LAKSASIKE 11
11
Peterùt en Korenelìùt ima pelakhesike mene pìlìngìrogo apùnì Yerusalem mene yogoisa lagaike wene
1It apùnì aike nen he,
“It apùnì etakwe mene Ala ane wanha o,” ìlùk isukwama, it ap Yesùt en inebe weteberogo inayoko hìlìk laksasike mene amanogo mel, Ala againapùrì o Yurea atogotì lagaukwa mene aike mel, inasuk holhukwa. 2Atì'nogo holhukwasik were'ma nen, at Peterùt ebe hobuk Yerusalem pikenem he, it apùnì inogat inekalìma mene palek logolìk inetaùken Yesùt oba hìpìrethesukwa mene amanogo nen wenagasukwa. 3Wenagatì logolìk he,
“Hat hebe it apùnì inogat inekalìma mene pale'lek mene inoba lagatìk he, sùpùrùk hinom omakìma nìkì lagasip wagen atì nahalok,” ìlùk wenagasukwa. 4Atì'nogo wenagasukwama, at Peterùt en wene ero ba nenat pìlìngìrogo mel yogoisasike:
5“An o Yope atoma sapan ìkì logolìk he, nabìkakan oba mel hìgì. Su kain hake hùko okut 4 en karek mene hele kelogo pogot oba nen nera'lu pelakhei waganam nabìkakan hìkì logolìk neileken hìgì. 6Atì'nogo hìgìrìk, neileken lùrogo kelakhìgì hake, su atì a'la yì wam tì wam, yì paik tì paik, yì walo tì walo, kweangma welagarek mene atì mel, nen yì rùe tì rùe pogot obakwe purogo nikerek mene atì mel, kalek were'ma neileken hìgì. 7Atì'nogo hikenem, at Ala nen, sa ane heat yogonetì logolìk he,
Peterùt. Hebe melarìk he, aroma warogo nan o, ìlùk yogonete. 8Atì'nogo yogonete meneat he, an nen he,
Lek o. Noe. Wesa mene mel, yùgale'lek mene mel, hamùlùk halok an napema aike kelapìrek motok lek o, ìlùk yogotì. 9Atì'nogo yogotì meneat he, at ane a'nogo hobuk pogot oba nen mel yogonete:
Ala nen, Hano, nasak, ìlùk ike mene halok, hat en,
Wesa, nasak lek, ìlùk ha'la akagùn o, ìlùk yogonete.
10Atì'nogo eki pìre ba yogonetesik, aike yogone'lùk he, hobuk yì mene tì mene atì obogat pogot oba nen lisogo wanhomo hek hogo lagaike. 11Atì sat, ap inebe hìnagan o Kaisarea nen laksa wagaikama, o an ap pok were'ma wagaika. 12Wagaikama re, Ala Areagùn nen an mel yogonete:
Ninom lasak mea, ìlùk ha'la wanesùgì ebetì'legat, hinom lano o, ìlùk yogonete. Atì'nogo yogonetomo re, it Ala againapùrì o Yope mene inebe 6 en wagaikasik yoma werek yì ninomat o Kaisarea lago. Lagoaik, nit obogat ap Korenelìùt aua kogo. 13Kogoma, at Korenelìùt en he,
An ya were'ma nen he, malaikat Ala nen yoko pelaksa wagarek mene amanogo aike ouma yoma pi wagasik metek were'ma neileken hìgì. At yoma metek logolìk ho, wene mel yogonete:
Ap aike etage alep mono Simon. Nen, hobuk mono Peterùt, o Yope atoma werek a'naga yoma wesuagalùk, ap aike at ayoko laksano o. 14At en hat hebe mel, hoe hagot mel, hagainapùrì mel, Ala nen telhinabuagalùk, wene yogohisegein mene werek o, ìlùk yogonete, ìlùk ike. 15Ikomo re, an wene yogoisagalùk ero ba oan iko were'ma, Ala Areagùn emakum nit ninoba pi wagaike atì hak, it hobuk inoba pi waga atì. 16Inoba pi wagama re, ninoe Etagepogot en wene mel ìlùk isike mene na'la ebeti:
Yohanet en ima pelakhinape meneat he, Ala nen Areagùn hinoba pelakhei wesigin o, ìlùk isike mene atì oba ebeti. 17Ninetaùken ninoe Etagepogot Yesùt Karìsùt oba hìpìrethikenem, Areagùn it lek, nit lek, ninom higit hogoat wo'nisikerek atì. Halok he, Ala nenat atì'nogo wo'nisikenem, an nen he,
It wogisike hùk, ìlùk wene palusak nogo? Mea o,” ìlùk yogoisasike.
18At Peterùt en atì'nogo yogoisasikomo, it en wenagatì lagaukwa a'nogo re, hobuk kamo ìlìk mel isukwa:
“Halok he, Ala oabùt hano nen, nit haga'ninaperek hagat, it apùnì etakwe mene inoabùt hebelaganem ineluk motok logouagalùk elok hagarinabusagat hìgì,” ìlùk Ala hogorasukwa.
Ala againapùrì o Atiokia nen hagatì lagaukwa wene
19At Sitepanùt a'nogo ebe wasukwasik he, Ala againapùrì yì aik tì aik hagarinapì logolìk, sigisek-mugusek hagatì lagaukwama, pùgùlogo o propinsi Penisia mel, Siperùt mel, kota Atiokia mel, wagaukwasik, wene it apùnì Yahuri mene nek yogoisìkì lagaukwa. 20It atì'nogo hagatì lagaukwa meneat he, it aike inom pùgùlhukwa mene inaua re, o Siperùt mene mel, o Kirene mene mel, o kota Atiokia wagaukwasik, wene hano wene ninoe Etagepogot Yesùt hagasike wene atì, it apùnì inùkùl etage Yunani mene yogoisasukwaat. 21Atì'nogo yogoisikenem, ninoe Etagepogot inomat logolìk, omamerogo leberisikenem he, apùnì inebe logolegat en,
“Wene atì eberogoat hìgì,” ìlùk wanìk he, inoabùt hebelarìk, inelokwe at wogosukwa. 22Atì'nogo hagasukwama, it apùnì aike nen he,
“It Yesùt ane wanhasik, inoabùt hebelha o,” ìlùk inabok ìkì lagaukwama re, it Ala againapùrì, o Yerusalem atogotì lagaukwa mene amanogo inasuk holhukwasik he, at Parenapat ayoko hìlìk, ebe o Atiokia lakhei wagaukwa. 23-24At Parenapat atì, oabùt hano logolìk, etaùken Yesùt oba hìpìrìk motok were'ma re, Ala Areagùn a'la peserek welagaike atì nen, lakhei wagaukwama, wagaikesik eileken isìlìk, a'la nen he,
“Ala oabùt hano nen hano hagarinapomo werek hìgì,” ìlùk a'la hai hakasike. A'la hai hakìlìk he,
“Hit obogat hinetaùken ninoe Etagepogot oba hìpìrethìlìk, at hinom hutigat motok logoino o,” ìlùk inasuk wasike. Inasuk watì lagaikomo, apùnì logolegat, ninoe Etagepogot werekwe lapuk ìlìk inebe seik-peik ìkì lagaukwa.
25Atì'nogo haga'laga kolek he, at Parenapat hobuk at Saùlùt ebe herarìk, o Tarasùt wagaike. 26Wagaikesik, ebe eperak apì agaukwasik he, wolok o Atiokia lagaike. O atoma lagaikesik, o mo lagagìk pìgìk iko kolek, 1 tahun logolìk he, Ala againapùrì inom atogothìlìk, apùnì apigat wene yakùlisìkì lagaukwa. It apùnì Yesùt ane wanhenem inùkùl etage Kerisiten agarek atì re, emakum o Atiokia atoma nen salhukwa.
27Atì sat he, it ap Ala ane yogoisìkì lagaukwa mene aike o Yerusalem en o Atiokia lagai wagaukwa. 28It wagaukwa atì mene, ap aike etage Agabùt atì, Ala Areagùn nen a'la kagalhikomo, melagaikesik mel yogoisasike:
“O yì awì tì awì obogat sùpùrùk no apigat hogoin o,” ìlùk yogoisasike. Yogoisasike atì, ebe ap etage Kelarìùt ebe kain logolìk hagisek were'ma haga'lagaike atì.
29Atì sùpùrùk no ebe oan haga'lagì'lek werek kolek he, it apùnì Yesùt ane wanhukwa mene amanogo nen he,
“Halok he, nit ninebe lopok uang ninekimo aga mene higit hogo ninerùgì ninagaiya'lak o propinsi Yurea atoma atogotarek mene leberisùok en atogorogo lakhouok o,” ìlùk wene palhukwasik uang atogosukwa. 30Atì'nogo atogosukwasik he, Parenapat Saùlùt eperak en, inekim wolok lìlìk, it ap Ala againapùrì serisek welagaukwa mene ineki ba hei loagalùk laksasukwa atì.
Tans Gekies:
LAKSASIKE 11: LAIDNI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
