KEJADIAN 6
6
Afuni inobabut mondok weagat hilingiti lagaukwa wene
1Afuni inebe a'nogo ta'larik waga lagaukwasik, inebe mondok hokhorogo sik-pik isukwasik, o yi awi ti awi mondok wialagaukwa. A'nogo wialaga logolik, omalik ekhe hemi taginafukwa. 2A'nogo taginafukwama, it ap Allah againafuri mene nen hemi andi fano mondogen ineilenggen isasukwasik he, it inamolo anggasukwa mene inebe woginafukwa. 3A'nogo woginafukwama, At Tuhan Allah nen ikhi logolik, ”It afuni andi inebe ineluk mondok logogun andi re nabit. Inebe we elama mene hilingi'mo, wa'lasugun nen werek. Andi halok he yogondak huli nen he inebe ineluk uanhogo ekhe logogun lek, we umur 120 tahun huli nek logogun,” iluk isikhe.
4O huli attak andem oba inom, hobuk oba inom, afuni kweangma inobakhe hokhondek mene ekhe welagaukwa. It afuni inebe inobakhe hokhondek andi re, hemi fano mondok it ap Allah againafuri mene nen woginafukwa mene omanogo nen taginafukwa mene. It ap inobakhe hokhondek andi re, attak welagaukwa andem oba inasialok weak logolik, inenu werek welagaukwa andi.#Bil. 13:33
5A'nogo logolik, afuni kweangma mene inobabut mondok weak, hundik-handik inendawimo weak mene nek ebetu were'ma Tuhan en eilenggen isasikhe.#Mat. 24:37; Luk. 17:26; 1Ptr. 3:20 6A'nogo isasikhesik, mel isikhe: ”Afuni andi nambigen elalogo kweangma fisigi e,” iluk endawimo mondok weak agaikhe. 7A'nogo endawimo weak agaikhesik, mel isikhe: ”Nambigen it elalinafi e, igi andi nen, afuni an nen elalinafigi mene andi inebe mondok legetfisikhi logolik, wam, sue, paik, yi mene ti mene enggi lek werek mondogat legetfisagain o,” iluk isikhe. 8A'nogo isikhe meneat he, at Nuh nek he Allah endawimo fano asuageluk hilingiti lagaikhe.
Ap Nuh nen hilingitikhe wene
9-10Nuh nen hilingitikhe re, yi'nogo. At Nuh againafuri ap inebe henagan mene taginafikhe. Inenu re, Sem inom, Yafet inom, Ham inom. Nen, at Nuh ebe obabut he, at Allah inom horokhogo hundik logolik, weak ekhe hilingiti'lek higithogo nek hilingiti lagaikhe. Andem sambul he, at amunek fano hilingiti lagaikhe.#2Ptr. 2:5 11A'nogo hilingiti lagaikhe meneat he, afuni ekhe mondogat Allah eilhanem inobabut mondok weak hilingiti logolik, o yi awi ti awi inebe inendawirinafi'lek weagerinafi lagaukwa. 12Afuni mondogat inobabut weak hilingiti lagaukwa andi nen, Allah nen afuni kweangma mene eilenggen isugunem he, mondok weak enek were'ma isikhi lagaikhe.
13Allah eilenggen a'nogo isikhi lagaikhe andi nen, Nuh mel yagatikhe: ”Afuni o yi awi ti awi inobabut it ekhe inebe inendawirinafi'lek mondok weak hilingiri'lagwi andi nen, afuni inebe inom, yi mene ti mene mondogat inom, kweang inom, mondok legetfisagain o. 14Halok, hat faget, kapal e omame meneba folhigik wu'no o. A'nogo wuti logolik, o hulithigik senggelogo wu'no. A'nogo wutfembik, e sin amusu hangge abel a'makwe inom endakwe inom mondogat wa'no. 15Kapal andi unggut uan fikhit he, 133 meter, nen unggut horok fikhit he, 22 meter, nen esin legeisogo, 13 meter wu'no. 16Wutfembik he, wa'lengge salino o. Wa'lenggeba nen huli hobat oba re, yiling-waling ambe huli 44 senti nen palogo hekhogo wu'no. Kapal andi o huli henagan sap palogo wusimbik he, kwe misik ekhe esanggoma folol feino o. 17A'nogo wutfugunem, afuni inom, yi mene ti mene kweangma welagarek mene mondogat inom, inoasuageluk, An nen i fu hokho mene ekhe lakfei wesigin o. A'nogo lakfei wesumo, yi mene ti mene kweangma eluk welagarek mene mondogat wa'lasigin o. 18A'nogo meneat he, harenek he, wene yi wathesik: Hat hagwe hemberek inom, hagainafuri inagagwi inom, kapal andi elema kwi lano o.
19-20A'nogo kwi laga logolik he, wam, sue, paik, yi mene ti mene enggi lek werek unggulenu lombok inom inoasinogo nen he, misiktek agun agwe emberek lomboget higik waluk kapal elema kwi lano o. 21A'nogo waluk kwikhi logolik, yi sumburu ti sumburu hit hinebe inom, yi mene ti mene waluk kugun mene andi inom, nogoin mene faget waluk kino aro,” iluk yagatikhe. 22A'nogo yagatikhemo, at Nuh wene Allah nen, yi'nogo hilingi'no ti'nogo hilingi'no, iluk yagatikhe hagat mondogat higithogo hilingitikhe.#Ibr. 11:7
Tans Gekies:
KEJADIAN 6: inohap
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
