ይዃንስት ወንጌል 7
7
ፈወነ 7
እየሱስ እየሩሳልየም ደዘዙ በሊል ፊረጘ
1እንዝ ግረ እየሱስ ኣይዅዳንድ ጝት ቁጥጘ ደምዝጛ ዊንጛንስቅ ይዅዳ ኻግርድ በር ገሊለ ኻግሪል ጅልዋ ዊኑ። 2ኣይንድ ኣይዅዳንድ ደዘል ኣቕጝ ኪብርዝጘው በልድ ችጝ ዊኑ።#ዘሊ. 23፡34፤ ዘዳ. 16፡13። 3እየሱስት ፅንም ጝጐ ኣልትጝ፦ «ክክንደጥድ ክት ፃቭረውድየንት ቓልጛንስ ማጥን እኒስ ጕር ይዅዳ ኻግሪል ፊጥ። 4ግልፅዝ ኣርቕሽትጠ በነው እጅር ጝሰቭድ ስውርዝ ሰራሻውም፤ ክትም እንዛትቅ ፃቭረር ኣረውዝየ፣ ክቕምት ኣልሚዝ ጋልፅተ ጥውሸኵ» ይ። 5በገዘ ጝፅንድ እኳ ኣምኒየቍ ዊንጛንስቅ እነይጝ ዊግት።
6እየሱስም፦ «ይግርየድ ገነ ችጚየውም፤ ክታጭስ ግን ግርየድ ዊትርቅ ሚቸው የጝ። 7ኣልም ክታት ሽክትጠ ቸላውም፤ ይት ግን ጝሰቭድ ጭቓ ኣቐጘ ሚዝርጠር ኣቓንስቅ ሽክተኵ። 8ክትን በሊል ፊጥን፤ ያን ግን ይግርየድ ገነ ችጚየው ኣቓንስቅ ፊጠቅም» ዩ። 9እኒንትም ዊግት ገሊለ እዳቑ።
እየሱስ በሊል ፊር ክንሰጘ
10ዊገድ ግን እየሱስት ፅን በሊል ፊርጘት ግረ ጘጝ ቈሽ ግልፅዝ እትላ ኣዪጝቀ ስውርዝ በሊል ፊሩ። 11ኣይዅዳንድም በሊዝ፦ «እድ እጅርድ ኣውል እኩ?» ይጛ ጝት ደምዝጛ ዊን። 12ኽዝቭድም ጝማጥን ሽዅሽዅተዝ ዊግታ ላው ላውድ፦ «ደግ እጅር የጝ» ግቨርድ ቈሽ፦ «ኣየውም ኽዝቭድ ቀሰው የጝ» ያ ዊኑ። 13ኣነጚ ኣይዅዳንድዛት ጐውተነውዝ ኣውማውቅ ግልፅዝ ዊግተውም ዊኒየው።
14በልድ ግቨርዳንድም፣ እየሱስ መቅደስ ጝኒል ፍ ክንስጠ ኪርሙ። 15ኣይዅዳንድም፦ «እን እጅርድ ክንዲጝቀ ኣወሽ መፃፋንድ ኣርቕጠ ቸሉ?» ይጛ ዲንቅሽጛ ዊን። 16እየሱስም፦ «ያን ክንሰው ክንድጝድ ይት እፃቐዊስ ችጝሸውጚ፣ ይቕምቲስ ችጝሸውም ኣየው። 17እደረት ፍቃድድ ፃቭጠ በነው ኣውማውቅ ፅብሽ እኒን ክንድጝድ እደረቲስ ችጝሸው፣ ዊንም ይጊስ ችጝሸው ኣቐጘ ቲዝ ኣርቕጡ። 18ጝቕምቲስ ችጝሸውድየንት ዊግተው እጅር፣ ጝቕምስ ክቭር በነኵ፤ ጝት እፃቐውድየን ኪብርጠ በነው እጅር ግን፣ ጘጝ እማንተው የጝ፤ ኻሽትም ጝግል እጀውም። 19ሙሴ ክታጭስ ኽግ ነዪየውመ? ኣነጚ ክታጊስ ወሪትት ኽግድ ፋፅመው ላው እጅርም እጀው። ውር ቃጥ የጝ ይት ቁትርነ በንርነውድ?» ዩ።
20ኽዝቭድም፦ «እፈ ጋኒናም ክተ! ኣው የጝ ቈሽ ክት ቁጡ በነውድ?» ይ። 21ጘጝም፦ «ያን ላው ጊርምሰው ሰቭ ሰራጩን፤ ክትንም ጝዝ ጊርምሽርኑ። 22ሙሴ ጊርዝሽተነዊዙ ስረት ነዩ፤ እን ስረትድም ኣቅሊስ ችጝሸውጚ ሙሴ ነየውም ኣየው፤ ክትንም ቅዳምሲንቭትዝ እጅር ጊርዝርነኵ።#ዘፍ. 17፡10፤ ዘሊ. 12፡3። 23ነስየ ወሪትት ኽግድ ሸርሻየጘ እጅር ቅዳምሲንቭትዝ ጊርዝሽተው ኣቐውዝየ፣ እደስለ ያን እጅርዙ ዅለመነድቅ ቅዳምሲንቭትዝ ቓዛንድ ውር ቃጥ የጝ ኻልክሽርነውድ?#ይዃ. 5፡9። 24ጭቅ የው ፍርድ ፊርድጥንጚ እቀ በው ቓለነውዝ ፊርድትርነ» ዩ።
ክርስቶስት ማጥን ጕይሽተው ክርክር
25እየሩሳልየምትቍ እቂስም ላው ላውድ፦ «ቁጥጘ ደምዝጘው እጅርድ እኒን ኣየውቀ? 26እንወ ጘጝ ኣደቫቫይዝ ዊግተኵ፤ ጛይ ግን ውረውረም ያቍ፤ ኻልቅጥድ ጘጝ ክርስቶስ ኣቐጘ ለምርጝመ ኣጢ? 27ዊገድ ግን እን እጅርድ ኣዊስ ተረጘ ይን ኣርቕነኵን፤ ክርስቶስ ተራንድ ግን ኣዊስ ተረጘ ኣርቐው እጅርም እጀው» ይ። 28እንዝ ማጥን እየሱስ መቅደስ ጝኒል ኣቕ ክንሳንድ ጝድመድ ኣጕስ ሸው፦ «የይ! ይት ኣርቕርነኵ፤ ኣዊስ ተጠጘም ኣርቕርነኵ፤ ዊገድ ግን ያን በገዘ ይስልጣንዝም ተጢቀር፤ ይት እፃቐውድ ጘጝ እማንተው የጝ፤ ክትንም ኣርቓይርነቅም። 29ያን ግን ጝጊስ ተጣንስቅ ይት እፃቐውድም ጘጝ ኣቓንስቅ ጝት ኣርቐኵን» የው ዊግቱ።
30ጛይም ኣይንድ ፃይጥጘ በን፤ ዊገድ ግን ጝግርየድ ገነ ችጚየው ኣቓንስቅ ኣውማውቅ ጝናኒዝ ዳቒየውም። 31ኣነጚ ኽዝቪስ ንቕፀቍ እቅ፦ «ክርስቶስ ተራንድ እኒን እጅርድ ፃቨቍ ምልክታኒዝቍ ታምራኒስ ዲቈውመ ፃቨወ?» ይጝ ጝት ኣምን።
እየሱስት ፃይጥጘ ዊተድር እፃሽጘጘ
32ፈሪሳንድም ኽዝቭድ እየሱስትቍዝ ሽዅሽዅተዝ ዊግታንድ ወሽ፤ ካኽነጣነ ኻልቅጢጅቅም ኣቕጝ ጝት ፃይጛንስ ማጥን መቅደስ ጝኒዝቍ ዊተድርድዛት እፃቕ። 33ኣይንድ እየሱስ፦ «ክታጅቅ ዊነውድ ዊቱ ግርየ የጝ፤ ጝዝለ ይት እፃቐዊዝጐ ፊጭር። 34ክትን ይት ደምዝትርንቅ፤ ዊገድ ግን ችጛይርነቅም፤ ያን ፅበዊዝጐም ተርትርነ ቸላይርነቅም» ዩ። 35ኣይዅዳንድም ጛስ ጛይ፦ «እን እጅርድ ይን ችጛይነው ስፍረ ኣውል ፊርጠ በን የጝ? ምናልቫች ግሪካነ ማኽሊል ቢትንሽጝ ፅበቍ ይናዊግኒል ፊር ግሪካንድዛት ክንስጠ በንመ ኣጢ? 36‹ይት ደምዝትርንቅ፤ ዊገድ ግን ችጛይርነቅም፤ ያን ፊጠዊልም ተርትርነ ቸላይርነቅም› የውድ ወረጘ የነት የጝ?» ይ።
ርዅየዙ ኣቘ ምኝጭ
37በሊዙ ኻትሸነ ኣቐው ኽየው ግርየይዝ እየሱስ ችብር ጝድመድ ኣጕስ ሸው፦ «ኣውማው ዝቛንደው ፅብሽ ይግል ተር ዝይነ።#ዘሊ. 23፡36። 38ይት ኣምነውድቅ መፃፍ ዊግተጘ ርዅየዙ ኣቘ ምኝጭ ጝጊዝዊስ ፍልቅጡ» ዩ።#ኽዝ. 47፡1፤ ዘካ. 14፡8። 39እኒንት የውድ ጝት ኣምነቍድ ለምርጥጙ መንፈስ ቅዱስት ማጥን የጝ፤ እየሱስ ገነ ኪብሪየው ኣቓንስቅ መንፈስ ቅዱስ ገነ ጊሚየውም ዊኑ።
40እንዝ ማጥን ኽዝቪስ ላው ላውድ እኒንት ወሽጝ፦ «እርግጥ እኒን እጅርድ ኣልሚል ተረው ነቭይድ የጝ» ይ። 41ላጥድም፦ «እኒን ክርስቶስ የጝ» ይ፤ ላጥድ ቈሽ፦ «ክርስቶስ ተረውድ ገሊለስመ ውረ? 42መፃፍ ክርስቶስ ዳዊትት ዚረይስ፣ ዳዊት ፅበይ ኻትመ በተልኺምስ ተርጠጘ ዊግተኵ ኣየውቀ?» ይ።#2ሳሙ. 7፡12፤ ምክ. 5፡2። 43እንዝ ኣይንትዝ እየሱስትቍዝ ኽዝቭድ ጝስመ ጝስ ቲተቲቱ። 44ላው ላውድም ጝት ፃይጥጘ በን፤ ዊገድ ግን ጝናኒዝ ዳቐው እጅርም ዊኒየው።
ኣይዅዳነ ኻልቅጢዙ ኣምነቅ የነውድ
45እንዝ ግረ ዊተድርድ ካኽነጣነ ኻልቅጢዝመ ፈሪሳኒዝጐ ፊር፤ ጛይም፦ «ውረ ጝት ነሲርነቅ?» ይ። 46ዊተድርድም፦ «እን እጅርድ ዊግተዊዝጘ ኣውማው እጅርም ዊግት ኣርቓው» ይጝ ዊስ። 47ፈሪሳንድም፦ «ክትንም ቀትርኑ የነትመ? 48ኣየውጚ? ካኽነጣነ ኻልቅጢስመ ፈሪሳኒስ ጝት ኣምነው እጅር እኩመ? 49ዊገድ ግን ወሪትት ኽግድየንት ኣርቓው እኒን ኽዝቭድ እፂተው የጝ» ይ። 50ጝታማኽሊስም ላውድ እንዝ ሚቅ ኻርዝ እየሱስትል ተር ዊነው ኒቈዲመስ፦#ይዃ. 3፡1-2። 51«ይናኽግድመ በዊል ላው እጅር ኪስሽተው ዊገድ ጝቕምቲስ ወይሽቲጝቀ፣ ወረጘ ፃቨጘም ኣርቒጝቀ ዝም የው ፊርደወ?» ዩ። 52ጛይም ዊስጝ፦ «ክትምመ ገሊለትወ? ነቭይ ገሊለስ ጓው ኣቐጘ ሚርምርድር ኣርቕ» ይ።
53እንዝ ግረ እጝቅቅ ጝታይታጝን ፊር።
Tans Gekies:
ይዃንስት ወንጌል 7: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
