ሉቃ̈ሳ 16

ፔቲ ዱር ኣስ ቆሊንን ና̈ጊዝ ናሳ ኤጫ ሚሳ̇̈ሊ

1ማ ዬሱ̈ሲ ፌ ታማ̈ራንኮ “ፔቲ̇ ዱር ኣስ ዎዶሪ ኢ̈ቦ ኢ ቆሊንን ና̈ጊ ኣቂሲዝ ፔቲ̇ ኣሲ ዎ፤ ኣሳን ‘ዪ ና̈ሳ ኔ ቆሊንን ኢ̈ሲ̇̈ሬ’ ጋ̈ሪ ና̈ሳ ዱራብ ሶ̈ሊዴ። 2ና̈ሳ ዱራ ኢያ ጼይጊሳሪ ‘ዪ ቴ ኔ ዎሃባር ሲስኪ̇ዛ ኣብዛ? ዪዚ ዓኒ̇ፖ ጌዳ ኔ ታ̈ብ ኦ̈ንዳ̇ብ ዳንዳኣባሴ። ኔ ቴ ሚ̈ሺ̇ንባር ዎዛርፌ̈ን ኦ̈ ዎኮ ፋይዳር ታ̈ና ቤይሳቤ’ ጌይዴ።

3ዱራ ቆሊንን ኣቂሲዝ ና̈ሳ̈ዲ ፌ ቡ̈ዳ ጋርታ̇ ‘ቴ ላ̈ ታ̈ና ቴ ኦ̈ሲን ጋርታ̇ፖ̇ ዳካ̇ንዳ ባያ? ዓት ዪዚ ቴ ዎዛ̈ርታ̇ኖ? ዎት ዎታ ሞ̈ካ̇ይፌ̈ኒ ታ̈ብ ዎልቃ ባዪ፤ ጌሻ ሞ̈ካ̇ይፌ̈ኒ ታ̈ና ኢ̈ቺ̇̈ሬ፤ 4ታ̈ኒ ቴ ኦ̈ሲን ጋርታ̇ፖ̇ ዳኪንቲ̇ዝ ባዝ ማ̈ቄ̇ጌይንዶ̇ ኣሳን ታ̈ና ፌ ኣ̈ል ጌልሳምፔ̇̈ን ቴ ዎታዝ ባዚን ቴ ኤራ̈ሬ’ ጌይዴ። 5ዪ̈ኮታ̇ቦ ፌ ላ̈ ኣጫ ኢንታ̇ ጋልዳ ዎ ኣሳን ዎይ ጼይጊዴ። ቲ̈ን ጼይጊኖ̈ኮ ‘ቴ ላ̈ ኣጫ ኔ ጋልዳ ኣ̈ፊን ዎ?’ ጌዪ ኦይጪ̇ዴ። 6ና̈ሳ̈ዳር ‘ፔቲ̇ ጼ̈ታ ኦት ዛይታ ቴ ጋልዳ ዎ’ ጌይዴ። ኢያሬ ‘ኔ ቲ̈ን ታልቃ̈ርዶር ጻ̈ፊንቲ̇ኖ ዎራቃቲን ዓይሺ፥ ኤሊ̇ ዶኣራ ኢሺ̇ን ታጳ̇ ኦቴ ጋ̈ራ ጻ̈ፋቤ’ ጌይዴ። 7ኢናፖ̇ ሜላ̈ኮ ‘ኣን ኔ ጋል ኣ̈ፊኒ ዎ?’ ጌይን ና̈ሳ̈ዳሬ ‘ጼ̈ታ ዳውላ̇ ዜርቃ̇ ዎ’ ጋ̈ር ማሂዴ። ኢያሬ ‘ኔ ቲ̈ን ታልቃ̇̈ርዶር ጻ̈ፊንቲ̇ኖ ዎራቃቲን ዓይሺ፥ ላማካይ ታጳ̇ ዳውላ̇ ጋ̈ር ጻ̈ፋቤ’ ጌይዴ።

8ላ̈̈ዲ ፌ ኣ̈ሊን ኣቂሲዝ ኣማ̇ኒንታ̇ካዮ ና̈ሳ̈ ዪኖ̇ ኤጪ̇ቲባር ዎቲኖኮታ̇ቦ ኢያ ቤርኢዴ። ዓኒ̇ ኣላሚን ጋልዳ ዎ ኣሳን ፌ̈ና ማይጺዛንባር ዶኢዝ ዶኢንዳ̇ ጾ̈ሳ̇̇ ኣሳንፖ̇ ኣ̇ር ኤጫ ማ̈ቂ̇ኖን ቤይሳ̈ሬ። 9ቴ ዪንታ̇ብ ሶ̈ላዚንዳ̇፥ ዪንታ̇ብ ኢሚ̇ንቲ̇ኖ ዓና̇ ኣላሚን ጋልዶ̇ ሚ̈ሺ̇ንባራ ላጋ̇ ኤ̈̇ብቴ̇። ዪንቲ̇ ዪኖ̇ ዎቴጌይንዶ̇ ዪንታ̇ ሚ̈ሺ̇ን ጊዳን ዉሪኖ ኬል̇ባራ ዪንታ̇ ሜናብ ዶኢዝ ኬ̈ ጋርታ̇ ኤኪ̇̈ሬ።

10“ጊላ̇ ባዝባር ኣማ̇ኒንቲ̇ኖ ኣሲ ጴች ባዝባራ ኣማ̇ኒንቲ̇̈ሬ። ጊላ̇ ባዚንባራ ኣማ̇ኒንታ̇ካ̇ዮ ኣሲ ጴች ባዝባራሬ ኣማ̇ኒንቲ̇ባ̈ሴ። 11ዪዚ ዪንቲ̇ ዓኒ̇ ኣላሚን ጋልዳ̇ ዎ ቆሊንባር ኣማ̇ኒንታ̇ካ̇ዮ̈ ኪን ቆሊንን ኦ ዪንታ̇ብ ዓዳራ ጌዪ ኢሚ̇̈ራ? 12ሜላ ኣሳን ቆሊንምቦ̇ ኣማ̇ኒንታ̇ካ̇ይ ኣቴ̇ጌይንዶ̇፥ ዪንታ̇ ባዝ ማ̈ቂ̇ኖ ቆሊንን ኦ ዪንታ̇ብ ኢሚ̇̈ራ?

13ፔቲ̇ ኣይሎ̇ ናምኢ ላ̈ቦ ኦ̈ንዳ̇ቦ ዳንዳኢዛ ኦ̈ናካር ባዬ̇። ፔታ̇ና ኢጺ̇̈ሬ፥ ፔታ̇ና ዶሲ̈ሬ፤ ዎይ ፔታ̇ና̈ኮ ኡኪ̇ሬ ፔታ̇ና ሌቂ̇̈ሬ። ዪንቲ̇ ጾ̈ሳ̇̇̈ባራር ሚ̈ሻ̇ባራር ዎልኣ ኣይላ ማ̈ቃ̇ንዳብ ዳንዳኢባ̈ሴ” ጌይዴ።

14ሚ̈ሺ̇ ዶሲዝ ፋራሳ̈ዋን ዬሱ̈ሲ ሶ̈ሊኖን ዪኖ̇ ዎይ ሲስካ̇ሪ ኢ ጋል ሚ̈ጪ̇ዴ። 15ዬሱ̈ሲ ኢንታ̇ኮ “ዪንቲ̇ ዪንታ̇ ኣሳ ቲ̈ን ቤርኢሲዝ ኣሴ። ማ̈ቂ̇ናካሬ ጾ̈ሲ̇ ዪንታ̇ ቡ̈ዲን ኤሪ̈ሬ። ኣሳ ቲ̈ን ቦንቺ̇ንቲ̇ኖ ማይጻር ቤንቲ̇ዝ ባዚ ጾ̈ሳ̇̇ ቲ̈ን ዎይሊን ኢጺንቲ̇ኖ ባዜ” ጋ̈ር ሶ̈ሊዴ።

16“ሙ̈ሳ ሂጊ̇ንዲኬ ናባን ማጻ̈ፋ ጋልዳ̇ ጻ̈ፊንቲ̇ኖ̈ንዶ ጻማ̇ቂዛ ዋ̈ኒ̇ሲ ዬይኖ ኬል̇ ዲራ̈ስ ኣሲ ዎይ ኢዝቦ ኪ̈ቲንቲ̇ ጋምኢንዶ̈ኒ፥ ኢናፖ̇ ዓኒ ጾ̈ሳ̇̇ ካ̈ቲቲ ዎጛላ ሳባ̇ኪንቲ̇ኔ። ኣሲ ዎይ ኢና ጌላንዳ̇ቦ ዎይሊን ዋንቲ̈ሬ። 17ዎቲናካሬ ጾ̈ሳ̇̇ ሂጊ̇ን ጋልዳ̇ፖ̇ ፔቲ̇ ፊዳሊን ኬዳ̇ር ያናፖ̇ ሳ̈ዶ̇ ሳ̈ዚንዲ̇ኬ ኣፎ ጪሊን ያዚን ዴ̈ጻ̇ባሴ።

18“ፌ ማጪ̇ን ኬሳ̇ሪ ሜላ ማጫ̇ ኤኪ̇ዝ ኣሲ ዎይ ኦሎላ ጋዲ̇ኔ። ማ ፌ ኣስና ጋልዳ̇ፖ ኬስኪ̇ኖ ኣሲን ኤኪ̇ዝ ና̈ሳ ዪ̈ዳሬ ኦሎላ ጋዲ̇ኔ” ጌይዴ።

ና̈ሳ ዱራ̈ዲኬ ዎርባያ ኣላ̈ዛ̈ርኬ

19ኢናፖ̇ ዬሱ̈ሲ ኢንታ̇ኮ “ዎይሊን ሚ̈ሺ̇ ኤኪ̇ዝ ኮሽ ኣፊላ ዎይ ጋላስ ማኢ፥ ዎይ ባዝ ኢ̈ብ ኩሚን ኮሽ ሙዪ ኡፋይስባር ዶኢዝ ፔቲ̇ ዱር ኣሲ ዎ። 20ማ ኢ ጋሊ̇ን ኪሲ ሙታ̇ ማ̈ቂ̇ኖ ኣላ̈ዛ̈ር ጌይዛ ፔቲ̇ ዎርባያዶ̈ሪ ኢ ና̈ሳ ዱራ ኣ̈ል ዉምፒ̇ታ̇ ሱርቂ̇ ዶኢ̈ሬ። 21ኢያሬ ና̈ሳ ዱራ ኣ̈ል ሞ̈ምባ̇ር ሺኖ ዶኪ̇ን ሞ̈ንዳ̇ቦ ኢኒ̇ቲ̈ሬ። ና̈ሳ ኣ̈ል ዎ ካናንር ዬ̈ሪ ኢ ኪሲን ላኢ̈ሬ።

22“ፔታ̇̈ብ ዪ ና̈ሳ ዎርባያ ዓይቂ̇ዴ። ኪ̈ታንቻ̇ንር ኢያ ኤ̈ጛር ኣብራሃ̈ማ ላፍ ዶኣምፔ̈ን ዎቲዴ። ዱራ ና̈ሳ̈ዳሬ ማ ዓይቃ̇ር ዱ̈ኪንቲ̇ዴ። 23ና̈ሳ ዱራ̈ዲ ጋ̈ናማ ጋርታ̇ ቢጻ ቤቂ̇ ሙታ̇ ዎዶ̈ሪ ፉዳ ሾክ ጋ̈ሪ ጎትባር ኣብራሃ̈ማኬ ማ ኢ ካንታ ጋልዳ ኣላ̈ዛ̈ሪ ዎን ቤቂ̇ዴ። 24ና̈ሳ ዱራ̈ዲ ‘ታ ባ̈ባ ኣብራሃ̈ሞ! ኔ ታ̈ብ ዋ̈ዴ ሚጪንቲ̇ሼ። ታ̈ኒ ዓ̈ ታማ ላ̈ባር ቢጻ ቤቃ̇ ሙታ̇ ዎ። ኣላ̈ዛ̈ራቦ ሶ̈ላራ ኢ ፌ ጊልኣ ሲ̈ንን ዋ̈ ኤይር ዬ̈ሪ ቴ ኢርጺንን ጋልዳ ጾኪሳምፔ̇ን ኔ ኢያ ሚሺሼ’ ጋ̈ር ኦይጪ̇ዴ። 25ኣብራሃ̈ሚ ኢ̈ኮ ‘ቴ ናኣ̈ዶ! ኔ ሳ̈ዝ ጋልዳ̇ ዶኢኖ ላይን ጋርታ̇ ኮሽ ባዝ ዲጚኖን ኤልቅ ዎታቤ። ኣላ̈ዛ̈ራር ዪና̇ ኢዝ ኬሊ̇ንባራ ቢጻ ቤቂ̇ኖን ኔ ኤራ̈ሬ። ዓት ዪዚ ኢ ዓይዲ ኡፋይስባራ ዶኣምባ̇ራ ኔ̈ኒ ቢጻ ቤቃ ጋል ዎ። 26ማ ዪና̇ ጋልዳ̇ ዓይዲፖ̇ ሴክ ዪንታ̇ክ ሉካካ̇ይፌ̈ኒ፥ ኢና ዎንሬ ማ ዓይ ኑ̈ክ ፊ̈ጛካ̇ይፌ̈ኒ ኑ̈ብኬ ዪንታ̇ብኬ ጊዳ̇ ጋርታ̇ ጴች ጋጋ ዎ’ ጌይዴ።

27“ኢናፖ̇ ና̈ሳ̈ዲ ኣብራሃ̈ማኮ ‘ቴ ባ̈ባ̈ዶ! ዪ̈ዶኮ ኣላ̈ዛ̈ራ ቴ ባ̈ባ̈ ኣ̈ል ሚሻምፔ̈ን ቴ ኔ̈ና ጌሻ̈ሬ። 28ኣባ ጌይን ታ̈ቦ ኢና ኢና̇ኣን ኣቲና ኢሺ̇ኒ ዎ፥ ኢንቲ ዓ ቢጻ ቤቂ̇ዝ ቤሳ̇ ጋርታ̇ ዬካ̇ይፌ̈ኒ ሉካ̇ር ኢንታ̇ብ ሶ̈ሎ ጋ̈ቤ ዋ̈ዴ’ ጌይዴ። 29ኣብራሃ̈ሚ ና̈ሳ̈ኮ ‘ኢንታ̇ቦ ሙ̈ሳኬ ናባን ማጻ̈ፋን ኢንታ ላፍ ዎ̈ኮታ̇ቦ ዪን ማጻ̈ፋን ጋ̈ዚን ሲስኮ̇ ጋ̈ቤ’ ጌይዴ። 30“ና̈ሳዳር ‘ቴ ባ̈ባ ኣብራሃ̈ሞ! ዪዝ ጊዳካ̇ዬ፥ ዓን ዓይቂ̇ኖ ኣሳን ጋርታ̇ፖ ፔቲ̇ ኣሲ ዲንዳ̇ር ኢንታ̇ክ ሉኬ̇ጌይን ኢንቲ̇ ማ̈ሪቲ ጌሊ̈ሬ’ ጌይዴ። 31ኣብራሃ̈ማር ኢ̈ኮ ‘ኢንቲ̇ ሙ̈ሳ ማጻ̈ፊንዲ̇ኬ ናባን ማጻ̈ፊን ጋ̈ዚን ሲስኪ̇ባ̈ስኮ̇ ኣሲ ዓይቃ ጋርታ̇ፖ ዲንዳ̇ር ኢንታ̇ብ ሶ̈ሊናር ሲስኪ̇ባ̈ሴ’ ” ጌይዴ።

Tans Gekies:

ሉቃ̈ሳ 16: ኦጫ̈ቃማ

Kleurmerk

Deel

Kopieer