MATIUS 8
8
Yesus ḇyuk pararei faro snonkaku ḇeduf pado oso
8:1-4
(Mrk. 1:40-45; Luk. 5:12-16)
1Yesus isabu kwar ro urek ya, snonkaku sibor semarani ḇo siso I. 2Ro fafisu ani snon ḇeduf pado oso ryama kyunem ma ḇyansuba faro Yesus, ro ḇarpon ḇyedi ma ikofen: “Tuan, rofyor Tuan wamarisen, Tuan wapok fasren aya.”
3Inja Yesus pyan ro snon ani ḇo Ikofen: “Yamarisen fa waprei.” Ro fafisuya beri snon ani isren ro dafduf pado ani. 4#Im. 14:1-32 Raimnai Yesus ikofen faro i: “Waswarepen, wakofen ḇadir awer pararei bedine faro snonkaku oso, ḇoi rwafa fasnai mankundaw faro imam ma buk farsarser, raris Moses ḇyuk sasoser kwar faro si.”
Yesus ḇyuk pararei faro mananir sarar manfyan ḇyedi ro Kapernaum
8:5-13
(Luk. 7:1-10; Yoh. 4:46-53)
5Fafisu Yesus syun ro Kapernaum mananir sarar oso ryama faro I mo ikofen, ḇo doḇo: 6“Tuan, manfyan ayedi ḇyarek ro rum ma iduf dafduf papipen ma iduf fafaya ḇa.”
7Yesus ikofen faro i: “Woḇo Yarafa Yaḇuk pararei faroike?”
8Ḇape mananir sarar ani kyarem faro Yesus, ḇo doḇo: “Tuan, yasyusḇa fa yor Au ḇe rum ayedi, mḇoi Wakofen wos oser monda, nari manfyan ayedi iprei. 9Snar mankundaya yaso sasoser ro mananir ayedi, ma ro baḇ ayedi sordade sisya. Rofyor yakofen faro sordade yesi oso: Rwa!, nari rya, ma faro oso wer: Rwama!, nari ryama, roḇa wer faro manfamyan yesi oso: Wafrur roi ine!, nari ifrur roi ani.”
10Rofyor Yesus imnaf kwar rarirya, I kandor ma Ikofen faro kawasa ḇeso Insya: “Yakofen faro mko, kaku ḇeri kakyar ḇeba ḇera dine Yasma ḇaim ro fandu snonkaku oser ro fandu kawasa Israel si. 11#Im. 13:29 Yakofen faro mko: Kawasa sibor nari srama ker Wamurem ma Wamḇarek fa skain sanan kam kuker Abraham, Ishak ma Yakub ro Ḇaḇesasoser Boiyaswa, 12#Mat. 22:13, 25:30; Luk. 13:28 ḇoi romawa-romawa Ḇaḇesasoser ansi kada nari sisawen si ro moḇ ḇepapan-ḇepampan bos kaku, ro moḇ ḇeser kankanes ma arkfafais nakor.” 13Raimnai Yesus ikofen faro mananir sarar ani: “Waburmura ma nari wasma raris kakyar bedi.” Ma ro fafisu ani beri manfyan ḇyani i prei.
Yesus ḇyuk pararei faro Petrus imbanyori ma ḇeduf ḇese ono
8:14-17
(Mrk. 1:29-34; Luk. 4:38-41)
14Skorama ro Petrus rum ḇyedi, Yesus myam Petrus imbanyori ḇyarek snar ḇyis. 15Yesus duf bin ani ḇrasi, ma bis ani iburi beri. Ikḇok beri ma duf farmyan I.
16Ro mandira ya ssun faro Yesus snonkaku ḇeḇor rur ḇemaḇak siswoḇer sya ma kuker wos oser monda Yesus iyaw rur-rur ansi ma ḇyuk pararei faro snonkaku ḇeduf si. 17#Yes. 53:4 Roi ḇeḇesya nane ndarirya insa Nabi Yesaya wos ikofen fa ḇekur moḇ ine ya imnis, doḇo: “Iso ḇeḇar papokḇa koḇena ma ḇekamar dafduf koḇena.”
Koso Yesus
8:18-22
(Luk. 9:57-60)
18Ro fafisu Yesus myam kawasa ḇeḇor sores yaryar I, Iwan fa manfamyan ḇyesi skaḇor ḇe danosen ya ḇar iwara. 19Raimnai snon ḇefawinananem Refo Yahudi oso ryama ma ikofen faro Yesus, ḇo doḇo: “Guru, yamarisen yaso Au, ḇe moḇ sai rwayoḇ na.”
20Yesus ikofen faro i: “Randip arḇur ya isma niw ma man sya sisma narem, ḇape Rumkun Snonkaku daksma moḇ fa Denef ro ḇa.” 21Snonkaku oso ḇese, isoine oso ro manfamyan ḇyesi, ikofen faro Yesus, ḇo doḇo: “Manseren, buk fa yara resari fa yakrir mami.”
22Ḇape Yesus ikofen faro i: “Waso Aya ma snonkaku ḇemar sya iḇye sikrir snonkaku ḇemar sesi.”
Yesus ḇyuk ḇarandin ro wam doḇer
8:23-27
(Mrk. 4:35-41; Luk. 8:22-25)
23Raimnai Yesus dek ro wai ya ma manfamyan ḇyesi siso I. 24Kniko monda wam doḇer ḇeba myun ro danosen ani, isof bak na nbaser wai ani, ḇape Yesus denef. 25Inja manfamyan ḇyesi oso ryama ḇyan I, ḇo doḇo: “Manseren, wafnoḇek, koine koro.”
26Ikofen faro si: “Snaro mkomkak, mkokyar mankunba?” Raimnai Yesus iyori, ma Imsor wam ma bak anna, ma danosen ani iḇrin bos beri.
27Ma snonkaku ansi sikandor, ḇo sikofen: “Snon rosaisoine, indiriso wam ma ḇakna neuser sasoser ḇyedi?”
Yesus ḇyuk pararei faro snon birisya iswoḇersuya
8:28-34
(Mrk. 5:1-20; Luk. 8:26-39)
28Sko fyafer kwar ro ḇarya, isoine ro sup ya fyor kawasa Gadara, snonkaku biris iswoḇer suya surama ker rusna, fa su srow Yesus. Suḇarḇor bos beri, isof snonkaku ono sipok sunuk nyan ani ḇa. 29Ma snon ansui suyar naba, suyoḇo: “Rosai waḇe wafrur ḇe nko, ne, Rumkun Allah? Inja rwama kwar ya isoineke fa buk kandera faro nko ḇepon ro fafisu ya ḇaim?”
30Mḇoi ḇyinkwan knikrosi randip naiḇeba ono simbran sanan. 31Inja Ibiris ansi sor faro Yesus, soḇo: “Rofyor wayaw nko, iḇye wawan nko fa nkosun ro randip nai siwa.” 32Yesus ikofen faro si: “Mkora!” Inja sisasyar ma ssun ro randip nai ansi. Rarirya randip nai ḇesiper ansi soper kam ro fofen ya ḇe danose ya dori ma simsar kam.
33Inja ḇewaren randip ansi sifrar ḇe mnu ya ma sfawar roi ḇeḇor nakam ro snonkaku Ibiris iswoḇer ansu ya. 34Inja kawasa ro mnu ansya kam sisasyar fa sra sisrow Yesus, ma sisrow Yesus kwar, sikam sordafdifer I insa Ibur sup sedi.
Tans Gekies:
MATIUS 8: LAIBHW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
