ዋ̈ኒ̇ሳ 18

ዬሱ̈ሳ ጻላታን ኢያ ኤ̈̇ዴ

ማ̈ቶ̈ሳ 26፡47-56፤ ማ̈ርቆ̈ሳ 14፡43-50፤ ሉቃ̈ሳ 22፡47-53

1ዬሱ̈ሲ ፌ ዎ̈ሲን ዉርሲኖፖ̇ ዓኒ፥ ፌ ታማ̈ራንባር ዎልኣ ማ̈ቃ̇ሪ ቄ̈ድሮ̈ና ጋ̈ዝ ጊላ̇ ዋ̈ን ፊ̈ጛር ኢና ዎ ኣታ̈ኪልታ ቤሲ̇ን ጋርታ ጌሊዴ። 2ዎይሊን ኬል̇ ዬሱ̈ሲ ፌ ታማ̈ራንባራ ዎልኣ ኢና ሺ̈ቂዛኮታ̇ቦ ኢያ ኣ ኢሚ̇ዛ ዪሁዶ ቤሲ̇ን ኢዞ ኤሪ̈ሬ። 3ዪሁዳሬ ሮም ዎታ̇ዳራን፣ ቄ̈ሳ ኣላቃንኬ ፋራሳ̈ዋን ኪ̈ታ̇ር ሚሺኖ ጾ̈ሳ̇̇ ኬ̈ ና̈ጊዝ ዎታ̇ዳራን ቲ̈ኒሙታ̇ ኣታኪልታ̇ ቤሲ̇ን ዬይዴ። ኢንታ̇ሬ ዣባ̇፣ ፋ̈ኖ̈ሳ፣ ቶ̈ራኬ ጊቲሚ ኤካ̇ሪ ዬይዴ።

4ዬሱ̈ሳር ፌ̈ና ዬላ̇ዝ ባዚን ዎይ ኤራሪ ጌዳ ኢንታ̇ክ ሉካ̇ሪ “ዪንቲ̇ ኦ̈ና ኮዪ̈ራ?” ጌይዴ። 5ኢንታ̇ሬ ኢ̈ኮ “ኑ ና̈ዝሬ̈ቶ ዬሱ̈ሳ ኮዪ̈ሬ” ጌይዴ። ዬሱ̈ሳሬ “ታ̈ኒሽዋ” ጌይዴ። ኢያ ኣ̈ ኢሚ̇ዛ ዪሁዶ ኢንታ̇ባር ዬዪ ኤቂ̇ኔ። 6ዬሱ̈ሳሬ ኢንታ̇ኮ “ታ̈ኒሽዋ” ጌይ ኢንቲ̇ ጋስ ዴጫሪ ሳ̈ዳ̇ ኬዲ̇ዴ።

7ኢያር ኢንታ̇ኮ “ዪንቲ̇ ኦ̈ና ኮዪ̈ራ?” ጋ̈ሪ ማሃር ኦይጪ̇ዴ። ኢንታ̇ሬ “ኑ ና̈ዝሬ̈ቶ ዬሱ̈ሳ ኮዪ̈ሬ” ጌይዴ።

8ኢያር ኢንታ̇ኮ “ታ̈ኒሽዋ ጋ̈ካ̇! ዪንቲ̇ ኮያዚን ታ̈ናኮ፥ ኣስ ዓን ኣሺ̇ብቴ̇፥ ሉካ̇ጋ̈ቤ” ጌይዴ። 9ዪና̇ ማ̈ቂ̇ኖንዳ̇ “ኔ ታ̈ብ ኢሚ̇ኖን ዓን ጋርታ̇ፖ̇ ፔታ̇ናር ቴ ይሳ̇ካ̇ዬ” ጋ̈ሪ ኢ ቲ̈ን ሶ̈ሊኖ ቃ̈ሊን ፎቲንታምፔ̈ኔ።

10ሲሞ̈ን ጴ̈ጥሮ̈ሲ ማሺ̇ ኤ̈̇ኖኮታ̇ቦ ሾ̈ኪን ጋርታ̇ፖ̇ ማሺ̇ን ጎቻ̇ክ ኬ̈ሳሪ ቄሳ ኣላቃንቦ ኣላቃ ኣሽካራ ዋይን ኡሻቺ̇ን ካራር ቶጚዴ። ዪ ኣሽካ̇ራ ኢ ሱምዲ (ማ̈ልኮ̈ሳ) ጌዪንቲ̈ሬ።

11ዬሱ̈ሲ ጴ̈ጥሮ̈ሳኮ “ማሺ̇ን ሾ̈ኪን ጋርታ̇ ማሃ ሚሻቤ! ቴ ባ̈ባ̈ ታ̈ብ ኢሚ̇ኖ ሜታ ጺዊ̇ን ቴ ኡሽካ̇ንዳብ ኮሻባሳ?” ጌይዴ።

ዬሱ̈ሲ ቄ̈ሳ ኣላቃንቦ ኣላቃ ኣ̈ና̇ ቲ̈ን ሺ̈ቂዴ

12ዪኒ̇ፖ ዎሃ ሮም ዎታ̇ዳ̇ራንኬ ኢንታ ኣላቃ̈ዲ ማ ጾ̈ሳ̇̇ ኬ̈ ና̈ጊዝ ዛባን ዎልኣ ማቃ̇ር ዬሱ̈ሳ ኤ̈̇ ቃቺ̇ዴ። 13ቲ̈ኒታሪ ኢያ ቃያ̈ፋ ባይሳ ኣ̈ና̇ ጌይዛኮ ኤ̈ጚዴ። ቃያ̈ፋሬ ላይን ኢዝ ጋርታ̇ ቄ̈ሳ ኣላቃንቦ ኣላቃ። 14ቃያ̈ፋሬ ዓኒ̇ፖ̇ ቲ̈ን “ዎርዣ ጊሽ ፔቲ̇ ኣሲ ዓይቂኖኮ ኮሼ̇” ጋ̈ሪ ኣይሁድ ኣላቃን ዞሪኖ̈ዳ።

ጴ̈ጥሮ̈ሲ ዬሱ̈ሳ ካ̈ዲዴ

ማ̈ቶ̈ሳ 26፡60-70፤ ማ̈ርቆ̈ሳ 14፡66-68፤ ሉቃ̈ሳ 22፡55-57

15ሲሞ̈ን ጴ̈ጥሮ̈ሳኬ ሜላ ፔታ̇ን ዬሱ̈ስ ታማ̈ሪኬ ዎልማ̈ቃ̇ሪ ዬሱ̈ሳ ዎሂን ሉኪ̇ዴ። ዪ ኢ ታማ̈ራ̈ዲ ቄ̈ሳንቦ ኣላቃ̈ባር ኤሪንቲ̇ኖ ኣስ ማ̈ቂ̇ኖኮታ̇ቦ፥ ኢ ዬሱ̈ሳባር ዎልኣ ኢ ጊቢ̇ን ጋርታ̇ ጌሊዴ። 16ጴ̈ጥሮ̈ሲ ዛ̈ና ጌላዝ ካሪን ላፍ ኤቂ̇ዴ። ዓታር ቲ̈ን ጌሊኖ ዬሱ̈ስ ታማ̈ራ ዬ̈ሪ ካራ ና̈ጋዝ ናኢምቦ̇ ሶ̈ላሪ ጴ̈ጥሮ̈ሳ ጊቢ̇ን ጋርታ̇ ጌልሲ̇ዴ።

17ካሪን ና̈ጋዝ ናኢንዳ̇ ጴ̈ጥሮ̈ሳኮ “ኣ̈ኖ ኔ̈ኒ ና̈ሳ ዓ̈ ታማ̈ራን ጋርታ̇ፖ̇ ፔታ̇ና̈ዳባያ?” ጋ̈ዴ። ኢያሬ ኢዝኮ̇ “ዋኣኬ! ታ̈ኒ ኢ ታማ̈ሪ ጊዳካዬ” ጌይዴ።

18ኢዝ ቃሚ̇ን ሳ̈ዚን ዛ̈ካ̇̈ርዶን ኣሽካራንኬ ዛባ ኣላቃን ታማ ኤይ ካሽኪ̇̈ርዶ̈ን፤ ጴ̈ጥሮ̈ሳር ኢንታ̇ባር ኤቃ̇ር ታማ ካሽኪ̇̈ሬ።

ቄ̈ሳ ኣላቃ̈ዲ ዬሱ̈ሳ ኦይች ኦይጪ̇ዴ

ማ̈ቶ̈ሳ 26፡59-68፤ ማ̈ርቆ̈ሳ 14፡55-65፤ ሉቃ̈ሳ 22፡63-71

19ዪና̇ ኢዝባራ ቄ̈ሳንቦ ኣላቃ̈ዲ ዬሱ̈ሳ ኢ ታማራን ጎይኬ ኢ ታማ̈ርሳዝ ቲሚርቲ̇ን ጎይ ኦይጪ̇ዴ።

20ዬሱ̈ሳር ኢ̈ኮ “ታ̈ኒ ኣስ ዎይቦ ፋል̇ ሶ̈ሊኔ፤ ኣይሁዳን ሺ̈ቂዝ ኢንታ̇ ዎ̈ሳ ኬ̈ ጋርታ̇ኬ ጾ̈ሳ̇̇ ኬ̈ ጋርታ̇ሬ ዎይ ጋላስ ታማ̈ርሲኔ፤ ቴ ጌ̈ማ ሶ̈ሊኖ ፔቲ̇ ባዚ ባዬ። 21ዪዚ ኔ ታ̈ና ኣባብ ኦይጫ̇̈ራ? ቴ ሶ̈ላምባ̇ር ሲስኪ̇ኖ ኣሳን ኦይጫ̇ቤ፤ ቴ ኣብዝ ሶ̈ሊኖኮ ኢንቲ̇ ኤሪ̈ሬ፤ ኢንታ̇ ኦይጫ̇ቤ” ጌይዴ። 22ዬሱ̈ሲ ዪኖ̇ ሶ̈ላምባ̇ራ ኢ ላፍ ኤቃ̇ር ዎ ዛባን ጋርታ̇ፖ̇ ፔታ̇ና̈ዲ “ኔ̈ኒ ቄ̈ሳን ኣላቃ̈ቦ ዎዛርፌ̈ን ዓ̈ ፌ̈ኖ ማልሳ ኢማ̇̈ራ? ጋ̈ሪ ኢያ ባቂ̇ዴ።

23ዬሱ̈ሳሬ ኢ̈ኮ፥ ቴ ኢ̈ት ሶ̈ሊኖኮ ቴ ሶ̈ሊኖ ኢ̈ት ባዚን ኣብዝኮ ማርኪ̇ታቤ፤ ቴ ኪን ሶ̈ሊኖኮ ኣባብ ታ̈ና ባቃ̇̈ራ?” ጌይዴ። 24ኣ̈ና̇ሬ ዬሱ̈ሲ ቃቺንቲ̇ኖ ቃሺን ኢዝባራ ቄ̈ሳን ኣላቃ ቃያፋክ ሚሺዴ።

ጴ̈ጥሮ̈ሲ ናምኢ ዬሱ̈ሳ ካ̈ዲዴ

ማ̈ቶ̈ሳ 26፡71-75፤ ማ̈ርቆ̈ሳ 14፡69-72፤ ሉቃ̈ሳ 22፡58-62

25ሲሞ̈ን ጴ̈ጥሮ̈ሳሬ ኤቃ̇ር ታማ ካሽካ̇ምባራ ኣሳን ኢ̈ኮ “ኣኖ! ኢ ታማራን ጋርታ̇ፖ̇ ፔታ̇ና ኔ̈ና ባያ?” ጌይን፥ ኢያሬ “ዋኣኬ ታ̈ና ባዬ” ጌይዴ።

26ጴ̈ጥሮ̈ሲ ኢ ዋይን ቃጺ̇ኖ ና̈ሳብ ዳባ̇ ማ̈ቂ̇ኖ፥ ቄ̈ሳንቦ ኣላቃ ኣሽካራ̈ዲ ኢ̈ኮ “ኣን ኔ ኣታ̈ኪልቲ̇ን ቤስ̇ ኢባር ዎዶ̈ን ቴ ኔ̈ና ቤኣካ̇ያ?” ጋ̈ሪ ኦይጪ̇ዴ። 27ጴ̈ጥሮ̈ሳር ዓታ̇ር ማ̈ቃር “ቴ ኢያ ኤራባሴ” ጋዚን ጋርታ ኢና ኩቶ ኦ̈ሊ̇̈ዴ።

ዬሱ̈ሲ ጲላ̈ጦ̈ሳ ቲ̈ን ሺ̈ቂዴ

ማ̈ቶ̈ሳ 27፡11-18፥20-23፤ ማ̈ርቆ̈ሳ 15፡2-15፤ ሉቃ̈ሳ 23፡1-5፥13-25

28ኣይሁዳንሬ ዬሱ̈ሳ ቃያ̈ፋ ኣ̈ላፖ̇ ሮም ካ̈ታ ኣ̈ል ኤኪ̇ ሉኪ̇ዴ። ዪና̇ሬ ጌ̈ሽ ጌላፋዶ̈ን ኣይሁዳን ፋ̈ሲጋ ባ̈ላብ ሹኪ̇ዝ ዶራ ሞ̈ንዳ̇ብ ዳንዳኣምፔ̈ኒ ፌ̈ና ቄካ̇ዮዲፌ̈ኒ ኢ̈ጫ̇ር ካ̈ታ ኣ̈ል ጊባ̇ ጋርታ̇ ጌላካ̇ዬ። 29ዪ̈ኮታ̇ቦ ጲላ̈ጦ̈ሲ ኢንታ̇ክ ኬስካ̇ር “ዪንቲ̇ ና̈ሳ ዓ̈ ሞ̈ታንዳቦ ኢ ጋልዳ ሺ̈ሺ̇ኖ ሞ̈ቲን ኣብዛ?” ጋ̈ሪ ኢንታ̇ ኦይጪ̇ዴ።

30ኢንታ̇ሬ “ዓ ና̈ሳ ኢ̈ት ባዝ ኦካይኮ ኑ ዎን ኔ ቲ̈ን ኢያ ኤሄይራ?” ጋ̈ሪ ኢ̈ብ ማሂዴ።

31ጲላ̈ጦ̈ሳሬ “ዪንቲ̇ ዪንታ̇ ቆማ̇ብ ኢያ ኤ̈ጛሪ ዪንታ̇ ሂጊ̇ንዲፌ̈ን ኢ ጋልዳ ፊርዲ̇ብቴ̇” ጌይን ኢንታ̇ሬ “ኦ ጋልዳካር ዓይቃ ፊርዳ ፊርዶ ኑ̈ና ጋካ̇ዬ” ጌይዴ። 32ዪ ማ̈ቂ̇ኖዲ ዬሱ̈ሲ ዎዛርፌ̈ኖ ዓይቃ ዓይቂ̇ርኮ ሶ̈ሊኖ ቃ̈ሊን ፎቲንታ̇ምፔ̈ኔ።

33ጲላ̈ጦ̈ሳሬ ጌዳ ኬ̈ ማ̈ቂ̇ ጌሊዴ፤ ኢናፖ̇ ዬሱ̈ሳ ጼይጊሳሪ “ኣይሁዳንቦ ካ̈ታ ኔ̈ና?” ጋ̈ሪ ኢያ ኦይጪ̇ዴ።

34ዬሱ̈ሳሬ “ዪና̇ ኔ ኔ ጋልዳፖ̇ ኬሳ̇ር ታ̈ና ኦይጫ̈ርቤ፥ ሜላን ቴ ባዝ ኔ̈ብ ሶ̈ሊና?” ጌይዴ።

35ጲላ̈ጦ̈ሳሬ ኢ̈ኮ ፥“ቴ ዎን ኣይሁድ ጋዶ̇ ኣሳ? ኔ̈ና ታ̈ብ ኣ̈ ኢሚ̇ኖን ኔ ዳባ̇ንኬ ቄ̈ሳ ኣላቃን ባያ? ኔ ኣብዝ ዎ̈ቲና?” ጌይዴ።

36ዬሱ̈ሳር ኢ̈ኮ “ቴ ካ̈ቲቲንዳ ዓይዲ ሳ̈ዝ ጋልዶ̇ ካ̈ቲቲፌ̈ን ጊዳካ̇ዬ፤ ዓይዲ ሳ̈ዝ ጋልዶ̇ ካ̈ቲቲኮ ዎኒ ኣይሁድ ኣላቃን ታ̈ና ኤ̈ካ̇ይፌ̈ን ቴ ኣሽካራን ታኮታ̇ብ ኦላሪ ታ̈ና ቡ̈ቲሲርዶን፥ ቴ ካ̈ቲቲንዳ̇ ዓና̇ ሳ̈ዝ ጋልዶ̇ ካ̈ቲቲ ጊዳካ̇ዬ” ጌይዴ።

37ጲላ̈ጦ̈ሳሬ ኢ̈ኮ “ዪ̈ዶኮ ኔ ዓት ካ̈ትካ!” ጌይዴ። ዬሱ̈ሳሬ “ኣ̈! ኔ ታ̈ና ካ̈ቴ ጌይኖንዳ̇ ኪን። ቴ ዓና̇ ኣላሚን ጋልዳ ዬይኖንዲክ ዬሊንቲ̇ኖንዲ̇ኬ ኪን ቃ̈ሊን ማርኪ̇ታንዳ̇ቦ። ዪ̈ኮታ̇ቦ ኪን ባዝ ዶሲዛን ዎይ ታ̈ኮን ሲስኪሬ” ጌይዴ።

38ጲላ̈ጦ̈ሳሬ ኢ̈ኮ “ኪን ጋ̈ዚን ኢዛ ኣብዛ?” ጌይዴ። ዪኖ̇ ሶ̈ሊኖፖ̇ ዓኒ ዛ̈ና ኬስካ̇ሪ ኣይሁዳንኮ ፥“ኢ ጋልዳ ፊርዲሲዝ ባዝ ኣባክ ቴ ዲጛካ̇ዬ። 39ዎቲናካሬ ዪንቲ̇ ፋ̈ሲጋ ባ̈ልባራ ዎይ ጋላስ ቃቺንቲ̇ኖ ኣስ ፔታ̇ን ቴ ዪንታ̇ብ ቢሊ̇ዝ ሊማዳ ታ̈ብ ዎ፤ ዪ̈ኮታ̇ቦ ቴ ዪንታ̇ብ ኣይሁዳን ካ̈ታ ቢላ̇ምፔ̈ን ዪንቲ ኮዪ̈ራ?” ጌይዴ።

40ኢንታ̇ር ዉይሳባራ “ዋኣኬ! ኢያ ኣሻ̇ር ኑ̈ቦ ባርባ̈ና ቢላ̇ቤ! ጌይዴ። (ባርባ̈ና ጌይዝ ና̈ሳ̈ዲ ፋ̈ና̇።)

Tans Gekies:

ዋ̈ኒ̇ሳ 18: ኦጫ̈ቃማ

Kleurmerk

Deel

Kopieer