Luka 24
24
1Mańa palitsuva ililongotsi ilya juma pwu vakalava vwu likanale ukuhuma ilitsuva ukubiha kuvuguli, vakagega nimituguva igyuvagahile. 2Vakavona iliganga libilwike pavuguli. 3Pwu vakingila mbuguli vakavona ummana gwa Jesu nagumuli. 4Pwu lino avene vwu visusuvala patsitsitsi pwu vakakeńemuka vakahegelela avanu vavili, vaswalile imisabwa igilengadika vuvule. 5Pwu avene vakadwada sitso vakinamila pasi. Pwu avanu ava vakatsova navo vakata: Umwumi vi mwatye mundonde mbaswe umu? 6Namuli umu bako atsukile. Nda nsamilwe itsu avavulaga vwu tango ali mu-Calilai 7itsu atetsaga: Uńamunu upita atagivwagwe mmavoko ga vatulanongwa, upita atovelelwagwe pakidamiṅanye, mańa palitsuva lya datu alatsukaga-tsu musamilwe? 8Pwu avadala vakakumbuhitsa amameńu ugwu atsovile UJesu. 9Lino vwu vatsisike kuvutsenge vwu vahumile kuvuguli pwu vakavavula tsoni tsitsitsi avakitsigo numpamato navange voni. 10Avene avadala avavavulaga avapositili tsitsitsi vwu va-Malija uvańina va Jakobu navange avadala avajiavo. 11Avene avapositili amameńu ga vadala gakava ndututsago ututsimu vuvule navakagavona. 12Pwu UPetele akasisimuka akanila ukubiha kuvuguli. Akatsigundama akatsikugivona imisabwa igyuvansilye. Pwu akabiha kuvutsenge akadega inongwa itsavonike.
13Lino pwu palitsuva lilyo pwu avanine vavili vakahuma mu-Jelusalemu pilivabiha kuvutsenge uvwu vita mu-Emausi ilitavwa. Vakagenda akajila ka patupindo utulevulo ntananato. 14Vwu vigenda pilivatsitsova tsoni inongwa itsavonike. 15Vwu vikutsitsova tsitso pilivandana pwu vakakeńemuka uju UJesu ahegelye igenda navo. 16Agene amiho ga vene gakavuta gaboswe, pange vammańe. 17Umwene akavavutsa akata: Gwu mameńu maki ugwu mukwandana vwu mugenda? Pwu vakima vakasusuvala kumiho. 18Pwu akanda ujyunge UKilyopa akata: Ulimmenza uve vimwene mu-Jelusalemu uve nutsimańili itsivonike umu itsu tugonile natso amatsuva? 19Umwene akata: Iliku? Avene vakambula vakata: Itsa Jesu uva mu-Nasaleti, uvi avetsaga munu uńamalago uviavonekige namaka nakwa Nguluve nakuvanu aga kuvombela imbombo naga kutsovela inongwa. 20Uvivantagile avateketsi avavaha navamamajitu, vahigile nilya kumbuda nilya kuntovelela pakidamiṅanye. 21Uvwe tuhuvilige tutetsige vi iva mbangi va Isilaeli. Lola ilelo lya datu vwu tugonilevwo ukuhuma upwutsitengwe. 22Avange navajitu avadala vatukeńemwise vwu vabye kuvuguli vwu vuhenga 23navatsikumbweni vitsile vatye tuluvwene uluvoneko lwa vasunwa avita mwumi umwene. 24Pwu vabye navajitu avange kuvuguli vatsikutsivwene tsoni itsu vatsovile avadala umwene navambweni. 25Pwu umwene akata: Lola uńe ńi vatsilaluhala, ńi vańanumbula inzito pakwidika tsoni itsu vatsovile avańamalago. 26Ndita atsovelilwe ṅani UKilisiti ukuta akuvilwagwe agendelage jijyo pakwingila mbuvaha vwa mwene? 27Pwu akahuma navo pa-Mose napavańamalago voni akavavula tsoni itsikuntsova jujwa muvakalata. 28Vwu vasike kuvutsenge ukwu vabihaga umwene akavuta ilutiṅanya. 29Avene vakantekelesa vakata: Uvetsage nuvwe mańa lya kimihe lino nilitsuva vuhwe vuvule. Pwu umwene akingila nńumba vakavetsanya. 30Vwu atamile navo pakulya akatola ikivanda akasana akameńulanya akavapa. 31Pwu gakadinduka baho amiho ga vene vakammańa. Umwene akańyemeluka vwu vilola. 32Avene vakavulana vakata: Natsipili inumbula tsitu ngati vwu itsova nuvwe munzila vwu ikutudindulila avakalata ukuta tuvamańe. 33Pwu vakavuka pakavalilo kako vakavujila mu-Jelusalemu. Mwu vakatsivona valundamine avalikitsigo nampamato navange avali navo. 34Vwu vakata: Atsukile jilweli unkuludeva ambonekye USimoni. 35Avene vakavavula itsa munzila nupwu vammańilaga upwu avameńulilaga ikivanda.
36Vwu valipakutsova tsitsitsi pwu vakakeńemuka itsile jujwa imile pagati ita: Ulunotsehetso luve nuńe, 37Pwu vakakeńemuka sitso nuludwado lukavavona. Ulwakuva avene vatetsaga pange ugupepo tuguvwene. 38Pwu umwene akavavutsa akata: Mukeńemuka kiki ninisagilo tsitoga kiki munumbula? 39Ukwi mundolage namavoko namalunde-mumańage ukuta nene jilweli. Ukwi muńabasage mummana, mańa ugupepo nagwiva nummana nagwiva nisitsege isyu mumbwene ukuva nasyo uńe. 40Lino vwu atsovile tsitsitsi pwu akavavonya namavoko namalunde. 41Vwu tango avene videga nduhekelo vwu videga vuvule pwu vakavona ita: Pange ndi natwo utunge utwakulya mumwa? 42Pwu vakampa akameńukila ka somba inutsule. 43Pwu umwene akatola akalya vwu vilola.
44Pwu akavavula akata: Lola tsitsitsi tsu tsilya ndivavulage vwu tulitwivoni nuńe tsilya nditetsage: Upita tsitsage tsisilage tsoni itsikunzova une itsivigilwe namusimilitso tsa Mose nambańamalago namwa Kalata va ńimbo. 45Pwu akavadindulila uluhala ulwa kuvamańila avakalata. 46Akavavula akata: Vwu vavigye ṅani vuvule-vule vatye: Vwu upita UKilisiti akuvilwagwe vuvule-vule, upita atsukage kuvaswe palitsuva lya datu, 47upita avanu isivumbuko syoni vavavulilage mwitavwa lya mwene ukuta nkilivukage pwu ndavuvona uvusyikilo vwa nongwa, vatengule mu-Jelusalemu umu. 48Uńe ndi vakutsidikila tsitsitsi. 49Mulole uńe ndikuvasuṅilaga ukwu idike udada atye: Ndikukasuṅaga kwu kikuvitsilaga uńe, Uńe tango mbetsage mumbutsenge umu mukasikage lulwa ndikuvaswikilaga amaka ga kukyańa.
50Pwu akahuma navo akalotsa navo mu-Betanija. Akimya amavoko ga mwene akavasaja. 51Lola vwu ikuvasaja pwu akigava kuvene akatoga akabiha kukyańa. 52Pwu avene vakisaja kumwene. Pwu vakakilivuka ukubiha mu-Jelusalemu, vakahekela sitso. 53Sikutsoni vakava mwa Tempeli vakanginya Unguluve.
Tans Gekies:
Luka 24: Kinga
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
New Testament in Kikinga © British and Foreign Bible Society, 1961.
