ሃዋ̈ 1

ዬሱ̈ሲ ኣፋ ሉኪ̇ዴ

1ቶ̈ፊሎሶ̇! ታ̈ኒ ታ ማጻ̈ፊን ቲ̈ኖን ጋልዳ ዬሱ̈ሲ ፌ ታማ̈ርሳ̇ዚንዲኬ ፌ ኦ̈ዚን ዣማ̇ሪኖ ኬሊ̇ንፖ ኤ̈̇ራ 2ፌ ማራ̇ጺኖ ሃዋ̈ራታንቦ ጌ̈ሻ̇ ኣያ̇ና ጎይባራ ኢንታ̇ ኪ̈ቲኖፖ ዎሃ ፉዳ ኣፋ ሉካ̇ዝ ቃሚ̇ን ዬሊ̇ዝ ዲራስ ኦ̈ኖ ኦ̈ሲን ዎይ ጻ̈ፊኔ። 3ኢ ዎይሊን ሜታ ኤካ̇ር ዓይቂ̇ኖፖ ዓኒ ዓይቃ ጋርታ̇ፖ̇ ዲንዳር ሼምፓባር ዎንዶ̇ ዎይሊን ኣማ̇ንዝ ማርኪቲባራ ኢንታ̇ብ ፌ̈ና ቤይሲዴ። ኦይዲ ታጳ̇ ቃም ኢንታ̇ባር ቤንቲ̇ ሙታ̇ ጾ̈ሳ̇̇ ካ̈ቲቲ ጎይ ኢንታ̇ ታማ̈ርሲዴ። 4ፔቲ̇ ጋላስ ኢንታባር ዎልኣ ዶኣር ቡና ኡሽኪ̈ርዶሪ ኢንታ̇ኮ “ቴ ሶ̈ላምባ̇ር ዪንቲ̇ ሲስኪ̇ኖንዶ̇፤ ታ ባ̈ባ ዪንታ̇̇ብ ኢሚ̇̈ሬ ጋ̈ሪ ታስፋ ኢሚ̇ኖን ና̈ጊብትዶኬ፥ ዬሩሳላማፖ̇ ኬስካ̇ሪ ሜላ ቤስ̇ ሉካፒ̇ቴ። 5ዋ̈ኒ̇ሲ ዋ̈ባር ጣማ̇ቂኔ፤ ዪንቲ̇ ጊላ̇ ቃማ̇ፖ̇ ዓኒ ጌ̈ሻ ኣያ̇ናባር ጣማ̇ቂንቲ̈ሬ” ጌይዴ።

6ኢንታ̇ሬ ዎልኣ ሺ̈ቃር ዎንጋርታ ኢ̈ኮ “ጎዳ̈ዶ! ኔ ኢስሬ̈ላ ካ̈ቲቲን ማሃር ኤሳ̇ዝ ኬሊ̇ን ዓት ዬሊ̇ና?” ጋ̈ር ኢያ ኦይጪ̇ዴ።

7ኢያር ኢንታ̇ኮ “ጾ̈ሳ̇̇ ባ̈ባ ፌ ሲልጣ̈ናባር ባዝ ዓና̇ ዓኒ̇ ቃምባር ማ̈ቃ̇̈ሬ ጌይኖ ኬሊ̇ን ዪንቲ̇ ኤራንዳ̇ቦ ዳንዳኢባ̈ሴ። 8ዎቲናካር ጌ̈ሻ̇ ኣያ̇ና ዪንታ̇ ጋልዳ ሶ̈ቤጌይን ዪንቲ̇ ዎልቃ ዲጚ̈ሬ። ዬሩሳ̈ላም ካታማ ጋርታ፣ ዪሁዳ ጋዳ̇ ዎይ፣ ሳማ̈ራ ጋዳ̇ኬ ዓጛር ሳ̈ዝ ቡጊድ ዬሊ̇ዝ ዲራስ ዪንቲ̇ ታ̈ብ ማርካ̇ ማ̈ቂ̇̈ሬ” ጌይዴ።

9ዪኖ̇ ኢ ጌዪኖፖ̇ ዓኒ ኢንቲ̇ ኢያ ቤቃ̇ምባራ ፉ̈ዳ ኣፋ ሉኪ̇ዴ፤ ሻ̈ራር ኢያ ጌ̈ሚዴ።

10ኢ ሉካ̇ምባራ ኢንቲ̇ ፉዳ ኮት ዎቲ ኢያ ቤቃ ጋልዳ ዎዶን ቦ̈ርስ ኣፊላ ማኢኖ ናምኢ ኣሳን#1፡10 ዪን ናምኢ ኣስ ጌዪንቲ̇ኖን ጾ̈ሳ̇̇ ኪ̈ታንቻን። ኢንታ ላፍ ኤቃ̇ሪ 11ኢንታኮ “ዪንቲ̇ ጋሊላ ጋዶ̇ ኣሳን! ፉዳ ኣፋ ቤቂ̇ሙታ̇ ዓይ ኣብዛብ ኤቂ̇ና? ዓ ዪንቲ̇ ቤቃ̇ምባር ፉዳ ኣፋ ሉኪ̇ኖ ዬሱ̈ሲ፥ ዓና̇ ኢዝፌ̈ን ማ̈ቂ̇ ዬ̈ይሬ” ጌይዴ።

ማ̈ታ̈ሲ ዪሁዳ ቤሲ̇ን ማራ̇ጺንቲ̇ዴ

12ኢናፖ̇ ኢንቲ̇ ዳብራዛይታ ጋ̈ዝ ኢንዲን ጋልዳፖ̇ ዬሩሳ̈ላም ካታማ ማ̈ቂ̇ ዬ̈ይዴ። ዪና̇ ቤሲ̇ንዳ ዬሩሳ̈ላማፖ̇ ፔቲ̇ ኪሎሜ̈ቲራ#1፡12 ፔቲ̇ ኪሎሜ̈ቲሮ ፔቲ̇ ሙኩላ ሜ̈ቲራ፥ ፔቲ̇ ሜቲሮ ናምኢ ዋ። ማ̈ቃ̇ምፔ̈ን ጎታ̇̈ሬ። 13ኢንቲ̇ ካታሚን ጋርታ̇ ጌሊኖፖ̇ ዓኒ ፌ ዶኣዝ ፎ̈ቂን ጋልዳ ኬስኪ̇ዴ። ኢንታ̇ሬ ጴ̈ጥሮ̈ሳ፣ ዋ̈ኒ̇ሳ፣ ዓይቆ̈ባ፣ ኢንዲራ̈ሳ፣ ፊልጶ̈ሳ፣ ቶ̈ማ̈ሳ፣ ባርቶሎሞ̈ሳ፣ ማ̈ቶ̈ሳ፣ ኢልፎ̈ሳ ናኣ ዓይቆ̈ባ፣ ፌ ጋዲምቦ ሚጪንቲ̇ዛ ሲሞ̈ናኬ ዓይቆ̈ባ ናኣ ዪሁዳኬ። 14ዪን ዎይኬ ማ ማጫ̇ንኬ ዬሱ̈ሳ ኢንዲ̇ን ማ̈ራሚባራ ማ ኢ ኢን̇ናኣንባር ዎልኣ ፔቲ̇ ቡ̈ዳባር ማ̈ቃ̇ር ዎ̈ሳብ ዎልኣ ሺ̈ቂ̈ሬ።

15ዪኒ̇ ኬሊ̇ንባራ ጴ̈ጥሮ̈ሲ ፔቲ̇ ጼ̈ታኬ ላምታም ኣስ ማ̈ቃ̇ምፔ̈ኖ ኣማ̇ኒኖ ኣሳን ጊዳ̇ ኤቃ̇ሪ 16ኢንታ̇ኮ “ቴ ኢሺንታ̇ን! ዬሱ̈ሳ ኤ̈̇ምፔ̈ኒ ኣሳን ቲ̈ኒ ኤኪ̇ ዬይኖ ና̈ሳ ዪሁዳ ባዚን ጌ̈ሻ ኣያ̇ና ቲ̈ኒታር ዳ̈ዊታ ኖ̈ናባር ሶ̈ሊኖ ጌ̈ሻ̇ ማጻ̈ፋ ቃ̈ሊን ፎቲንታ̇ንዳብ ኮሻ̇̈ሬ። 17ኢ ኑ ጋርታ̇ፖ̇ ፔታ̇ና ማ̈ቃ̇ር ፋይዲንታሪ ዓና̇ ኦ̈ሲን ጋልዳ ቤንታ̇ር ኑባር ኦ̈ኖ ኣሴ” ጌይዴ።

18“ዎቲናካሬ ዪ ና̈ሳ̈ዲ ፌ ኢ̈ታ ኦ̈ሳባር ዲጚኖ ሚ̈ሻ̇ባር ሳ̈ዝ ዎጚዴ፤ ኢና ፌ ሚልባር ጉፕ ጋ̈ር ኬዳ̇ር ኢ ሚላ̇ ዳርኢዴ፤ ኢ ሜርማዳር ዎይ ውልኢንቲዴ። 19ባዝ ዪ̈ና̇ ዬሩሳ̈ላም ጋዳ̇ ዶኢዝ ኣሳን ዎይንቦ ሲስኪንታ̇ዴ፤ ዪና̇ ዎጚንቲ̇ኖ ሳ̈ዚንዳ ኢንታ ኖ̈ናባራ ‘ኣካልዳ̈ማ’ ጌዪንታ̇̇ር ጼይጊንታ̇ዴ፤ ኢዝ ቢርሺቺ̇ንዳሬ ‘ሱ̈ ጋዴ’ ጌንቴ።

20“ዪና̇ ማ̈ቂ̇ኖንዳ̇ ማዝሙራ ማጻ̈ፋ ጋልዳ፥

“ ‘ኢ ዶኢ ቤሲ̇ን ካይዝ ማ̈ቆ̇፤

ኦ̈ናካር ኢና ዶኣፖ̇ ጋ̈ቤ’

ማ ‘ኢ ሲልጣ̈ኒን ሜላ ኣሲ ኤኮ̇’ ጋ̈ሪ ጻ̈ፊንቲኖኮታ̇ቦ።

21-22ዬሱ̈ሲ ኑ ጊዳ̇ ጋርታ̇ ቢሪንታ̇ዝ ኬሊ̇ምፖ̇ ኤ̈̇ሪ ዪ̈ዳሬ ዋ̈ኒ̇ሲ ኣስ ጻማ̇ቂ̇ስ ኤ̈̇ኖፖ̇ ኤ̈̇ሪ ዬሱ̈ሲ ፉዳ ኣፋ ሉኪ̇ኖ ቃሚ̇ን ዬሊ̇ዝ ዲራስ ኑባር ዎ ኣስ ማራ̇ጺንታ̇ንዳብ ኮሺ̇̈ሬ። ኣባ ጌይን ኣሳን ዪን ጋርታፖ̇ ፔቲ̇ ኣሲ ኑባራ ዬሱ̈ሲ ዓይቃ ጋርታ̇ፖ̇ ዲንዲኖን ማርኪቲዝ ኣስ ማ̈ቃ̇ንዳብ ኮሺ̇̈ሬ” ጌይዴ።

23ኢናፖ ኢንቲ̇ ናምኢ ኣስ ሺ̈ሺ̇̈ዴ። ዪንሬ ቤርሳባ̈ሳ ዎይ ዮስጦ̈ሳ ጌይዛ ዮ̈ሴፋኬ ማ̈ታ̈ሳ። 24ኢናፖ̇ ኢንቲ̇ ዎ̈ሲ̇̈ርዶሪ “ኣስ ዎይ ቡ̈ዳ ኤሪዛ ጾ̈ሳ̇̇̈ዶ! ዓን ናምኣን ጋርታ̇ፖ̇ ኔ ኦ̈ና ማራጺኖኮ ኑ̈ና ቤይሳቤ። 25ዪሁዶ ፌ̈ብ ማ̈ቂ̇ዝ ቤስ̇ ሉካ̇ሪ ኣሺ̇ኖ ኦ̈ሲ̇ምቦ̇ ኢ ቤሲ̇ን ሃ̈ዋ̈ራ ማ̈ቃ̇ር ኦ̈ምፔ̈ኖ ኦ̈ናኮ ኑ̈ና ቤይሳቤ” ጌዪ ዎ̈ሲ̇ዴ። 26ኢንቲ̇ ናምኣንቦ ኢጻ ቃጺ̇ዴ፤ ኢጺንዳ ማ̈ታ̈ሳ ጋልዳ ኬዳ̇ዴ፤ ዪ̈ኮታ̇ቦ ኢ ታጶ̇ ፔቲ̇ ሃዋ̈ራታንባራ ፋይዲንቲ̇ዴ።

Tans Gekies:

ሃዋ̈ 1: ኦጫ̈ቃማ

Kleurmerk

Deel

Kopieer