Luka 2
2
Guvelegwa ga Jesu
(Matewu 1:18-25)
1Khu matshigu yale, gu di tshayedwa thetho nya gilovela nya litigo latshavbo khu mufumeli nya khongolo Sezari Augusto. 2Gilovela gegi nya guphele gi giregide gikhati Kirino a nga bani ari mufumeli wa Siriya. 3Muthu ni muthu a di ya lovedwa tigoni gwawe nya mavelego. 4Josefe nuye, a di khuga khu dhoropani ga Nazareta wa Galileya a gu hongola, tigoni ga Dhavhidhe, a gu Bhetlehema gwa Judheya, kholu a diri wa nyumbani ya Dhavhidhe, 5gasi guya dzi lovedzisa gumogo ni Mariya, mwangadzi waye, a nga bani ari ni mimba. 6Na va romo iyoyo, Mariya a di vbohedwa khu matshigu yaye nya guhefemule, 7a gu velega gyanana gyaye nya matiwula, a nga gi fenengedzelago myendra a gi ladzisa mugighowoloni, kholu kha va nga mana wulanga nyumbani nya vaendri.
Dzingilozi dza Nungungulu dzi ngu tivisa vahavisi
8Vbafuvbyana vbale va diromo vahavisi va nga bani va gulala panini va ghadha sifuyo sawe, wutshigu watshavbo. 9Va di tumbulugedwa khu ngilozi ya Pfhumu, va randredwa khu wenengedzo wa Pfhumu, va tala khu hwanga. 10Ngilozi yi di va embela, khiyo: “Mu nga thavi, nya guta mi tivisani mahungu maphya nya gutsake nya gukhongolo ngudzu, ma na gu tsakisago vathu vatshavbo. 11Muhuno olu, Dhoropani ga Dhavhidhe mu velegedwe Muvbanyisi wanu, a gu Kristo, Pfhumu. 12Giwonegiso mu na guya mu tigo khigyo, khegi: Mu na mana gyanana na gi fenengedzedwe myendra, na gi ladzisidwe mugighowoloni.” 13Khu githugedza, gu di wonega gumogo ni ngilozi lidhuma nya mabutho ya Ndzadzini ma rungudza Nungungulu, khayo:
14“Rungudzo ga Nungungulu Ndzadzini,
gurula mafuni ga sigodwa saye.”
15Hwane nya gu dzingilozi na dzi bwelede Ndzadzini, vahavisi va di embeledzelana, khavo: “Hongoleni Bhetlehema hiya wona iso si dugeledego, esi hi tivisidwego khu Pfhumu.” 16Khavbo avbo, va di hongola khu guvbiredza, vaya mana Mariya ni Josefe ni gyanana, na gi ladzisidwe mugighowoloni. 17Na va va wone, va di phela gu ganela iso va nga embedwago khu mahungu nya gyanana gile. 18Vatshavbo va nga bani va gupwa, va di liwuga khiso si nga bani si gu ganedwa khu vahavisi. 19Gasi Mariya, a di vegedza satshavbo sile khanani gwaye na gu zama guti tshamuselo wakone. 20Vahavisi va di bwelela na va gu dhumisa ni gu rungudza Nungungulu khu gu wona nya gukhavo satshavbo va nga si wonago ni gu sipwa si ngu fanana niso va nga embedwago khu ngilozi.
Litsimba la Jesu
21Na gu vbindride livbandre na mararu matshigu, gasi gu mu hanisa wugwera, va di mu thangisa lina la Jesu, a gu ilo a nga thangiswago khu ngilozi mayi waye na si gu khuri mimba.
Gubikedwa ga Jesu Nyumbani ga Nungungulu
22Na ma vbindride matshigu nya guagiswe gwaye, gasi gu landrisa Nayo wa Mosi, Mariya ni Josefe va di dzega gyanana va gu hongola nagyo Jerusalema, gasi guya gi bikela ga Pfhumu, 23#Wona gambe: Eks 13:2,12. kha nga idzo a rumago Nayo wa Pfhumu wu gukhuwo: “Mwamana watshavbo nya matiwula a na phasedwa Pfhumu”; 24#Wona gambe: Levh 12:6-8. ni guya gira ningelo nya matuva mavili, khonge ni mbaha mwendro sipombana sivili, kha nga guruma nya Nayo wa Pfhumu. 25A di gu vbanya Jerusalema mwama moyo nya gupwani khu Simiyoni. Adiri muthu nya gululame ni githawo ga Nungungulu; a di gu lindrela gu tangadziswa ga Israyeli, Liphuvbo nya Guage li diri gwaye. 26A di wonisidwe khu Liphuvbo nya Guage pwani kha nafa nyamba wona Kristo wa Pfhumu. 27Na kutsidwe khu Liphuvbo, a diya Nyumbani ga Nungungulu gikhati Jesu a nga yiswago khu vavelegi vaye, gasi guya landrisa milayo yi nga bani yi mu lumba. 28Simiyoni a di mu dzega, a mu wugarela, a gu rungudza Nungungulu waye, khuye:
29“Pfhumu, olu diga githumi gyago gi gu hongola khu
gurula,
kholu u giride iso u nga gi sambanyelago.
30Kholu nyi wonide guvbanyisa khu maho yangu,
31ugo u gu vegidego vbakari nya vathu vatshavbo.
32 # Wona gambe: Isa 42:6; 49:6. Uye khuye wenengedzo wu na gu wenengedzago va nya mayigo,
Uye gambe gidhumo gya Israyeli, ngamo yago.”
33Vavelegi va Jesu va di liwuga khiso si nga bani si gu ganedwa khu kotani yaye. 34Simiyoni a di va kategisa, a gu embela Mariya, mayi wa Jesu, khuye: “Gyanana gegi gi emisedwe gu khunguvanyisa ni gu wusa vathu nya vangi va na Israyeli; gi na vanga guganedzisana; 35gasi gu wonegiswa mahingigedzo ma sihadego myonyoni nya yingi. Hefemulo wago wu na hekhwa khu litshari.”
36Gi diromo nigyo gikhosane gimwegyo nya nyamayi gi nga bani giri muprofeti, nya gupwani khu Ana, gyanana gya Fanuweli, nya lihundzu la Aseri. 37Gi vbanyide ni mwama waye livbandre na mivili myaga. Na gi tshidwe, gi di vbanya kha nga gifurugadzi kala gi nga enedza livbandre na mararu magumi na mina (84) myaga. Gi di gu khala Nyumbani ga Nungungulu, umo gi nga bani gi thumela Nungungulu wutshigu ni mihani, na gi lombelela ni gu hala. 38Uye nuye a di vboha khu gikhati gile, a di dhumisa Nungungulu gumogo ni gu ganela khu gyanana gile ga vatshavbo va nga bani va gu lindrela guvbanyiswa ga Jerusalema. 39Na va landriside satshavbo si nga bani si gu lombwa khu Nayo wa Pfhumu, va di bwelela Galileya, dhoropani gwawe ga Nazareta. 40Aholu gyanana gi di gu dandra ni gu mana tshivba na gi tade khu guti ni wuhigo wa Nungungulu.
Jesu Nyumbani ga Nungungulu
41 # Wona gambe: Eks 23:15; Dhet 16:1-8. Myaga yatshavbo vavelegi va Jesu va di gu hongola Jerusalema, khu gikhati nya Phasika. 42Nari ni likhumi na mivili myaga, va di hongola naye kha nga giolovedzo gyawe. 43Guvbelani nya buzo, va di bwelela gaya. Aholu mwamana Jesu a di tshala Jerusalema nyamba tidwa khu vavelegi vaye. 44Va di hingigedza gukhavo womo vbakari nya vathu. Na va gimbide litshigu rumba, va di phela gu mu vbweta muvalongoni numo nya vaakelane. 45Na va mu hamugide, va di bwelela Jerusalema, guya mu vbweta. 46Hwane nya matshigu mararu va diya mu mana Nyumbani ga Nungungulu na khade vbakari nya vahevbudzi nya Nayo a va yingisa gumogo ni gu va wudzisa. 47Vatshavbo va nga mupwago va di liwuga khu guti gwaye ni dziphindrulo dzakone. 48Na va mu wone, vavelegi vaye va di thuruga; mayi waye a di khuye: “Mwanangu, u di hi sanisela ginani? Nga wona, babe wago ni eni hi di gu vbweta khu tshivba.” 49Khavbo avbo, Jesu a di khuye: “Mu di nyi vbwetela ginani? Kha mu dziti nya gukhenu fanelo yangu khu gu khala nyumbani ga Babe wangu, gani?” 50Aholu avo kha va nga wu pima gwadi tshamuselo nya magana ya Jesu.
51Khavbo avbo, a di relela navo a hongola Nazareta; a di gu va yingela. Mayi waye a di vegedza satshavbo sesi monyoni gwaye. 52Gasi Jesu a di dandra khu guti, ni tanga ni wuhigo, mahoni ga Nungungulu ni ga vathu.
Tans Gekies:
Luka 2: BGG2014
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Gitonga DC Bible © Bible Society in Mozambique, 2014.
