Matayo 6
6
Yeekya vakiva
1“Kwiiseny efyo fya usumanu mutanaa mulasheefitana efo fisanguny fya vandu mukooye ilollyo mmbo. Kwakooya kulaore ni indo, nkukiiyo-se isina mutiri efo kwa Nde yeto waany wa efo iruveeu-fo. 2Naasa elyi kwiifo kuniingya kyaanu kya vakiva nta kulakunde ikapywa wombe lukwiirye mbee shaasa vakunang'ari vatana efo mmba teeterevya neefo shia tikwaannyi naambo vakooye irumishwa. Ni kya dede shamuvia, ‘Isina lyawo alyo vammeelyiwarya.’ 3Indi elyi kwiifo kuniingya kyaanu kya vakiva, kulare woko lwafo umuso lumanyi ekyo woko usha lwiifo lutanaa. 4Na kyaanu kyafo kyeeninga vakiva kive ni kirika na ndoo yeto alollye fya kirika akaa nakutae.”
Kiterewo
(Luk 11:2-4)
5“Na elyi kwatereva Iruva nta kulave sha vakunang'ari. Wo mmbo vakunndye itereva vasalali efo mmba teeterevya na efo shia tikwaannyi ta efo muriny naambo vakooye ilollywa mmbandu. Ni kya dede shamuvia, ‘Isina lyawo alyo vammeelyiwarya.’ 6Indi kyafo yewe elyi kwatereva Iruva ira na efo kirieny kya mmba yafo kya nnang'ani kuveraya na mwaango, kutereveny Ndoo efo kyaminy kukai. Na Ndoo yeto alollye fya kyama akaa nakutae.”
7“Na elyi mwatereva Iruva, nta mularere ura-ura sha vandu va masanga; mashika wo mmbo vaishi kindo vashiirikywa ni elyi marero awo ava meengyi. 8Naasa yeni mulave shawo; mashika Nde yeto waany aishi yekyo mwatura kulaore mwammutereva. 9Naasany yeni tereveny indi,
‘Nde weeru kukee efo iruveeu;
irina lyafo lyivikwa yeele,
umangyi lwafo lushe.
10Kindo kyafo kukundye
shaasa kyatanyika efo iruveeu na
kunu urukeny kivetanyika indo.
11Luniinge inu shoonga teru tilufye.
12Kulusarye ngyulyamari teru
shaasa na yese lwasarya valya valulyamarya.
13Kulalurwaa efo kyeesyony,
indi kulukire ekyo kivishwa.
[Shamashika umangyi ni lwafo, na finya,
na usuri, meeri moose allung'ani. Amen.]’
14Shamashika kwakooya yeni mushefwaayaa vandu kya efyo vamulyamarye, na Nde yeto waany wa efo iruveeu ashemufwayaa. 15Indi kwakooya yeni mulafwaaya vandu na Nde yeto waany nta nnashemufwaayaa kya efyo mullyamarye-fo. 16Na elyi mushekootoyaa nta mulave sha vakunang'ari. Mashika wo mmbo vakusha fisangu naambo vamanyike efo vanduny mmbo veefo vakootoyaa. Ni kya dede shamuvia, ‘Isina lyawo alyo vammeelyiwarya.’ 17Indi kyafo yewe elyi kukekootoya amba nrwe wafo mafura kuvesangya kisangu. 18Naambo kulamanyike efo vanduny mmbo kwiifo kukootoyaa. Mmbo kumanyikaa yefo kwa Ndoo yeto akee efo kyaminy. Na Ndoo yeto alolye fya kyama akaa nakutaa.”
Umasi lwa Iruveu
(Luk 12:33-34)
19“Nta mulave vekusanyirya masaa kunu urukeny. Mfo kurukuru ilyaa na kurere na manyinyi akasuma mmba akaiva. 20Indi kusanyiryeny masaa efo iruveeu kundo kulaifo kurukuru ilyaa nta kurere, nta manyinyi nalaifo asumaa mmba akaiva. 21Shamashika ando kusurumyi umasi lwafo na ngoo yafo nng'u ando ikai.”
Sa ya mwiili
(Luk 11:34-36)
22“Naasa kwakooya iriso lyafo lyikee isha na mwiili yeto wafo mmbo ukaa na sa. 23Indi kwakooya iriso lyafo lyankashaa, na mwiili wafo mmbo ukaa na ireema moose deny. Naasa sa yeyo ikee nnang'ani yafo kwakooya yammba ireema, a paa ireema lying'ani.”
Iruva ao masaa
(Luk 6:13)
24“Nkwiiyo nndu ashiidimaa irundya vanndumi vavii-fo. Mashika ndesa ashesua yeto umwi na ikunda yeto wa kavii. Ao ndesa ashetiraa yeto umwi namini yeto ungyi. Nta mmushiidimaa irundya Iruva musande na irundya masaa a ulana elu-fo.”
Usau lwa muu yeu
(Luk 12:22-31)
25“Kimmba ni indo, neeny shamuvia nta mulasaukwa kya muu yeu kindo mulyaa ao ina, nta kya mwiili kindo muraa. A muu nshi kindo kiniini kikailanya shoonga, na mwiili wany nshi kindo kiniini kikailanya masara eeraa? 26Loleny ndeye ta efo nginiiu-te nteera nta mbeu nta yuulula-fo, nta yaalya mbesheny-fo. Lyo Nde yeto wa iruveu eefo atilelaa. A yeni nshi mutiilanyi kya mmwasi? 27A mmbo kwiifo nndu kunu kwany ashiidimaa yeengerya waasha lwakwe naakwa ni ando a irambo lyimwi nsi na kasaukwa inda? 28Na kya masara yoo nkikyi elyi musawukwaa nng'u? Kufundeny na fivaro fya efo mbuven-te shaasa fimmyaa filavinaa filashooka nta soori. 29Na yeny shamuvia, ‘Nta Solomon na utore lwakwe loose, nneeree fisha sha kimwi kya vayo-fo.’ 30Naasany, mare a efo mbuveny aiyo inu na ndesi akandeerwa iyeny, kimmba Iruva amfyaambika indo afikaany yeni mukee va kikusiryo kidu nshi ashemweengeryaa? 31Naasany nta mulasaukwa mwaambe, ‘A lukalya-kyi ao lukana-kyi ao lukaraa-kyi?’ 32Shamashika fya ngata yeyo ni vandu va masanga vafilalakyaa. Shamashika Nde yeto waany wa efo iruveeu we eeshi mmbo mutinnyo mfindo efyo. 33Pookeny mbele iruuya umangyi lwa Iruva na usumanu lwa vayo, na efyo fingyi fyoose musheerywaa-u fya ngyeerya. 34Naasany nta mulasaukwa kya ndesi, Shamashika nkonu wa ndesi usawukwaa nkya vayo. Wo nkonu utiri ngatara ya vayo iwumaa.”
Tans Gekies:
Matayo 6: MASNT00
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
New Testament in Kimashami © Bible Society of Tanzania, 2000.
