मरकुस 10

सोळचिटिता बारेते येसुना करिहाना

(मत्ति १९:१-१२; लूका १६:१८)

1पजा येसु अगडाल पसियस यरदन नदिता होदपाकाळ यहुदियाता सिमातेके हतुर। असा वने भीळ ओना हेरे जमा आत, ओर आपुना रितिते ओरकुन उपदेश हिया लागतुर। 2असके परीसि लोकुरक ओना हेरे वास, परिक्षा कियान साटि ओन पुच्चेमातुरक, “मानेय आपुना मुत्तेन सोळेकेविर इन्जोर बाताल इद उचित मन्ता?” 3येसु ओरकुन उत्तर हितुर, “मूसाल मिकुन बाताल आग्या हितोर?” 4ओरक इतुरक, “आपुना मुत्तेन सोळचिटि कोटस अदेन कयदिगा हिसुन तासियाना इन्जोर मूसाल आग्या हितोर#व्यव २४:१-४; मत्ति ५:३१ ।” 5येसु ओरकुन इतुर, “मिया मन्दा कटोरताता कारण ओर मिया साटि इद आग्या कोटतोर। 6मति सबोय बनेकियानाता सुरुवाते परमेस्वर ओरकुन मानेय अनि आळ इदाम बनेहकितोर#उत्प १:२७; ५:२। 7इद कारणते मानेय आपुनोर अवाल-बाबोनिगाडाल अलगो आस आपुना मुतेनसंग उन्दि आयनुर#उत्प २:२४ । 8अनि ओरक इवुरास उन्दि मेन्दुल आयनुर, इन्जोरक ओरक इदेक रन्ड आयो मति उन्दि मेन्दुल मन्तोरक। 9इन्जोर परमेस्वर जोळेहकितोर ओरकुन मानेय अलगो केमाकिर।”

10पजा येसु लोतिगा मन्दानपा चेलालोरक इदेना बारेते ओन असा पुच्चेमातुरक। 11येसु ओरकुन इतुर, “बोरायि आपुना मुत्तेन तासिस दुसरो आळतासंग मरमिंग केविर ते ओर पहले मुत्तेना विरोदते व्यभिचार किन्तोर#मत्ति ५:३२; १ कुरि ७:१०-११ । 12अनि मुत्ते आपुना मुजोन तासिस दुसरो मानेयनासंग मरमिंग केवि ते ओद व्यभिचार किन्ता।”

येसु बालकिन आशिरवाद हिन्तोर

(मत्ति १९:१३-१५; लूका १८:१५-१७)

13पजा येसु ओरा पोरो कय इरीर इन्जोर लोकुरक बालकिन ओना हेरे ततिला लागतुरक मति चेलालोरक ओरकुन रांगतुरक। 14चेलालोरक रांगतुरक इन्जोर येसु हुळस होंग आस ओरकुन इतुर, “बालकिन नावा हेरे वायिला हिम्ट ओरकुन मना केमाट, बाक्याकि परमेस्वरना राज्य बालक लेहका बोर मन्तोरक ओरा साटि मन्ता। 15बोरायि परमेस्वरना राज्यतुन बालक लेहका स्विकार केवोर ओर परमेस्वरना राज्यतिगा बसकेय हन्दिला परोर आयनुर इन्जोर नना मिकुन खरोय इन्तोना#मत्ति १८:३।” 16अनि येसु बालकुन अतितुर अनि ओना पोरो कय इरस ओन आशिरवाद हितुर।

सावकार मानेय अनि अनन्त जिवन

(मत्ति १९:१६-३०; लूका १८:१८-३०)

17येसु अगडाल पसियस हरिते हन्दिला आस मतोर असके वरोर मानेय वितसोर ओना हेरे वातुर अनि येसुना मुने मिन्डांग टेकेकिस ओन पुच्चेमातुर, “हे बेसतोर गुरु, अनन्त जिवन स्विकार कियान साटि नना बाताल कियाका?” 18येसु ओन इतुर, “निमा नाकुन बेसतोर गुरु बाक्या इन्तोन? परमेस्वरदुन तासिस बोरे बेसतोर हिलेर। 19निमा आग्यातुन पुन्तोन बहे, ‘हव्काना आयो, व्यभिचार केमाट, कलेर कियाना आयो, खोटाल गवाहि हियाना आयो, दुसरोन दोखा हियाना आयो, आपुनोर बाबो अनि अवहारिना आदर किम्ट#निर २०:१३; व्यव ५:१७; निर २०:१४; व्यव ५:१८; निर २०:१५; व्यव ५:१९; निर २०:१६; व्यव ५:२०; निर २०:१२; व्यव ५:१६ ।’ ” 20ओर येसुन इतुर, “हे गुरु, इव सबोयतुन नना लयोरपनताल मानेमासोर वातोना।” 21येसु ओन हुळस ओन मया कितुर। अनि ओन इतुर, “नियागा उन्दि पोल्लोता कमि मन्ता, निमा हन्जुन निया सबोय चिज मोमस गरिब लोकुरकुन हिम, निमा अदाम कियाकि ते निकुन स्वरगतिगा धन पुटार। अनि पजा वास नावा परके आम” इदाम वेहतुर। 22इद पोलो केन्जुन ओन पकाय दुःख किसोर मलस हतुर बाक्याकि ओर पकाय सावकार मतोर। 23येसु सबोयबासा हुळस आपुनोर चेलालोरकुन, “दनवान लोकुरक परमेस्वरना राज्यतिगा हन्दाना बचोन कटिन मन्ता!” इन्जोर इतुर। 24चेलालोरक येसुना पोल्लोते आश्चरय आतुर, येसु असा ओरकुन इतुर, “हे मावोर बालक, धन संपतिगा विस्वास इरान्तोरक परमेस्वरना राज्यतिगा हन्दाना बचोन कटिन मन्ता। 25धनि मानेय परमेस्वरना राज्यतिगा हन्दानाताल हुट सुयिता बुकाताल पसियस हन्दाना सुदोय मन्ता इन्जोर नना मिकुन इन्तोना।” 26ओरक पकाय आश्चरय आस आपसते इन्दा लागतुरक, “ते पजा बोन पिसिहला आय परान्ता।” 27येसु ओरकुन हुळस, “मानेयनिकेडाल इद आय परो, मति परमेस्वरताल आय परान्ता; बाक्याकि परमेस्वरताल सबोय आय परान्ता” इन्जोर इतुर। 28पतरस ओन इन्दा लागतुर, “हुळा माक ते सबोय तासिस निया परके वातोरोम!” 29अनि येसु इतुर, “बोर नावा साटि अनि सोबाता पोल्लोसाटि लोन, तमो, हेलाळ, अवाल-बाबो आपुना बालक अनि आपुना डन्डतुन सोळे किन्तोर, 30ते ओन इद दुनियातेय नुर पट लोन, तमो हेलाळ, अवाल बाबाल, बालक अनि डन्ड वने पुटार अनि अदेनासंग लोकुरकनिकेडाल मिकुन पकाय तकलिप वने पुटार। अनि वायाना काळते ओन स्वरगतिगा अनन्त जिवा वने पुटार इदाम नना मिकुन खरोय इन्तोना। 31मति मुने मन्तोरक पकायि लोकुरक आकरितोर आयनुरक अनि आकरि मन्तोरक पकाय लोकुरक मुनेटोर आयनुरक#मत्ति २०:१६; लूका १३:३०।”

येसु आपुना हायानाता बारेते असा वेहान्तोर

(मत्ति २०:१७-१९; लूका १८:३१-३४)

32ओरक येरुसलेम हन्जोर मतोरक, अनि येसु ओरा मुने मुने हन्दिला आस मतोर, चेलालोरक आश्चरयते मतोरक अनि बोर ओना परके परके ताकिन्दुरक ओरक वरियस मतोरक, असके पजा ओर बारा चेलालोरासंग ओनागा वायाना पकाय तकलिप बारेते वळकिला लागतुर, 33“हुळाट, माक येरुसलेम दान्तोरोम अनि नना मानेयतोर मरि मुक्याह याचक अनि मूसाना नियमतुन करिहवालोरा कयदे पयानुर अनि ओरक ओन हव्कान साटि योग्य ठहरे कियानुर अनि दुसरो जातिता लोकुरा कयदे सोपे कियानुर। 34ओरक ओन कवनुरक, ओना पोरो उक्सनुरक, ओन पट्टाते हियानुरक अनि ओन होवकस वाटनुरक अनि मून्ड दियाना पजा ओर असा जिवे मायनुर।”

याकुब अनि युहन्नाना विनन्ति

(मत्ति २०:२०-२८)

35जबदिनोर मरक याकुब अनि युहन्ना येसुना हेरे वासुन इतुरक, “हे गुरु, माक बारायि निकुन तलकिकोम अद निमा मावा साटि किम इन्जोर मावा इच्चा मन्ता।” 36येसु ओरकुन इतुर, “नना मिकुन साटि बाताल कियाका इन्जोर मिया इच्चा मन्ता?” 37ओरक येसुन इतुर, “निया महिमाता राज्यतिगा निया सिंहासनतिगा उदाना बेरा मावागाडाल वरोर निया तिन्दान कयबासा अनि दुसरो निया डाबानबासा उदाना साटि वाचा हिम।” 38येसु ओरकुन इतुर, “निमाट बाताल तलकान्तोरिट इन्जोर निमाट पुनविट! नना पकाय तकलिप सहन कियाका अदाम लेहका निमाट वने पकाय तकलिप सहेन किया परकिट बहे? नना हायका अदाम लेहका निमाट हायपरान्तोरिट बहे#लूका १२:५०?” 39ओरक येसुन, “इंगो! माक सहेन किया परान्तोरोम” इन्जोर इतुरक। येसु ओरकुन इतुर, “नना सहेन कियाका ओद पकाय तकलिप निमाट सहन कियाकिट अनि नना बदाम हायका अदामे निमाट वने हायकिट इद निश्चित मन्ता। 40मति आपुना तिन्दान कयबासा अनि डावान कयबासा बोने उपहाना नावा बुतो आयो, मति नावोर बाबो बोना साटि तयार कितोर ओरकुने ओद पुटार” इन्जोर इतुर। 41याकुब अनि युहन्ना येसुन हेरे बाताल तल्कतुरक इद ओना दहा चेलालोरकुन समजेमात असके ओरक याकुब अनि युहन्ना पोरो होंग कितुरक। 42येसु ओरकुन हेरे केयस इतुर, “इद दुनियातोर राजाह लोकुरक ओरा लोकुरा पोरो राज किन्तोरक। अनि ओरा हजोर अदिकारि लोकुरक ओरागा वने अदिकार किन्तोरक#लूका २२:२५-२६ । 43मति मियागा इदाम आयो, मियागाडाल हजोर आयाना इच्चा मन्ता ओर मिया सेवक आयिर#मत्ति २३:११; मर ९:३५; लूका २२:२६। 44अनि बोरायि मियागाडाल सबोय लोकुरा मुक्याल आयाना इच्चा मन्ता ओर सबोय लोकुरा सेवक आयिर। 45बाक्याकि नना मानेयतोर मरि सेवा किहान साटि आयो मति दुसरो लोकुरकुन आपुनाय सेवा कियान साटि अनि पकाय लोकुरकुन पापताल पिसान साटि आपुना जिवा हेविर इन्जोर दरतितिगा वातोना।”

येसु आन्दराल बरतिमायिन दुष्टि हिन्तोर

(मत्ति २०:२९-३४; लूका १८:३५-४३)

46येसु अनि ओना चेलालोरक येरिहो सहेरतिगा वातुरक ओर अनि ओनोर चेलालोरक अनि उन्दि पकाय भीळ येरिहोतिगाडाल पसियन्द असके तिमायिनोर मरि बरतिमायि पोरोयतोर वरोर आन्दराल बिकारि हरदा ओदातिगा उदस मतोर। 47येसु नासरितोर आन्दुर इन्जोर केन्जुन ओर केयस केयस इन्दा लागतुर, “हे येसु दावुदनोर मरि नाकुन दया किम।” 48कमेक मन इन्जोर पकाय लोकुरक ओन रांगतुरक मति ओर असा वने केयिला लागतुर, “हे दावुदनोर मरि नाकुन दया किम।” 49असके येसु रोमस इतुर, “ओन केयाट” अनि लोकुरक ओर आन्दरान केयस ओन इतुर, “हिमत इरा तेदा, ओर निकुन केयान्तोर।” 50आन्दराल आपुना मुच्चाना सन्दरा हरच सान्डे तेदितुर अनि येसुना हेरे वातुर। 51येसु ओन पुच्चेमातुर, “नना निया साटि बाताल कियाका इन्जोर निया इच्चा मन्ता?” आन्दराल ओन इतुर, “हे गुरु, नना हूळ परका इन्जोर नावा इच्चा मन्ता।” 52येसु ओन इतुर, “हन निया विस्वास निकुन सुदरे किता” ओर सान्डेय हुळिला लागतुर अनि हरतिगा ओना परके वातुर।

Tans Gekies:

मरकुस 10: fmu

Kleurmerk

Deel

Kopieer