Johani 17
17
A kukhongela ka Jesu.
1Jesu na a wulawulile timhaka leti, i lo tlakusa mahlo yakwe le tilweni, aku ngalo: Dadani, a xikhati xi chikele; dumisa Nʼwana wa wena, kasi a Nʼwana wa wena a fela ku ku dumisa; Xip. 12:23
2kota lezi u mu nyikileko ntamu hehla ka nyama yontlhe, lezaku vontlhe lava u mu nyikileko vona, a fela ku va nyika wutomi ga pinzukelwa. Dan. 7:14; Mat. 11:27; 28:18; Xip. 6:37; 1 Kor. 15:25
3A wutomi ga pinzukelwa hi kuva va ku tiva, wena Nungungulu wece wa zinene, na Jesu Kristu loyi u mu rumileko. Isa. 53:11; Jer. 9:24; 1 Kor. 8:4; Xip. 3:34; 7:29
4Nzi ku dumisile misaveni, hi ku mbheta a ntiro lowu u nzi nyikileko wona a ku wu tira. Xip. 5:36; 13:31; 15:10
5Makunu, Dadani, nzi dumise le ka wena hi wudumo legi nzi ngha nga nzi hi nago ka wena, a misava na yi nga seva kona.
6Nzi wonekelisile a vito ga wena ka vanhu lava u va tekileko tikweni u nzi nyika vona; va wa hi va wena, zonake u nzi nyikile vona; va yi hlayisile a mhaka ya wena. Tis. 22:22; Xip. 6:37, 39
7Makunu va zi tiva lezaku zontlhe lezi u nzi nyikileko zona zita hi le ka wena.
8Hakuva nzi va nyikile a timhaka leti u rizi nyikileko tona; va ti amukele, va zi tiva lezaku kunene nzi humele hi ka wena, va kholwa ku ngalo u nzi rumile. Xip. 12:49; 16:27
9Nza va khongelela; a nzi khongeleli tiko, kanilezi nzi khongelela vona lava u nzi nyikileko, hakuva mba wena. 1 Joh. 5:19
10Zontlhe lezi zi nga za mina za wena, ni za wena za mina; nza dumiswa ka vona.
11A nza ha hi tikweni, kanilezi vona va ha hi tikweni; mina nzita ka wena. Dadani wa ku Basa, va hlayise vitweni ga wena legi u nzi nyikileko gona, kasi va fela ku tshama munwe, khwatsi hi hina hi nga munwe. Xip. 13:1; 1 Ped. 1:5; Juda 1
12Na nza ha hi navo, nzi lo va hlayisa vitweni ga wena, legi u nzi nyikileko gona; nzi va gongile, a ku na munwe a lovileko, saseka a nʼwana wa kulova, kasi a mitsalo yi fela ku tatiseka. Tis. 109:8; Maheb. 2:13; 1 Joh. 2:19
13Kanilezi makunu nzata ka wena; nzi kanela lezi zilo na nza ha hi tikweni, kasi a kutsaka ka mina ku fela ku mbhelela ka vona.
14Nzi va nyikile a mhaka ya wena, zonake a tiko gi lo va venga, hakuva a hi va tiko, kota lezi mina nzi nga hiko wa tiko. Xip. 8:23; 15:18
15A nzi kombeli lezaku u va susa tikweni, kanilezi lezaku u va hlayisa ka loyi wo biha. Gal. 1:4; 2 Tes. 3:3; 1 Joh. 5:18
16A hi va tiko, kota lezi mina nzi nga hiko wa tiko.
17Va basise zineneni; a mhaka ya wena zinene. 2 Sam. 7:28; Miti. 15:9; Efe. 5:26
18Kota lezi u nga nzi ruma tikweni, hizalezo nzi va rumile tikweni.
19Nza ti basisela vona, lezaku vonawu va basisiwa zineneni. 1 Kor. 1:2; 1 Tes. 4:7; Maheb. 10:10
20A nzi khongeleli lava voce, kanilezi nza khongelela ni lava va ta nga kholwa ka mina hi kota ya kukanela kabye;
21aku kasi vontlhe va fela kuva munwe, kota lezi wena Dadani u nga ka mina, na mina nzi nga ka wena, lezaku na vona va fela ku tshama ka hina; kasi a tiko gi ta kholwa lezaku u nzi rumile. Xip. 10:38; Rom. 12:5; Gal. 3:28
22A kungangamela loku u nzi nyikileko kona, nzi va nyikile, kasi va fela kuva munwe, kota hina hi nga munwe; Xip. 14:20; 1 Joh. 1:3; 3:24
23mina ka vona, na wena ka mina, kasi vava munwe hi kumbheleleko; kasi a tiko gi fela ku zi tiva lezaku u nzi rumile, niku, u va ranzile kota lezi u nzi ranzileko. Kol. 3:14
24Dadani, nzi ranza lezaku lava u nzi nyikileko vona, na vonawu va fela ku tshama na mina laha nzi nga kona; kasi va fela ku wona a kungangamela ka mina loku u nzi nyikileko kona; hakuva u nzi ranzile na yi nga se ku vangiwa misava. Vesi 5; Xip. 12:26; 1 Tes. 4:17
25Dadani wa nongameto, a tiko a gi ku tivangi, kanilezi mina nzi ku tivile; na vona lava va zi tivile lezaku u nzi rumile. Xip. 8:55; 16:3, 27
26Nzi va tivisile a vito ga wena, nza ha ta gi tivekisa; kasi a liranzo leli u nzi ranzileko ha lona li fela ku tshama ka vona, na mina nzi hi ka vona. Xip. 15:9, 15
Tans Gekies:
Johani 17: TSC72
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Tshwa Bible © Bible Society in Mozambique, 1972, 2007.
