युहन्ना 14
14
येशू न लाम, सट्य र जीवन हो
1येशूये फेरी चेलाकोलाक डेया, “नाखुरीकुङ मीमन ब्याकुल माछान्ख्यौ। नाखुरीकै लहो भरोसा परमेश्वर मीटाक डानी र ङामीटाक र डानी। 2ङौ बोयो इमाङ वास्टै ङुच ठाउँको ले र ङा नाखुरीकुङ लागी ठाउँ टयार खास्की नुङ्ङन ले। होट होइन डेनाङ, ही ङा नाखुरीककी याङ्च कुरा डेच लेया र? 3ङा नुङार नाखुरीकुङ लागी ठाउँ टयार खासार ङा फेरी ल्हेसार राल्हे र नाखुरीककी ङा लेच ठावाङ आल्ल्हे, होटै नाखुरीक र ङा खाटा न छान्ने। 4ङा नुङ्ङन लेच लाम च नाखुरीकै चीन्डीमने।”
5टब ठोमै डेया, “ए प्रभु, नाको कुला नुङ्ङन ले, होसे कानकी हीर थाहा माले, झन नाको नुङ्च लाम कानै कुटजाट्न चीन्डीले?”
6येशूये होसकी डेया, “लाम, सत्य र जीवन ङा न हो। ङा लकीङ बाहेक कुसे भर्मी र बोइ लेठाङ राखी माय्होक्ले। 7इडीक नाखुरीकै ङाकी चीन्डीच लेनाङ, ङौ बोइकी र चीन्डीच लेया। अब लकीङ आलाक नाखुरीकै ङौ बोइकी चीन्डीले, हीजैडेनाङ नाखुरीकै होसकोकी डाङ्ङने।”
8फीलीपै येशूकी डेया, “ए प्रभु, कानकी बोइ टान्हाक्ङ यान्ही, होडीक लेनाङ कान चीट्ट बुझडीले।”
9येशूये डेया, “फीलीप! इडीक लोट्च समयसम्म ङा नाखुरीक खाटा न ले, र पनी नाकै ङाकी माचीन्डीले? ङाकी डाङ्चये बोइकी डाङ्ङ भ्यामने। ङाकी डाङ्ङ र नाको हीजै ङाकी, ‘बोइ टान्हाक्ङ यान्ही’ डेले? 10ङा बोइखाटा ले, र बोइ ङाखाटा ले डेच कुरा ही नाको विश्वास माजाट्ले? ङै नाखुरीककी डेच बचन ङाल्है न ङाक्च होइन, टर ङाखाटा लेच बोये न लहो काम ङा लकीङ जाट्नन ले। 11ङा बोइखाटा ले र बोइ ङाखाटा ले डेच कुरा विश्वास जाट्नी। नभा ङै जाट्च अचम्मौ कामको ङोसार ङाकी विश्वास जाट्नी।
12“साँच्ची न, ङा नाखुरीककी डेले, सुये ङाकी विश्वास जाट्ले, होचे ङै जाट्च काम र जाट्ले, र होसे डेनाङ बा-बाड्सो काम जाट्ले, हीजैडेनाङ ङा बोइलेठाङ नुङ्ङन ले। 13नाखुरीकै ङौ म्यार्मीनाङ ही ङेन्हाङ र मीजा लकीङ बोयो महीमा छान्ख्यौ डेयार ङा होसे नाखुरीककी पुरा जाट्न याल्हे। 14नाखुरीकै ङौ म्यार्मीनाङ हीर कुरा ङेल्हे डेनाङ ङा होसे नाखुरीकुङ लागी जाट्न याल्हे।
पवित्र आट्मौ प्रतिज्ञा
15“इडीक नाखुरीकै ङाकी माया जाट्ले डेनाङ ङै याछ आज्ञाको मन्डीले। 16अनी ङा बोइखाटा बिन्ती जाट्ले, र होसकै नाखुरीकुङ लागी अर्को काट जना सल्हाकार बीर्न्हकाले, र होसको चहीँ नाखुरीक खाटा सढैँ भरी ङुले। 17होसको सत्यौ आत्मा हो। टर संसारै होसकोकी स्वीकार माजाट्ले। हीजैडेनाङ संसारै होसकोकी न डाङ्ले न चीन्डीले। टर नाखुरीकै चहीँ होसकोकी चीन्डीले, हीजैडेनाङ होसको नाखुरीकखाटा ङुले, र नाखुरीक भीत्री बास जाट्ले। 18ङा नाखुरीककी टुहुराकोलाक लेखा माडास्ले, ङा फेरी नाखुरीकलेठाङ राल्हे। 19अब कालाप न्हुइङ संसारै ङाकी सेन्र माडाङ्ले, टर नाखुरीकै चहीँ ङाकी डाङ्ले। ङा फेरी जीवाच बाटै नाखुरीक र जीवाम ङुले। 20अनी होसनीक नाखुरीकै बुझडीस्ले, ङा ङौ बोइखाटा ले, र नाखुरीक ङा खाटा ले, र ङा नाखुरीकखाटा ले। 21ङौ आज्ञाको मन्डीच न ङाकी माया जाट्च भर्मी हो। अनी ङाकी माया जाट्चकी ङौ बोये र माया जाट्ले। ङा होसकी माया जाट्ले, र होसे लेठाङ डाङ्ले।”
22यहूदास इस्करीयोट चहीँ होइन, टर अर्को न यहूदा डेच चेलै येशूकी डेया, “ए प्रभु, हीजै नाको लाहाकी कानलेठाङ मट्टै डाङ्ले, टर संसार लेठाङ चहीँ होइन डेले?”
23येशूये होसकी डेया, “ङाकी माया जाट्चकै ङौ शिक्षाकी मन्डीले। ङौ बोये होखुरीककी माया जाट्ले, अनी बोइ र ङा होखुरीक लेठाङ राहार होखुरीक खाटा ङुले। 24टर ङाकी माया माजाट्चकै ङौ शिक्षाकी मामन्डीले। नाखुरीकै सेच इसे बचन ङा लकीङ राछ होइन, टर ङाकी बीर्न्हकाच बोइ लकीङ न राछ हो।
25“इसे पट्ट न कुराको नाखुरीकखाटा लेनाङ न ङै नाखुरीककी डेम याम्हने। 26टर बोये ङौ म्यार्मीनाङ बीर्न्हकाच सल्हाकार पवित्र आत्मै नाखुरीककी पट्ट न कुरा पाहाक्ले र ङै नाखुरीककी डेच पट्ट न कुराको आर्मीटाक्ङ याल्हे।
27“ङा नाखुरीकखाटा शान्ति डास्न डार नुङ्ले। ङा ङाल्हौ शान्ति नाखुरीककी याल्हे। संसारै याछ ल्याक्च शान्ति होइन। नाखुरीकुङ मीमन ब्याकुल छान्की माय्हानी र माबीर्हीनी। 28ङै ‘ङा नुङ्ङन ले, अनी फेरी ङा नाखुरीक लेठाङ ल्हेसार राल्हे’ डेच कुरा नाखुरीकै सेया। इडीक नाखुरीकै ङाकी साँच्ची न माया जाट्च लेनाङ ङा बोइ लेठाङ नुङ्ङन ले डेच कुरा सेयार नाखुरीक मार्हाङ्छ लेया, हीजैडेनाङ बोइ ङा डेनाङ महान ले। 29अब इसे पट्ट न कुराको छान्की डेनाङ अघी न ङै नाखुरीककी डेम याम्हने, होटबाटै इसे कुराको पुरा छान्नाङ नाखुरीकै विश्वास जाट्ले। 30अब नाखुरीकखाटा ढेरै ङाक्च ङौ समय माले, हीजैडेनाङ इसे संसारौ शासक#14:30 इसे संसारौ शासक “इसे संसारौ शासक” डेच चहीँ शैतान हो। राम्हन ले। टर होच्यो ङामीटाक हीर शक्ति माले। 31टर संसारुङ पट्ट न भर्मीकै ङा बोइकी माया जाट्ले डेच कुरा वार्खी य्होक्ख्यौ डेयार ङा बोये याछ आज्ञाको मन्डीमन ले। सोनी, अब कान इटै नुइङ।”
Tans Gekies:
युहन्ना 14: EMGP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 (Active), Wycliffe Bible Translators, Inc. All rights reserved.
