LAKSASIKE 18
18
At Paùlùt o Korìtùt wagaikesik logolìk hagatì lagaike wene
1Atì'nogo haga'lùk he, at Paùlùt o kota Atena atoma hebùlùk o kota Korìtùt wagaike. 2Ebe oan wagì'lek werek kolek, ap kain Kelarìùt en he,
“Apùnì Yahuri mene inebe o kota Ùrùm logousak lek. Motogat hela wùlùbuak o,” ìlùk wene palhikomo re, ap Yahuri mene aike etage Akwila. Ebe o Potùt ta'lagaike mene. Agwe etage Perisikila eperagat, o Italia nen it tak o Korìtùt kerat lagaukwasik were'ma, at Paùlùt hobuk wagaikesik isa wagaike atì. 3It Akwila Perisikila eperagat ineki oko hesik he, o en mene katì lagaukwa. At Paùlùt eki oko hesik atì'nogoat katì lagaike atì nen he, it inoba wagaikesik logolìk, inomat katì lagaukwa. 4Atì'nogo kato inom logolìk, ninhùp-nanhùp Ala hesik ineki welegat logolìk sapan uogolùk ikenem, o apùnì Yahuri mene sapan ìkì lagaukwa ba kìlìk he, it apùnì Yahuri mene lek, Yunani mene lek, Yesùt ane wanuagalùk ina'la kagalhì lagaike.
5Ina'la kagalhenem he, it Silat Timotìùt eperak o Maketonia nen wagaukwama re, at Paùlùt hùnogo mene aike hagatì'lek, we, wene atìat yogoisiko motok welagaike. It apùnì Yahuri mene mel yogoisasike;
“Ala nen he, Karìsùt lakhei wesigin ìlùk wene wa'nisasike a'nogo re, ebe Yesùt wagaike atìat o. An nelu,” ìlùk pak hogo yogoisìkì lagaike. 6Atì'nogo yogoisikenem he, it en he,
“Weak ìkì lagen o,” ìlùk abok weak palhì lagaukwama re, at Paùlùt en he,
“An wene noba selek o,” ìlùk u hak, asu etakwe mene alolong hesalogo pelaksìkì logolìk he, mel yogoisasike:
“Hit hinokawerek en nong akegep halok he, hinoba lopok o. An noba lek o. Hùlì yogotak hùlì nen, an apùnì etakwe mene wene yogoisa legein o,” ìlùk yogoisasikesik he, 7it o atoma heraksalùk wùlìbìk he, ap etakwe mene Ala ane wanhike mene etage Tìtìùt Yùsìtùt atì aua lagaike. At aua atì re, o it apùnì Yahuri mene sapan ìkì lagaukwa ba era'luat wùrìk welagaike. 8Ap Kerìsìpùt, o apùnì Yahuri mene sapan ìkì lagaukwa ba atì kain esewerek welagaike mene ebe mel, againapùrì mel,
“Wene atì eberogoat,” ìlùk inetaùken ninoe Etagepogot oba hìpìrethesukwa. Hìpìrethesukwama re, it apùnì o kota Korìtùt mene aike inebe logolegat wene holìk he,
“Eberogoat,” ìlùk wanhì lagaukwama re, inom ima pelaginapukwa.
9-10Atì'nogo hagasukwama, ineki aike o hùako ninoe Etagepogot en Paùlùt abìkakan oba wene mel yogosike:
“Hayùk agùn. An setharek motogat welagì. O yoma an nagainapùrì inebe apigat were'ma re, apùnì aike nen weagathabuogolùk yì'nogo tì'nogo aike hagathabugun lek o. Halok he, kamo ìgì'lek wene yogoisikoat logoino,” ìlùk yogosike. 11Atì'nogo yogosike atì, satu tahun welagaikesik en, tùgì 6 aike inom Paùlùt ebe o atoma kamo ìlìk logolìk, Ala ane yakùlisiko welagaike.
12O propinsi Akaya atoma ap kain Kalìo gubemur logouagalùk menhesukwama were'ma, it apùnì Yahuri mene inebe atogothìlìk, Paùlùt ebe wasuogolùk hakhesukwasik he, anema wanuagalùk ap ùkùm inoba hìgìk, kotìk, egarek mene inoba wolok lagaukwa. 13Ebe wolok lìlìk, ùkùm oba hìkì logolìk he, mel isukwa:
“Ap yì nen he, wene Ala nen ninasuk wasike wene a'nogo heraksìlìk, Ala ebe nek hogoratì logolìk he, hùnogoat hagatì logouagalùk ina'la kagalì'logo mene wolok wago o,” ìlùk yogoisasukwa. 14Atì'nogo isukwama, at Paùlùt en wene oko igin ha'ma re, at Kalìo nen apùnì Yahuri mene yogoisìkì logolìk he,
“Hit apùnì Yahuri mene yì sanì. Ùrùm oba hegesip wolok wagep yì re, nit pemerintah Ùrùm mene ninane sagalogo hìlìk weak hùkoat hagatomo nen wolok we'lepma re,
Hanoat yogonesi wagep, ìlùk, hit en iko kolek nasuk holek logoile. 15Mene re, wene yì hit hinane hesik, inetage hesik, hit hagatesep mene hesik, oba hegesip wolok wagasipmo re, hit hinoba lopok en higirethousak o. Wene atìgìnìk mene, an nen higirethousak lek. Nabìt,” ìlùk yogoisasike. 16Atì'nogo yogoisasikesik he, o ùkùm inoba hìgìk, kotìk, egarek oba atoma nen mùk hogo wulaksasike. 17Wulaksikenem, it apùnì aike obogat en he, ap etage Sosetenet, o apùnì Yahuri mene sapan egarek oba esewerek kain welagaike mene atì, ebe hakhìlìk he, o ùkùm inoba hìgìk, kotìk, ìkì lagaukwa ba atoma ebe tùgì wasukwa. Atì'nogo wato kolegat he, at Kalìo a'nogo nen elele wanhì'lek obaken nen hìgìk kamo isike.
Paùlùt apotkwe o Atiokia lagaike wene
18At Paùlùt eki logolegat Ala againapùrì o kota Korìtùt mene inom atoma welagaukwasik en he, hobuk it o atoma hai warogo hisalùk, he Perisikila agùn Akwila eperak inomat wogisek he, imakwe so ba o Sìrìa lùogolùk isukwa. Isukwasik, o kota Kekerea lagaukwasik atoma logolìk,
“An Ala neperak hutik welago, ìlùk nesi uan-aban hùlì atì hùlì logouagalùk hebegein,” ìlùk herakhesikesik welagaike mene,
“Hùlì yì hùlì arat,” ìlùk heleleng hogo palhike. 19Esi atì'nogo palhikesik, o atoma nen o Epesùt lagaukwa. Lagaukwasik he, it Akwila Perisikila eperak atoma hisalùk he, o apùnì Yahuri mene sapan egarek oba kìlìk he, it Yahuri mene atoma welagaukwa mene, wene at en ina'la kagalogo yogoisikenem, it en oko yogotìk, it en at yogotenem, at en oko yogoisìgìk, ìkì lagaukwa. 20Atì'nogo ìkì lagaukwasik, it en he,
“Hat yoma heki logolegat ninom logopik en lanok o,” ìlùk hakhouogolùk isukwa meneat he, at en he,
“Nabìt,” isike. 21Atì'nogo isikesigat he, lagalùk ìkì logolìk, mel yogoisasike:
“Hit egep atì Ala nen hano ìlùk akiko halok he, an hobuk hinoba wesigin o,” ìlùk o Epesut atoma nen imakwe so ba o Kaisarea lagaike. 22O Kaisarea lagaikesik he, Ala againapùrì o Yerusalem mene hai warinabi lagaikesik he, hobuk apotkwe o Atiokia wagaike. 23O Atiokia wagaikesik welagaikesik en he, hobuk o propinsi Kalatia mel, Perigia mel, waga logolìk atoma it apùnì Yesùt ane wanhukwa mene inetaùken ago warisìlìk nìkì lagaike.
Apolot o Epesùt logolìk wene yogoisìkì lagaikesik, hobuk o Korìtùt wagaikesik hagatì lagaike wene
24Ap Yahuri mene aike etage Apolot. Ebe o Aleksataria nen ta'lagaike mene, o Epesùt wagaikesik welagaike. Ane yakoksek logolìk he, Ala ane helal waganek a'nogo elu motok welagaike. 25Were'ma re, it aike nen he, ninoe Etagepogot opolik lagaikarek wene atì yakùlesukwama wìlìk he, ima pelaginaparek wene atì, Yohanet en ima pelaginapì lagaike atì nek elu welagaike. Atì'nogo meneat he, Yesùt ane omamerogo yogoisìgìk, higit hogo yakùlisìgìk, ìkì lagaike. 26Yesùt ane wanhikesik he, o it apùnì Yahuri mene sapan ìkì lagaukwa ba kìlìk, ayù'lek logolìk, wene pak hogo yogoisìkì lagaike. Yogoisikenem he, it he Perisikila agùn Akwila eperak inasuk holhukwasik, ebe wolok inaua lìlìk he, Ala nen at opolik laga logouagalùk a'la akikerek wene atì tùkùm hogo yakùletì lagaukwa. 27Yakùletì lagaukwama re, o Akaya wesigìlùk isikomo, Ala againapùrì o Epesùt mene nen, wene helal waganogo it o Akaya mene Yesùt ane wanhukwa mene inoba lakhìkì logolìk, mel isukwa:
“Apolot hinoba waga atì hanorogo wanino,” ìlùk helal waganogo wogosukwama wolok lagaike. Lagaikesik he, it apùnì o Akaya mene Ala oabùt hano nen wene eberogoat akìlìk wanhukwa mene apigat leberisìkì lagaike. 28Leberisìkì logolìk, it Yahuri mene inom apùnì ineilhanem wene palhì logolìk he, at ane yakoksek atì nen, it inane mabenetsìlìk, at ane omame agaikesik he, Ala ane helal waganek a'nogo ba yogoisìkì logolìk he,
“Ala nen he, Karìsùt lakhei wesigin ìlùk wene wa'nisasike a'nogo, ebe Yesùt lakhei wagaike atìat o,” ìlùk pak hogo yogoisìkì lagaike.
Tans Gekies:
LAKSASIKE 18: LAIDNI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
