Mt 9
9
Kuhanyisiwa ka wa kuwonyana swiro
(Mrk 2:1-12; Lk 5:17-26)
1Kuti loko anhingeni abyatrhwini, awelela halahaya, ayatlhasa atikweni dra kwavu,#9:1 Kuhlayiwa Kapernawume, a tiko ledri drivoniwaka swanga tiko dra Yesu. Lavisa Mt 4:13; Mrk 2:1. 2vonani, vamutisela a mhunu wa kuwonyana swiro, na ali lihlakeni; loko Yesu avoni a kupfumela kwavu, aku ku lweyi wa kuwonyana swiro: Tiya ntamu n'wananga; a swidoho swaku swidrivaleliwile. 3Kolahu van'we ku vatrali vapimisa vaku: Lweyi asandra Xikwembu Nkulukumba! 4Kambe Yesu atiki ativa miyanakanyu yavu, avavutisa aku: Xana n'wiyanakanyela yini leswi swakubiha atimbilwini tenu? 5Xana i mpswini leswi swinabyalaka? A kuhlaya leswaku: A swidoho swaku swidrivaleliwile, kumbe kuhlaya leswaku: Pfuka utifambela? 6Kambe akuva n'witativa leswaku a N'wana wa Mhunu ani ntamu wa kudrivalela a swidoho amisaveni, aku ku lweyi wa kuwonyana a swiro: Pfuka, utitlakulela a vunanu byaku, utimukela. 7Lweyi wa kuwonyana swiro apfuka, atimukela a kaya kwake. 8Loko a switrhungu swivoni leswo, swiveni kutxhava, kutani switwalisa Xikwembu Nkulukumba, lweyi anyikiki ntamu wolowo ku vhanu.
Kuvitaniwa ka Matewu
(Mrk 2:13-17; Lk 5:27-32)
9Kuti loko Yesu ahundrela mahlweni, avona a mhunu lweyi valiki i Matewu, lweyi afaka atrhami ambangwini wa nhlengo, aku ku yene: Nilandre. Kutani Matewu asekeleka amulandra. 10Kuhumelela leswaku loko Yesu atrhami akudeni, kuta vanyingi va vahlengisi ni vadohi, vatrhamisa atafuleni kun'we na Yesu ni vadondrisiwa vakwe. 11#Fananisa na Lk 15:1-2. Loko a vafarisi vavona leswi vavutisa vadondrisiwa vakwe vaku: Hayini a Mudondrisi wenu ada kun'we ni vahlengisi ni vadohi xana? 12Kambe loko Yene aswiyingelile, aku ku vone: Lava vanga vatomi avadjuli n'anga, kambe ntsena lava vavabyaka. 13#Lavisa Hx (Os) 6:6. Fambani n'wiyadondra a ntlhamuxelo wa maritu lawa maliki: Nidjula a lilondro, mange magandrelo. Hikusa mine anitelanga kuvitana valulami, kambe niteli kuvitana vadohi akululameni.
Mhaka ya kutitrona
(Mrk 2:18-22; Lk 5:33-39)
14A vadondrisiwa va Yohana Mubabatisi vatrhindrekeli ku Yesu vamuvutisa vaku: Xana hine ni vafarisi hititronela yini ha kanyingi, na kasi a vadondrisiwa vaku avatitroni? 15Yesu aku ku vone: Xana swakoteka leswaku a vakhapi va muteki vadrila na muteki ahali na vone? Kambe wata a nkama lowu a muteki atakasusiwa ku vone; laho-ke vatatitrona.
16Angakone lweyi angarungelaka xihlama xa kapulana drimpswha axiyambalwini xa khale, hikusa a xihlama lexi ximpswha xingawonyana, xihandrula a xiyambalu lexi xa khale, akuhandruka ka xone kuva loku kukulu. 17Na swone avatxheli a vhinyo drimpswha aminkwameni ya khale, hikusa a vhinyo dringahandrula a minkwama, kuhalaka a vhinyo na yone minkwama mihoneka. Kambe vatxhela a vhinyo drimpswha aminkwameni mimpswha, kutani swibekiseka hi vubiri bya swone.
Kupfuxiwa kufeni ka wanhwanyana ni kuhanyisiwa ka mbabyi
(Mrk 5:21-43; Lk 8:40-56)
18Loko Yene ahavabyela leswo, kutlhasi mun'we wa murangeli wa sinagoga, akhisama amahlweni kwake aku ku yene: A n'wananga wa wanhwanyana ahakufa swoswi; kambe tana utatamutlhanteka a voko draku, atahanya. 19Yesu ahangasekeleka, amulandra kun'we ni vadondrisiwa vakwe. 20Kolahu mun'we wa wansati, lweyi afaka avabya hi mavabyi yakuhalata a ngati, hi xipimu xa khume dra malembe na mabiri, atrhindrekela ku Yesu hi le ntrhaku, akhumba a makhaxa ya xiyambalu xakwe. 21Hikusa afa atipimisela aku: Loko nikhumba ntsena a xiyambalu xakwe, nitahanya. 22Yesu andrulukiki avona lweyi wansati, aku ku yene: Tiya mbilu, n'wananga! A kupfumela kwaku kukuhanyisile. A kusukela ankameni lowo lweyi wansati ahanyisiwa.
23Loko Yesu atlhasi a kaya ka lweyi wa murangeli, avona a vayimbi va tinanga#9:23 A vayimbi va tinanga afa valongoloka ni kudrila ni kutretra ka vavasati lava afaka vahakeliwa akuva vadrila hi kutlakuxa ka maritu, ankameni wa mintiro ya kulahla ka vafi. ni switrhungu leswi swibaka pongwe, 24aku ku vone: Sukani! Hikusa a nhwanyana angafanga, ali khutriyela. A vhanu vamuhleka, 25kuti loko a xitrhungu xihumexiwi handle, Yene anhingena, akhumba a voko dra lweyi wanhwanyana, kutani a nhwanyana asekeleka. 26Kutani atikweni ledri hinkwadru kuhangalaka a mhaka leyi yiyentxekiki.
Yesu ahanyisa a vakufa-mahlu vabiri
27Loko Yesu asuki kone, a vakufa-mahlu vabiri vamulandra, va bandlukana vaku: N'wana Davida, hi yentxeli vurombe! 28Loko Yesu anhingeni ndlwini, lava vakufa-mahlu vabiri vamutrhindrekelela, Yene avavutisa aku: N'wapfumela leswaku ningaswikota a kuyentxa leswo? Vone vayangula vaku: Im'na, we HOSI! 29Kutani Yesu avakhumba a mahlu aku: Akuyentxiwi hi laha n'wipfumelaka ha kone! 30Kutani a mahlu yavu mapfuleka. Yesu avaleleta hi kutiyisa aku: Tivonelani leswaku kungavini mhunu lweyi aswitivaka. 31Volavo kambe vaku vahuma, vamutwalisa atikweni hinkwadru.
Kuhanyisiwa ka lweyi wa mbheveve
32Vaku na vasuka, vamubuyisela mhunu wa mbheveve lweyi afaka ani demoni. 33Loko Yesu ahlongoli demoni, kutani lweyi afaka ali mbheveve asungula kukhanela. A vhanu vahlamala ngopfu vaku: Ahingivona swanga hi leswi a Israyeleni! 34Kambe a vafarisi vaku: Ahlongola mademoni hi hosi ya mademoni.
A ntrhovelo ni vatiri
35Yesu afa afamba-famba hi miti ni swimitana, adondrisa amasinagogeni, arera Ivangeli ya Mfumu wa Matilo, na ahanyisa hinkwatu tinxaka ta mavabyi ni minkaralu. 36Loko avona a switrhungu, aswitwela vurombe, hikusa afa swikarali ngopfu, swihangalakile, swanga hi tihamba leti tingekena mubyisi. 37Kutani aku ku vadondrisiwa vakwe: Hakunene a ntrhovelo i wukulu, kambe a vatiri i vatrongo. 38Hileswo-ke, kombelani ku N'winyi wa ntrhovelo akuva aruma a vatiri akutrhoveleni kwake.
Tans Gekies:
Mt 9: NTX2007
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Xironga New Testament with Psalms © Bible Society in Mozambique, 2007.
