Lukas 13
13
“His henebabut heberlagai erlak holuk e, waroroguptik nalorogup o,” oluk mo’gulentesi wene
1Ai erlige re, is aphwami pema en Yesus disogo mo’gulegisa,
“Aphwami Galilea a’ge wam Allah akhit wusogo pogwiam, at Pilatus en is enemep emin, wam Allah akhit werigisa a’ge emep emin, mesikmu la’bulogo warenebegei o,” oluk mo’gulosu egesa. 2Asogo mo’gulosu egesema, at Yesus en e, disogo mo’gulentesi,
“His honogola en e,
Is ap o Galilea a’ge pema ’berlek e, weisogo logon wiak tugukhwe, is asogo warenebegei ai nak e, wiak logat togu legesema, enebabut pam warenebegei o, oluk opogu legep a? 3Erlak o. An en his mo’gulhentaik. His wiak togu legep a’ge ai ukpoluk henebabut heberlagai erlak holuk e, is waregesa ’gela’geat, his asogoat waroroguptik nalorogup ani o. 4Ye, his honogola en e,
O Yerusalem ik omugwe pelak onuk Siloam eba o helep a’ge yat werigisa a’ge oruakma, ’bulogo ’bu agalat, enebe 18 enal ’besil-’besalsogo sebelenebegei ano re, is aphwami pema ’berlegat o Yerusalem welagai a’ge eba re, weiyat wiak ’gela’ge tugukhwe, is al ’besilogo sebelenebegei ai nak e, wiak logat togu legesema enebabut pam sebelenebegei epegep a? 5Erlak o. An en his mo’gulhentaik. His wiak togu legep a’ge ai, ukpoluk henebabut heberlagai erlak holuk e, is waregesa ai ’gela’geat, his ogo asogoat warotluk nalorogup ani o,” oluk mo’gulentesi.
E ara e’gen oso erlak a’ge pam elitsogo mo’gulentesi wene
6Asogo mo’gulentesirik e, wene mesik ebam elitsogo re, disogo mo’gulentesi,
“Ap mesik iabukmu e ara owi yogo welaga. Oruakma re,
E’gen egesegei a? Erlak a, oluk il ’gogolil laga ’gal e, ebe ikho erlak. 7Ikho erlakma lagarik e, eragam a’ge iabuk tenak welaga a’ge mesik disogo mo’gulesi,
E ara yu e’gen mesik egeimu a? Erlak a, oluk 3 tahun a’ge pam ’gogolil waga legi a’ge re, ebe modok egesiso erlak. Holuk e, ’gwiang almasogo yogo wolomma re, mukho hwikhemen o, oluk mo’gulesimu, 8at eragam a’ge ano en e, disogo mo’gulesi,
Nue! Tahun yu pam e, moru erlakma en ukpouwok o. Asogo oruakhwe, an en hogol eselat, omogot ’baliselat, taga leik o. 9Asogo tagalomma, tahun pobuk a’ge pam en de, ebe egesiso holuk e, op o. Ye, oso erlak holuk e, hat en,
Mukho hwikhomup o, oluk mo’gulnorogun ani o, oluk mo’gulesi,” oluk, at Yesus en mo’gulentesi.
Yesus en agauwa mesik Allah paget weat welat, hwe mesik ou obaptegei wene
10Asogo mo’gulontoluk welat e, agauwa sabit a’ge pam mesik Allah paget weat welat, at Yesus o aphwami Yahudi a’ge se’ban ogumu mesik ’goluk wene mo’gulentasu oruakma re, 11hwe mesik mu’gat ebabut wiak a’ge ogola ’goluk welat o’borl modok ’gonu egeitik ’bekhitsogo inom modok mia oruakhwe, 18 tahun aga a’ge eba welaga. 12Eba oruakma, at Yesus en, hwe ano il yethesirik e, iak pakhesi ’gal wagama re, disogo mo’gulesi,
“Nerei o! Hat hebam ou ai arat op orogun ai o. Herle ’gela’ge hettak welegen ano, arat hebilemen o,” oluk asogo mo’gulotluk e, 13e’gik ebam pasukhwe erianoat, hwe ano o’borl ’bekhit agama, inagarik e, Allah erliktegei. 14#Kel. 20:9,10; Ula. 5:13,14Asogo tegeimu re, ap mesik se’ban ogumu eba onue ’gain welaga a’ge ai en disogo egei,
“Yesus ai agauwa sabit pam Allah paget weat oruakhwe, hwe ai ou obaptegei ai nopaget,” oluk olot het en e, aphwami a’bik ebano disogo mo’gulentesi,
“Di ebele yu ebele tugulom ai re, agauwa hebarlik a’ge pamat tugulom o. Holuk e, agauwa ai pamat ou henebam a’ge obaphonobuagoluk waga lomup. A’ge re, Allah paget weat welagai erlige re, woluk worogup o,” oluk asogo mo’gulentesimu, 15at nonue ’gain Onuk Logo a’ge en e, ap ano disogo mo’gulesi,
“His henagap pam nak op ’gela’ge welat, henede ’biren a’ge yema re! His henebe ’berlegat agauwa Allah paget weat welagai erligeat de, honuam wam sapi a, keledai a, owi werikmu en, ’goduk husogo herle hebilogo lebikpoluk e, ik nouwagoluk wogonoboluk laga legep erlak no? Wogonoboluk laga legebat ani o. 16Ai ’gela’ge re, hwe Abraham en dogo’gwe a’ge yu Iblis en herle hetsogo tenak oruakhwe, 18 tahun aga a’ge yu, agauwa Allah paget weat welagai erlige, herle hebilogo pogwi erlak no? Hebilogo poat o,” oluk wene asogo mo’gulesimu, 17is pema Yesus enebit welegesa a’ge ebano ’berlegat ene’gerli egesa. A’geat de, is aphwami pema enebe a’bik ebano ’berlek en e, at Yesus taga laga ano ’berleksogo paget e, onogola enagai a’bik hogu legesa.
’Gebi e’gen owi pam elitsogo mo’gulentesi wene
(Matius 13:31-32; Markus 4:30-32)
18Asogo hegesema, at Yesus en e, disogo mo’gulentesi,
“Allah en eragam enebasu ai, no ’gela’ge. An no pam elitsogo mo’gulhentaik,” oluk mo’gulentesirik e, mesik disogo mo’gulentesi,
19“Allah en eragam enebasu ai ebe re, ’gebi e’gen owi ’gela’geat o. Ap mesik en ’gebi e’gen owi mesik wik-wok iabukmu pelegeimu re, ’baktegeirik e, edip e ’gela’ge lok agama, sue darak noso a’ge en e’gik duelak a’ge pam owi wosu ago ai ’gela’geat o,” oluk mo’gulentesi.
E’gen roti periso a’ge pam elitsogo
mo’gulentesi wene
(Matius 13:33)
20Asogo mo’gulentesirik e, pobuk mesik disogo mo’gulentesi,
“Allah eragam enebasu ai ebe re, no’gwe pam elitsogo mo’gulhentaik. 21Ai re, e’gen so’boru roti a’ge poruagoluk ogola ’belabogwi a’ge ai ’gela’geat o. Hwe mesik en gandum sagalak tepung ul ’gela’ge ano a’ge 40 kilo lu’gweasogo wik-wok, e’gen roti poruagoluk ogola ’belabogwi a’ge ai ogola ’belakpoluk ne’garlok-he’garlok takpesimu re, ebe modok peregei ai ’gela’geat o,” oluk mo’gulentesi.
“’Goduk wei o’gwe ’gogup en e, henannisogoat togu lemis o,” oluk mo’gulentesi wene
(Matius 7:13-14,21-23)
22Asogo mo’gulontoluk e, pobuk at Yesus o Yerusalem ’biselat, o seli lokma ’gwiselat, weimu ’gwiselat, wene mo’gulentil ’begei. 23Asogo mo’gulentil ’bisoma re, ap mesik en disogo mo’gulesi,
“Nue. Allah en delonobua ai re, enebe loksogoat a? Weisogo a,” oluk egeimu, at Yesus en is aphwami eba welegesa a’ge ebano disogo mo’gulentesi,
24“Is aphwami a’bigat, ’goduk wei o’gwe ’guogoluk walhouwa a’geat de, mia ema ai paget e, his ’goduk wei o’gwe ai ’gwi lagup en e, henannisogo togu lomup o, oluk mo’gulhentasu legi o. 25Ye, o eba ap owi eiye a’ge ai inemarik, ’goduk ’betesogo lariso lomma re, his odipmu edik welat, ’goduk puk-puk hogulat e,
Nue o! Nis ’goduk hutnentemen o, oluk mo’gulorogup a’geat de, at en e,
His henebe an neperlak o. ’Geba en wegep o, oluk mo’gulhentasuam, 26his en mo’gulugulat,
Nonowi seli lo’bok no’gulat, so’boru nemin sakho no’gulat, wene mo’gulnentasulat, taga legen ani o, oluk mo’gulorogup a’geat de, 27#Mzm. 6:8at en e,
His o ’geba en wegep. Henebe an neperlak o. His wiak togu legep a’ge ne’bek ’gu orogup. Eria enat ’bekhit lit o, oluk mo’gulhontouwa ani o. 28#Mat. 22:13; 25:30#Mat. 8:11-12Asogo mo’gulhontoma, his odipmu welat, ap Abraham emin, Ishak emin, Yakub emin, ap pema logon Allah iak mo’gulontogu legesa a’ge ebano emin, Allah eragam opma eba oruakma, henil ’gwelagentagup ani o. Ye, his nak e, ’goduk lasogo lebikhonoboma odipmu eba welat, heniak ’gerlit marogulat, nge togwi modok wolorogup ani o. 29Ye, is aphwami erabu akhit en, orogobu akhit en, etleba akhit en, yema akhit en, Allah eragam enebasumu eba seni nouwogoluk odoktuma o. 30#Mat. 19:30; 20:16; Mrk. 10:31A’ge re, yethemit! Is aphwami o yogodak pobuk a’ge ai naduk ema o. Ye, naduk a’ge ai pobuk ema o,” oluk mo’gulentesi.
At Yesus en aphwami o Yerusalem a’ge edeabenebegei wene
(Matius 23:37-39)
31Wene asogo owan mo’gulentasukhwe, is ap Farisi a’ge pema Yesus e’bek wegesarik e, disogo mo’gulegisa,
“Ap Herodes en wathebigoluk oso ai re, o yema wolorogun o. Hweiye o momu ’bok lak o,” oluk mo’gulegisema, 32at Yesus en disogo mo’gulentesi,
“Ap ebabut mene orlomene ebabut ’gela’ge ai, wene yu perleneat mo’gulesi lit o. An e, o yogodak emin, loruk emin, mu’gat ebabut wiak a’ge aphwami onogola ’goluk oruakma henokho lebikpasulat, ou werak a’ge holuk, obabenebiselat, taga leiktik e, agauwa mesik en de, an tigoluk wegi a’ge il hodologo ’gobok tik o. 33Asogo tik a’geat de, ap Allah iak mo’gulontogwi a’ge ai, wema waronobu puk o. Yerusalem eba en nak waronobu ai en e, an yogodak emin, loruk emin, hau emin, eba lasu leik en e, hegit hegi o.
34Eige. His aphwami o Yerusalem a’ge yu nede o! His en ap Allah iak mo’gulontogwi a’ge enebe waronobogulat, ap Allah en yo’go onoboluk hene’bek peragonobou wago a’ge helep en damuk-demaksogo waronobogulat, togu legep ai nede o! Sue ayam olu agapsaburl lekho odoksogo enebasu ai ’gela’ge, an en nin hwedik nan hwedigat his o yema welegep a’ge ’berlek asogoat odoksogo henebaigoluk epasu legi a’geat de, his en,
Nenebit, ogu legep ai nede o! 35#Mzm. 118:26Ai en e, Allah en his henebe ukhonoboma, honowi werik a’ge ai polugat welema o. Hwerli yogodak ya his en e, an nebe henil nio erlak woloroguptik e, pobuk his en e,
Nenaik ’gain Onuk Logo a’ge Allah en perakhobu wagama wegenma re, at enat obaphobuak o,
oluk pobuk mo’gulnorogup ai hwerli henil niagup ani o,” oluk mo’gulentesi.
Tans Gekies:
Lukas 13: Wul
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
