LUKA 16
16
1Jesu go den yedi o ŋoadikaaba: «O piado den ye ki pia o ŋalimankubilo ke bi ti cua o kani ki kuli o ŋalimankubilo yeni ke o biandi o piama. 2O den yini o ki yedi o: ‹N gba ke bi maadi apo be n yeni? Doagidi ki waani nni a ŋalimankubili tuonli fuuli, kelima a kan go baa ki yaa tie n ŋalimankubilo.› 3O ŋalimankubilo yeni den yedi o pali nni: ‹N canbaa baa ñani nni li ŋalimankubili tuonli nni. N baa tieni lede? Ki ko bu kpaabu? N kan fidi. Ki yaa miadi? Bu miabu pia npo i fe. 4N bani min baa tieni maama ke o yaa ti ñani nni li ŋalimankubili tuonli nni, ke n gedi ki cani yaaba kuli, ban ga n cangu.› 5Lani o den yini o canbaa pandanba kuli yendo yendo. O den yedi yua n kpa cua: ‹A pia n canbaa po i ŋa yo?› 6O den goa ki yedi o: ‹Kpaboba kobiga.› O ŋalimankubilo den yedi o: ‹Ga a panli tili ki kali ki diani tontoni kpaboba piimuu.› 7O den yedi toa mo: ‹A pia n canbaa po i ŋa?› O den goa ki yedi: ‹*Ŋalikama kpalipadi kobiga.› O ŋalimankubilo den yedi o: ‹Ga a panli tili ki diani kpalipadi piinii.› 8O canbaa den pagi laa ŋalimankubilo yua n kaa tiegi, kelima o den tieni u fanu.» Jesu den pugini ki yedi: «Ŋanduna yaaba fani leni bi lieba ki cie yaaba n tie mi yenma yaaba.
9N yedi yi ke yin taa mani ŋanduna ŋalimani yi n joagini yeni, ki baa danlinba, ke yi yaa ti pia yi ŋalimani yaa yogunu, ban n ga yi cangu naani n ki pia juodima nni. 10Ban fidi ki dugi yua po li bonwaala po, bi go baa dugi o yaa po yo yaa bonla n yaba po. Yua n ki tiegi li bonwaala nni, o kan go yaa tiegi yaa bonla n yaba nni. 11Lanwani bi yaa fidi ki dugi yipo leni yin kubi ŋanduna ŋalimani maama yi n pia i boandi, ŋme baa piani yi o ŋalimanmoano? 12Bi yaa fidi ki dugi yipo leni yin kubi nitoa ŋalimano maama, ŋme baa teni yi yaa ŋalimano n tie yi yua?
13Naacemoba kuli kan fidi ki yaa tuuni canbaanba lie po, kelima o yaa baa nani o canbaakpialo ki bua o canbaalielo, o nan baa taabi o bonkpialo ki fali o bonlielo wani. Yi kan fidi ki yaa taa ki tuuni U Tienu po leni ŋalimani po.»#Mat 6.24
Jesu bangima mi tianma
(Mat 11.12-13; 5.31-32; Mak 10.11-12)
14 *Falisieninba yaaba n den bua i ligi ke li kandi den gbadi lankuli ki ñuadi Jesu. 15O den yedi ba: «Yinba yi moandi ke bi niba n yaa nua ke yi tiegi, ama U Tienu wani n bani yi pala. Bi niba n nua ke yaala n pia ti kpiagidi yeni tie caginde U Tienu po.
16Li *balimaama leni bi sawalipuaba maama den die ki pundi hali Jan Batisi yogunu. Ki cili lanyogunu bi wangi *U Tienu diema Laabaaliŋamo. Nilo kuli tiendi u paalu ki bua ki kua lienni.#Mat 11.12-13 17Tanpoli leni ki tinga pendima dingi ki cie li bali maama nni baa dianfuubiyenga n bodi ki kan tieni.#Mat 5.18
18Yua n ñani o pua ki go taa potoa kuli conbi. Yua mo n taa ban ñani yaa pua kuli, o conbi.#Mat 5.32; 1Kol 7.10-11
O piado leni Lasala maama fuuli
19O piado den ye ki laa ti tiakpiagidi, ki mangidi o pali daali kuli leni o yeŋanma leni mi jemanma. 20O luodo moko den ye ke bi yi o Lasala. O den yen dua o piado yeni diegu buliñoajabu nni ke o gbanandi kuli tie nala. 21Mi koma den kubi o hali ke o den bua ki yaa di yaa jiema n joagidi o piado yeni saajekaanu kani. Baa i sangbanli den kpendi ki liagi o nala moko.
22To, o luodo den kpe ke malekinba taa o ki gedini Abalahama kani. O piado moko den ti kpe ke bi piini o. 23O den laadi fala bi tinkpiba n ye naankani. O den yaadi ki diidi hali foagima, ki ban laa Abalahama leni Lasala ke o ye Abalahama kani. 24O den tiani ki yedi: ‹N baa Abalahama, gbadi npo mi niñima ki soani Lasala wan tu mi ñima leni o nubiyuli ki cua ki kuugi npo n lanbu, kelima n laadi fala boncianla mi fantama na niinni.› 25Abalahama den goa ki yedi o: ‹N biga, tiadi ke a den baa yaala n ŋani boncianla ŋan den ye yaa yogunu, ke Lasala mo den laadi fala boncianla. Moala, o ye ne ke bi baagidi o, a mo laadi fala. 26Lani bebe ka, ku buociangu ye tinba leni yinba siiga, ki teni ke yaaba n bua ki ña ne ki gedi yipo kan fidi, yaaba n bua ki ña yi yaa po mo ki cua ti yaa kani kan fidi.› 27O piado den yedi: ‹Lanwani n nan mia ŋa, ŋan soani Lasala n baa denpo. 28Kelima n pia waamu muu. Wan gedi ki ban tuodi ki waani ba ke bani wani n da cua o naa falabiado kaanu na niinni.› 29Abalahama den goa ki yedi o: ‹A waamu pia Musa leni bi sawalipuaba kuli, ban cengi ba.› 30O piado den goa ki yedi: ‹N baa Abalahama, yeni ka, yua n kpe yaa fii bi tinkpiba siiga ki gedi bikani, bi baa lebidi bi yama.› 31Abalahama den goa ki yedi o: ‹Bi yaa yie kaa baa cengi Musa leni bi sawalipuaba, baa o nilo yaa fii bi tinkpiba siiga ki gedi bikani, bi kan cengi o.› »
Ti tuonbiadi leni mi sugili miama
(Mat 18.6-7,21-22; Mak 9.42)
Tans Gekies:
LUKA 16: GUX03
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Gulmancema Bible © Bible Society of Burkina Faso, 2003.
