Bo Bolɛ 15
15
Nyanmiɛn waan ɔ ´fa Kanaan mɛn'n ɔ ´man Abram nin i anunman mun
1Kɛ ɔ yoli sɔ'n, Anannganman fiteli Abram nyrun aolia nun nan ɔ'a se i kɛ: «Abram, nán srɛ kun wɔ. N ti wɔ sasafuɛ, ɔ mo yolɛ'n ɔ wa yo dan mín sa nun.»
2-3Abram seli i kɛ: «Anannganman min Min, m'an wu-man ba. ?Nguɛ like cɛ yɛ a ´man min-ɔn? Min aja difuɛ'n yɛlɛ Eliezɛr b'ɔ fin Damas'n i kunngba. A man-man min ba, ɔ man min sufuɛ'n yɛ ɔ ´yo min aja difuɛ-ɔ.»
4Kpɛkuun Anannganman waan: «Nɛ́n i yɛ ɔ ´yo wɔ aja difuɛ-ɔ.»
5Yɛ ɔ fɛ i fiteli nan ɔ'a se i kɛ: «Man ɔ nyin'n su nian nglo lɔ. Sɛ a kwla ka nzraama mun'n, ka be man n nian. Kɛ wɔ anunman'm be wa sɔn kpanngban sɔ-ɔ.»
6Ndɛ nga Anannganman kɛnnin i lɛ'n, Abram lafili su, ɔ man Anannganman buli i sran kpa . 7Yɛ Anannganman seli i kɛ: «Min yɛ n fali wɔ Babilɔni nvle'n nun klɔ nga be flɛ i Ir'n su lɔ m bali wa kɛ n ´fa mɛn nga m ´man wɔ nin-ɔn.» 8Abram usɛli i kɛ: «?Anannganman min Min, nguɛ like yɛ man n ´kwla wun kɛ mɛn nga ´yo n liɛ-ɔ?»
9Yɛ Anannganman waan: «Fa nannin talua kun, boli nin kun, ɔ nin bua nene kun bɔ b'a di afuɛ nsan-nsan, ɔ nin ablioso nin okunmomo ba kun, fa be bla.»
10Yɛ Abram ´fa nnɛn nga Anannganman kleli'n ´ba-a, yɛ ɔ ´kpaci be nun nnyɔn-nnyɔn sɛsɛsɛ-ɔ. Ɔ fali be bue nnyɔn-nnyɔn sɔ'n bé nyin'n wɔwɔli su. Sanngɛ anunman'm be liɛ'n ɔ'a kpaci-man be nun. 11Anunman nga be di nnɛn'n be bali nnɛn sɔ'm be dilɛ nan Abram ɔ'a fuan be.
12Kɛ wia'n ´tɔ'n, lafilɛ wie b'ɔ wa kunnin Abram'n, be flɛ-mɛn i lafilɛ. Lika'n dunnin tritri kpa, kpɛkuun srɛ kunnin i. 13Yɛ Anannganman seli i kɛ: «Se kɛ sɛ, wɔ anunman'm be wa tran nvle wie nun. Be ´yo akua, be ´kle be yalɛ afuɛ kpakpa ya nnan . 14Sanngɛ n ´tu i sɔ nvle liɛ nga be ´fa wɔ anunman'm be ´yo be akua'n be fɔ. Kɛ be ´jaso lɛ be ´kɔ'n, be ´nyan ninnge kpanngban. 15Ɔ kusu ɔ liɛ'n, a wa di alaje, ɔ́ ti'n ´bo je fitafita. A ´wu wɛtɛɛ, be ´sie wɔ. 16Wɔ anunman siansian mun yɛ be ´ba wa-a, afin Amɔrfuɛ'm bé sa tɛ bɔ be yo'n ɔ nian bobo-man su bɔ man n ´fuan be-ɔ.»
17Kɛ wia'n tɔli'n, lika'n dunnin dan kpa, kpɛkuun sin wie jueli nnɛn bɔ Abram kpacili be nun nnyɔn-nnyɔn'm be afiɛn. 18Le kun sɔ nun'n, Anannganman nin Abram be trali aenguɛ. Anannganman seli i kɛ: «Mɛn ng'ɔ o yɛ'n, kɛ ɔ fɛ i Ezipt nzue ba kan'n i nuan lɛ b'ɔ ´fa ju Efrat nzue ba dan'n i nuan'n, m'an fa man wɔ anunman mun . 19Kenfuɛ mun, nin Kɛnazfuɛ mun, nin Kadmɔnfuɛ mun, 20nin Ɛtfuɛ mun, nin Ferezfuɛ mun, nin Rɛfafuɛ mun, 21nin Amɔrfuɛ mun, nin Kanaanfuɛ mun, nin Girgazfuɛ mun, ɔ nin Zɛbisfuɛ'm be liɛ yɛlɛ mɛn sɔ'n.»
Tans Gekies:
Bo Bolɛ 15: BB98
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Baoulé Bible © Alliance Biblique de Côte d'Ivoire, 1998.
