Litanga 2
2
1Na ligulu nelirova vya mala kulombwa, nelihe lyavyo lyosi. 2Kandi ku lidiku lya gatano na gaviri Nyasaye ya mala miyinzi gya ya li kulomba; na ya sosa ku lidiku lya gatano na gaviri ku miyinzi gyosi gya ya lomba. 3Kandi Nyasaye ya gasidza lidiku lya gatano na gaviri, na a li kola litakatifu; kigira ku lidiku yili ya sosa ku miyinzi gyigye gyosi gya Nyasaye ya lomba nokukola.
4Yivi ni visukululwi vyeligulu na vyelirova ku lidiku lya Yahova Nyasaye ya lomba lirova ne ligulu. 5Na misala gyomulimi si gya li mu lirova kali mulala, na tsingutsa tyomulimi si tsya mera; kigira Yahova Nyasaye ya li na a kikiri kukupidza imbula ku lirova kandi si ha li nomundu kulima lirova; 6navutswa lirova lya vuyidza lilumbe, na lya kindidza marova gosi. 7Na Yahova Nyasaye ya lomba mundu nolugukyi lwamarova, na a huudza mmolu gege mwika gwelivamwoyo: na mundu ya gwa mwoyo gwelivamwoyo. 8Kandi Yahova Nyasaye ya simika mulimi ku luvega lwevugwe mu Edenina a vika ho mundu wa ya lomba. 9Na Yahova Nyasaye ya meridza misala gyosi gyi yanzidzanga ku liloleka lyagyo, na gyi veye milahi ku vyokulia, kandi musala gwelivamu oyo hagati homulimi, na musala gwelimanya ubulahi nobudamano. 10Kandi ha li nomugera gwa twula mu Edeni kukindidza mulimi; na kutwula yaho gwa vukana kugwa tsinzira tsine. 11Lieta lya gwokutanga li langwa Pishon: nigwo gu kumbiridza kivala kya Havila, hethahabu i nyoleka; 12na ithahabu yekivala yikyo i veye indahi: kandi ha veye na ibedola i veye mu kivala yiki na magina gobuguli budinyu. 13Lieta lyomugera gwegyiviri li veye Gihon: yigwo nigwo gu kumbiridza kivala kyosi kya Ethiopia. 14Na lieta lyomugera gwegyivaka li veye Hidekeli: nagwo gu vitanga ku luvega lwa Asuria. Kandi ugu kola gyine gu veye Farati. 15Na Yahova Nyasaye ya vugula mundu, na a mbika mmulimi gwa Edeni a yinzire nokugulinda. 16Yahova Nyasaye ya laga mundu, na a mbolera, Ku misala gyosi gyomulimi u nyala kulia kuli yanza: 17navutswa ku musala gwelimanya ubulahi nobudamano, u ta lia kugwo: kigira ku lidiku lya u lia kugwo ligali u la kudza.
18Kandi Yahova Nyasaye ya vola Si bu li bulahi mundu a ve yeng'ine, nda mu lombera mukonyi u dukana naye. 19Yahova Nyasaye ya lomba tsyinyama tsyosi kutwula mmarova, na manyonyi gosi gombwerefu; na a vi leta ku mundu kumanya a la vi gulika ki: na ku lieta lyomundu ya gulika kilombe ku vyosi, yili lya li lieta lyakyo. 20Na mundu ya gulika mitugu gyosi ameta, namanyonyi gombwerefu, netsinyama tsyosi tsyombulimu; navutswa si kya loleka kilala ki dukana kuva mukonyi kuye. 21Kunangwa Yahova Nyasaye ya hila Adamu mu tsindolo tsinene, naye ya gona; na a vugula luvalu lwilwe lulala, na yizulitsa ha zana inyama: 22Noluvalu lwa Yahova Nyasaye ya vugula ku Adamu, ya lomba mukali, na a mu leta ku Adamu. 23Na Adamu ya vola, Uyu a veye kigumba kyevigumba vyange, nenyama yenyama yombiri gwange: a la gulikwa mukali, kigira ya twulidzwa ku musatsa. 24Kigira yaga musatsa a la leka dada wewe na mama wewe, na a hambane nomukali wewe: na vombi va la gwa inyama indala. 25Navo vombi va li kyahonyo, musatsa nomukali wewe, na si va li netsisoni.
Tans Gekies:
Litanga 2: MBE
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
©Bible Society of Kenya, 1967
