Marko 2
2
Jesu a ngu vbanyisa gigoha gya Kafarinawume
(Matewu 9:1-8; Luka 5:17-26)
1Na ma vbindride matshigwana, Jesu, na wide Khafarinawume, vathu va di dziti nya gukhavo womo ndrangani. 2Gi di tshangana gidzemo nya gingi ngudzu, gi nga tadzago ndranga yatshavbo kala vbanyangwatunu. Uye a di va hevbudza Mahungu ya Nungungulu. 3Khavbo avbo, va dita vambe va mu resela gilima na gi rwadwe khu vama vana. 4Kha nga ulo va ngamba dzi kodza gu gi vbohisa vbafuvbi gwaye, khu kotani nya vathu va nga bani vari vangi, va di lita vbatshani vaya tshula gikoli nya nyumba omu a nga bani a romo Jesu; na va girile isoso, va di reledza lithatho nya gilima. 5Jesu, na wonide gukhodwa gwawe, a di embela gilima, khuye: “Mwanangu, sighoho sago si tsetseledwe.”
6Vbakari nya gidzemo gi nga wonago esi, va diromo vahevbudzi nya Nayo va nga hingigedzago myonyoni gwawe, khavo: 7“Khu ginani a ganela kharati? A gu vala Nungungulu. Khu mani a dzi kodzago gu tsetselela sighoho vbavbandze ga Nungungulu basi?”
8Jesu na wone mapimoni gwawe nya gukhuye va ngu hingigedza kharato, a di va wudzisa, khuye: “Khu ginani mu pimisa kharato myonyoni gwanu? 9Khu gevbini gi vbevbugidego, gu embela gilima, kheni: ‘Sighoho sago si tsetseledwe’, ni gukheni: ‘Khuga u eme, u dzega lithatho lago u hongola?’ 10Gasi mufela gu dziti nya gukhenu Mwamana wa Muthu a na ni tshivba nya gutsetselele sighoho mafuni.” 11Khavbo avbo, a di embela gilima, khuye: “Khuga u eme, dzega lithatho lago u hongola gaya gwago.” 12Khavbo avbo, gilima gi di dzegela gu khuga gi ema gi dzega lithatho laye mahoni nya gidzemo gyatshavbo. Na va wonide esi, vatshavbo va di liwuga ngudzu, gumogo ni gu dhumisa Nungungulu, khavo: “Gima hi si gu woni nya nga esi.”
Guranwa ga Levhi
(Matewu 9:9-13; Luka 5:27-32)
13Jesu a di duga nyaluphye a gu hongola siwoni nya yiphwa ya Galileya. Gidzemo gyatshavbo gi di mu landra; uye a di va hevbudza. 14Na guvbindra a di wona Levhi, mwamana wa Alifewu, na khade vbagikhalotunu gwaye nya gukhuphise. A di mu rana, khuye: “Nyi landre.” Uye a di dzegela gu khuga a mu landra.
15Jesu na khade vbamezatunu ndrangani ga Levhi, vahengisi nya vangi ni sighohi va diya khala navo vbamezatunu vbale a nga bani a romo Jesu ni vapizane vaye, kholu va diri vangi va nga bani va gu mu landrela. 16Valovi, nya tsawa wa Vafarisi, na va mu wone na gu hodza ni sighohi ni vahengisi nya khupho, va di wudzisa ga vapizane vaye, khavo: “Khu ginani uye a hodzago gumogo ni vahengisi nya khupho ni sighohi?” 17Jesu, na pwide satshavbo, a di va hakha, khuye: “Khandri vale va gu ni womi va vbwetago nyanga, aholu vadwali. Eni kha nya tela guta rana va nya gululama, aholu, sighohi.”
Guhala
(Matewu 9:14-17; Luka 5:33-39)
18Khu gikhati gile, vapizane va Johane ni Vafarisi va di gu hala. Khavbo avbo, va dita vathu va ta mu wudzisa, khavo: “Khu ginani vapizane va Johane ni Vafarisi va halago, avo vago va si hali?” 19Jesu a di va hakha, khuye: “Ina gu ngu kodzega sithiva gu hala si ngari ni mudzegi, gani? Na va ngari naye mudzegi, sithiva kha si dzi kodzi gu hala. 20Aholu, ma nguta matshigu va na gu wandredwago mudzegi. Gikhati gyogyo va na hala. 21Mwalo a thelago giziva nya giphya vbamwendratunu wa gale, kholu giziva nya giphya gi na pferula mwendra wa gale, khu kharato mwendra wu na engedzelana gu pferuga. 22Kha nga gambe mwalo a thelago wadwa nya givhayi malowoni ya gale, kholu wadwa nya wuphya wu na pola malowo ya gale, gu luzega kharato wadwa ni malowo. Khu kharato; wadwa nya wuphya, malowoni nya maphya.”
Mwamana wa Muthu mune nya Sabhadho
(Matewu 12:1-8; Luka 6:1-5)
23 # Wona gambe: Dhet 23:25. Tshigu mwedo nya Sabhadho, Jesu a di vbindra khu thembweni nya mavbila. Vapizane va di fanya mavbila. 24Vafarisi va di mu kawuka, khavo: “Khu ginani vapizane vago va girago esi si himbedzedwago gu gira khu litshigu nya Sabhadho?” 25Jesu a di va hakha, khuye: “Mu si gu hevbuli esi a nga girago Dhavhidhe gikhati a nga dugago gumogo ni ava a nga bani ari navo avbo a nga pwago ndzala, gani? 26#Wona gambe: Levh 24:9; 1 Sam 21:1-6. Idzo a bedego khidzo Nyumbani ga Nungungulu gikhati gya Abhiyatari, khongolo nya vaphasi nya mhamba, aya hodza sibaba nya miphaso; a ninga navo ava a nga bani ari navo, sibaba si nga bani si gu lumba gu hodzwa basi khu vaphasi nya mhamba.”
27A di engedza gambe, khuye: “Sabhadho yi di giredwa muthu, khandri muthu a nga giredwa Sabhadho; 28Khu kharato, dzitini gukhenu Mwamana wa Muthu a ngu fumela ni Sabhadho gambe.”
Tans Gekies:
Marko 2: BGG2014
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Gitonga DC Bible © Bible Society in Mozambique, 2014.
