ይዃንስት ወንጌል 8

ፈወነ 8

ሽርሙጥነዝ ችጝሽረይ እውነ

1እየሱስ ግን ደቭረ ዘይት ፊሩ። 2ጛምርሲዝም ግረቨዝ መቅደስ ጝኒል ፊሩ፤ ኽዝቭድም እጝቅቅ ጝጐ ተሩ፤ ጘጝም ጐይ ክንስጠ ኪርሙ።

3ወሪትት ኽግ ክንሰጢዝመ ፈሪሳኒዝም ሽርሙጥነዝ ችጝሽረይ እውነት ፃይጝ ጝጐ ነስጝ ኽዝቪዝ ማኽሊል ችብስ። 4እየሱስትም፦ «ክንሰተወ! እኝቸን እውነየን ሻርሙጥራ ችጝሽች። 5ሙሴ እነየቍ እቍንድ ቕርጘዝ ድድብን ቍወናንስ ኽግጊዝ ኣዝኩ፤ ክትሰ ጝርማጥን ወረጘ ይራ?» ይ።#ዘሊ. 20፡10፤ ዘዳ. 22፡22-24። 6እነየው ዋቕረ ኣልስጘውድ ጝት ኪሰነው ምላሰነ ችጛንስ ማጥን የጝ፤ እየሱስ ግን ፍጥ የው ጝናኒዝ ዝቨይል ፃፍጠ ኪርሙ።

7ጛይም ደግምግምጝ ዋቕርጛንድ፣ ኒየ ጭቅ የው በር፦ «ክታጊስ ኽጥያት እጀው እጅር በዊል ጝርት ቕርጘዝ ጣዝነ» ዩ። 8እንደ ገነም ፍጥ የው ዝቨይል ፃፉ። 9ጛይም እኒንት ወሽጛንድ ሽመቅሊስ ኪርምጝ ላው ላው ይጛ ፍጝ ፊር፤ እየሱስም እውነየን ጝበዊል ችብትረጘ ጝግል ጝለ እዳቑ። 10እንዝ ግረ ጭቅ የው፦ «እውነ ክተ! ክት ኪሰቍድ ኣውል እኵ? ክት ፊርደውድ እጀውመ?» ዩ። 11ጚይም፦ «ኣደረወ! ላውም እጀው» ይች። እየሱስም፦ «ያንም ፊርጠቅም ፊጥ፤ ነስየ ሊጘት ኽጥያት ሰራሽተ» ዩ።

እየሱስ ኣልምዙ ብርኻን የጝ

12እየሱስም እንደ ገነ ኽዝቪዝ፦ «ያን ኣልሚዙ ብርኻን የጝ፤ ይት ቲክነውድቅ ርዅየዙ ብርኻን ጝጭስ ኣጡ፤ ጥመዝም ዋጥርጥራውም» የው ዊግቱ።#ማቲ. 5፡14፤ ይዃ. 9፡5። 13ፈሪሳንድም፦ «ክት ክቕምት ማጥን ሚዝርድራንስቅ ክሚዝርነይድ ለምርሻም» ይ።#ይዃ. 5፡31። 14እየሱስም፦ «ያን ይቕምት ማጥን ሚዝርጥሽም ኣዊስ ተጠጘ፣ ኣውገም ፊጨጘ ኣርቐር ኣቓንስቅ የሚዝርነይድ እማን የጝ። ክትን ግን ኣዊስ ተጠጘ፣ ኣውገም ፊጨጘ ኣርቕርነው ዊገም እጀው። 15ክትን እቀ ኻሰቪዝጘ ፊርድርነኵ፤ ያን ግን ኣውማውትቅ ፊርጠቅም። 16ፊርጥሽም እኳ ይት ኣፃቐው ኣይር ይጅቅ ኣቓንስቅ፣ ይለም ኣይቀር ኣቓንስቅ ይፍርድድ ጭቅየው የጝ። 17ሊጘ እቅዙ ሚዝርነይድ እማን ኣቐጘ ክታኽጊዝ ፃፍሽኩ። 18ይቕምት ማጥን ሚዝርጠር ላውድ ያን የጝ፤ ላየ ይሚዝርድ ቈሽ ይት እፃቐው ኣይር የጝ» የው ዊሱ። 19ጛይም ኣይንድ፦ «ኪርድ ኣውል የጝ?» ይ። ጘጝም፦ «ይትም ኣነ ይርት ኣርቓይርነቅም፤ ይት ኣርቕርናን፣ ይርትም ኣርቕትርነ ዊንድርኑ» የው ዊሱ።

20እየሱስ እኒንት ዊግተውድ መቅደስ ጝኒስ ጊንዝቭ ለምረነ ሳፁኒዝ ጋቢል ኣቕ ዊኑ፤ ኣቕሽም ጝግርየድ ገነ ችጚየው ኣቓንስቅ ኣውማውቅ ጝት ፃዪየውም።

21እየሱስም እንደ ገነ፦ «ያን ፊጭር፤ ክትንም ይት ደምዝትርንቅ፤ ክታኽጥያቲዝም ክርትርንቅ፤ ያን ፊጠዊዝጐ ክትን ተረነው ቸላይርነቅም» ዩ። 22ኣይዅዳንድም፦ « ‹ያን ፊጠዊዝጐ ክትን ተረነው ቸላይርነቅም› የውድ ጝቕምት ቁጡመ ኣጢ? ኣርቀር!» ይ። 23ጘጝ ግን፦ «ክትን ሳይስ የጝ፤ ያን ግን ኒየይስ የጝ፤ ክትን እን ኣልሚስ የጝ፤ ያን ግን እን ኣልሚስም ኣይቀር። 24ክታኽጥያቲዝ ክርትርነጘ ድቍኩን፤ ‹ያን ጘጝ የጝ› ያንድ ያን ጘጝ ኣቐጘ ኣምኒርነውዝየ ክታኽጥያቲጅቅ ኣርነጘ ክርትርንቅ» ዩ።

25ጛይም፦ «ክት ኣው የጝ?» ይ። ጘጝም፦ «ነኳን ኣሽ ድቈርድ ያን ጘጝ የጝ። 26ያን ክታት ዊግጠው ፊርጠውም፣ ንቕፀው ዊገ ፃቀር የጝ፤ ዊገድ ግን ይት ኣፃቐውድ ኣምንሸው የጝ፤ ጝጊስ ወጨውድየንት ኣልሚዝ ድቈኵን» ዩ። 27ጛይ ግን ጚርት ማጥን ድቋ ኣቐጘ ኣስክሲየቍም። 28እንዝ ማጥን እየሱስ፦ «እጅር ዅርት ሚስቅሊል ንየስ ሽርናንድ ያን ጘጝ ኣቐጘ ኣርቕትርንቅ፤ እኒዝጘም ኣይር ይት ክንሰጘ ዊግጠርጚ በገዘ ይፍቃድዝ ውረውረቅ ፃቨቅ ኣቐጘ ኣይንድ ኣርቕትርንቅ። 29ይት እፃቐውድ ይጅቅ የጝ፤ ዊትርቅ ጝት ዲስ ሸውድየንት ፃቨር ኣቓንስቅ ይት ይለ በሪየውም» ዩ።

30እኒንትም ዊግተጘ ንቕፀቍ እቅ ጝት ኣምን።

ኽጥያትዙ በርነይስ ኻርነይ ፈነው

31እየሱስም ጝት ኣምነቍ ኣይዅዳንድዛት፦ «ክትን ይቃሊዝ ፀናቕር ፅብርንሽ ኣማንዝ ይክንደጥ ኣትርንቅ። 32እማንትም ኣርቕትርንቅ፤ እማንም ክታት ኻርነይ ፊስጡ» ዩ። 33ጛይም ዊስጝ፦ «ይን ኣቭርኻምት ዚረ የጝ፤ ኣውማውስም በር ኣቕን ኣርቓይነቅ፤ እደስለ፦ ‹ኻርነይ ፍትርንቅ› ይረኵሳ?» ይ።#ማቲ. 3፡9፤ ሉቃ. 3፡8። 34እየሱስም፦ «እማን እማን የኵን! ኽጥያት ሰራሸውድቅ ኽጥያትዙ በረ የጝ። 35በረ ዊትርቅ በተሰብ ጅቅ ፅባውም፤ ዅር ግን ዊትርቅ በተሰቭ የጝ። 36ነስየ ዅር ክታት ኻርነይ ፊስሽ እማንዝ ኻርነይ ፍትርንቅ። 37ኣቭርኻምት ዚረ ኣቕርነጘ ኣርቐኵን፤ ዊገድ ግን ይቃልድ ለምራይርነቅ ኣቕርናንስቅ ይት ቁትርነ በንርነኵ። 38ያን ይርቲስ ቓለውድየንት ዊግጠኵን፤ ክትንም ክታይርቲስ ወሽርነውድየንት ፃቭርነኵ» የው ዊሱ።

39ጛይም፦ «ይናኣይርድስ ኣቭርኻም የጝ» ይ፤ እየሱስም፦ «ኣቭርኻምት ቝር ኣቕርናንስ፣ ኣቭርኻም ሰራሸው ሰብድየንት ሰራሽትርነ ዊንድርኑ። 40እደረቲስ ወጭ እማን ዊግጠርድየንት ቁትርነ ደምዝርነኵ፤ ኣቭርኻም ግን እንት ሺየውም። 41ክትን ፃቭርነውድ ክታይር ፃቨውድየንት የጝ» ዩ። ጛይም፦ «ይን ሽርሙጥነዝ እዅርሽነቅ ድቃልም ኣይነቅ፤ ላው ኣይር ፃይነቅ የጝ፤ ጘጝ ይናኣይርድም እደረ የጝ» ይ።

42እየሱስም እንት ዩ፦ «ክታይርድ እደረ ኣቓንስ፣ ይት ቀንትርን ዊንድርኑ፤ ምላሰንድም ያን ተጠውድ እደረቲስ ፍ የጝ፤ ጘጝ እፃቑጚ ያን በገዘ ይስልጣንዝም ተጢቀር። 43ያን ዊግጠውድየንት ኣስክሳይርነውድ ወረጘ የጝ? ምላሰንድም ይቃልድየንት ወሸነው ቸላይርነቅ ኣቕርናንስቅ የጝ። 44ክትን ክታይር ዳቪለውስት ቝር የጝ፤ ጝበንድየንትም ፋፅምትርነ በንርነኵ፤ ጘጝ በውገይስ ኪርም ኒቭስ ቍወተ ዊኑ፤ እማን ጝጅቅ እጀው ኣቓንስቅ እማን ጅቅ ችብራውም፤ ጘጝ ኻሽወረ፣ ኻሽትዝ ኣይርም ኣቓንስቅ ኻሽት ዊግታንድ በገዘ ጝቕምቲስ ፊስ ዊግተኵ። 45ያን ግን እማን ዊግጠር ኣቓንስቅ ይት ኣምናይርነቅም። 46ክታጊስ ያን ኽጥያትኘ ኣቐነውድ ቓሊስጠ ቸለው እጅር እኩመ? እማን ዊግጠር ኣቐውዝየ ውረ ይት ኣምናይርነቅ? 47እደረቲስ ኣቐው፣ እደረት ቃልድ ወሸኵ፤ ክትን ግን እደረቲስ ኣይርነቅ ኣቕርናንስቅ እደረት ቃልድ ወሻይርነቅም።»

እየሱስ ኣቭርኻምቲስ በውገ ዊነው ኣቐጘ ዊግቱ

48ኣይዅዳንድም፦ « ‹ክት ሳምራነው የጝ፤ ጋኒንዝም ፃይሽርኵሩ› ይነውድ እማን ኣየውቀ?» ይ። 49ጘጝም፦ «ያንስ ይርት ኪብርዘኵንጚ ጋኒንም እጀር፤ ክትን ግን ይት ኣዋርዝርነኵ። 50ያን ይቕምስ ክቭር በነቅም፤ ያን ኪብርጨ በነው ላየ እኩ፤ ፊርደውድም ጘጝ የጝ። 51እማን እማን የኵን! ይቃልድ ሊሚደውድቅ ስሪስቅ ክርጘ ቓላውም» ዩ። 52ኣይዅዳንድም፦ «ጋኒኒዝ ፃይሽረር ኣረጘ ገነ ነን ኣርቕኑን፤ ኣቭርኻም ክሩ፤ ነቭያታንድም ክር፤ ክት ግን፦ ‹ይቃልድየንት ሊሚደውድቅ ስሪስቅ ክርጘ ቓላውም› ይረኵ። 53ኣየውጚ? ክረው ይናኣይር ኣቭርኻምቲስመ ክት ዲቍረራ? ነቭያታንድም ክርጝኵ፤ እደስለ ክት ክቕምት ኣው ይተ በንር የጝ?» ይ። 54እየሱስም፦ «ያን ይቕምት ኪብርዛን ይክቭርድ ወየ እጀውም፤ ይት ኪብርዘውድ ግን ክትን ይናኣምላክ ይርነው ይር የጝ። 55ኣነጚ ጝት ኣርቓይርነቅም፤ ያን ግን ጝት ኣርቐኵን፤ ኣርቐቅም ያን፣ ክታጘ ኻሽወረ ኣጨ ዊኑን፤ ዊገድ ግን ጝት ኣርቐኵን፤ ጝቃልድም ሊሚጠኵን። 56ክታይር ኣቭርኻም ጝበንድ ይግርየድ ቓልን ዲስ የነው ዊኑ፤ ቓልም ዲስ ዩ» ዩ።

57ኣይዅዳንድም፦ «ገነ ኣኵርጝን ምት ኣኳ ኣቒረርድመ ኣቭርኻምት ቓልዱ?» ይ። 58እየሱስም፦ «እማን እማን የኵን! ኣቭርኻም እዅርሸነዊስ በውገ ያን እኩን» ዩ። 59ጛይም ኣይንድ ጣዝጥጘ ቕርጘ ጕይ፤ እየሱስ ግን ጛጊስ ሲውርሹ፤ መቅደስ ጝኒስም ጝታማኽሊዝ ፃቭ ፍ ፊሩ።

Tans Gekies:

ይዃንስት ወንጌል 8: ኽምጣኣኪ

Kleurmerk

Deel

Kopieer