Jesu Tondiba Tuona 4
4
Bi cuani Pieli leni Jan bi cancantieba taancianli kani
1Pieli leni Jan n da den maadi leni bi niba yaa yogunu, bi kopadicianba, U Tienu diegu guudikaaba yudaano leni Sadusieninba den cua likani. 2Bi pala den beni kelima Pieli leni Jan bangi bi niba ki wangi ba ke bi tinkpiba kuli baa fii, kelima Jesu den fii bi tinkpiba siiga. 3Bi den cuo ba ki kuani li kpaadidieli nni hali lan baa fii ki faa, kelima u yienu den bua ki baa. 4Ba yeni, yaaba n den cengi bi maama siiga boncianla den daani Jesu, ke bi coali bua ki pundi niba tudamuu (5 000).
5Lan den fii ki faa, Jufinba yudanba, a nikpela leni li bali maama banda den taani Jerusalemi. 6Bi kopadicianba bado Hana leni Kayifa, Jan, Alekisandri leni yaaba n sieni ki tie bi kopadicianba yudanba kuli den cua. 7Bi den teni ke Pieli leni Jan sedi bi siiga, ke bi buali ba: «U laa paalu po, bi ŋme yaa yeli po yo, ke yi tieni yeni?»
8Lani, U Tienu Fuoma Yua den gbieni Pieli ke o yedi ba: 9«Yinba bi paatieba leni Isidayeli nikpela, yi buali ti dinla yaa tuonŋanli n tieni o naa wabo po fuuli leni lan gaa maama ke o paagi. 10Yinba yaaba n ye ne leni Isidayeli yaaba, yaaba n sieni kuli, bandi mani ke Jesu Kilisiti, Nasareti yua, yin den joani yua li dapoanpoanli po, ke U Tienu fiini o bi tinkpiba siiga, yaa yeli po yo, ke yaa joa n tie ne paagi cain ki se yi nintuali. 11Wani Jesu yeni n tie:
Yinba bi tanmaaba n den luni yaa tanli,
Lini n tua li tanpuukaali.#Ps 118.22.
12Mi tindima ki ye nitoa kuli kani, kelima yetoali kuli ki ye ŋanduna nni tin baa tindi kelima yaali yaa po.»
13Bi cancantieba yeni n den laa Pieli leni Jan n pia yaa papaali, li den paki ba kelima bi bani ke bi tie taliginba, kaa kua cogu. Bi den bandi ke bi tie yaaba n den taa ki ye leni Jesu. 14Ban den nua ke yaa joa n paagi yeni se Pieli leni Jan kani, baa den fidi ki guani ba liba. 15Bi den teni ke bi ñani bi cancantieba taanli nni, ke bi ledi ki juogi ki yedi: «Ti baa tieni bi naa jaba lede? 16Jerusalemi yaaba kuli bani ke bi tieni mi bancianma, timoko nan kan fidi ki nia. 17Ama ke laa maama n da yadi bi niba siiga ki pugini, tin fu leni ba ki yie bi po, ke ban da go taa laa yeli oba kuli kani.»
18Lani, bi den guani ki yini ba ki yie bi po cain ke ban da go maadi, bi ki bangi bi niba Jesu yeli nni. 19Pieli leni Jan den guani ki yedi ba: «Biigi mani ki le li yaa tiegi U Tienu po, ke tin tuo yi yaa maama ki cedi wani U Tienu yaama. 20Ti kan fidi ki cedi ki kan maadi tin laa ki go gbadi yaala.» 21Bi cancantieba go den funi leni ba ki yuandi ki ŋaa ba. Baa den laa ban baa cuo ba yaala yaa po, kelima bi niba kuli den kpiagidi U Tienu, yaala n den tieni po. 22Ban den tieni yaa joa po mi bancianma ke o paagi, den cie bina piinaa.
Li dandanli yaaba jaandi
23Ban den ŋaa Pieli leni Jan, bi den gedi bi lieba po ki ban waani ba bi kopadicianba yudanba leni a nikpela n yedi ba yaala kuli. 24Ban den gbadi lani, bi den taani yanyenma ki jaandi ki mia U Tienu ki yedi: «Ti Diedo, fini n den tagi tanpoli, ki tinga, mi ñincianma leni yaala n ye mi niinni kuli. #Ñam 20.11; Neh 9.6; Ps 146.6. 25A den maadi, ke U Tienu Fuoma Yua teni ke ti yaaja Davidi a naacemo soagini a maama ki yedi:
‹Be n teni ke bi nilanba fii ki tiendi ku fuugu,
Ke i nibuoli mo pia laa yantiabiada?#Ps 2.1-2.
26Ki tinga badiba kuli fii ki sedi.
Bi badijaba mo taani ki tuu ñoayenbu
Ki fii ki sedi o Diedo
Leni wan Gandi Yua po.›
27Moamoani o bado Herodi leni guveneeri Ponsi Pilati den taani yanyenma leni yaaba n kaa tie Isidayeli yaaba leni Isidayeli yaaba kuli u naa dogu nni, ki juogi ban baa tieni maama ki cuo fini U Tienu naacen-gagidiŋamo Jesu, ŋan Gandi Yua. #Mat 27.1-2; Mrk 15.1; Luk 23.1,7-11; Jan 18.28-29. 28Ban den taani yeni, bi den tieni ŋan den tuodi ki bili yaala a paalu leni a yanjagili po. 29Moala o Diedo, cengi ban funi leni ti maama, ki paagi tinba a naacenba pala, ki teni tin yaa wangi a maama leni li papaali. 30Tandi a nuu ke tin yaa taagi a naacen-gagidiŋamo Jesu yeli ki paagidi bi niba, ki tiendi sinankeeninba leni mi bancianma.»
31Ban den jaandi yeni, ban taani naankani den digibi. Bi den gbie leni U Tienu Fuoma Yua ke bi wangi U Tienu maama leni li papaali.
Li dandanli yaaba boagidi bi piama leni biyaba
32Yaaba n den daani kuli den pia yanyenma leni yanjagiyenli. Oba kuli naa den yedi ke wan pia yaala tie wani bebe n die yaala. Nilo kuli den tuo ke o piama tua o lieba yaame.#JTT 2.44-45. 33Jesu tondiba den tiendi siedi wani o Diedo Jesu fiima bi tinkpiba siiga po leni u paalu. U Tienu seli mo den ye leni bikuli. 34Bi siiga luodo ki den ye, kelima yaaba n den pia i kuani, bi ti diedi kuli den kuadi ki kpendinni li ligi, 35ki biliti Jesu tondiba kani. Bi yen ñandi lienni ki boagidi ki tendi yuakuli nani o ŋantaadi n da maama.
36Josefi, Jesu tondiba n den cili yua yaa yeli Barnabasi, lani n tie yua n paagidi bi niba pala. O den tie Levi buolu yua ki ñani Sipiri diema nni. 37Omoko den pia u kuanu, ki kuadi ki cuani ki bili wan baa yaa ligi Jesu tondiba kani.
Tans Gekies:
Jesu Tondiba Tuona 4: BGP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Gulmancema Protestant Bible © Bible Society of Burkina Faso, 2013.
