Mt 13
13
Xifaniso xa mubyali
(Mrk 4:1-9; Lk 8:4-8)
1Hi siku droledro Yesu ahumi andlwini ayatrhama ankingeni wa nambu. 2Hikuva afaka switrhungu swinyingi swihlengeletani ku Yene, anhingeni abyatrhwini atrhamisa kone, a switrhungu swone afa swiyimi ankingeni. 3Kutani avabyela swakutala hi swifaniso aku ku vone:
Mun'we wa mubyali ahumi ayabyala. 4Loko abyala, tin'we timbewu tiwela andleleni, kutlhasa a tinyanyana titatatida. 5A tin'wana tiwela amaribyeni, lomu kungekena misava minyingi; a timbewu leto tihatla timila, hikusa a misava afa mingayetanga. 6Kambe loko a dambu dritlhava, tipswha, tiwoma hikuva afa tingena mitru. 7Tin'wana kambe tiwela amakari ka mitwa, loko a mitwa mikulile mitikamanyeta. 8Kutani tin'wana mfuri, tiwela amisaveni leminene, tihumexa a mihandru ya kuxonga: yin'we a mbewu yihumexa dzana (100), yin'wana ntlhanu wa makume na drin'we (60), ni yin'wana makume mararu (30) ya tinhleke. 9Lweyi angani tindleve ayingiseti!
Nkongometo wa swifaniso
(Mrk 4:10-12; Lk 8:9-10)
10Kutani a vadondrisiwa loko vatrhindrekela ku Yene vamuvutisa vaku: Ha yini ukhanela ni vhanu hi swifaniso? 11Avayangula aku: N'wine n'winyikiwi kutiva a swihundla swa Mfumu wa Matilo; kambe vone avanyikiwanga. 12Hikuva lweyi anganaswu atanyikiwa, atataleliwa ha swone, kambe lweyi angekena ntxhumu, ni leswi switrongo anganaswu atatekeliwa. 13Hileswo-ke nikhanela na vone hi swifaniso; hikuva nambi vavona, vangavoni, nambi vayingela, vangayingeli, vayingelisisa. 14Xiswoswo kuhetiseka leswingahlayiwa hi muprofeta Ezaya lweyi angaku:
Hi kuyingela, n'witayingela, kambe n'wingayingelisisi;
hi kulangusa, n'witalangusa, kambe n'wingaka n'wingavoni.
15 # Lavisa Ez 6:9-10. Hikusa a mbilu ya vhanu lava yinonon'hwile;
ni hi tindleve tavu, vayingela hi kukarateka, vaswonyi mahlu yavu
akuva vangavoni hi mahlu; vayingela hi tindleve, vayingelisisa hi mbilu,
vandruluka nivahanyisa.
16Kambe makatekile a mahlu yenu, hikuva mavona; ni tindleve tenu, hikuva tayingela. 17Nihlayelamfuri leswaku i vanyingi vaprofeta ni valulami vanaveliki kuvona leswi n'wine n'wiswivonaka, kambe avaswivonanga; ni kuyingela leswi n'wiswiyingelaka, kambe avaswiyingelanga.
Yesu atlhamuxela a xifaniso xa mubyali
(Mrk 4:13-20; Lk 8:11-15)
18Yingisetani swoswi a ntlhamuxelo wa xifaniso xa mubyali: 19Lweyi ayingelaka a ritu dra Mfumu, kambe angadriyingelisisi, kuta lweyi mfani, awutla leswi swibyaliwiki ambilwini yake; hi yene lweyi abyaliwiki#13:19-23 A tindrimana leti tingava na titlhamuxeliwa hi tindlela tibiri: Hi ndlela yin'we, kufanisiwa a vhanu ni mbewu leyi yibyaliwiki misaveni; hi ndlela yin'wana, kufanisiwa a vhanu ni misava leyi miyamukelaka a mbewu. andleleni. 20Kambe lweyi abyaliwiki amaribyeni hi lweyi ayingelaka a ritu ahatla adriyamukela hi kutrhava, 21kambe angana mitru andreni kwake, atrhama nkamanyana ntsena; a nhlomulo, kumbe kuxaniseka hinkonta ya ritu, swiku swahumelela ahatla akhunguvanyeka. 22Kambe lweyi abyaliwki amitweni hi lweyi ayingelaka a ritu, kutani a kuhlatiyela ka nkama lowu ni kukanganyisa ka vukosi swikamalata a ritu, drindruluka dringabeki mihandru. 23Mfuri lweyi abyaliwiki amisaveni leminene, hi lweyi ayingelaka ritu adriyingelisisa, ava abeka a mihandru, a nhleke yin'we yibeka a dzana (100), a yin'wana ntlhanu wa makume na drin'we (60), a yin'wana makume mararu (30).
Xifaniso xa lihungu
24Yene avabekeli xin'wana xifaniso aku: A Mfumu wa Matilo wufana ni mhunu lweyi abyaliki mbewu leyi yinene ansin'wini yake. 25Kambe avusikwini, loko vhanu hinkwavu vayetlelile, kuta nala atatabyala lihungu amakari ka mavele, ava atifambela. 26Loko a mavele marumbuka, mabeleka, kuvoneka ni lihungu, kolahu. 27A vatiri va n'winyi wa nsimu vata ku yene vaku: hosi, xana awubyalanga a mbewu leyi yinene ansin'wini yaku? Xana a lihungu dripfa kwini? 28A n'winyi aku: I nala wa kukari ayentxiki leswo. Kutani a vatiri vamuvutisa vaku: Urandra leswaku hitruvula a lihungu xana? 29Kambe yene aku ku vone: Im'hi, hikusa n'witaku n'witruvula a lihungu, n'witruvula na wone mavele. 30Switrikani swikula kun'we kukondra kuyatlhasa nkama wa ntrhovelo. Ankameni lowo nitabyela vatrhoveli niku: Rangani n'wihlengeleta a lihungu, n'widritrimba hi tinyandra drihisiwa, kambe amavele mahlengeletani atrhaleni dranga.
Xifaniso xa nhleke ya sinapi ni xa handrelo
(Mrk 4:30-32; Lk 13:18-21)
31Avabekela mfuri a xifaniso xin'wana aku: A Mfumu wa Matilo wufana ni nhleke ya sinapi leyi a mhunu ayibyaliki ansin'wini yake. 32Yone hi leyi yitrongo ngopfu kutlula tinhleke hinkwatu. Kambe, loko yimila, yikula yindruluka nsinya lowu wukulu ngopfu kutlula a minsinya hinkwayu, lakakuva a tinyanyana tiyaka vusaka atinkambyini ta wone.
33Atlhela avadrungulela xin'wana xifaniso aku: A Mfumu wa Matilo wufana ni handrelo leyi a wansati ayitxheliki ku mimpimu miraru ya mapa, apfuva akuva yiyentxa leswaku a mbila hinkwayu yikukumuka.
Xivangelo xa kudondrisa hi swifaniso
(Mrk 4:33-34)
34Yesu akhaneli hinkwaswu leswi ku switrhungu hi kutirisa swifaniso; afa angavabyeli ntxhumu loko kunge hi swifaniso, 35#Lavisa Swd (Salmo) 78:2. akuva kuhetiseka leswi afaka swihlayiwi hi muprofeta lweyi angaku: Nitakhanela hi swifaniso; nitahlaya leswi afaka swili xihundla kehe loko Xikwembu Nkulukumba atumbuluxi misava.
Yesu atlhamuxela a xifaniso xa lihungu
36Kutani asuka avhanwini, ayanhingena andlwini, laha atrhindrekeleliwiki hi vadondrisiwa vakwe akuva vakombela leswaku avatlhamuxela a xifaniso xa lihungu. 37Yene avayangula aku: Lweyi abyaliki mbewu leyi yinene hi N'wana wa Mhunu, 38a nsimu i tiko. A mbewu yinene hi vana va Mfumu wa Xikwembu Nkulukumba, a lihungu drikombisa a vana va lweyi mfani. 39A nala lweyi abyaliki lihungu hi yene Diyavulosi, lava vanga vahlengeleti va ntrhovelo i tintrumi. 40Swanga hi leswi a lihungu drihlengeletiwaka dritrimbeleliwa vadritxukumetela andrilweni vadrihisa, switava swoswo ni le kuheleni ka misava. 41A N'wana wa Mhunu ataruma a tintrumi takwe tihlengeleta a handle ka Mfumu wakwe hinkwavu lava vayentxaka leswaku van'wana vadoha, ni hinkwavu lava vayentxaka leswi swimfani, 42akuva vatxukumetiwa akheleni dra ndrilo, laha kutakava ni swidrilo ni kuketrela ka menyo. 43Kutani a valulami vataphatima swanga hi dambu, a Mfun'wini wa Tatana wavu. Lweyi angani tindleve (ta kuyingela), ayingeli.
Xikombiso xa vukosi lebyi byifihliwiki.
44Yesu ayengeta aku: a Mfumu wa Matilo wufana ni vukosi lebyi byifihliwiki ansin'wini. Loko mhunu abyikuma, atlhela abyifihla kolahu. Hi kunyoxa loku kukulu, afamba aya xavisa hinkwaswu leswi anganaswu ayaxava nsimu leyo. 45Nakone a Mfumu wa Matilo wungafanisiwa ni muxavisi lweyi afambaka adjula a swa lisima. 46Loko akumi perola drin'we dra lisima ngopfu, afamba ayaxavisa hinkwaswu leswi anganaswu axava drone.
Xifaniso xa nkukutu
47Nakone a Mfumu wa Matilo wahafana kambe ni nkukutu lowu wupetiwaka alikhulwini wuphasa hinkwatu tinxaka ta tinhlampfi. 48Loko a nkukutu wutalile, a vatrhevi vawukokela asaveni, vatrhama vahlawula kone a tinhlampfi; leti tinene vatibeka amintrhaveni, vatxukumeta leti tingapfunikiki ntxhumu. 49Hi swoswo switakahumelela akuheleni ka misava: a tintrumi titahuma a kutatatravukanisa a vhanu lava vamfani ku lava vanene, 50kutatxukumetiwa lava vamfani akheleni dra ndrilo lomu kutakavani kudrila ni kuketrela ka menyo.
Mintxhumu mimpswha ni ya khale
51Kutani Yene avutisi, aku: Xana n'wiswiyingelile leswi hinkwaswu? Vone vayangula vaku: Im'na. 52Ahangaku ku vone: Loko mun'we mudondrisi wa Nawu apfumela a dondro ya Mfumu wa Matilo afana ni n'winyi wa ndangu, lweyi ativaka a kuhumexa ku vukosi byake, a mintxhumu mimpswha ni ya khale.
Yesu angayamukeliwi a Nazarete
(Mrk 6:1-6; Lk 4:16-30)
53Kahangahumelela leswaku loko Yesu aheti kudrungula a swifaniso leswi, asuki kolahu 54atlhelela atikweni dra le kwavu, lomu asunguliki kudondrisa asinagogeni dra mbangu lowo. A vhanu vahlamala vaku: Byipfa kwini a vutivi lebyi ni ntamu wa kuyentxa mahlolana? 55Xana lweyi ahi yene a n'wana wa muvatli xana? Xana a mamana wakwe ahi yene lweyi valiki i Maria? Ni vamakwavu, ahi Yakobe, na Yosefa, na Simoni na Yuda? 56Ni vamakwavu va vaxisati avatrhami kolomu na hine xana? Swipfa kwinike hinkwaswu leswi? 57Hikolahu ka swone vakhunguvanyeka ha Yene. Kutani Yesu aku ku vone: A muprofeta angapfumali xitxhavu, loko kunge ka lekwavu ni le ndlwini yake. 58Hinkonta yakuva a vhanu vangapfumelangakiki, angayentxanga mahlolana manyingi kone.
Tans Gekies:
Mt 13: NTX2007
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Xironga New Testament with Psalms © Bible Society in Mozambique, 2007.
