Johani 15
15
A sinya yi nene ya vina.
1Mina nzi tshinya gi nene ga vina; Dadani hi murimi.
2Ni gihi ravi gi nga ka mina, legi gi nga pswaliko mihanzu, wa gi tsema; kanilezi legi gi pswalako mihanzu wa gi thena, kasi gi fela ku pswala hi kuhunzeleleko. Mat. 15:13
3Nwina mu sina mu hlazekile hi kota ya mhaka leyi nzi nga kanela ka nwina. Xip. 13:10; Efe. 5:26; 1 Ped. 1:22
4Tshamani ka mina, na mina ka nwina. Kota lezi a ravi gi nga zi kotiko ku pswala mihanzu ha goce, sine loku gi tshamile tshinyeni ga vina, hizalezo na nwina loku mu nga tshami ka mina. Kol. 1:23; 1 Joh. 2:6
5Mina nzi tshinya ga vina, nwina mu maravi. Loyi a tshamako ka mina, na mina ka yena, yaloye wa pswala mihanzu yo tala; hakuva ahandle ka mina a mu zi koti ku tira nchumu. Hos. 14:8; Fil. 1:11
6Loku munhu a nga tshami ka mina, wa cukunyetiwa handle khwatsi hi ravi, a wuna; va wungeletela a maravi ya kunghaho, va ma hoxa nzilweni, mahiswa. Mat. 3:10; 7:19
7Loku mu tshama ka mina, ni timhaka ta mina ti tshama ka nwina, kombelani ni xihi lexi mu xi ranzako, mu ta mahelwa xona.
8Dadani wa mina wa dumiswa hi lezi, lezaku mu pswala mihanzu yo tala, mu maha vapizani va mina. Xip. 13:35; Fil. 1:11
9Khwatsi hilezi Dadani a nzi ranzileko, hizalezo na mina nzi mu ranzile; tshamani liranzweni la mina.
10Loku mu hlayisa a milayo ya mina, mu ta tshama liranzweni la mina; kota lezi mina nzi hlayisileko a milayo ya Dadani, nzi tshama liranzweni lakwe. Xip. 14:23
11Nzi mu byelile lezi, kasi a kutsaka ka mina ku fela ku tshama ka nwina, ni lezaku a kutsaka ka nwina ku mbhelela. 1 Joh. 1:4
12A nayo wa mina hi lowu, lezaku mu ranzana, khwatsi hilezi mina nzi mu ranzileko. Xip. 13:34; 1 Tes. 4:9; 1 Joh. 3:11
13A ku na munhu a nga ni liranzo la hombe lo hunza leli, lezaku munhu a nyikela kuhanya kakwe hi kota ya maxaka yakwe. Rom. 5:7, 8; 1 Joh. 3:16
14Nwina mu maxaka ya mina, loku mu maha lezi nzi mu leletelako. Mat. 12:50
15A nza ha mu vitani lezaku mu malanza; hakuva a nanza a gi zi tivi lezi zi mahiwako hi hosi ya gona; kanilezi nzi mu vitanile nziku mu maxaka, hakuva nzi mu tivisile zontlhe lezi nzi nga zizwa ka Dadani. Miti. 20:27
16A hi nwina mu nga nzi hlawula, kanilezi hi mina nzi mu hlawulileko, nzi mu yimisa lezaku mu ya pswala mihanzu, ni mihanzu ya nwina yi simamisa; kasi ni xihi lexi mu ta nga mu kombela Dadani hi vito ga mina, a fela ku mu nyika xona. Mat. 28:19; Xip. 14:13; 1 Joh. 4:10
17Lezi nzi mu leletelako zona, hi lezaku mu ranzana.
Ta livengo lo tiko.
18Loku tiko gi mu venga, zi tiveni lezaku gi rangile hi mina gi nzi venga. 1 Joh. 3:1, 13
19Loku mu wa hi va tiko, a tiko ngha gi ranzile a za gona; kanilezi lezi mu nga hiko va tiko, kanilezi mu hlawulilwe hi mina, nzi mu susa tikweni, hikwalaho a tiko ga mu venga. Xip. 17:14; 1 Joh. 4:5
20Alakanyani a mhaka leyi nzi nga mu byela, nziku: A nanza a hi ga hombe ku hunza a hosi ya gona. Loku va xanisile mina, va ta xanisa na nwina kambe; loku va hlayisile a mhaka ya mina, va ta hlayisa ni va nwina kambe. Ezek. 3:7; Mat. 10:24; Xip. 13:16
21Kanilezi va ta maha zontlhe lezi ka nwina hi kota ya vito ga mina, hakuva a va mu tivi loyi a nzi rumileko. Mat. 24:9
22Loku nzi wa nga tangi, nzi ta kanela ka vona, ngha va nga hi na nanzu; kanilezi makunu a va hi na ku ti pendla kuonheni kabye. Xip. 9:41; Rom. 1:20
23Loyi a nzi vengako wa venga ni Dadani.
24Loku nzi wa nga tirangi xikari ka vona a mitiro leyi yi nga tiriwangiko hi munwani, ngha va nga hi na nanzu; makunu va yi wonile, va venga mina ni Dadani.
25Kanilezi yi fela ku tatisekisa lezo a mhaka leyi yi tsalilweko nayweni wabye, yaku: Va nzi vengile mahala. Tis. 35:19
26Kanilezi loku Muyimeli ata, loyi nzi ta nga mu rumela hi ka Dadani, a nga Moya wa zinene, lowu wu humako hi ka Dadani, i ta maha wukustumunyu ha mina. Lu. 24:49; Xip. 14:17, 26; 1 Joh. 5:6
27Na nwina mu ta kustumunya, hakuva mu wa hi na mina hi kusanguleni. Miti. 1:8, 21; 10:39; 1 Joh. 1:1
Tans Gekies:
Johani 15: TSC72
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Tshwa Bible © Bible Society in Mozambique, 1972, 2007.
