ሃዋ̈ 27

ጳውሎ̈ሲ ሮ̈ም ካታማ ሉኪ̇̇̇ዴ

1ኑ̈ኒ ማርካ̇ባባር ጣ̈ላን ካታማ ሉካ̇ምፔ̈ኒ ጌዪንቲ̇ኖፖ̇ ዎሃ ጳውሎ̈ሳኬ ሜላን ቃሺ ኣሳን ኣውጉስጦ̈ሳ ዎታ̇ዳራን ጋርታ̇ፖ ፔታ̇ና ዩሎ̈ሳ ጌይዛ ማታላቃ̈ቦ ኣ̈ ኢሚ̇ዴ። 2ኢ̈ሳ ጋዳ̇ ባሃ̈ራ ላፍ ዎ ካታማን ጋርታ ሉኪ̇ዝ ኣዲራማ̈ጣፖ ዬይኖ ማርካ̇ባ ጋርታ ጌላሪ ሉኪ̇ዴ፤ ታሳሎንቃ ካታማ ጋርታ̇ ዶኢዛ ማ̈ቂ̇ዶ̈ኖ ና̈ሳ ኣርስጣ̈ሮኮ̈ሳ ጌይዛ ኑባር ዎ።

3ኢዝ ዎንን ኑ̈ኒ ሲዶ̈ና ካታማ ዬ̈ሊ̇ዴ። ዩ̈ሎ̈ሲ ጳውሎ̈ሳቦ ኮሽ̇ ኦ̈ንዳብ ኮዪኖኮታ̇ቦ ኢ̈ኮ “ኔ ላጋ̇ን ኔ̈ብ ማ̈ቂ̇ዝ ማ̈ዳ ባዝ ኢማ̇ምፔ̈ኒ ኔ ኢንታ̇ክ ሉካ̇ንዳብ ዳንዳ̈ኣሬ” ጌዪ ኢያ ሚሺዴ። 4ዓታ̇ር ኑ̈ኒ ማርካባ ጋርታ̇ ጌላሪ ኢናፖ ዲንዲዴ። ኣይጊ ሴካ̇ፖ ዓኒ ኑ̈ክ ባቃ̇ዚንኮታ̇ቦ ቆጵሮ̈ሳ ዴሴ̈ቲን ኡንኪንባር ዎታሪ ኣይጊ ባዮ̇ ቤሲ̇ን ሉኪ̇ዴ። 5ኪልቃኬ ጲንፊላ ላፍ ዎ ባሃ̈ሪን ፊ̈ጚኖፖ ዓኒ ሊ̈ቃ ጋዳ̇ ዎ ሙ̈ራ ጋ̈ዝ ካታሚን ጋርታ̇ ዬሊ̇ዴ። 6ኢና ማታ̈ላቃ̈ዲ ጣ̈ላን ጋዳ̇ ሉኪ̇ዝ ኢስኪንዲራፖ ዬይኖ ማርካ̇ባ ዲጛሪ ኑ̈ና ኢዝ ጋርታ ጌልሲዴ።

7ኑ̈ኒ ዎይሊን ጋላስ ካች ካች ሉኪ̇ሙታ̇ዶ̈ሪ ዎይሊን ሜታባር ቃንዶ̈ሳ ካታሚን ላፍ ዬሊ̇ዴ፤ ጌዳ ኑ̈ኒ ቲ̈ን ሉካካ̇ይፌ̈ን ኣይጊን ኑ̈ና ጋሚን ሲሊሞ̈ና ጋ̈ዝ ቤሲ̇ን ኡንኪንባር ኣ̈̇ሪ ቃርጤ̈ሳ ጋ̈ዝ ዴሴ̈ቲን ቡጊዲን ኤ̈̇ር ኣይጊ ባዮ̇ ጎይን ሉኪ̇ዴ። 8ዎይሊን ሜታባራ ሳ̈ዚን ቡጊዲን ቡጊድንባር ኤ̇ሪ ኣኖፖ ዓኒ ላ̈ሳ ካታሚን ላፍ ዎን “ማርካቢ ሜቲ ዬላ̇ካ̇ይዶን ኮሽ̇ባር ዶኢዝ ቤስ̇” ጋ̈ዝ ቤሲ̇ን ዬሊ̇ዴ።

9ኑ̈ኒ ዬ̈ ጋልዳ ዎይሊን ኬል̇ ጋምኢኖ ጊሽኬ ማ ጾ̈ማ ኬሊ̇ ኣ̈ኖኮታ̈ቦ ዓ̈ፌኖ ኬል̇ባራ ባሃ̈ራ ጋልዳ ዬ̇ዛዲ ዎይሊን ዋ̈ዪዛኮታ̇ቦ ጳውሎ̈ሲ ኣሳንኮ 10“ኣሳን! ዓኒ̇ፖ ጌዳ ኑ̈ብ ዎ ዬ̈ንዳ ዋ̈ያ ኢዝ ጋርታ̇ ዎን ታ̈ብ ቤንታ̈̇ሬ፤ ማርካ̇ቢን ጋልዳኬ ኢዝ ጋልዳ ዎ ኢቃን ጋልዳ ሙታ̇ ጊዳካ̇ይዶን ኣሳ ሼምፓ ጋልዳሬ ሚ̈ን ሜታኬ ዪ ዬሊ̇̈ሬ” ጋ̈ሪ ኢንታ̇ብ ሶ̈ሊዴ። 11ማታላቃ̈ዲ ጳውሎ̈ሲ ዞራዚምፖ̇ ሺ ማርካ̇ቢን ኣዛ̈ዣ̈ዳኬ ማርካቢን ላ̈̈ ጌይዝ ባዚን ሲስኪ̇̈ሬ። 12ዪና̇ ማርካ̇ብ ኤቃ̇ዝ ቤሲ̇ንዳ̇ ባርጊ ኬል̇ባራ ኢና ጋምኣንዳ̇ቦ ዋ̈ዪዛኮታ̇ቦ ኣሳን ጋርታፖ ሺን “ኑ ሉካ̇ሪ ፊንቃ ጋ̈ዝ ካታሚን ጋርታ̇ ባርጊን ኣ̈ስቶ̇” ጋ̈ሪ ፌ ቆፊን ሺ̈ሺ̇ዴ። ፊንቃ ኦ̈ፓ ኣዋ̈ፍ ጌላ ጎይኬ ሲጛል ኣዋ̈ፍ ጌላ ጎይ ጊዲ̇ን ጋርታ̇ ዎ ቃርጣ̈ስ ጋ̈ዝ ማርካ̇ቢ ኤቂ̇ዝ ካታማ ጋርታ̇ ዎ ቤሴ̇።

ባሃ̈ሪን ጋልዳ ዉርጊ ዲንዲዴ

13ሲጛ̈ላፖ ዋዪባ̈ሶ ጊላ̇ ኣይጊ ባቂ̇ን ቤቃ̇ሪ ኢንቲ ቆፒ̇ኖንዲፌ̈ን ኮሽ̇ ማ̈ቂ̇ኖ ኢንታ̇ብ ማይጺን ማሊቂን#27፡13 ማሊቃ ጋ̈ዚንዳ ማርካቢ ዋ̈ ቡጊድ ዬላ̇ሪ ኤንኣካ̇ይዶር ኤቃ̇ምፔ̈ን ዋ̈ን ጋርታ ቶራ ሚሻር ማርካቢን ቃቻር ኤ̈ዝ ጴች ሲላ ዲንሪ ዬ̈ ኤ̈ዴ፤ ማርካ̇ባ ኤቂ̇ዝ ቤሲ̇ን ጋልዳፖ̇ ዲንዳ̇ሪ ቃርጣ̈ሳ ላፊንባር ቡጊድን ቡጊዲን ኤ̇ር ኣ̈̇ዴ። 14ዎቲናካሬ ጊላ̇ ጊዛፖ̇ ዓኒ “ኦፓ̇ፖ ኣዋ̈ፍ ኬሲ ጎይ ዉርጊ” ጌይዛ ጴች ኣይጊ ቃርጣ̈ሳፖ ዲንዳ̇ር ኢንታ̇ክ ባሃሪን ጋልዳ ዬይዴ። 15ማርካ̇ቢንዳር ኣይጊ ባቃ̇ዚንኮታ̇ቦ ኣይጊን ጋማር ቲ̈ን ሉካ̇ንዳብ ጋሚን ኣይጊን ኑ̈ና ኤ̈ጚዝ ቤ ዚም ጌዪ ሱጊንቲ ሙታ̇ ሉኪ̇ዴ።

16ቄ̈ዳ ጋ̈ዝ ጊላ̇ ዳሴ̈ቲን ላፊምባር ኣ̈̇ምባ̇ራ ጴች ሜታባራ ማርካ̇ቢን ጋርቶ ጎጚን ኤ̈ር ኤሳ̇ንዳብ ዳንዳኢዴ። 17ማርካ̇ቢን ዋ̇ዛን ጎጚን ጎ̈ቺ̇ ማርካ̇ቢን ጋልዳ ኬስኪ̇ኖፖ ዓኒ ማርካ̇ቢን ቡጊዲን ጋ̈ዲባር ጻ̈ጺዴ፤ ሱርቲስ ጋ̈ዚን ሻ̈ማባሮ ቤሲ̇ን ጋልዳ ኬዳካ̇ዮ̈ዲፌ̈ን ኢ̈ጫ̇ሪ ሻሪን ሶ̈ቢሳሪ ኣይጊንባር ሱጊንቲ̇ ሙታ̇ ሉኪ̇ዴ። 18ዉርጊን ሚ̈ጛሙታ ሉኪ̇ን ኢዝ ዎንን ማርካቢን ጋልዳ ጫ̈ኒንቲ̇ኖ ኢቃን ጋርታፖ ፔታ̇ን ፔታ̇ናን ባሃራ ጋርታ ቶጚ ኤ̈ዴ። 19ዓይዚ̇ ቃሚ̇ንባራ ማርካቢንቦ ማ̈ዲ̇ዝ ኢቃን ፌ ኩሽ ጌ̈ቲምባር ዡጉዳ̇ር ቶጚዴ። 20ዎይሊን ቃም ኣዋ̈ፋር ማ̈ቂ̇ን ቤ̈ርሳ̇ር ቤንታካ̇ይ ኣይጊር ዎይሊሙታ̇ ሉኪ̇ን ዪዚ ዓኒ̇ፖ ጌዳ ኑ ቡ̈ታንዳባዬ̇ ጌዪ ቆፒ̇ዴ።

21ኣሳን ኣባካር ፊ̈ሽ ሞ̈ካ̇ይዶር ዎይሊን ቃም̇ ጋምኢኖኮታ̇ቦ ጳውሎ̈ሲ ኢንታ ጊዳ̇ ኤቃ̇ሪ “ኣሳን! ዪንቲ ታ ጌይኖን ኤሮ ጌይኖኮ፥ ቃርጣ̈ሳፖ ዲንዳካ̇ይኮ ዎን ዓ ዎይ ሜታኬ ያክ ዪንታ̇ ዬሊ̇ባ̈ስዶን፤ 22ዓታ̇ር ማ̈ቄ̇ጌይን ማርካ̇ቢን ሙታ̇ ሜቃ̇̈ርዶኬ ዪንታ̇ ጋርታፖ ኦ̈ናካር ሜታ ዬ̈ሊባሴ፤ ዪ̈ኮታ̇ቦ ዓይዞ፥ ኢጫፒቴ! ጋ̈ራ ቴ ዪንታ̇ ዞራ̈ሬ። 23ቴ ኢ̈ብ ጎሽታ ኢ̈ብ ኪ̈ቲንቲ̇ዝ ጾ̈ሳ̇̈ዲ ኪ̈ታ̇ር ሚሺኖ ኪ̈ታንቻ ዚቃንታ̇ ቃም̇ ታ̈ክ ዬ̈ር ታ ላፍ ኤቃ̇ሪ፥ 24‘ጳውሎ̈ሶ! ኢ̈ጫፔ! ኔ̈ኒ ሮ̈ማ ካ̈ታ ቲ̈ን ሺ̈ቃንዳ̇ብ ኮሻ̇̈ሬ! ማ ኔባር ሉኪ̇ዝ ኣሳንር ዎይ ጾ̈ሲ̇̇ ኔ ጊሻ̇ቦ ጋ̈ሪ ዓይቃ ጋርታፖ ቡቲሲ̈ሬ’ ጋ̈ሪ ታ̈ብ ሶ̈ሊኔ። 25ዪ̈ኮታ̇ቦ ኣሳን ዓይዞ! ጾ̈ሲ̇ ዪኖ̇ ታ̈ብ ሶ̈ሊ̈ኖን ዎይ ፎታዚን ታ ኣማ̇ና̈ሬ። 26ማ̈ቂ̇ናካሬ ኣይጊንዳ ኑ̈ና ኤ̈ጛራ ፔቲ̇ ዳሴ̈ታ ቡጊዲን ጋልዳ ቶጛ̈ሬ” ጌይዴ።

27ታጶ ኦይዲ ጋላሲን ቃ̈ም ኣዲ̈ራ ባሃ̈ሪን ጊዲ̇ን ጋርታ ኣይጊባር ዋ̈ንቲሙታ̇ዶር ሉካ̇ምባራ ጊዲቢላሃ ጋልዳ ማርካ̇ቢን ጋልዳ ኦ̈ዛን ማርካ̇ቢን ኢንታ̇ክ ጌዳ ሳ̈ዛ ጋልዳ ኡኪ̇ኖ ማይጻዴ። 28ዪ̈ኮታ̇ቦ ባሃሪን ኮላቲን ዋ̈ ቤቃ̇ንዳቦ ጋ̈ዲ ሚሺን ላማ̈ካይ ታጳ ዋ̈ ማ̈ቂ̇ዴ፤ ኢናፖ ጊላ̇ ሉኪ̇̈ርዶሪ ኢንቲ ዓታ̇ር ማ̈ቃ̇ር ጋ̈ዲን ሚሻምባ̇ራ ሌሂ ታጳ ዋ̈ ማ̈ቃ̇ዴ። 29ኑ ማርካ̇ቢንዳ ባሃ̈ሪን ቡጊድ ጋልዳ ዎ ሹች ጋልዳ ዶምኢንታካ̇ዮ̈ዲፌ̈ን ኢ̈ጫ̇ሪ ማርካ̇ቢምቦ ጋስ ጎይ ኦይዲ ማሊቃን ባሃ̈ሪን ጋርታ ቶ̈ራ ሶ̈ቢሲዴ፤ ኢናፖ ዓኒ ቃሚ̇ን ዎንታ̇ምፔ̈ን ዎ̈ሳ ኤ̈̇ዴ። 30ማርካ̇ቢን ጋልዳ ኦ̈ዛን ማርካ̇ቢን ጋርታፖ ኬስካ̇ር ዎጻ̇ንዳብ ኮይኖኮታ̇ቦ ማርካቢንፖ ቲ̈ን ጎይ ማሊቃን ሚሺዛ ማይጺሳሪ ማርካ̇ቢን ጋልዳ ዎ ጎጚን ቶ̈ራ ባሃሪን ጋርታ ቶጚዴ። 31ዪኒ̇ባራ ጳውሎ̈ሲ ማታላቃኬኬ ዎታ̇ዳራንኮ ጌይርዶሪ “ዓን ማርካ̇ቢን ጋልዳ ኦ̈ዝ ኣሳን ማርካ̇ቢን ጋልዳ ሼምፓር ዶኣካ̇ይ ኣቴ̇ጌይን ዪንቲ ቡታ̇ንዳብ ዳንዳኢባ̈ሴ” ጌይዴ። 32ዪ̈ኮታ̇ቦ ዎታ̇̈ዳራን ጎጚን ኤ̈ኖ ጋ̈ዲን ቃጻ̇ሪ ጎጚንዳ ባሃ̈ሪን ጋልዳ ፋላል ጋ̈ር ኣታ̇ምፔ̈ን ኣሺ̇ዴ። 33ሳ̈ዚ̈ን ዎንታ̇ንዳብ ዎታምባ̇ራ ዎይን ፊ̈ሺ ሞ̈ምፔ̈ን ጳውሎ̈ሲ ኢንታ ጌሺዴ፤ ኢ ጌይርዶሪ “ዪንቲ ኣባካር ፊ̈ሺ ሞ̈ካ̇ይሙታ̇ ዓታ̇̈ብ ታጶ ኦይዲ ቃም̇ ማ̈ቂ̇ኔ። 34ዪ̈ኮታ̇ቦ ፊ̈ሺ ሞ̈ንፔ̈ን ቴ ዪንታ̇ ጌሻ̈ሬ። ዪና̇ ዪንታ̇ ሚ̈ንሬ፤ ዪንታ̇ ጋልዳ̇ ኣባክ ፔቲ̇ ኢ̈ታ ባዛር ዬሊ̇ባ̈ሴ” ጌይዴ። 35ዪኖ̇ ጌይኖፖ ዓኒ ሶ̈ላ̇ ኤካ̇ሪ ዎይን ቲ̈ን ጾ̈ሳ̇ ጋላቲዴ፤ ኢናፖ ዳርሳር ሙንት ኤ̈̇ዴ። 36ዪኒ̇ባራ ዎይን ሚ̈ጚንታ̇ሪ ካ ሙይዴ። 37ማርካ̇ቢን ጋርታ ዎ ኣሳን ዎይ ናምኢ ጼ̈ታኪ ታብዛ ታጶ ሌሂ ኣሴ። 38ዎይን ሙዪ ሚሽኪኖፖ ዓኒ ማርካ̇ቢን ጋርታ̇ ጫ̈ኒንቲ̇ኖ ዜርቃ ኬሳ̇ር ባሃራ ጋርታ ቶጛሪ ማርካ̇ቢን ዴን ፋ̈ሊዴ።

ማርካቢን ሜቃ̇ዴ

39ሳ̈ዚን ዎንቲ̇ን ኢንቲ ፌ ዬሊ̇ኖ ቤሲ̇ን ኤራካ̇ዬ፤ ዎቲናካሬ ሻ̈ማ ቡጊድ ዎ ባሃ̈ሪን ሲ̈ንን ቤቂ̇ዴ፤ ዳንዳኢንታ̇̈ርኮ ማርካ̇ቢን ጌዳ ሱጋሪ ቡጊድ ኬሳ̇ንዳብ ቆፒ̇ዴ። 40ማርካ̇ቢን ኤንኣካ̇ይፌ̈ኒ ቢላ̇ሪ ባሃ̈ሪን ጋርታ ጌዳ ኣሺ̇ዴ። ዪኒ̇ባራ ባሃ̈ሪን ሱጋዝ ሚን ቃቺ̇ኖ ጋ̈ዳን ቢሊ̇ዴ፤ ዓይ ጎይ ዎን ሻሪን ኣይጊንኮ ጎይ ሾክ̇ ዎታሪ ባሃ̈ሪን ቡጊድ ኬስካ̇ንዳብ ሉኪ̇ዴ። 41ዎቲናካሬ ማርካቢንዳ ሻ̈ማ ኩ̈ሊንቲ̇ኖ ጋልዳ ዶምኢንታ̇ራ ጎርጎራ ኬዳ̇ዴ፤ ቲ̈ን ጎይባር ቶ̈ራ ቶኪንታ̇ራ ኤንኣባ̈ሶ ማ̈ቃ̇ዴ፤ ጋስ ጎይ ዉርጊ ሱጊዛኮታ̇ቦ ሜቂ̈ ኤ̈ዴ።

42ቃሺ ኣሳን ጋርታ̇ ሜላ ኣቲ̇ን ፔቲ̇ ኣሲ ጉታራር ቡ̈ታ̇ካይፌ̈ን ዎታ̇ዳራን ኢንታ̇ ዎንዳብ ቆፒ̇ዴ። 43ማታ̈ላቃዲ ዎቲናካር ጳውሎ̈ሳ ቡ̈ቲሳንዳ̇ቦ ኮዪኖኮታ̇ቦ ኢንታ ቆፊን ኤካካ̇ይ ኣቲ̇ዴ፤ ዪኒ̇ፖ ጉቲ ኤሪዛን ቲ̈ኒታሪ ማርካ̇ቢን ጋልዳ̇ፖ ባሃ̈ሪን ጋርታ ዶጚሙታ ሳ̈ዝ ጋልዳ ኬ̈ስካ̇ምፔ̈ን ኪ̈ቲ̇ዴ።

44ኣቲ̇ኖ ኣሳን ማ ሳ̈ንቃን ጋልዳ̇ኬ ማርካ̇ቢን ሜቂን ጋልዳ ዶኣሪ ኬስካ̇ምፔ̈ን ኪ̈ቲ̇ዴ፤ ዪ̈ፌ̈ን ዎታሪ ዎይን ኮሽባር ሳ̈ዝ ጋልዳ ዬሊ̇ዴ።

Tans Gekies:

ሃዋ̈ 27: ኦጫ̈ቃማ

Kleurmerk

Deel

Kopieer