Mt 6
6
Kunyika swisiwana
1Tivonelani, leswaku n'wingatxhuki n'wiyentxa kululama kwenu amahlweni ka vhanu, akuva n'witavoniwa hi vone; loko n'wiyentxisa xileswo, n'wingaka n'wingakumi a hakelo ku Tatana wenu lweyi anga Matilweni.
2Hileswo-ke, loko unyika xinyiko, ungatxhuki uyimba nanga amahlweni kwaku, swanga hi leswi a vamandrendre vayentxisaka xiswone, amasinagogeni ni le maruweni, akuva vhanu vatavatwalisa. Nihlayelamfuri nili ku n'wine: xileswo, vone vayamukelile a hakelo dravu. 3Kambe wene, loko unyika xinyiko, a voko draku dra ximantrhi dringavitiva leswi swiyentxiwaka hi dra xinene; 4akuva a kunyika kwaku kuyentxiwa axihundleni; kutani a Tatana waku lweyi akuvonaka axihundleni, atakunyika a hakelo draku.
Yesu adondrisa a makhongotela
(Lk 11:2-4)
5Loko n'wikhongota n'wingayentxi swanga hi vhanu va mandrendre lava varandraka a kukhongota na vayimile, amasinagogeni ni le matlhanganwini ya maruwa, akuva vatavoniwa hi vhanu. Nihlayelamfuri leswaku a vhanu lavo vayamukeli khale a hakelo dravu.#6:5 A va-Yuda lava va timpswalu (vakhongoti) afa vafanela a kuyentxa a xikhongoto hi minkama leyi mibekisiwiki. Fananisa na Lk 18:10-14. Van'we afa vadjula a mimbangu ya kuvoneka akuva vakhongota ku yone, hi kukombisa a timpswalu tavu (vukhongoti byavu). 6Kambe wene, loko ukhongota, nhingena andlwini yaku, kutaku loko upfali a xipfalu, khongota Tatana waku lweyi anga xihundleni; Tatana waku lweyi akuvonaka axihundleni, atakunyika a hakelo draku.
7Loko n'wikhongota n'wingatateleni maritu swanga hi va-Matiko. Hikusa vapimisa leswaku vatayingeliwa hi kutatela a maritu yavu. 8N'wingafaneni navu! Hikusa Tatana wenu awaswitiva leswi n'wiswipfumalaka na n'wine n'wingasikombela ku Yene. 9Hileswo-ke n'wifanela kukhongotisa xileswi:
Tatana weru lweyi anga Matilweni.
A vito draku adrihlawuliwe,
10awute a Mfumu waku;
a kurandra kwaku akuyentxiwe
amisaveni, swanga hi le Tilweni.
11Hihanane namuhla a swakuda sweru swa siku drin'wana ni drin'wana,
12Hidrivalele a milandru yeru,
swanga hi leswi na hine hidrivalelaka van'wana lava vangani milandru ku hine.
13Ungahiyise akudringiweni,
kambe hihuluxe ku lwe mfani.
14Hikusa, loko n'widrivalela vhanu a swidoho swavu, Tatana wenu wa le Tilweni atan'widrivalela na n'wine. 15Kambe loko n'wingadrivaleli a vhanu a swidoho swavu, na Yene Tatana wenu angaka angan'widrivaleli a swidoho swenu.
Mhaka ya kutitrona
16Loko n'wititrona, n'wingavi fana ni va mandrendre lava vatiwonyanisaka mimombo; hikusa vatimphumisa liso, akuva switavoneka avhanwini leswaku vatitrona. Nihlayelamfuri, nili ku n'wine: vakuma a hakelo dravu. 17Kambe wene, loko utitrona, tola mafura anhlokweni, uhlamba ni liso, 18swingativoneka avhanwini leswaku watitrona, kambe switavoniwa hi Tatana waku lweyi anga xihundleni. Kutani Tatana waku lweyi avonaka axihundleni, atakunyika a hakelo draku.
Nhlengwe ya xihlayelamfuri
(Lk 12:33-34)
19N'wingatihlengeleteleni nhlengwe lani misaveni, lomu a tinsumba ni kukura swihoneka, ni lomu a vayivi vanhingenaka vayiva; 20kambe tihlengeletelani a nhlengwe atilweni, lomu a tinsumba ni kukura swingahonikiki, ni lomu a vayivi vanganhingenikiki vayiva. 21Hikusa lomu a nhlengwe yaku yinga kone, hi laha a mbilu yaku yinga kone.
A motre wa miri
(Lk 11:34-36)
22A motre wa miri i mahlu; hi leswo-ke, loko a mahlu yaku me manene, a miri waku hinkwawu wutavaninga; 23kambe loko a mahlu mange manene, a miri waku hinkwawu watava munyameni. Ke loko a kuvaninga loku kunga ndreni kwaku kuva munyama, a kumphuma ka munyama lowo kutava loku ka kuyini!
Xikwembu Nkulukumba ni mali
(Lk 16:13)
24Angakone lweyi angakotaka kutirela a tihosi tibiri; hikusa kumbe atavenga yin'we arandra yin'wana, kumbe atanamarela yin'we adrela yin'wana. An'winakuswikota a kutirela Xikwembu Nkulukumba ni mali.
Xikwembu Nkulukumba abekisa a vana vakwe
(Lk 12:22-31)
25Nan'wibyela nili: N'wingakaratekeni hileswaku n'witada yini, kumbe n'witanwa yini, ni leswaku amirini wenu, n'witayambala yini. Ke a vutomi abyitluli swakuda, ni miri amitluli swiyambalu xana? 26Lavisani a tinyanyana ta tilo: atibyali, atitrhoveli, atihlengeleti ntxhumu aswintlhanteni; hi Tatana wenu wa le Tilweni atiphamelaka. N'wine an'wina lisima ngopfu kutlula a tinyanyana ke? 27Xana hi wini ku n'wine lweyi hi kutikarata ngopfu hi vutomi byake, angakotaka a kuyengesela kutrongo a nkama wa vutomi byake?#6:27 A matralwa man'wana mali: kuyengetela xiyimu.
28Ni loko swi swiyambalu; xana n'wikaratekela yini? Lavisani magon'wa ya nhova leswi mamilisaka xi swone! Amatiri, amaluki! 29Kambe nan'wibyela leswaku nambi mufumi Salomoni, ni kutwala kwake hinkwaku, angayambalanga swanga ha drin'we dra wone. 30Ke loko Xikwembu Nkulukumba ayambexisa xileswi a byanyi bya nhova, lebyi byinga kone namuhla na mundruku byitahisiwa, xana angaka angan'wiyambexi ngopfu n'wine, swipfumelinyana?
31Hileswo-ke, n'wingatikarateni n'wiku: Hitada yini? Kumbe hitanwa yini? Kumbe hitayambala yini? 32Hinkwaswu leswo swidjuliwa hi va-Matiko. Hikusa Tatana wenu wa le Matilweni awaswitiva leswaku n'wipfumala hinkwaswu leswo. 33Djulisisani kusungula a Mfumu wa Xikwembu Nkulukumba ni kululama kwake, kutani hinkwaswu leswo n'witayengeteliwa. 34Hileswo-ke n'wingakaratekeni hi siku dra mundruku, hikusa a siku ledro dritatidjulela swa drone. Hikusa a siku drin'wana ni drin'wana dridringana hi khombo dra drone.
Tans Gekies:
Mt 6: NTX2007
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Xironga New Testament with Psalms © Bible Society in Mozambique, 2007.
