ማቲወስት ወንጌል 2
2
ፈወነ 2
ምስራቂስ ተረቍ ፅግልውጥ ተመራምርሸቍ እቅ
1እየሱስ ንጕስ ኺረውድስት ዚምኒዝ ይዅዳ ኻግሪዝወ በተልኺምስ እዅርሸት ግረ፣ ፅግልውጥ ተመራምርሸቍ እቅ ምስራቂስ ጕጝ እየሩሳልየም ተርጝ፦ 2«እዅርሸው ኣይዅዳነ ንጕስድ ኣውል የጝ? ጝፅግልወድየንት ምስራቂስ ቓልን ጝጭስ ሲግድነ ተርንኵኑን» ይጝ ዋቕር።#የር. 23፡5፤ ዘካ. 9፡9፤ ዘዅ. 24፡17።
3ንጕስ ኺረውድስም እኒንት ወሻንድ ዳጝግፁ፤ እየሩሳልየም ኻትመየንም ምሉዝ ጝጅቅ ዳጝግፅች። 4ጘጝም ካኽነጣነ ኻልቅጢዝመ ኽዝቪዝቍ ወሪትት ኽግ ክንሰጢዝ እጝቅትቅ ጭጝ፦ «ክርስቶስ ኣውል የጝ እዅርሸውድ?» የው ዋቕሩ። 5ጛይም፦ «ይዅዳ ኻግሪዝወ በተልኺምስ የጝ። 6ምላሰንድም ነቭይዝ፦ ‹ይዅዳ ኻግሪዝወ በተልኺምወ!
ይዅዳ ኻግሪዝቍ ኽየቍ ኻትምጢስ ውረውረዝቅ ፅጓርም፤
ይኽዝቭ እስራየልት ሊሚደው ቅመተ ክጊስ ፍጡ› ይሽት ፃፍሽኩ» ይጝ ድቍ።#ምክ. 5፡2።
7እንዝ ግረ ኺረውድስ እዛይ ፅግልውጥ ተመራምርሸቍ እቅድዛት ስውርዝ ጭጝስ ጝፅግለወድ እትለው ትክክልኘ ግርየድየንት ዋቕር ጛጊስ ተረድሹ። 8ጛትም፦ «ፊጥን ኽፃንድየንት ጥጝቅቀዝ ደምዝጥን፤ ችጝርናንድም ያንም ፊጥ ጝጭስ ሲግጣንስ ማጥን ዋጥርድርን ይጭስ ድቍጥን» የው በተልኺም በርሱ። 9ጛይም ንጕስድ የውድየንት ወሽጝ ጝታጒደነድ ቃጥል፤ እድየን ምስራቂስ ቓልጘው ፅግልወድም ጛት ቃዋⶖ ፊስ ኽፃንድ ፅበው ስፍረይል ችጛንድ ችብሩ። 10ፅግልወድየንት ቓልጛንድም ጭቕጘ ዲስ ይ። 11ጝኒል ጥውጛንድም ኽፃንድ ጝኘ ማርያም ጅቅ ቓል፤ ጝታበዊዝም ደፋሽጝ ጝጭስ ሲግድ፤ ጝታሳፁንድም ብዝጝ ዊርቀ፣ እጣን፣ ከርቭየ፣ ይውት ይው። 12እደረም ኺረውድስ ትጐ ዋጥራይጘጘ ኒቪዝ ጣጝቅቅሳንስቅ ላየ ጒደነዝ ጝታኻግር ፊር።
ዮሴፍ ኽፃኒዝመ ጝኘስ ፃይ ግቭፅ ሰየጘ
13ፅግልውጥ ተመራምርሸቍ እቅድ ፊርጘት ግረ ኣደረት መላክ ዮሴፍስ ኒቪዝ እትል፦ «ኺረውድስ ኽፃንድ ቁጠ ደምዘኵነ ጕር ኽፃንድየንት ጝኘ ጅቅ ፃይር ግቭፅ ትጐ ሰይ፤ ያን ድቍጪስቅም ጝግል ጐይ» ዩ። 14ዮሴፍም ኻር ጕ ኽፃንድ ጝኘ ጅቅ ፃይ ግቭፅ ፊሩ። 15ኺረውድስ ክርጢስቅም ጝግል ጐዩ፤ እንም ኣቐውድ ነቭይዝ ኣደረቲስ፦ «ይዅርት ግቭፅስ ጭጙን» ይሽተው ቃልድ ፋፅምሻንስ የጝ።#ዀስ. 11፡1።
16ኺረውድስም ፅግልውጥ ተመራምርሸቍ እቅድዛይ ጝት ኻጝስጘጘ ኣርቓንድ ጭቕጘ ቈጣሹ፤ ጛጊስ ተረድሸው ግርየይዝ ሚስርትዝም ጝታእድሚድ ሊጘምትዝመ ጝዝ ሳዝ ኣቐቍ በተልኺምስመ ጝርጅልወይዝቍ ኻግራኒል ዊነቍ ግልቍ ኽፃናታንድዛትቅ ዊተድር እፃቕ ቍውሱ። 17ኣይንድ ነቭይ የርምያስ፦
18«ሊዝዝመ እሪተዙ ድመዝ ራመስ ወይሽቱ፤
ራኺል ጝርቝርት ማጥን ሊዝች፤
ጝርቝርድ እጝቅቅ ኣቢትጛንስቅ
ዲብሽተነው እምቢ ይች»
የው ዊግተውድ ፋፅምሹ።#የር. 31፡15።
ዮሴፍ ኽፃኒዝመ ጝኘስ ፃይ ናዝሪት ዋጥረጘ
19ኺረውድስ ክረት ግረ ኣደረት መላክ ዮሴፍስ ግቭፅስ ኒቪዝ እትል፦ 20«ኽፃንድ ቁጥጘ በነቍ እቅድ ክርጛንስቅ ጕር ኽፃንድየንት ጝኘ ጅቅ ፃይር እስራየል ኻግሪል ዋጥር» ዩ። 21ዮሴፍም ጕ ኽፃንድ ጝኘ ጅቅ ፃይ እስራየል ኻግሪል ጥዉ።
22ዊገድ ግን ኣርኪላወስ ጚር ኺረውድስት ፊንተ ይዅዳትል ኒግሰጘ ወሻንድ ጝጐ ፊረነውድ ጐውቱ፤ እደረም ጝጭስ ኒቪዝ ኣስርድዛንስቅ ገሊለት ኣውራጀይዝጐ ፊሩ። 23ነቭያታንዝ፦ «ናዝሪትቱ ይሽትጡ» ይሽት ዊግሸውድ ፋፅምሻንስ ማጥን ናዝሪት የነይ ኻትመትል ፊር ጐዩ።#እሳ. 11፡1፤ ማር. 1፡24፤ ሉቃ. 2፡39፤ ይዃ. 1፡45።
Tans Gekies:
ማቲወስት ወንጌል 2: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
