Mt 26
26
Makungu ya kudlaya Yesu
(Mrk 14:1-2; Lk 22:1-2; Yhn 11:45-53)
1Kuti loko Yesu aheti kuhlaya a maritu lowo, abyela vadondrisiwa vakwe aku: 2N'waswitiva leswaku ntrhaku ka masiku mabiri a Paska dritava kone, kutani a N'wana wa Mhunu atanyiketiwa akuva avambiwa.
3Ankameni lowo a vaprista lava vakulu ni vakulu va tiko vahlengeletana hubyini ya muprista lwenkulu, Kayafasi; 4vabekisa makungu ya kukhoma Yesu hi marengu akuva vamudlaya. 5Kambe afa vaku: Kungavi ankameni wa nkhuvu, akuva swingatipfuxa a dzolonga amakari ka tiko.
Yesu atotiwa mafura ya kunun'hwela a Betaniya
(Mrk 14:3-11; Lk 22:3-6; Yhn 12:1-8)
6Kuti loko Yesu ali Betaniya; andlwini ya Simoni lweyi wa nhlokonho; 7kutrhindrekela a wansati lweyi afaka atameli a nhlambeto ya mafura ya kunun'hwela, ya lisima drikulu ngopfu, amatxhela a anhlokweni yake, na atrhami atafuleni. 8A vadondrisiwa loko vaswivona, vahlundruka ngopfu vaku swipfuna yini akuhalata a mafura lawa? 9Afa mataxavisiwa hi mali yinyingi, kutani a mali leyo yitanyikiwa swisiwana. 10Yesu aswitiviki, aku ku vone: Xana n'wimukaratela yini lweyi wansati? Ayentxi ntiro lowu wunene ku mine. 11Loko swi swisiwana n'witavanaswu amakari kwenu hinkwawu nkama, kambe mine, n'wingativana mine hinkwawu nkama. 12Leswi lweyi wansati atxheliki mafura lawa amirini yanga, aswiyentxeli kulahliwa kwanga. 13Nihlayelamfuri nili ku n'wine: Amisaveni hinkwayu, lomu a Ivangeli matakareriwa kone, leswi aswiyentxiki, na swone switahlayiwa, akuva adrimukiwa ha swone.
Ntrengo wa kunyiketiwa ka Yesu
(Mrk 14:10-11; Lk 22:3-6)
14Kutani Yudasi Isikariyota mun'we wa vadondrisiwa lava va khume na vabiri, aya ku vaprista lava vakulu, aku ku vone: 15Xana n'witaninyika yini, loko nin'winyiketa Yene?#26:15 Hi Matewu ntsena, a khanelaka hi ntrengo wa kuxavisiwa ka Yesu. Ku buku dra Khm 21:32 kuhlayiwa leswaku lowu afa wuli ntrengo wa xavisiwa ka xikarawa. Lavisa Zk 11:12. Vone vamunyika a makume mararu ya timali ta silivhela. 16Akusukela kolahu asungula kudjula a nkama wunene wa kuvanyiketa Yene.
Paska dra vugamu dra Yesu ni vadondrisiwa vakwe
(Mrk 14:12-26; Lk 22:7-23; Yhn 13:21-30; I Kor 11:23-25)
17Hi siku dra kusungula dra nkhuvu wa makati lawa mangekena handrelo, a vadondrisiwa vatrhindrekeli ku Yesu vaku: U randra leswaku hi kubekisela kwini a xilalelo xa Paska? 18Yene aku ku vone: Fambani amutini, a kaya ka manyana, n'wiyaku ku yene: A Mudondrisi ali: A nkama wanga wu kusuhi! Nitada a Paska a kaya kwaku, kun'we ni vadondrisiwa vanga. 19A vadondrisiwa vayentxa swanga hi leswi Yesu afaka avaleletisi xiswone, vabekisa a Paska.
20Loko dripela, atrhama atafuleni kun'we ni vadondrisiwa lava va khume na vabiri, 21vaku na vada, aku ku vone: Nihlayelamfuri nili ku n'wine: Mun'we ku n'wine ataniwonga. 22Vone vavaviseka ngopfu, vasungula a kumuvutisa ha mun'we ha mun'we, vaku: Xana atava mine, we HOSI? 23Yene ayangula aku: Mun'we ku n'wine lweyi apetaka voko ambengeni kun'we na mine, hi yene lweyi ataniwonga. 24A N'wana wa Mhunu awafamba swanga hi leswi kutraliwiki ha yene; kambe yowee lweyi a mhunu lweyi a N'wana wa Mhunu awongiwaka hi yene! Afa swi swahombe ku mhunu lweyo, loko afa angabelekiwanga. 25Kutani Yudasi lweyi afaka amuwonga, avutisa aku: Mudondrisi, xana angava mine? Yesu, amuyangula aku: Uhlaya swone.
26Vaku na vahada, Yesu ateka a kati adrikatekisa, akhemelela, anyika vadondrisiwa, aku ku vone: Tekani n'wida, leyi i miri yanga. 27Kutani ateka ntrheko, atlhangela, avanyika aku: N'wanani ha wone hinkwenu, 28hikusa leswi i ngati yanga, ya xipfumelelanu ximpswha, leyi yihalateleliwaka lava vanyingi a kudrivaleliweni ka swidoho. 29Nan'wibyela leswaku kusukela swoswi, ningahanwi mihandru ya nvhinya, kukondra kutlhasa a siku ledri nitakanwa swone na n'wine, na swi swimpswha a Mfun'wini wa Tatana wanga. 30Kuti loko vayimbeleli lisimu, vaya anhaveni ya Minhlwari.
Yesu ativisa Petrosi
(Mrk 14:27-31; Lk 22:31-34; Yhn 13:36-38)
31 # Lavisa Zk 13:7. Kutani Yesu aku ku vone: Hi vusiku lebyi hinkwenu n'witakhunguvanyeka ha mine, hikuva a Matralwa mahlaya swoswo: Nitaba mubyisi, a tihamba titahangalaka. 32Kambe loko nitava nipfukile kufeni, nitan'wirangela Galileya. 33Kambe Petrosi aku ku yene: Nambi loko hinkwavu vatakhunguvanyeka ha wene, mine ningatikutrika. 34Yesu aku ku yene: Nihaleyelamfuri nili ku wene: Hi vusiku byolebyi, a nkuku wungasinayimba utava unilandruli kuraru. 35Petrosi aku ku yene: Nambi swingafanela kufa na wene, ningaka ningakulandruli. Hinkwavu a vadondrisiwa vahlaya swoleswo.
Yesu akhongota a Getsemani
(Mrk 14:32-42; Lk 22:39-46)
36Kutani Yesu afamba ni vadondrisiwa, ambangwini lowu valiki i Getsemani, aku ku vone: Trhamisani kola, nahaya lahaya niyakhongota. 37Atekiki Petrosi ni vana vabiri va Zebedeya, asungula kuvaviseka ni kukamiwa-ka-mbilu. 38A moya wanga wuvaviseka hi kutlulisa, swanga hi kufa. Salani kola n'wilavelela na mine. 39Kutani aya kulenyana, awa a hansi hi liso, akhongota aku: Tatana wanga, loko swikoteka, a ntrheko lowu awuhundre kule na mine; kambe kungayentxiwe a kurandra kwanga, akuyentxiwe a kurandra kwaku.
40Atlhelela ku vadondrisiwa, avakuma na vakhutriyela. Kutani aku ku Petrosi: Hi leswaku an'wikumanga ntamu wa kulavelela hi xipimu xa nkama mun'we (1 hora) na mine? 41Hitekani n'wikhongota, n'wingatinhingena andringweni, hikuva a moya wone wapfumela, kambe a miri mini gome.
42Asukiki ka vubiri aya khongota aku: Tatana wanga, loko swingakoteki akuva a ntrheko lowu wuhundra ningawunwanga, akuyentxeke a kurandra kwaku. 43Atlhela abuyela kambe ku vadondrisiwa, avakuma na vakhutriyela, hikusa a mahlu yavu afa mabindriwa hi vurongo.
44Avatrikiki, asuka kambe ayakhongota ka vuraru, atlhela ahlaya wo maritu wolawo. 45Kutani atlhelela ku vadondrisiwa aku ku vone: N'wahayetlela ni swoswi, n'wiwisa! Vonani, wutlhasile a nkama lowu a N'wana wa Mhunu atakanyiketiwa amavokweni ya vadohi. 46Pfukani, hambani hifamba; lweyi aniwongaka atlhasile.
Ku khomiwa ka Yesu
(Mrk 14:43-50; Lk 22:47-53; Yhn 18:3-12)
47Aku na ahavulavula, Yudasi mun'we wa lava va khume na vabiri, atlhasa na ali ni xitrhungu lexi xikulu, na xitameli tinhonga ni timpanga; xipfa hi le ku vaprista lava vakulu ni vakulu va tiko. 48A muwongi afa avanyiki a xikombiso, aku: Lweyi nitaka munyunta hi yene; mukhomani.
49Ahangahatla atrhindrekela Yesu, aku ku yene: Xawani, Rabbi! Kutani amunyunta. 50Yesu aku ku yene: Nakulori, uhalenu ha yini? Kolahu a van'wana vatrhindrekela, vayisa mavoko henhla ka Yesu vamukhoma#26:50 A tralwa dra Xigirika dripfumelela man'wana mahlayela ya tolokiwo, swanga hileswaku: leswi utelaka kutata yentxa swone swiyentxe. 51Kutani mun'we wa lava afaka vali na Yesu, ahlomula lipanga avavisa a nandra wa muprista lwenkulu, amutrema ndleve. 52Kambe Yesu aku ku yene: Tlhelisela lipanga draku ambangwini wa drone. Hikusa hinkwavu lava vatirisaka a lipanga, na vone vatadlawa hi lipanga. 53Xana upimisa leswaku nihluleka kukombela ku Tatana wanga, aninyika swoswi-swoswi kutlula khume dra mabutrhu na mabiri ya tintrumi? 54Xana afa matahetisekisa kuyini a Matralwa lawa mahlayaka leswaku swifanekeli swihumelelisa xiswoswo?
55Ankameni wolowo Yesu abyela a switrhungu aku: N'wihumi ni timpanga ni tinhonga akutata nikhoma, swanga ni xiyivi? Afa nidondrisa masiku hinkwawu andlwini ya HOSI, kambe an'wanikhomanga. 56Kambe hinkwaswu swihumeleli akuva a Matralwa ya vaprofeta mahetiseka. Kutani a vadondrisiwa hinkwavu vamusiya vatrutruma.
Yesu amahlweni ka Huvu
(Mrk 14:53-65; Lk 22:54-55,63-71; Yhn 18:13-14,19-24)
57Lava vakhomiki Yesu vamuyisi andlwini ya Kayafasi, muprista lwenkulu, lomu a vatrali ni vakulu va tiko afaka vahlengeletani kone. 58Kambe Petrosi afa amulandra hi le kule ako ayatlhasa alinxonxeni dra yindlu ya muprista lwenkulu. Kutani anhingena atrhamisa kun'we ni malandra atavona a mahelela ya swone.
59Kutani a vaprista lava vakulu ni Huvu hinkwayu afa vadjula a vumboni bya madrimi bya kurambela Yesu, akuva vatakota a kumudlaya. 60Kambe avabyikumanga, nambi kuhumeleli a timboni tinyingi ta madrimi. Avugan'wini kuhumelela timboni tin'wana tibiri, 61leti tihlayiki leswaku: A mhunu lweyi ati: Naswikota a kubutrhuta a Tempele, nitlhela niyiyaka hi masiku mararu. 62Kutani a muprista lwenkulu asekeleka amuvutisa aku ku Yene: Xana awuyanguli ntxhumu? Xana hi swini leswi lava vakurambelaka ha swone? 63Kambe Yesu amiyela. Kutani a muprista lwenkulu aku ku yene: Nikufungisa hi vito dra Xikwembu Nkulukumba lweyi ahanyaka, leswaku uhibyela loko ali wene Kriste N'wana wa Xikwembu Nkulukumba! 64Yesu ayangula aku ku yene: Uhlayi swone. Mfuri nan'wibyela leswaku, kusukela swoswi, n'witavona a N'wana wa Mhunu atrhami xineneni xa ntamu wa Xikwembu Nkulukumba, ata henhla ka matlavi ya tilo.
65Hi kuyingela leswo a muprista lwenkulu ahandrula swiyambalu swake, aku: Asandrile! Hahadjulela yini a vumboni? N'wahakumuyingela swoswi loko asandra. 66Xana n'wili yini ha swone? Vayangula vaku: Afaneliwa hi lifu.
67Kutani vamuntsekela mari alisweni na vamuyamasa, van'wana vamuba, 68na vaku: We Kriste, hipfhumbeli leswaku i mani lweyi akubiki!
Petrosi alandrula Yesu
(Mrk 14:66-72; Lk 22:56-62; Yhn 18:15-18,25-27)
69Kambe Petrosi afa atrhami handle, alinxonxeni. Kutani mun'we wansati wanandra amutrhindrekelela aku ku yene: Na wene afa una Yesu, mu-Galileya! 70Kambe alandrula amahlweni ka hinkwavu aku: Aniswitivi leswi uswihlayaka. 71Aku adjula kuhuma hi nyangwa, a mun'wana wansati wa nandra, amuvona abyela lava afaka vali kone aku: Lweyi afa ena Yesu, mu-Nazarete. 72Atlhela alandrula hi kufunga aku! Animutivi a mhunu lweyo! 73Ku hundriki nkamanyana, lava afaka vatrhami kone vatrhindrekela, vaku ku Petrosi: kunene, na wene u wavu. Hikusa na wone makhanelela yaku makukombisa. 74Ahangasungula kuruka, ava afunga aku: Animutivi a mhunu lweyo. Kutani hi nkama wolowo, a nkuku wuyimba. 75Petrosi ahangadrimuka a maritu ya Yesu lawa afaka amubyeli: Na nkuku wungasiyimba, utava unilandruli kuraru. Kutani ahuma handle, ayadrila hi xiviti.
Tans Gekies:
Mt 26: NTX2007
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Xironga New Testament with Psalms © Bible Society in Mozambique, 2007.
