ማቲወስት ወንጌል 10
10
ፈወነ 10
እየሱስ ፅጭ ሊጘ ኻወርየታንድ ማርፅ እፃቐጘ
(ማር. 3፡13-19፤ ሉቃ. 6፡12-16)
1እየሱስም ፅጭ ሊጘ ክንደጥድዛት ጝጐ ጭጝ እርኵሳን መንፈሳንድዛት እቂስ ፊስጛንስ፣ ቕጅወዝመ ፅውዘዝድቅ ቓዝጛንስ፣ ስልጣን ይዉ። 2ፅጭ ሊጘ ኻወርያታኒዝ ሽድም፣ በውገ ቢጥሮስ ይሽተው ስሙንስመ ጝዝን እንድርያስስ፣ ዘቭዲወስት ቝር ያይቈቭስመ ይዃንስስ፣ 3ፊልበውስ፣ በረተለሚወስ፣ ተውማስ፣ ቀረጥ ቀቨው ዊነው ማቲወስ፣ እልፊወስት ዅር ያይቈቭ፣ ታዲወስ ይሽተው ልቭዲወስ፣ 4ቀንየተ ስሙንስመ እየሱስት ዲቍስ ይወው ኣስቈረትቱ ይዅዳስ ጛይ።
(ማር. 6፡7-13፤ ሉቃ. 9፡1-6)
5እየሱስ እንዛይ ፅጭ ሊጘ ኻወርየታንድዛት እፃቑ፤ እንት የውም ኣዙ፦ «ኣኽዛቫኒል ፊርትርነ፤ ሳምራነ ኻትመይልም ጥውትርነ፤ 6ኽሽስ ቢቂዝጘ ድዘቍ እስራየላኒዝጐ ፊጥን። 7ፊትርንም፦ ‹ምጝግስተሰማያት ኣልትርኵች› ይርና ሲቭክጥን።#ሉቃ. 10፡4-12። 8ፅዊተቍድ ቓዝጥን፤ ክረቍድ ጒስጥን፤ ለምፃማንድ ቓዝጥን፤ ጋኒናንድ ፊስጥን፤ ኻርነይዝ ለምትርነጘ ኻርነይዝ ይውጥን። 9ክታኪሺዝ ዊርቅ፣ ዊንም ቍርሽ፣ ዊንም ላጥ ሳንቲማን ፃይትርነ። 10ጒደነዝም ኸረጢት፣ ቂይረነው ኣልቨ፣ ቂይረነው ፃብ፣ ግብም፣ ፃይትርነ፤ ሰራሸው እጅርዝ እልቱ ዀነው ጥውሸው የጝ።#1ቈረ. 9፡14፤ 1ጢመ. 5፡18።
11«ላው ኻትመል ዊንም ኪውል ጥውርናንድ፣ ክታት ለምርጠ ፊቅደው እጅር ደምዝርን ጝግል ፈውጥን፤ ጘጝ ስፍረድየንት ሊቅርን ፊርትርኒስቅ ጘጝ ጝኒል ጐይጥን። 12ጝኒል ጥውርናንድም ዲግተ ይውጥን። 13ጘጝ ጝንድ ዲግተ ጥውሸው ኣቕሽ ክታዲግተድ ጝግል ችጝነ፤ ጥውሻው ኣቕሽ ግን ክታዲግተድ ክታጐ ዋጥርነ። 14ኣውማው እጅር ክታት ለምጠቅ ይሽ ዊንም ክታቃልድ ወጨቅ ይሽ፣ ጘጝ ጝኒስ ዊንም ጘጝ ኻትመይስ ፍርናንድ ክታልኲዙ ኣወረድየንት#10፡14 ኣወረ ኣርግፈነውድ እደረት ቃልድየንት ለምጠቅ ይጛንስቅ ክታጐ ተረው ፍርዲስ ቢን እጀቍ ኣቐነውድ ቓሊሰው ምልክት የጝ። ኣርግፍጥን።#ኻወ. 13፡51። 15እማንዝ የኵን፤ ፍርድዝ ኰር ጚ ኻትመየንትል ችጘው ቕፃሪስ ሽ ሰደውምስመ ጐመረስትል ችጘው ቕፃርድ ቀልጡ።#ማቲ. 11፡24፤ ዘፍ. 19፡24-28።
16«እንወ! ክታት ቢቂዝጘ ተኵልጢዝ ማኽሊል እፃጭር፤ እንዝ ማጥን ሲቭረይዝጘ ብልኻን፣ እርግቭ ትጘ ገርኻን ኣጥን።#ሉቃ. 10፡3። 17እቅ ክታት ፍርድ ሸጐውል ዲቍስጝ ይውጥቍ፤ ጝታምኵራቫን ጨቨቅም ጊርፍጥቍ፤ እንዝ ማጥን ጛጊስ ጣጝቅቅጭጥን።#ማር. 13፡9-11፤ ሉቃ. 12፡11-12፤ 21፡12-15። 18ይቍዝም ቅመቲል ንጕሳኒልም ፊስጥቍ፤ እንዝም ጛጭስመ ኣኽዛቫኒዝ በዊል ይሚዝረጫን ኣትርንቅ። 19ፃይሽርናንድ፦ ‹ወረጘ ዊግትንቅ? ኣወሽንስ ዊስንቅ› የነወዝ ጨጝቅሽትርነ፤ ክትን ዊግትርነ ጥውሸው ዊገድ ኣይንድ ክታጭስ ነይሽትጡ። 20ክታግል ኣቕ ዊግተውድ ሲመይ ፅበው ክታይርት መንፈስድ የጝጚ ክትንም ኣይርነቅ።#ማር. 13፡12፤ ሉቃ. 21፡16።
21«እጅር በገዘ ጝዝንት ክርጘል ዲቍስ ይውጡ፤ ኣይርም ጝዅርት ዲቍስ ይውጡ፤ ዅልም ጝታኣቅሊል ኣምፅጥቍ፤ ቍውስጥቍም። 22ይሽⶔዝቍዝ እጝቅ እጅርዝቅ ሽክሽርነቅ ኣትርንቅ፤ ኻትሸነይል ኣሽ ፀናቐው ግን ጘጝ ቓድጡ።#ማቲ. 24፡9፤ 13፤ ማር. 13፡13፤ ሉቃ. 21፡17። 23ላው ኻትመይስ ሲድስጛንድ ላየ ኻትመል ሰይጥን፤ እማንዝ የኵን፤ እጅር ዅር ዋጥር ተርጢስቅ እስራየላነ ኻትምጥድዛት ችጝዝርን ኻታይርነቅም።
24«ክንደተ ጝክንሰተይስ ዲቋውም፤ ኣገልጋይም ጝኣደረይስ ዲቋውም።#ሉቃ. 6፡40፤ ይዃ. 13፡16፤ 15፡20። 25ክንደተ ጝክንሰተይዝጘ ኣቐውዝየ፣ ኣገልጋይም ጝኣደረይዝጘ ኣቐውዝየ ጝጭስ ኣቐኵ፤ ወነድየንት፦ ‹ብየልዘቩል› ይጘውዝየ ጝበተሰቭድሰ ኣወይጝ እኒስ ዲቈው ጭቓ ሽ ፊሳቍ?»#ማቲ. 9፡34፤ 12፡24፤ ማር. 3፡2፤ ሉቃ. 11፡15።
ኣውት ጐውተነው ጥውሽጥጘ
(ሉቃ. 12፡4-7)
26«ነስየ እቅድ ጐውትርነ፤ ሺፍንሸውድ ጋልፅሽተነው፣ ጭቭረውድም ኣርቕሽተነው እዳቓውም።#ማር. 4፡22፤ ሉቃ. 8፡17። 27እንዝ ማጥን ያን ክታጭስ ጥመዝ ድቈውድየንት ብርኻንዝ ዊግትጥን፤ ሽዅሽዅተዝ ወሽርነውድየንትም ኣደቫቫይዝ ኣውጅጥን። 28ስየት ኣሽጚ ኒፍስት ቁጥጘ ቻላቍ እቅድዛት ጐውትርነ፤ ኽሽስ ኒፍስዝመ ስየዝ ገኻነመሳትዝ ድስጠ ቸለው ኣምላክድየንት ጐውትጥን። 29ሊጘ መልቍ ዚልቅድ ኣኰ ሳንቲምዝ ቅይሽጘኵ ኣየውቀ? ኣነጚ ጛጊስ ላይሸን እኳ ሲመይ ፅበው ክታይርድ ፊቅዲጝቀ ሊቭር እዳቓይም። 30ክትንስ ክታውሪዙ ፅቭቀድ እኳ እጊተው የጝ። 31ነስየ ጐውትርነ! ንቕፀቍ መልቍ ዚልቂስ ክትን ዲቍርነቅ የጝ።
32«እንዝ ማጥን እቀ በዊል ይጭስ ሚዝርደዊዝቅ ያን ቈሽ ሲመይ ፅበው ይርት በዊል ጝጭስ ሚዝርድጭር። 33እቀ በዊል ይት ኻድየዊዝቅ ቈሽ ያንም ሲመይ ፅበው ይርት በዊል ጝት ኻዲጭር።#2ጢመ. 2፡12።
34«ያን ተጠውድ፣ ዝቨትል ዲግተ ነስጨ ፃቭርን ኻስቭትርነ፤ ያን ተጠውድ ሰይፍ ነስጨጚ ዲግተ ነስጨም ኣየው። 35ያን ተጠውድ
ጊር ዅር ጚርቲስ ቲዝጨ፣
ምጂ ዅረትም ጝርኘቲስ ቲዝጨ፣
ስሪትም ጝርጣስንቲስ ቲዝጨ፣ የጝ።
36እጅርዝ ጝፃለትድ፣
በገዘ ጝበተሰቭድ ኣጥቍ።#ምክ. 7፡6።
37ይሽ ጚርት ዊንም ጝኘት ቀነውድቅ ይው ኣጠ ጥውሻውም፤ ይሽ ጝዅርት ዊንም ጝቝረት ቀነውድቅ ይው ኣጠ ጥውሻውም። 38ጝሚስቅልድየንት መውር ይግርገይል ቲክናው እጅርድቅ ይው ኣጠ ጥውሻውም።#ማቲ. 16፡24፤ ማር. 8፡34፤ ሉቃ. 9፡23። 39ጝርዅየሸንት ቓዝጠ በነው እጅርድቅ ጝርት ድሰኵ፤ ጝርዅየሸንት ይማጥን ድሰው እጅርድ ግን ጝርት ቓዘኵ።#ማቲ. 16፡25፤ ማር. 8፡35፤ ሉቃ. 9፡24፤ 17፡33፤ ይዃ. 12፡25።
40«ክታት ለምረውድ ይት ለምረኵ፤ ይት ለምረውድም ይት እፃቐው ኣይርት ለምረኵ።#ማር. 9፡37፤ ሉቃ. 9፡48፤ 10፡16፤ ይዃ. 13፡20። 41ነቭይድየንት ነቭይዝ ሽ ለምረውድቅ፣ ነቭዪዙ ወየድ ለምርጡ፤ ፃድቅድየንት ፃድቅዝ ሽ ለምረውድቅ፣ ፃድቂዙ ወየድየንት ለምርጡ። 42እማንዝ የኵን! ኣውማው እጅር እንዛይ መልቊስ ላውድየንት ይክንደተ ኣቑዝ ላው ሽቅነ ቓዝቕዘቍ ኣቝ ይውሽ ጝወየድ ባውም።»
Tans Gekies:
ማቲወስት ወንጌል 10: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
