ्ङन्या। 3येशू डाँडाङ नुङा, अनी लहो चेलाकोखाटा होला ङुवा। 4होडीक बेला यहूदीकुङ छुटकारौ चाड खेरेप राम्हन्या।
5येशूये ङोस्नाङ भर्मीकुङ बाड्को भीड लाहा पट्टी राम्हन लेच डाङार फीलीपकी डेया, “इसे भर्मीकोलाक कास्की कानै रोटो कुटै लोवार राक्की य्होक्ले?” 6इसे कुरा येशूये फीलीपौ मीमन जाँच्डीकीयो लागी मट्टै डेमन्या हीजैडेनाङ होसकै ही जाट्की पामन्या, होसे कुरा होसकोकी थाहा लेया। 7फीलीपै डेया, “पट्टकी चेक्जा-चेक्जा मट्टै यान्हाङ र नीस सय चाँडीयो सीक्कै#6:7 नीस सय चाँडीयो सीक्कै इसे चहीँ आठ महीनौ ज्याला टडीक हो। लोच रोटोये होखुरीककी माओल्ल्हे।”
8येशूओ चेलाको मढ्याङ काट जना सीमोन पत्रुसौ भाइ अन्द्रियासै डेया, 9“इला काट लेन्जा जजाखाटा जौओ बाङा रोटो र नीस डीस्या च ले। टर इडीक वास्टै भर्मीकोलाक इडीकै ही ओल्ल्हे औँला र?”
10येशूये चेलाकोलाक डेया, “भर्मीकोलाक ङुकी लैडीनी।” होला घाँस लेच बाड्को चउर लेया र भर्मीको होला न ङुवा। होसे भीडाङ लेन्जा भर्मीको मट्टै बाङा हजार टडीक लेया। 11टब येशूये बाङा रोटो लार परमेश्वरकी धन्यवाद याहा अनी येशूये भर्मीकै ज्याख्यौ डेयार चेलाकोलाक पुङ्ङ याखी लैडीया। होटजाट्न न येशूये नीस डीस्या लार परमेश्वरकी धन्यवाद याहा र ङुच भर्मीकै ज्याख्यौ डेयार चेलाकोलाक पुङ्ङ याखी लैडीया, र होखुरीक पट्टकै र्हास्ठर ज्या। 12अनी होखुरीक र्हास्चपछी येशूये चेलाकोलाक डेया, “ओबारीस्च टुक्राको बटुलीनी, चेक्जा र खेर मानुङ्ख्यौ।” 13भर्मीकै ज्यार ओबारीस्च जौओ बाङा रोटोओ टुक्राको होखुरीकै बार्ह डालो न्हे-न्हेप सोटा।
14येशूये जाट्च अचम्मौ याङ्च काम डाङार होसे भर्मीकै डेया, “साँच्ची न, कानै आसा जाट्च संसाराङ राछ अगमवक्ता होसको न हो।” 15भर्मीकै राहार लाहाकी जबरजस्टी आल्हार राजा खास्की पामन ले डेच कुरा थाहा डीन्हार येशू फेरी लाहा काट न डाँडाङ नुङा।
येशू डीयाङ व्हाच
(मत्ती १४:२२-३३; मर्कूस ६:४५-५२)
16नाम्बीक्रखीङ येशूओ चेलाको टाल पट्टी झाल्न नुङा। 17डुङ्गाङ काल्हार होखुरीक टाल पारी कफर्नहुम पट्टी नुङा। होडीक बेला छुम्ह भ्यामन्या, टर येशू चहीँ इडीक बेलासम्म चेलाको लेठाङ माटार्हामन्या। 18बाड्को नाम्सु क्योस्च बाटै टालाङ डीओ छाल सोकी ठाला। 19चेलाको बाङा-छ कीलोमीटर टडीक डुङ्गा क्योटार व्हाम भ्यामन्या। होडीक बेला होखुरीकै येशूकी डी मीटाक व्हाचै डुङ्गा पट्टी राछै जाट्च डाङार होखुरीक साप्फी बीर्हीया। 20टर येशूये डेया, “ङा हो, माबीर्हीनी!” 21टब चेलाकै येशूकी मार्हाङ्छै डुङ्गाङ काल्हाका, अनी तुरुन्तै डुङ्गा होखुरीक नुङ्चै जाट्च ठावाङ टाहार छेउ लक्डीसा।
22टालौ छेवाङ काट मट्टै डुङ्गा लेया र चेलाकोखाटा येशू चहीँ होसे डुङ्गाङ माकाल्न्हन्या, टर चेलाको मट्टै काल्न्हन्या डेच कुरा टालौ पारी लेच भर्मीकुङ भीडै पीउर्हाक लेखो थाहा डीन्हा। 23टब अरु डुङ्गाको र तिबेरियासलकीङ टाराहा, होसे ठाउँ प्रभुये धन्यवाद याहार भर्मीकै रोटो ज्याच खेरेप लेया। 24येशू र होसकुङ चेलाकोलाक होला माडाङ्च पछी होसे भर्मीको येशूकी पाचै डुङ्गाकोवाङ काल्हार कफर्नहुम पट्टी नुङा।
येशू जीवनौ रोटो
25भर्मीकै टालौ पारी येशूकी डुपार गीना, “ए गुरुज्यु, नाको इला सेन टाराहा?”
26येशूये होखुरीककी डेया, “ङा नाखुरीककी साँच्ची न डेले, नाखुरीकै ङै जाट्च अचम्मौ चीन्हको बुझडीसार होइन, टर र्हास्ठर रोटो ज्याकी डीन्छ बाटै नाखुरीकै ङाकी पाच हो। 27नास छानार नुङ्च ज्याच ठोकौ लागी काम माजाट्नी, टर सेन्र मासीच जीवन याछ ज्याच ठोकौ लागी काम जाट्नी। इसे सेन्र मासीच जीवन याछ ज्याच ठोक नाखुरीककी भर्मीयो मीजै याल्हे हीजैडेनाङ परमेश्वर बोये इसे कामौ लागी होसकोकी अधिकार याम्हने।”
28टब भर्मीकै येशूकी गीना, “परमेश्वरै मीमन जाट्च कामको जाट्की कानै ही जाट्की पर्ले?”
29येशूये होखुरीककी डेया, “परमेश्वरै बीर्न्हकाचकी विश्वास जाट्नी, इसे न परमेश्वरै मीमन जाट्च काम हो।”
30भर्मीकै येशूकी गीना, “नाकै कुङ्च अचम्मौ चीन्ह टान्हाक्ले, अनी होसे डाङार कानै नाको मीटाक विश्वास जाट्की? नाकै कुङ्च काम जाट्ले? 31कानुङ बोइ-बाज्युकै उजाड-ठाँवाङ मन्न ज्या। होटजाट्न न धर्मशास्त्राङ र रीक्ङने, ‘होसकै होखुरीककी स्वर्ग लकीङ रोटो ज्याकी याहा।’#प्रस्थान १६:४,१५; भजनसंग्रह ७८:२४”
32येशूये होखुरीककी डेया, “ङा नाखुरीककी साँच्ची न डेले, नाखुरीककी स्वर्ग लकीङ रोटो याछ मोशा होइन, टर स्वर्ग लकीङ नाखुरीककी साँच्चीयो रोटो याछ चहीँ ङौ बोइ हो। 33परमेश्वरौ रोटो होसे न हो, सु स्वर्ग लकीङ म्हाका झाल्न राहार संसारुङ भर्मीकोलाक सेन्र मासीच जीवन याल्हे।”
34अनी भर्मीकै डेया, “गुरुज्यु, होसे रोटो कानकी सढैँ न यान्ही।”
35येशूये भर्मीकोलाक डेया, “सेन्र मासीच जीवनौ रोटो ङा न हो। ङा लेठाङ राछ सेन्र मीटुक मारन्छीले र ङामीटाक विश्वास जाट्च सेन्र डी मासोन्ल्हे। 36टर ङै नाखुरीककी डेम भ्यामने, नाखुरीकै ङाकी डाङ्नाङ र विश्वास माजाट्ले। 37बोये ङाकी याछको पट्ट न ङा लेठाङ राल्हे, र ङा लेठाङ राछको चहीँ सुकीर ङा ल्हेट्न माकाले। 38हीजैडेनाङ ङाल्हौ इच्छा पुरा जाट्की डेम ङा स्वर्ग लकीङ झाल्न राछ होइन, टर ङाकी बीर्न्हकाचौ इच्छा पुरा जाट्की डेम ङा राछ हो। 39ङाकी बीर्न्हकाचौ इच्छा इसे न हो, होसकै ङाकी याछको मढ्याङ सुकीर माम्हास्की, टर होखुरीककी अन्टीम डीनाङ सीच लकीङ जीवाटाक्की हो। 40हीजैडेनाङ ङौ बोयो इच्छा इसे न हो, मीजाकी ङोस्च र होसे मीटाक विश्वास जाट्च पट्टकै सेन्र मासीच जीवन डुप्ख्यौ, र ङा होखुरीककी अन्टीम डीनाङ सीच लकीङ जीवाटाक्ले।”
41येशूये “स्वर्गलकीङ झाल्न राछ रोटो ङा न हो” डेच कारनै यहूदी अगुवाको होसकुङ विरोधाङ गन-गन जाट्चै 42इट डेकी ठाला, “इसे च होसे योसेफौ मीजा येशू होइन र? इच्यो मोइ-बोइकी कान चीन्डीले। चाँहा इचे कुटजाट्न ‘ङा स्वर्ग लकीङ झाल्न राछ हो’ डेले?”
43येशूये होखुरीककी डेया, “नाखुरीक लाहा-लाहाङ गन-गन माजाट्नी। 44ङाकी बीर्न्हकाच परमेश्वर बोये ङा लेठाङ राछ मीमन माय्हा डेनाङ सुर ङा लेठाङ राखी माय्होक्ले, ङा लेठाङ राछको जटीकी ङा अन्टीम डीनाङ सीच लकीङ जीवाटाक्ले। 45अगमवक्ताकुङ कीताबाङ इट डेयार रीक्ङने, ‘होखुरीक पट्ट जनाकी परमेश्वरै न पाहाक्ले’#यशैया ५४:१३। अनी परमेश्वर बोइ लकीङ सेच र पाछ पट्ट न ङा लेठाङ राल्हे। 46बोइकी कुसे भर्मीये र माडाङ्ने, सु चहीँ परमेश्वर लकीङ राछ हो, होचे मट्टै बोइकी डाङ्नने।
47“साँच्ची न ङा नाखुरीककी डेले, सुये विश्वास जाट्ले, होसे खाटा सेन्र मासीच जीवन ले। 48जीवन याछ रोटो ङा न हो। 49नाखुरीकुङ बोइ-बाज्युकै उजाड ठावाङ मन्न ज्यानाङ र होखुरीक सीयार नुङा। 50टर स्वर्ग लकीङ झाल्न राछ रोटो ज्याचको चहीँ सेन्र मासीले। 51स्वर्ग लकीङ झाल्न राछ जीबीट रोटो ङा न हो। इसे रोटो सुये ज्याले होसे सढैँभरी जीवाम ङुले। ङै याछ होसे रोटो चहीँ ङौ डेह हो। संसारुङ भर्मीकै सेन्र मासीच जीवन डुप्ख्यौ डेयार ङा ङौ डेह याल्हे।”
52टब यहूदीको मेखुरीक-मेखुरीक बहस जाट्चै डेकी ठाला, “इसे भर्मीये कुटजाट्न कानकी मेन डेह ज्याकी याखी य्होक्ले?” 53येशूये होखुरीककी डेया, “साँच्ची न ङा नाखुरीककी डेले, इडीक नाखुरीकै भर्मीयो मीजौ डेह माज्याले र य्हु मागाले डेनाङ नाखुरीक खाटा सेन्र मासीच जीवन माछान्ने। 54टर सुये ङौ डेह ज्याले र ङौ य्हु गाले होसेखाटा चहीँ सेन्र मासीच जीवन छान्ने, अनी अन्टीम डीनाङ ङा होसकी सीच लकीङ जीवाटाक्ले। 55हीजैडेनाङ ङौ डेह साँच्ची न ज्याच कुरा हो, र ङौ य्हु साँच्ची न गाच कुरा हो। 56सुये ङौ डेह ज्याले र ङौ य्हु गाले होसे चहीँ ङाखाटा ङुले र ङा होसेखाटा ङुले। 57जीबीट बोये ङाकी बीर्न्हका, र ङा बोयौ कारनै जीवाले। होटजाट्न न सुये ङाकी ज्याले होखुरीक ङौ कारनै जीवाले। 58स्वर्ग लकीङ राछ इसे रोटो चहीँ नाखुरीकुङ बोइ-बाज्युकै ज्याच मन्न ल्याक्च होइन। हीजैडेनाङ होखुरीकै होसे ज्यानाङ र सीम नुङा। टर ङै याछ रोटो ज्याचको चहीँ सधैँभरी जीवाम ङुले।”
59येशूये इसे कुरा कफर्नहुमुङ सभा ङुच इमाङ शिक्षा यान्हाङ डेच हो।
वास्टै चेलाकै येशूकी डास्च
60इसे कुरा सेयार येशूओ चेलाको मढ्याङ वास्टै जनै डेया, “इसे बचन च सार्है गार्हो ले, इसे सुये लाकी य्होक्ले र?”
61येशूये लोहो चेलाकै इच्यो बारेयाङ गन-गन जाट्न न ले डेच कुरा वार्हार होसकै चेलाकोलाक डेया, “ही इसे कुरै नाखुरीककी बाढा छान्ले? 62होट डेनाङ भर्मीयो मीजाकी पहीला कुला लेया, होला न स्वर्गवाङ ल्हेस्चै जाट्च डाङा डेनाङ ही आर्मीट्ले? 63जीवन याछ चहीँ परमेश्वरौ आत्मा हो, याङ्च काम भर्मीये जाट्की माय्होक्ले। ङै नाखुरीक खाटा ङाक्च बचन आत्मा र जीवन हो। 64टर नाखुरीकमढ्याङ कुडीक जनै ङाकी विश्वास माजाट्ले।” (हीजैडेनाङ विश्वास माजाट्चको सु-सु छान्ले, अनी लाहाकी ढोका याछ सु छान्ले डेच कुरा येशूकी सुरुलकीङ न थाहा लेया।) 65अनी होसकै डेया, “होटबाटै ङै नाखुरीककी डेच हो, इडीक परमेश्वर बोये ङा लेठाङ राछ मीमन माय्हाठर सुर भर्मी ङा लेठाङ राखी माय्होक्ले।” 66होस बेलालकीङ येशूओ चेलाको मढ्याङ वास्टै जना न्हुङ्लाक सरीसा, र होसकोकी डुट्की डासा।
67येशूये बार्ह जना चेलाकोलाक गीना, “ही नाखुरीक र ङाकी डासार नुङ्ले?” 68टब सीमोन पत्रुसै जबाफ याहा, “ए प्रभु, कान सु लेठाङ नुङ्की? सेन्र मासीच जीवनौ बचन च नाको खाटा न ले। 69नाको न परमेश्वरै बीर्न्हकाच पवित्र जन हो डेम वार्हार कानै विश्वास जाट्नने।” 70येशूये होखुरीककी जबाफ याहा, “ही ङा ङाल्है न नाखुरीक बार्ह जनाकी भाक्च होइन र? टर पनी नाखुरीक मढ्याङ काट जना चहीँ शैतानौ भर्मी हो।” 71इसे कुरा येशूये सीमोन इस्करीयोटौ मीजा यहूदासौ बारेयाङ डेमन्या, हीजैडेनाङ बार्ह जना चेलामढ्युङ लेनाङ र होचे येशूकी ढोका याखी पामन्या।
Tans Gekies:
युहन्ना 6: EMGP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 (Active), Wycliffe Bible Translators, Inc. All rights reserved.
