Matayo 10
10
Vakiloshyony ikumi na vavii varumwa
(Mar 3:13-19; Luk 6:12-16)
1Nalyo kavaanga vakyiloshony kyakwe ikumi na vavii, kavaniinga ushilyi lwayiitorya mimuyo mikasha naambo vayaante, na ishiisa ndwari ta wo ngata na unana lwa wo ngata. 2Na marina a vakyiloshony kyakwe ikumi na vavii akee ule, Wa mbee ni Simion avaangwa Petro, na Andrea akee mwanamaye. Yakobo akee mwana wa Sebedayo, na Yohane akee mwanamaye, 3Filipo, Bartolomayo, Toma na Matayo yeto akee nndedemi, Yakobo akee mwana wa Alfayo na Tadayo, 4Simion akee wa yewo vakaari iringa ngata ya Kiyuda, na Yuda Iskariote yeto alenndiingya.
Yesu aruma vakiloshyony ikumi na vavii
(Mar 6:7-13; Luk 9:1-6)
5Yewo ikumi na vavii Yesu mmbo alevaruma kavavavasa ashaambaa, “Nta mulaire shia ya vandu va masanga. Nta muri wa Vasamaria mulaange nafo-fo. 6Enderuuyeny vandu va Israeli yewo varekye sha moonri. 7Na elyi murie shia endeny mwiikapaa weele mwaambe, ‘Umangyi lwa iruveeu lwamaafukya.’ 8Yewo valwee vashiiseny yewo vafu varuteny, yewo va ivave veremuteny, mimuyo yeyo mikasha yaanteny; mwankiniingwa kya ruu, kevekiniingyeny-fo ruu. 9Muleepoo saabu nta fesa nta ukova lwa iiniva kisiny; 10nta mulakamare mboloko ya shia nta soori ivii, nta nsengye. Nndu nndundi mmbo asumani iniingwa shoonga yakwe. 11Na kwakooya mushaangaa muriny wa vandu ukava nniini ao ni n-du lolen-fo warya nndu eefo asumani mfo kundo mushekaa kutani mwakwiipoo-fo. 12Na elyi mushaangaa efo mmba iidikireny. 13Kwakooya ni mmba isumannyi kiidikiro ekyo kyany nakyo mmbo kisheikayaa, na kwakooya kulaore isumannyi kiidikiro ekyo kyany, mmbo kishemuwuiyaa. 14Na kwakooya nndu ara nalamuwarya, nta yaaranya marero any, somukeny efo mmba yeyo, naakwa ni efo muriny yeto mwiikakapaa kiluulyi efo marendeny. 15Ni kya dede shamuvia, ‘Ekyo kya uruka lwa Sodoma na Gomora kishangwaa nkonu yeto wa mwaandu ngota kya muri yeto.’ ”
Uravi
(Mar 13:9-13; Luk 21:12-17)
16“Llen-te mmbo shamuruma mukee sha moonri akee nnang'ani ya fite fya ngoroshony. Veny sha shoka tikee shirango, muveva sha mbeta tilashevikaa ntambo. 17Na yeni kwiiseny na vandu. Mmbo vashemurambikyaa efo ikwaanuny lya masiingo, na efo mmba tawo teeterevya vavemukapa na ngova. 18Naakwa ni efo usanguny lwa vashilyi vaniini na vamangyi musherawaa-fo kimaruma kyakwa kive nkyo ukureeki lwa efo kwawo na kwa vandu va masanga. 19Na kyeeri vamurambikya-fo nta mulasaukwa kindo mushaambaau. Mashika kyeeri ekyo kyeni mmbo musheniingwaa kya yaamba-u. 20Mashika veerera-u nshi yeni-fo ni Mumuyo wa Nde waany, mmbwe areraa-u akee efo miriminy yaany. 21Kya indi mwanamaye wa nndu akaa nanderambikya-fo mwanamaye nandewaawa, na ndeye wa nndu nanderambikya-fo mwana. Na vana wa nndu vakwiipoo kya isua vamiku vawo vandevarambikya-fo vandewaawa. 22Na yeni mushevaa veesuwa mmbandu woose kimaruma kya irina lyakwa. Indi yeto asisirya-u kafika mafurummyony, mmbwe akirwaa. 23Naasa kwakooya vashemurishisaa vamwaante muriny mmbe, enderishyeny ungyi. Ni kya dede shamuvia, ‘Nta mmushekwanisaa miri yeyo ya kunu Israeli-fo, kulaore Mwana yeto wa nndu ansha.’ 24Na nndu wa kiloshyony nta nnairye llori wakwe-fo, nta nndu kishinga nnairye nndumi wakwe-fo. 25Mmbo kimaa nndu wakiloshyony kwakooya ava sha llori wakwe; na nndu kishinga kaveva sha nndumi wakwe. Vantana vambaanga yeto muni kyeny Belsebuli afikaany kya va kyeny kwakwe nshi kishiiryaa kilanya?”
Asumani yeerewa
(Luk 12:4-7)
26“Naasa nta mulavairyae-fo shamashika nkwiifo kindo kikee kisikye kire kilalollyo-fo. Nta kindo kiifo kisurumi kire kilamanyika-fo. 27Ekyo shamuviiya ireemeny endekyaambeny efo seny. Na ekyo mwamiita muvereryo kuriny endekyaambeny musaamye mmbeeu. 28Na yewo vewaa mwiili yeto wa nndu nta valashiidimaa iwaa nrima yeto nta mulavairyae! Kilanya mmbo mushiiryaa yeto aidima ireta nrima na mwiili fi fivii firekye yefo murony wa Gehena. 29A ngyuruu ivii nshi tikumbwaa senti imwi? Nta lumwi lwa vayo lluwaa si kulaore Nde yeto waany aishi-fo. 30Na yeni naakwa ni fii ta efo nrweny wany mmbo tikee sheekeni toose. 31Naasany nta mulairyee! Mmbo mwiirye ngyuruu na tikava shiingyi.”
Ikureekya Kristo ao inkana
32“Naasa wo nndu ankureekaa-u kyakwa efo fisanguny fya vandu, neeny nshevekureekaa-u kyakwe efo kisanguny kya Nde wakwa wa efo iruveeu. 33Na wo nndu ashikana efo fisanguny fya vandu neeny nshevenkanaa efo kisanguny kya Nde wakwa wa efo iruveeu.”
Mirauko
(Luk 12:51-53; 14:26-27)
34“Nta mulakusare mmbo shisheye yeende ufoo kunu urukeny. Kindo shisheye yeende nshi ufoo-fo ni usu. 35Mmbo shisheye ilakanisa nndu na mwana na mwana wa kyika na maye, na mwalyi na mammi wakwe. 36Na yewo va kyeny kwa nndu vaveva mmbo vakiduva vakwe. 37Na yeto mwiikunda ndeye ao maye ngota yen, we nshi nndu ashisumannyi-fo. Na yeto mwiikunda mwana wakwe wa womi ao wa kyika ngota yeny, we nshi nndu ashisumannyi-fo. 38Na yeto nalakurika nsalaba wakwe neeshilatya, we nshi nndu ashisumannyi-fo. 39Yeto mwiikuwonisya muu wakwe mmbo asheuretaa. Na yeto mwiikuretya muu wakwe kikava ni kimaruma kyakwa mmbo asheuonisaa.”
Waavi lwiiyoo
(Mar 9:41)
40“Na yeto amuwarya efo kyeny kwakwe ni yeny ashiwarya. Na yeto ashiwarya yeny mmbo awarya yeto aleshiruma. 41Na yeto awarya nndu nkisuku aishi ni nndu nkisuku, mmbo aniingwaa waavi lwa nndu nkisuku. Na yeto awarya nndu nsumanu aishi ni nndu nsumanu mmbo aniingwaa waavi lwa nndu nsumanu. 42Na vandu yewo vafwafwa naakwa ni yeto umwi nsi nndu kanrita mura mweni na aishi mmbo akee wakiloshyony kyakwa, shamuvia kya dede waavi lwakwe llukaa lureke-fo.”
Tans Gekies:
Matayo 10: MASNT00
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
New Testament in Kimashami © Bible Society of Tanzania, 2000.
