Matius 2
2
Yepasye ge bok yo ma ku Yefun Yesus
1Yenggras Herodes gum yeraja mo bur Yudea sa, Maria kem su Yefun Yesus mo kota Betlehem mo bur Yudea ne. Maria kem su Pa, orete yepasye ge bok yo gato watbot bí ma kadit nobu nim ma mo kota Yerusalem. 2Yepasye ne ma ndobot do, ”Pa gato ye pe tepsu yeraja wa ye Yahudi ana u ne? Men me bí be bor mo gu nim ne anato men jam do, ye pe yeraja be dik yo ma mo bur ré re, sane men ma wa men som Pa ne et.”
3Yeraja Herodes jam sukdu ne sa, an kwabom dek ndo nde. Yeraja si yé mwa ne mo kota Yerusalem kwabom dek sino. 4Sane Herodes kendo yekwesú mo Yefun Allah bi nu si yeguru agama mwa ne sino sum, ete Herodes ndobot yé ne do, ”Kristus gato Yefun Allah tom do, bere An syogat ma mo bur ré wa nai men yetu kadit sukye ete jowa men ne te, bere bi im kem su Pa ne mo u ne?”
5Yé ne ki do, ”Kristus ne bi im bere kem su Pa ne mo kota Betlehem mo bur Yudea, we yenabi dik yo krombot suktaru gato Yefun Allah ki, sare do,
6’Kota Betlehem mo bur Yudea,
yepasye mo bur Yudea jam do, nan sa, kota gato yé bes gum kok;
we bere Yekwesu dik yo ma kadit nan.
Yekwesu ne bere mewa Ji bi nje-i, gato sok mo yewis ye Israel ne tepsu ye mewa domba sisu ndo.’ ”
7Sane Herodes kendo yepasye gato ma kadit nobu nim ne dakai ma ku an wadigan, ye yi jam nde. Herodes ndobot yepasye ne do, ”Bí ne ketke bor su kam ot ne?” Yepasye ne ki sukdu ne nai Herodes jam re. 8Orete Herodes syogat yepasye ne mu mo Betlehem, an ki do, ”Nin mu watbot pe ne sane sor nin ku Pa ne et. Nin do ku Pa ne it yo, nin ma ki napyo nai ji jam subere ji waii mu mone, ete ji som Pa ne dom.”
9Yeraja ki sukdu ne, orete yepasye ne mu. Yepasye ne me bí gato án me it kadit nobu nim suga nyim neya kok mone. Bí ne mu nyim mo án gwem, ete bí ne kem ti ri tepsu nu gato Pa kem mone. 10Án me bí mone sa, án mit iwa wai o re. 11Án sok mo nu mit sa, án ku Pa ne si Pa bi im gato Maria. Án ku Pa ne, or án tu án umsu, orete án som pa ne. Sane án nai suk gato bi sugum sye sato emas e, kemenyan sisu mur ete syo wa Pa. 12Án som Pa su suk ne, orete án satu mu mo án bi bur-i, án yo mu ku Herodes o nde, we án semda ku Yefun Allah, ete Yefun Allah duyawa án mu ku Herodes. Sane án muket os yi yo tara re.
Yusuf si Maria gwat Pa ne titi mu mo bur Mesir
13Yepasye gato watbot bí ne mu wé, orete Yusuf semda ku Yefun bi malaikat dik yo. Malaikat ne ki do, ”Bere Herodes meret Pa wa an gu Pa ne kwop wé, sane nan sun, nan gwat Pa si bi im titi mu mo bur Mesir kadit. Nin sino kem mone sane sor ji ki sukdu nai nan o et.”
14Sane Yusuf sun, an gwat Pa si bi im mu, án we si Pa titi mu mo bur Mesir su noru miten. 15Án we si Pa kem mone sane sor Herodes kwop.
Sane suktaru gato Yefun Allah tarubot yenabi ne bor re. Suktaru gato bor, ye krom sare do, ”Ji kendo Ji bi Pa mu kadit bur Mesir.”
Herodes syogat bi yesukmise mu gu pa wokgan kwop wé
16Herodes jam do, yepasye ne ben kidar an sa, an maskwa ndo nde. An syogat an bi yesukmise mu gu pa yebris gato sye kom mo tahun we mu bur mo kota Betlehem si nat wairi wa kota ne sino kwop wé. Herodes jam sukdu subot bi kam gato bí dik yo it mone kadit yepasye bok ne, sane Herodes gu pa yebris mwa ne wé re.
17Sane mone, sukdu gato yenabi Yermia ki ne bor re. Yermia bi sukdu subot Rahel bi dat gato ye gu kwop mo Betlehem re do,
18”Ye jam yé yo wo mo kota Rama.
Mone yé wo, yé nderku yé bi pa ndo nde.
Rahel wo nderku bi pa.
Rahel bariwa yé bidek mom re, we mom bi pa kwop or re.”
Yusuf si Maria gwat Pa satu ma kadit bur Mesir
19Herodes kwop, orete mo bur Mesir Yusuf semda ku Yefun bi malaikat dik yo. 20Malaikat ne ki do, ”Yé gato werwa gu nan bi Pa kwop wé ne, án dakai kwop re, sane nan sun, nan gwat Pa si bi im satu mu mo bur Israel.” 21Sane Yusuf sun, an gwat Pa si bi im satu mu mo bur Israel.
22Sarewo Yusuf jam sukdu do, Herodes bi pa gato gum do Arkelaus, ye bes tepsu yeraja mo bur Yudea win an bi ai sa, Yusuf nyuwa mu mone. An semda ku malaikat dik yo o, ete malaikat ne ki nai an do, ”Nan mu mo bur Yudea nde,” sane Yusuf mu mo bur Galilea kadit. 23Yusuf si an bi rus kem mo kota gato gum do Nazaret. Sane sukdu gato yenabi ki subot Pa ne bor mone. Yenabi ki do, ”Bere ye kendo Pa ne do, An ye Nazaret.”
Tans Gekies:
Matius 2: KGR
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2004, 2014
